1 အိုယ် ဘေ ဒူအီ အီ မိုဝ်း နဝ်း ဆိူဝ်၊ တဲး ဘေ တဝ်း မှုဝ် ဒါခိုယ် ဘော အိူပ် ဇဝ်ဖြာ။ ဘေ အီ ဘူင် နာ မှာန် နာ မွှိုမ်၊ န့ ကာအာပ် ဘေ အိူပ် ဇဝ်ဖြာ။

2 တဲး ဘေ ဘး ဒိင်၊ တဝ်း မှုဝ်၊ အိူပ် ဇဝ်ဖြာ။ တဲး ဘေ ဘး ဘော ဒိင် အီ မိုဝ်း ဝန် ဂိုဝ် ညွင့်။

3 တဲး ဘေ တဝ်း မှုဝ် ကာမာယ် အီ အိူပ် အန် ဇဝ်။ တဲး ဘေ ဘး ဘော ဒိင် အီ ဟမ် ဒါခိုယ် ဘော တဝ်း မှုဝ် တာင် တာင်။

4 ခုဝ်၊ ဂြုဝ်း ဇဝ်ဖြာ ဟဲ့ မှာန် အာခါခ်ု။ လွင် ပဲ့ ဟဲ့ ဘူင် အန် ဒွန် မျုဝ်၊ န့ ဘော ဟဲ့ မှာန်။

5 အန် ဇဝ် ဘော အိုင် ဒီ ဘူင် နာ ဆိူဝ် နာ မှာန်။ ဒွန် နာ ဒွန် ပ့လုဝ့် န့ ဘော လိုဝ်း ဆီချာ ခဲ့ ရွက့် ဇဝ်ဖြာ ဒူအီ ဆေဆေ။

6 ကူပ် ကာလာင် ဇဝ်ဖြာ၊ န့ မိုဝ်း ဂါင်ဟြာဝ်။ ဘော အီ ကွယ် ခဲင် ဂါင်ဟြာဝ် ဒွန် မျုဝ်၊ န့ ကွယ် ကူပ် ဟဲ့ ကာလာင် ဇဝ်ဖြာ။

7 ဇဝ်ဖြာ ဘော တဲး အိုမ် နမ်မုက်ဆာရာ ကာဇု အူ ပ့လုဝ့်၊ တဲး န့ ပီ အန် ဟပ် အိုမ် ခဲင် ကာပဝ်။ အန် ဘော ကာဘိတ် အိုမ် အီ ကွယ် ဒူင် လိုက် ကာဆဝ်၊ တဲး န့ ပီ အန် အုန် ခဲင် အိုမ် ခိုမ်။

8 ခဲ့ ကွယ် ဒူအီ ဒွန် မျုဝ် ဒဲင် ကာဒါယ် နီ၊ တဲး ဘေ ရုဝ်ဆေ ဇဝ်ဖြာ။ တဲး ဂေ ဘောကာဂ့လျီတ် ဘော အာမ် ဘော ယုဝ် အန်။

9 ခုဝ်၊ ခဲ့ တဝ်း ဇဝ်ဖြာ၊ န့ မိူဝ် ဟဲ့ ဘဲန်။ ခဲ့ စ်ု အန်၊ န့ မိူဝ် ဟဲ့ မိုဝ်း။

10 ဇဝ်ဖြာ ဘော ဝဲန် အာကျာမ် အာငျာန် ပီ တဝ်း ဒူအီ အာမျုဝ် ဟဝ် ဒီ ဘူင်။ အန် ဘော ပျာတ့် ဝဲန် ပီ ခြာမ် ဂေ။

11 အာကျာမ် အာငျာန် ဇဝ်ဖြာ ယီ တူ ပွိုန် ဝဲန် ဒေါ မှဝ်။ ပီ ကာဖာ ဇဝ်ဖြာ ခဲင် နဝ်း အန်၊ န့ ဒီ ဘဲန် ဒေါ မုး စုဝ် လှုက်လှာန် အေ ဒွန် စုဝ်။

12 ဂေ ဒူအီ ပဲ့ ဟဲ့ ရဝ်း ဇဝ်ဖြာ၊ ဂေ ဒီ ဘျုဝ် ဒါခိုယ်။ ဂေ ပီ ကြုဝ် အီ မုး ခါဂုန် အန်။

13 ဇဝ်ဖြာ ကွယ် ခဲင် ဂါင်ဟြာဝ် ယွတ် လူင်။ အန် ဘော ယိုဝ် ဒူအီ ဘောကာဂ့လျီတ်။

14 အန် ကွယ် ဒဲင် မာလာင် အန် ဘော ယွတ်၊ ဘော ယိုဝ် တူတ့် ဒဲင် ကာဒါယ် နီ။

15 ဇဝ်ဖြာ အီ ဒွါ နဝ်း ဖွိုမ် ဒီ အေ ဒွန် အီ၊ အန် ဇဝ် နပ် ဘော ပီ ဘူင် အေ ဘောကာဂ့လျီတ်။

16 ဒါ ဆိုက် ပီ ဘော ကိူန် ခဲ့ မှဝ်၊ ဂေ ယီ တူ ပွိုန် ချွတ် ခုန်ဒီခမ်။ ဒါ ဆိုက် ပီ ဘော မိုဝ်း ပ့လူမ် ဂေ ဟဲန့် ကိူန် ကာဆဝ်၊ န့ ယီ တူ တဲး ဂေ လွတ် ယမ်။

17 ဒါ ဆိုက် အီ ဘိုင် မင်ပြွင့်၊ အာဝ် မိုဝ်း ဒီခုဝ်။ ပ့လူမ် မင်ပြွင့် အာဝ် ပဲ ဒီ ချွတ် ဂေ။

18 န့ ယီ မုး ဇဝ်ဖြာ၊ အန် ယွတ် ဂေ အီ ရုဝ်ဆေ အန်။ အန် စွယ် ဂေ အီ လှုဝ်း ဂုင် ဂေဇူ အန်။

19 ဇဝ်ဖြာ တူ တဲး ဂေ ဇမ် ဒုက် တာင် ကာဆဝ်။ ဒေါ ဇမ် အာခြာဝ် အေတ့် ပီ ဒီ ဟူမ်၊ အန် ဇဝ် တူ တဲး အာဆာက် ဂေ စှိုမ်။

20 ခုဝ်၊ တဲး အေ နှဝ့် န့ဒဝ့် ဇဝ်ဖြာ။ အန် ဇဝ် အီ စွယ် အေ။ အန် ပီ မင် ဂွင့် အီ ရဲ ဒုဝ် အေ။

21 အေ ညှိုမ် ဘိုင် အန် ဇဝ် အီ ဘွတ် ကာဆဝ်။ ခုဝ်၊ နဝ်း အေ ဒါခိုယ် ဘော အိူပ် ဇဝ်ဖြာ။

22 အိုယ် မဲ ဇဝ်ဖြာ၊ တဲး မဲ ရွက့် ကာဝေ ယေ ဆေဆေ။ တဲး န့ ကာဒါန် ခဲ့ ပီ ဘိုင် ယေ ဒီ မဲ။