1 အိုယ် မဲ ဇဝ်ဖြာ၊ အုဝ် ဘိုင် မဲ ဇဝ်။ အုဝ် မှာန့်၊ ကွဲ့ တဲး အုဝ် လုဝ် ဆာယ် အီ ဒေါ မှဝ်။ ကူပ် မိုဝ်း မဲ ဇဝ် နဝ်း မှာန် နဝ်း မွှိုမ် ဆေဆေ၊ အုဝ် မှာန့်၊ တဲး မဲ ဇဝ် ချွတ် အုဝ်။

2 တဲး မဲ ဇဝ် ထူမ် ဂြုဝ်း အုဝ် ဘော စွယ် တဲး အုဝ် လွတ် ခြန် ခြန်။ တဲး မဲ ဇဝ် ဘဲန် ပီ ဒါအာင် မာဝ် အီ မုး ဒူင် ဘိုင် အုဝ်။ တဲး မဲ ဇဝ် ချွတ် အုဝ်၊ တဲး မဲ ဘော ပီ ဒူင် ပွိုန် အုဝ် ဒီ ချြီင် ဆီချာ။

3 မဲ ဇဝ်ဖြာ၊ မဲ ဟဲ့ ပီ ဒါအာင် မာဝ် ဘော ဒူင် ပွိုန် အုဝ် ဒီ ဘိုင် ဒီ ချြီင်။ ကူပ် မိုဝ်း မဲ ဇဝ် ပွုန် တာင်၊ တဲး မဲ ဘော အိုပ် ဘော ယဲတ့် အုဝ်။

4 ကူပ် ဘိုင် အုဝ် ဒီ မဲ၊ တဲး မဲ ဇဝ် ဒိုဝ်း လေး အုဝ် ခဲင် ယွတ့် ပီ ဒိန့် အုန် အီ ဒီ အုဝ်။

5 အုဝ် ဒီ အာပ် နဝ်း ဖွိုမ် အုဝ် ဒီ မဲ၊ တဲး မဲ ဇဝ် ယွတ် မဲန်။ မဲ ဇဝ်ဖြာ မုး ဇဝ်ဖြာ အီ ဘူင် နာ မုး နာ မှာန်၊ မဲ ဒီ ဘော ချွတ် အုဝ်။

6 မဲ ဇဝ်ဖြာ၊ မဲ ဇွင့် ဂေ အီ ကြိုပ် အာရိုပ်၊ တဝ်း န့ မုး ဇဝ်ဖြာ။ အုဝ် ယီ ဘိုင် မဲ ဇဝ်ဖြာ။

7 အုဝ် ဒီ ဘော ခူယ် ကာဆဝ် ကူပ် ရွက့် ကာဝေ မဲ ဇဝ် ဒီ အုဝ်။ မဲ ဇဝ် ဟဲ့ ယိုဝ် တူတ့် အီ ဒုက် အီ ညှာပ် ဒီ နဝ်း အုဝ်။

8 မဲ ယီ တူ အာပ် အုဝ် ဒီ ရန်ဆူ အုဝ်။ မဲ ဇဝ် ဘော ယဲတ့် အုဝ် ဟာဝ် ဒူင် ကာဝဝ်း၊ ဒူင် ဆီချာ။

9 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ကာဝေ အုဝ်။ အုဝ် ဟဲ့ ကာဒုး ဒုက် တာင်။ န့ ဘော ပီ ဒုဝ် ဘူင့် အုဝ် ဘော ငါယ် အုဝ် ဘော ခဲင် ဝတ့် ခဲင် နဝ်း အုဝ် ဟဲ့ ဟွတ့် လိုဝ် တူတ့် ကူပ် ဒုက် တာင် တီ။

10 ခုဝ်၊ အာဆာက် အုဝ် မိူဝ် ဘော ပွုန် ဟာဝ်၊ အုဝ် မိူဝ် ဘော က့လိုဝ် ဘော ငှဝ် ဒွန် ဆီနမ်။ ကာအာင် အုဝ် ဂေ ပ့လူမ် အုဝ် ဘော ဒီလှး တူတ့် ကူပ် ဒုက် အုဝ် တီ။

11 ကူပ် ဟဲ့ ကိူန် ဂေ ရန်ဆူ အုဝ်၊ ဂေ အီ ကွယ် ကာတတ် အုဝ်၊ ဂေ ဘော နဲန အုဝ်။ ဂေ အီ လာယ် ဒွိုမ် ဒီ အုဝ်၊ ဂေ ဝီ ကာအိး ကာဆဝ် အုဝ်။ ဂေ ဟီ ယိုဝ် အုဝ် ဒူပ် န့တေန့်၊ ဂေ ဘော တဝ် ဂေ။

12 ဂေ ဟဲ့ ပိဝ် အုဝ် ပီ ဂေ ပိဝ် ဒူအီ ယမ်။ အုဝ် ဘော ပီ ကာလုဝ့် အီ ကာလာတ့်။

13 အုဝ် ယိုဝ် ဂေ ဒူအီ ကိူန် ဖူဖာပ် ကာယွင့် အုဝ်။ ဂေ အီ မွှိုမ် ယုဝ် ဘော ကွယ် ဒွန် ဘ့လာက်။ ဂေ ဘော လာယ် ဆင်ချာင် ဒီ ဝဲန် အုဝ်။ ဂေ ဘော ခြာမ် ဒီ ငဝ်း ယမ် အုဝ်။

14 အုဝ် ယီ ဘိုင် မဲ ဇဝ်ဖြာ။ အုဝ် တဝ်း၊ “မဲ ဇဝ်ဖြာ မုး ဇဝ်ဖြာ ပီ ကြိုပ် အုဝ်။”

15 မဲ ဇဝ်ဖြာ ဘော နပ် တူတ့်၊ န့ ဒီ ပါယ် မှဝ် ဒီ အုဝ်။ အုဝ် မှာန့်၊ တဲး မဲ တဲး အုဝ် လွတ် တ ဂေ ရန်ဆူ အုဝ်၊ ဂေ အီ ဘူင် နာ စီစိဝ် ဒီ အုဝ်။

16 အုဝ် မှာန့်၊ တဲး မဲ ဇဝ် ကာဝေ အုဝ် အီ မုး ဒဲစေန့် မဲ နီ။ ကူပ် မိုဝ်း မဲ ဇဝ် နဝ်း ရွက့် ကာဝေ ဆေဆေ၊ တဲး မဲ ဇဝ် ချွတ် အုဝ်။

17 ကူပ် ဆာခိုဝ် အုဝ် ဒီ မဲ ဇဝ်ဖြာ၊ ကွဲ့ တဲး အုဝ် လုဝ် ဆာယ် အီ။ တဲး ဂေ ဒူအီ မိူက်၊ ဒူအီ ဟာယ် တီ ဝီ လုဝ် ဆာယ် အီ။ တဲး ဂေ စုဝ်း တူတ့် ခဲင် မိူင် မာရာန၊ ကွဲ့ တဲး ဂေ ဆီ ပွိုန် ကာလာင် ဂြုဝ်း။

18 ဂေ အီ နပ် ဒီ ကာလုဝ်၊ တဲး ဆီဒ ဂေ ဝီ ဟေတ့်။ ဂေ အီ နဲန ဒူအီ နဝ်း ဆိူဝ် နဝ်း ဘွတ်၊ ဘော ဂေ အီ မိုဝ်း နဝ်း ပီခိုက်၊ ဘူင် နာ စီစိဝ်၊ တဲး ဇဝ်ဖြာ ဘူင်၊ ကွဲ့ တဲး ဂေ ပွိုန် ဒီ ကာလာင် ဂြုဝ်း မာဆေ။

19 မဲ ဇဝ်ဖြာ ဟဲ့ ရဲန် အုန် ပီ ဒီ ဂေဇူ မဲ ဒီ ဂေ အီ ရုဝ်ဆေ မဲ။ ဒွန် အီ ဟဲ့ နပ် ခဲ့ မွှိုမ် မဲ။ ဆေဆေ မဲ ဒီ ဘူင် နာ မွှိုမ် ဒီ ဒူအီ အီ ဘိုင် မဲ။

20 မဲ ဇဝ်ဖြာ ဒီ ဘော ဒိုဝ်း ချြီင် ဂေ ဒူင် ကွယ် မဲ။ မဲ တူ တဲး အီ ပွိုန် ဒီ ဘူင် နာ တူ မွှိုမ် ဒီ ဂေ။ မဲ ဇဝ် ဘော ယွတ် လိုမ်လာ ဂေ ဒူင် ကွယ် မဲ။ မဲ ဇဝ်ဖြာ တူ တဲး အီ ပွိုန် ဒီ ကာအေး ကာထဲန့် ဒီ ဂေ။

21 အုဝ် အိူပ် မဲ ဇဝ်ဖြာ ကူပ် ဟဲ့ တဲး မဲ ဇဝ် အုဝ် ယိုဝ် နဝ်း ရွက့် ကာဝေ မဲ အီ မွှိုမ် အာမ် ကာဆဝ်။ ဒေါ ကွယ် ရန်ဆူ ရူပ် အုဝ် ပီ ဂေ ကွယ် ရူပ် မိူင်၊ မဲ ဇဝ် ဟဲ့ ရွက့် ကာဝေ အုဝ်။

22 ဒေါ ယုဝ် ကာဆဝ် အုဝ်၊ အုဝ် ဟဲ့ ကာလိုပ် ဒီ တဝ်း၊ “ဇဝ်ဖြာ တူ ယွတ် အုဝ်။ ဇဝ်ဖြာ ဟဲ့ ဟွတ့် ဝဲန် အုဝ်။” မာလဲ၊ အုဝ် ဟဲ့ ဝီ ဆာခိုဝ် ဒီ မဲ ဇဝ်ဖြာ၊ မဲ ဇဝ် ယီ ဝီ ထူမ် ဂြုဝ်း ပီ ဆာခိုဝ် ပီ မှာန့် အုဝ်။

23 အိုယ် ဘေ ဒူအီ အီ ဘိုင် ဇဝ်ဖြာ၊ တဲး ဘေ ရွက့် ဇဝ်ဖြာ။ ဇဝ်ဖြာ ဒီ ဘော ယွတ် မဲန် ဂေ အီ မိုဝ်း နဝ်း ဆိူဝ် နဝ်း မှာန်။ ဆေ န့ ယီ မိုဝ်း ဒူအီ အီ မိုဝ်း နဝ်း ပီခိုက်၊ အန် ဇဝ် ဒီ ဒမ် ကာဆဝ် မှာပ် ဒီ ဂေ။

24 အိုယ် ဘေ အီ ဘိုင် ဇဝ်ဖြာ၊ ကွဲ့ တဲး ဘေ ယုဝ်။ တဲး ဘေ ဘောကာဂ့လျီတ် မိုဝ်း နဝ်း ယ၊ နဝ်း ပ့လူမ်။