1 မဲ ဇဝ်ဖြာ၊ မဲ ဟဲ့ တဲး န့ ဘ့လာင် ဒီ အုဝ်။ မဲ ဘော မုး အီ ချွတ် အုဝ်။ အုဝ် အာဝ် ဟူ မိုဝ်း ဒီ လုဝ် ယုဝ် အာဆေ။ မဲ ဇဝ်ဖြာ မုး အီ ဘ်ု အာဆာက် အုဝ်။ ခုဝ်၊ အာဝ် ဟူ မိုဝ်း ဒီ လုဝ် ယုဝ် အာဆေ။

2 ဂေ ဒူအီ မိူက် ဒူအီ ဟာယ်၊ ဂေ အီ မုး ရန်ဆူ အုဝ် ဘော ဂေ အီ ဟြေတ့် ဒီ ငဝ်း အုဝ်၊ ဂေ ဒီ ဝီ ကေး စှိုမ် တူတ့်။

3 ဒပ် ဒါ ဆိုက် ပီ ဘော ဟဲ့ ကွယ် ရူပ် အုဝ်၊ အုဝ် မိူဝ် တူ လုဝ် ယုဝ်။ ရန်ဆူ အုဝ် ပီ ဘော ကာဂုဝ်း ကာဆဝ် ဒီ အုဝ်၊ နဝ်း အုဝ် ယီ ညှိုမ် ဘိုင် ဇဝ်ဖြာ။

4 အုဝ် ဒီ မှာန့် ဒီ မဲ ဇဝ်ဖြာ အာဒါ အူ မျုဝ်၊ တဲး အုဝ် ပွိုန် ဒီ ကွယ် ခဲင် ဟုဝ် မဲ ဇဝ်ဖြာ ဆေဆေ ဘော စုဝ် အုဝ်။ တဲး အုဝ် ယိုဝ် ခဲ့ မိုဝ်း မဲ ဇဝ် ဆာရေ၊ တဲး အုဝ် နပ် ပီ ဆီ တဲး မဲ ဇဝ် အုဝ် ဘူင်။ န့ မုး ဇိုဝ် တီ ပီ ဟြေတ့် အုဝ်။

5 ခုဝ်၊ ဒေါ ကာဒုး အုဝ် ဒုက်၊ ဇဝ်ဖြာ ဘော ဒိုဝ်း ချြီင် အုဝ် ဒူင် ကွယ် အန်။ န့ ပီ၊ အန် ဇဝ် ဟဲ့ ဒိုဝ်း အုန် အုဝ် ခဲင် ထိုပ် ဘိက် အန် ဘော ဒိုဝ်း ဘ့လေး အုဝ် ဒဲင် ဒါအာင် မာဝ် အီ စာ၊ တူ တဲး ရန်ဆူ အုဝ် ဇမ်။

6 ပါယ် တီ၊ အုဝ် ဒီ ပဲ တူတ့် ဂေ ရန်ဆူ အုဝ် အီ ဟဲ့ ရူပ် အုဝ်။ ခုဝ်၊ အုဝ် ဟဲ့ ဘျုဝ် ဒါခိုယ် ဒီ ဝီ လှူ ပီ ဒီ လှူ ခဲင် ဟုဝ် ဇဝ်ဖြာ ဘော တဝ်း မှုဝ် ဘော အိူပ် အန် ဇဝ်။

7 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ယိုဝ် ဂြုဝ်း ပီ ဆာခိုဝ် အုဝ်။ တဲး မဲ ဇဝ် ကာဝေ အုဝ် ဘော ဒွါ ပီ မှာန့် အုဝ်။

8 အုဝ် ဘော နပ် ခဲင် နဝ်း အုဝ် မဲ ဇဝ်ဖြာ ဟဲ့ တဝ်း၊ “တဲး မဲ ကာဒိုက် ကာဒဝ့် ဒီ အုဝ်။” အုဝ် ဘော ဝျီ့ ဂြုဝ်း မဲ ဇဝ်ဖြာ ခဲင် နဝ်း အုဝ် တဝ်း၊ “အိုယ် မဲ ဇဝ်ဖြာ၊ အုဝ် ဒီ ကာဒိုက် ကာဒဝ့် ဒီ မဲ ဇဝ်ဖြာ။”

9 မဲ ဇဝ်ဖြာ၊ ကွဲ့ ဝဲန် အုဝ်။ မဲ ဇဝ် ပီ ဘော ဟဲ့ ရူ၊ ကွဲ့ တဲး မဲ ဘ့လေး ဝဲန် အုဝ်။ မဲ ဇဝ် မုး အီ စွယ် အီ ချွတ် အုဝ်။

10 ဂုန့် မာ အုဝ် ပီ ဘော ဘ့လေး ဝဲန် အုဝ်၊ မဲ ဇဝ်ဖြာ ယီ ယွတ် လိုမ်လာ အုဝ်။

11 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ မာနုဝ် အုဝ်၊ တဲး အုဝ် နပ် ဒီ ဘူင် ပီ အိုင် မဲ ဇဝ်။ တဲး န့ ပီ အုဝ် ဒူပ် န့တေန့် အီ ဟာဝ် ဒါခိုယ် ကူပ် ဟဲ့ ကိူန် ရန်ဆူ အီ ဘ်ု ဒီ ယွတ် အုဝ်။

12 အုဝ် မှာန့်၊ ကွဲ့ တဲး မဲ ဇဝ် အာပ် အုဝ် ဒီ ရန်ဆူ အုဝ်၊ ကွဲ့ တဲး ဂေ ပွိုန် ဒီ ဘူင် ခဲ့ ပီ အိုင် ဂေ ဒီ အုဝ်။ ခုဝ်၊ ဂေ ဘော ကာလာင် နာ တူ မှာန် လွင် အုဝ်။ ဂေ ဘော ရိန် ကာဆဝ်၊ တဲး ဂေ ပွိုန် ဒီ ဘူင် နာ စာဝ် ဒီ အုဝ်။

13 အုဝ် ယီ ညှိုမ် အုဝ် တူ ယမ်။ အုဝ် ဒီ ယိုဝ် ဂုင် ဂေဇူ မဲ ဇဝ်ဖြာ ကာတဲ ဂေ ဒူအီ အိမ်။

14 တဲး ဘေ ညှိုမ် ဘိုင် ဇဝ်ဖြာ။ တဲး န့ ဘဲန် ပ့လူမ် ဘဲန် ဟဲန့် ဒီ နဝ်း ဘေ၊ ကွဲ့ တဲး ဘေ မိုဝ်း နဝ်း က့လိုဝ် နဝ်း လိုဝ်။ တဲး ဘေ ညှိုမ် ဘိုင် ဇဝ်ဖြာ။