1 အုဝ် ဒီ အိူပ် ဂုင် ဂေဇူ ဇဝ်ဖြာ ဆေဆေ။ ဂြုဝ်း အီ အိူပ် ဇဝ်ဖြာ၊ အုဝ် တူ ဆီ တဲး န့ ကာဒတ် ဒေါ မှဝ်။

2 ခဲင် နဝ်း ခဲင် ဖွိုမ် အုဝ်၊ န့ ဒီ လေး ဂြုဝ်း အီ ခိုက်ခမ် လွင် ဇဝ်ဖြာ။ ဂေ ဒူအီ အီ ကာဒုး ဒုက် ဟီ ယိုဝ်၊ တဲး ဂေ ဝီ ခူယ်။

3 တဲး ဘော ဘေ ကာဖြူမ် ဒီ အိူပ် ဇဝ်ဖြာ ဒူပ် အုဝ်။ တဲး အေ ဘောကာဂ့လျီတ် အိူပ် မျုက် အန် ဇဝ်။

4 ဒေါ ဆာခိုဝ် အုဝ် ဒီ အန် ဇဝ်၊ အန် ဇဝ် ဘော ထူမ် ဂြုဝ်း အုဝ်။ အန် ဘော စွယ် ကွဲ့ တဲး အုဝ် ယုဝ် မာဆေ။

5 တဲး ဘေ ဘိုင် အန် ဇဝ်၊ တဲး ဘေ အေဝ်၊ ကွဲ့ တဲး ဘေ လုဝ် ဆာယ် အီ ဟဝ် ဒေါ မှဝ်။

6 အုဝ် အီ ဟဲ့ ခမ် ဒုက် ဘဲန် မျုဝ် ဘဲန် မျုဝ်၊ အုဝ် ဟဲ့ ဒဲ့ ဇဝ်ဖြာ၊ အန် ဇဝ် ဘော ယဝ်း ဂြုဝ်း အုဝ်။ အန် ဇဝ် ဘော ချွတ် အုဝ်၊ တဲး အုဝ် လေး ခဲင် ဒုက် ခဲင် ညှာပ် ဒွန် မျုဝ်။

7 န့ မုး အာမူ အာမာတ် ဇဝ်ဖြာ အီ ကွယ် ရူပ် ဂေ ဒူအီ အီ ရုဝ်ဆေ ဇဝ်ဖြာ။ ဂေ ဘော စွယ် တဲး ဒူအီ တီ ပွိုန် ဒီ လွတ် အာဖေ အာရေ ဒွန် မျုဝ်။

8 တဲး ဘေ တး၊ တဲး ဘေ ထေဝ် ဒီ ဘိုင် ဇဝ်ဖြာ၊ တဲး ဘေ နပ် ရာင် ဘေ ခဲ့ မွှိုမ် ဇဝ်ဖြာ။ အာဆေ ဘိုင် ဇဝ်ဖြာ၊ အန် ဒီ ဘျုဝ် ဒါခိုယ်။

9 ဘေ အီ ညှိုမ် ဇဝ်ဖြာ၊ တဲး ဘေ ရုဝ်ဆေ ဇဝ်ဖြာ။ အာဆေ ရုဝ်ဆေ ဇဝ်ဖြာ၊ အန် ဒီ မိုဝ်း ခဲ့ ပီ လုဝ် အန်။

10 မာခြင်ဆီ နှိုမ် ဆီ ဘော အေတ့် ပီ ဒီ ဟူမ်။ အာဆေ ယီ ဘိုင် ဇဝ်ဖြာ၊ အန် တူ အေတ့် အီ ဘွတ် အီ မွှိုမ်။

11 အိုယ် ဘေ ဂွန်၊ တဲး ဘေ တး ထူမ် ဂြုဝ်း အုဝ်။ အုဝ် ဒီ မာနုဝ် တဲး ဘေ နပ် ဒီ ရုဝ်ဆေ ဇဝ်ဖြာ။

12 အာဆေ ဆီ ပွိုန် အာဆာက် တူင့်၊ အန် ဒီ ဘော နှဝ့် န့ဒဝ့် ဒွန် မှိုဝ် ဒွန် ညှာ၊ တဲး အန် ပွိုန် နာ ဘွတ် နာ မွှိုမ်။

13 အန် လုဝ် ဆာဒိက်၊ ကွဲ့ တဲး ဂြုဝ်း တူ မွှိုမ် လေး ခဲင် မူတ့် အန်၊ ကွဲ့ တဲး အန် ကာလာင် ဂြုဝ်း တူ မှာန်။

14 တဲး ဘေ ဝဲန် အီ တူ မွှိုမ်၊ ဝီ ဘူင် အီ မွှိုမ်။ တဲး ဘေ ကွယ် ဆီချာ ဘော ဂျုဝ်ဂျာ ဒီ ကာလဝ့် ဒီ အီ ဟဝ်။

15 ဇဝ်ဖြာ ဘော ယွတ် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်။ အန် ဒီ ဘော ထူမ် ပီ ယာမ် ပီ ဒတ် ဂေ။

16 ဇဝ်ဖြာ ဒီ ဘူင် ကာဘး ဒီ ဂေ အီ ဘူင် မိူက်။ အန် တူ တဲး အီ နမ်လှုဝ်း ဂေ ဒဲင် ကာဒါယ် နီ။

17 ဇဝ်ဖြာ ဘော ထူမ် ဂြုဝ်း ပီ ဆာခိုဝ် ဂေ ဒူအီ နဝ်း ဆိူဝ် နဝ်း မှာန်။ အန် ဘော စွယ် တဲး ဂေ လေး တ ဒုက် ဒွန် မျုဝ်။

18 ဇဝ်ဖြာ ဘော ကွယ် ကာတတ် ဂေ အီ မိုဝ်း နဝ်း လိုဝ်။ အန် ဇဝ် ဘော စွယ် ဂေ အီ ဒုက် အီ တူ မိုဝ်း ပီ နှဝ့် န့ဒဝ့် မာဆေ။

19 ဒူအီ အီ ဘူင် နာ မှာန် နာ မွှိုမ်၊ အန် ကာဒုး ဒုက် ဘဲန် မျုဝ် ဘဲန် မျုဝ်။ ဇဝ်ဖြာ ယီ ဒီ စွယ် အန်၊ တဲး အန် လေး တ ဒုက် ဇိုဝ် တီ ဒွန် မျုဝ်။

20 ဇဝ်ဖြာ ဒီ ယွတ် လိုမ်လာ အန်၊ ကွဲ့ တဲး ကာအာင် အန် ကာဘက် ခေါ အူ ညွင့်။

21 ဂေ ဒူအီ မိူက်၊ ဂေ ဒီ ယမ် ဒီ မျုဝ် တူ မွှိုမ်။ အာဆေ ဇွင့် ဒူအီ နဝ်း ဆိူဝ် နဝ်း မှာန်၊ အန် ဒီ လုဝ် ခမ် မှာပ် အန်။

22 ဇဝ်ဖြာ ဘော ထုတ် လေး ဒဲစေန့် အန် ဒွန် အီ။ အာဆေ ဘိုင် ဇဝ်ဖြာ အာဝ် ဟူ လုဝ် ခမ် မှာပ် အန်။