1 ဆေ ဇဝ်ဖြာ ဟဲ့ ဂဝ်း ဝဲန် မှာပ် ဒူအီ ဝီ မှဝ်၊ ဒူအီ တီ ဒီ မိုဝ်း နဝ်း ဒါခိုယ် ကူပ် ဟဲ့ ဟွတ့် ဟြာယ် မှာပ် အန် တီ။

2 ဆေ ဇဝ်ဖြာ တဝ်း လွင် ဒူအီ အူ ဝီ၊ အန် တူ မိုဝ်း မှာပ်၊ ဆေ ဒူအီ တီ ဘော မိုဝ်း နဝ်း ဆိူဝ်၊ နဝ်း တူ ကာလုဝ်၊ အန် ဒီ ဘျုဝ် ဒါခိုယ်။

3 ဒေါ တူ ကာလာင် အုဝ် မှာပ် ပဲ့ ဟဲ့ ဘူင် အုဝ်၊ အုဝ် က့လိုဝ် ဘော ယာမ် ဒွင် ဝန် ဒွင် ခိူန်။ အုဝ် ဟဲ့ ဒီလှး န့စမ် ဘော ဒုဝ်။

4 မဲ ဇဝ်ဖြာ ဟဲ့ တဲး အုဝ် လှုဝ်း မှာပ် အုဝ် ဒွင် ဝန် ဒွင် ခိူန်၊ တဲး န့ ဒုက် ဒီ နဝ်း အုဝ်။ အုဝ် ဒီလှး ပီ လှာ ဟေ ဒီလှး ဒေါ ဟဲ့ ဆောဒါတ် ကာဆဝ်။

5 ဝါယ် အန် တီ အုဝ် ဘော ကာလာင် မှာပ် အုဝ် ဒီ မဲ ဇဝ်ဖြာ။ အုဝ် မိူဝ် တူ ချြီင် မှာပ် အုဝ်။ အုဝ် တဝ်း၊ “အုဝ် ကာလာင် တူတ့် မှာပ် အုဝ် ဒီ ဇဝ်ဖြာ။” ဟဲ့ ဟွတ့်၊ မဲ ဇဝ်ဖြာ ဟဲ့ ဂဝ်း ဝဲန် မှာပ် ပဲ့ ဟဲ့ ဘူင် အုဝ် တီ။

6 ခုဝ်၊ ဂေ အီ ရွက့် မဲ ဇဝ်၊ တဲး ဂေ ဒွန် အီ ဆာခိုဝ်၊ မှာန့် ဒီ မဲ ဇဝ် ဒေါ ဇမ် ဂေ ဒုက်။ ဆေ န့ ဘော မိုဝ်း ဒုက် အီ ပီ အိုမ် တာင် အီ တး အူ ဇေန့်၊ န့ ယီ တူ တး ဇမ် ဂေ။

7 အုဝ် ဘော ဘိုင် မဲ ဇဝ်။ မဲ ဇဝ် ဒီ စွယ် ရဲ အီ တူ မွှိုမ် ဒီ အုဝ်။ မဲ ဇဝ် ဒီ ချွတ် အုဝ်။ ခုဝ် အန် တီ ဂေ အီ ကွယ် ဒူပ် အုဝ်၊ ဂေ တဝ်း မှုဝ် လွင် မဲ ဟဲ့ ချွတ် အုဝ်။

8 ဇဝ်ဖြာ ဘော တဝ်း၊ အုဝ် ဒီ ယဲတ့် မဲ ဘော မာနုဝ် မဲ၊ တဲး မဲ နပ် န့တေန့် အီ ကာအာပ် ဟာဝ်။ အုဝ် ဒီ ယွတ် မဲ၊ ကွဲ့ တဲး မဲ ကာလိုပ်။

9 ကွဲ့ တဲး မဲ ဒိူဝ် ပီ မင်ပြွင့် ဂေ မာလုဝ်၊ အီ တူ မိုဝ်း အာငျာန်။ ဆေ ဒါ ကာညာ အန် တူ ဟပ် ကဝ့် ဂေ ဝန် တိုန့် အန်၊ အန် မိူဝ် တူ ဟာဝ် ဒူပ် ဒါ ကာညာ အန်။

10 ဂေ အီ တူ မွှိုမ်၊ ဂေ ဒီ ဇမ် ဒုက် ဘဲန် မျုဝ် ဘဲန် မျုဝ်။ ဆေ အီ ယီ ဘိုင် ဆီချာ ဇဝ်ဖြာ၊ ဇဝ်ဖြာ ဒီ ရွက့် ကာဝေ ဂေ ဆေဆေ။

11 အိုယ် ဘေ ဒူအီ အီ မိုဝ်း နဝ်း ဆိူဝ်၊ တဲး ဘေ ဘျုဝ် ဒါခိုယ်၊ အိူပ် ဇဝ်ဖြာ။ ဘေ အီ မိုဝ်း နဝ်း မွှိုမ်၊ တဲး ဘေ တဝ်း မှုဝ် ဒါခိုယ် ကူပ် ပဲ့ ဟဲ့ ဘူင် ဇဝ်ဖြာ ဒီ ဘေ။