1 အိုယ် မဲ ဇဝ်ဖြာ၊ မဲ ဇဝ် ဘော ပီ ဒါအာင် မာဝ် ဒူင် ပွိုန် အုဝ် ကွယ် ဆီချာ။ အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ်။ ဆေ မဲ ဇဝ် တူ ထူမ် ဂြုဝ်း ပီ ဆာခိုဝ် အုဝ်၊ အုဝ် ဒီ ပီ ဂေ ဒူအီ အီ ဟဲ့ ဟွတ့် ယမ်။

2 ဒေါ ကွယ် အုဝ် ခဲင် ဒူင် ဘွတ် ကာဆဝ် ဘော ကြိုပ် ဆာခိုဝ် ဒီ မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် ပီ မှာန့် အုဝ် တီ။

3 ကွဲ့ တဲး မဲ ဇဝ် ဘ့လေး ဝဲန် အုဝ် ဒူပ် ဂေ ဒူအီ ဟာယ် ဒူအီ မိူက် ဘော ဒူပ် ဂေ ဒူအီ တူ မွှိုမ်။ ဂေ ဘော နပ် ဒီ ကာလာင် ဂြုဝ်း ငါမ် ဒီ ဂိုက် ဂေ။ မာလဲ၊ အာကျာမ် အာငျာန် ခဲင် နဝ်း ဂေ ယီ တူ မွှိုမ်။

4 မှာန့်၊ မဲ ဇဝ် ဝီ ဘူင် ဝျီ့ ဒီ ဂေ ခဲ့ ပီ ဒွိုမ် ဘူင် ဂေ။ မှာန့်၊ မဲ ဇဝ် ဝီ ဘူင် ဝျီ့ တဲး န့ ကာဒါန် မှာပ် ခဲ့ ပီ ဒွိုမ် ဘူင် ဂေ တီ။ တဲး ဂေ ခမ် မှာပ် ပီ ကာအာပ် ဂေ ခမ်။

5 ဂေ မိူဝ် တူ လှုဝ်း ပဲ့ ဟဲ့ ဘူင် ဇဝ်ဖြာ၊ ပဲ့ ဟဲ့ ဖာန် ဘ့လေး အန် ဇဝ်။ ခုဝ်၊ ဇဝ်ဖြာ ဒီ ပျာတ့် တဲး ဂေ စှိုမ်၊ တူ တဲး ဂေ ဝီ ယိတ့် ဒေါ မှဝ်။

6 အုဝ် အိူပ် မဲ ဇဝ်ဖြာ၊ မဲ ဇဝ် ဟဲ့ ထူမ် ဂြုဝ်း ပီ ဆာခိုဝ် ပီ မှာန့် အုဝ်။

7 မဲ ဇဝ် ဟဲ့ တဲး ပ့လူမ် တဲး ဟဲန့် ဒီ အုဝ်။ န့ ဘော ပီ အုဝ် ဟဲ့ မိုဝ်း မင် ဂွင့် အီ ရဲ ဆီချာ အုဝ်။ နဝ်း အုဝ် ဘိုင် မဲ ဇဝ်။ မဲ ဇဝ် ဘော စွယ် အုဝ်။ ခုဝ်၊ နဝ်း အုဝ် ဟဲ့ ဒါခိုယ် ကာဆဝ်၊ အုဝ် ဒီ တဝ်း မှုဝ် ဒါခိုယ် အီ အိူပ် မဲ ဇဝ်ဖြာ။

8 ဇဝ်ဖြာ ဘော တဲး ဟဲန့် ဒီ ဂေ ဒူအီ ပီ အိုပ် အန်။ အန် ဇဝ် ဘော ချွတ် ဝီ ပီ ရဝ်း ပီ တိုယ် အန်၊ တဲး န့ ပီ ဝီ တီ ဟဲ့ ကွယ် ခဲင် ဒူင် ဆီချာ။

9 မှာန့်၊ တဲး မဲ ဇဝ် ချွတ် ဒူအီ ပီ အိုပ် မဲ။ တဲး မဲ ဇဝ် မွင့်ကာရာ တဲး ဒီ ဂေ အီ ပီ ခါဂုန် မဲ။ တဲး မဲ ဇဝ် ဟျီင် ဂေ ပီ အီ ဟျီင် မာဘူ။ တဲး မဲ ဇဝ် ယွတ် မဲန် လိုမ်လာ ဂေ ဆေဆေ။