ဇဝ်ဖြာ ပီ ဝီ တဝ်း ဒီ အာယုဝ်ဘာ၊ “မဲ ထာင်၊ မဲ ဒီ ပွိုန် ဒိုဝ်း မ့ပဲတ်၊ ပဲတ် လေး မာကြာယ် ဘော ဒိုဝ်း ဝန်၊ ပက် ကာညိုပ် အန်။း

2 မဲ ထာင် မဲ ဒီ ပွိုန် ဒိုဝ်း ဝန်၊ ဘ့လုး မုး အန် ဘော ဒိုဝ်း ဟိန် ဂုဝ့်၊ ဝှဝ့် ဒီ ကုင်ကာပ် အန်။း

3 မဲ ထာင် မာကြာယ် တီ ဒီ ဘော ဝီ ဒွင် ဘာန် မဲ၊ ဝီ ကာလာင် ဂြုဝ်း န့စု န့စမ် ဘော ဝွန် မဲ။း

4 မဲ ထာင်၊ အန် ဒီ ဘော ဝီ ကာဆဲန့် ဒီ မဲ၊ ဒွါ ကာဒိက် ဆတ်ဇာ ဒီ မဲ၊ တဲး အန် ဘဲန် မှာယ် မဲ ဘော ဘူင် ဂါန် မဲ ဆေဆေ။း

5 မဲ ထာင် မဲ ဒီ ဘော ပွိုန် ဖိုက် အန်၊ တဲး မဲ ပွိုန် ဒီ ဒီလာဝ် ဒီ အန်၊ ပီ မဲ ဖိုက် မာဆိမ်။း မဲ ထာင် မဲ ဒီ ဘော ပွိုန် ပက် အုန် အန်၊ တဲး န့ ဘဲန် ပီ ဘ့လတ့် ပီ ဒီလာဝ် ဂေ ဂွန် အီဘိုန့် မဲ။း

6 မဲ ထာင် ဂေ ဒူအီ အီ စိုဝ်း အီ ယွင့် ကြုဝ်၊ ဂေ ဒီ ဘော တး ကာစိုဝ်း ငဝ်း အန် ဘော စိုဝ်း ဟာဝ် အန်။း ဆေ ဂေ ဟဲ့ ဟွတ့် စိုဝ်း၊ မဲ ထာင် ဂေ ဒီ ဘော ဒိုဝ်း ဟာဝ် အန် လာယ် ကာယဝ်း ကာဆာင် ကာတဲ ဂေ။း

7 မဲ ထာင် မဲ ဒီ ဘော ပွိုန် ဒိုဝ်း ဘ့လာ လျီး၊ ဆတ် ဟုန် အန်၊ ဒိုဝ်း ဘော ကာလွင့် ပီ ဆတ် အီ မာဂါ တွိုန်၊ ဆတ် ဂိန့် အန်။း

8 တဲး မဲ ထေဝ် ဒီ ပါ ဒုဝ် အန် တာ ဒဲ မဲ။ မဲ ဒီ ယိုဝ် ပီ ဒီ ပါယ် အန် ဒီ ရူ၊ ဝီ ကာဂုဝ်း ဒီ မဲ။ ဝါယ် အန် တီ မဲ မိူဝ် အာဝ် ဟူ ပိဝ် ဒေါ မှဝ်၊ အာဝ် ဟူ မိုဝ်း နဝ်း ဆီ ဘူင် ပါယ် တီ ပေါ အူ စိုပ်။

9 ဆေ မဲ ခြာမ် ဒီ ကာဂုဝ်း ဒီ အန်၊ မဲ ဒီ ခြာမ် ပီယေန့်။ ခုဝ်၊ ဆေ ဒူအီ ယိုဝ် မာကြာယ် တီ၊ န့ ဒီ ဘော ဘဲန် ကာပိုန့် ကာဆဝ် ဒီ အန်။

10 အာဝ် မိုဝ်း အာဆေ အီ ယ ဘျိတ့် ယိတ့် အန် ဘော ယ ကာဂုဝ်း ဒီ အန်။ ဆေ န့ ပါယ် တီ န့ မိူဝ် တူ မိုဝ်း ခေါ အူ ဝီ အီ ပွိုန် ကာဘး ဒီ အုဝ်။

11 အာဝ် မိုဝ်း အာဆေ အီ ဟဲ့ ဒွိုမ် ဂေဇူ အုဝ်၊ တဲး အုဝ် လုဝ် ဝီ ဝျီ့ ပီ ဂေဇူ အန်။ ဒဲင် ကာဒါယ် နီ၊ န့ မုး တူတ့် ကြုဝ် အုဝ်။

12 အုဝ် ဒီ ဝီ ကာလာင် ပေါ မ့ပွါ လွင် မာကြာယ်။ အုဝ် ဒီ ကာလာင် လွင် ပ့လဝ် အန် ဘော ဒုဝ် အန် အီ ဟဲ့ မွှိုမ် ယွတ် ဘော ခဲ့ ကိူန် ဟဲန့် အန်။

13 အာဝ် မိုဝ်း အာဆေ အီ ပွိုန် ဘုတ့် လေး ခြိုင် ပီ တာ အန် ထာပ် ရေတ့်၊ ဘော ဘ့လုး ကာလှုး ဆီတုဝ် အန် အီ ကွယ် ခြိုမ် ခြိုင် တီ။

14 အာဝ် မိုဝ်း အာဆေ အီ ပွိုန် ကာဝိုဝ်း မူတ့် အန် တဲး န့ အာင်။ မ့ပြဲင် ဟြာင် အန် န့ ဘော မွှိုမ် ယုဝ်၊ မွှိုမ် ကာဟိဝ် ကာဆဝ်။

15 ဂဲတ် ဒဲင် ကာတု အန် ဘော ကွယ် ဘဲန် မ့ပြဲင် ဘဲန် မ့ပြဲင်။ န့ ဘော လာယ် ကာတဲ့ ဘဲန် ဒီဖ့လ ဘဲန် ဒီဖ့လ။

16 န့ ဘော ကွယ် ကာဒိုက် ဆီချာ၊ အာဝ် ပွိုန် ဒိူတ် လေး။

17 ဂဲတ် အန် တီ၊ န့ ဘော ကွယ် လာယ် ဒါမ်၊ အာဝ် ပွိုန် ဂဝ်း တဲး အန် ကာယဝ်း။

18 ဆေ မာကြာယ် တီ အာစှိး၊ န့ ဘော ဘ့လာင် လေး ဒီ ဂုင်မုး အန်။ ခေါ ငါယ် အန် ဘော ဘ့လာင် ပီ ဘ့လာင် ဆီငဲ စေဝ် ညှာ။

19 ပ့လဲ့ ငဝ် ဘော ကာစှူတ့် ငဝ် ဘော လေး တး ခဲင် မူတ့် အန်။

20 ဒက် ငဝ် ဘော လေး ခဲင် ဂုင်မုး အန်။ န့ ဘော ပီ ကာလုဝ့် အီ ဟဲ့ ကာဆိုမ်၊ အီ ကွယ် ဒဲင် ငဝ် အီ ဟဲ့ ဒါတ် ကာဆဝ်။

21 ဖွိုမ် ပီ ဟိုဝ်း လေး အန်၊ န့ ဘော ပဲ ပီ ကုး ငဝ် န့ကိုဝ်။ ပ့လဲ့ ငဝ် ဘော နပ် ဒီ လေး ခဲင် မူတ့် အန်။

22 ဂါန် မဲင် အန် မိုဝ်း ပ့လူမ် မိုဝ်း ဟဲန့် ကိူန် ကာဆဝ်။ ဂေ အီ ကာတုန့် အန်၊ ဂေ ဘော ယုဝ် ကာဆဝ်။

23 ယင် အန် ဂေ ဟုန် အန် ဘော ကွယ် လာယ် န့ဂ့လပ် န့ဂ့လပ်။ ယီ ပ့လူမ် ကာဆဝ်၊ အာဝ် ပွိုန် ရ်ု။

24 ဘင်နဝ်း အန်၊ ဘော ပ့လူမ် နှဲန် မာဝ်။ န့ ဘော ပ့လူမ် ပီ မာဝ် ပီ ကြိတ် အီ ခါမုန် အီ ကွယ် ဘ့လာက် နာ ခြိုမ်။

25 ဒေါ ယိတ့် အန် ဘော ဂေ အီ မိုဝ်း ပ့လူမ် ဂေ ဟဲန့် ကိူန် ကာပိုန့် ဘော ယုဝ် ကာဆဝ်၊ ဝီ တဝ် အူ ဇေန့်။

26 ဂေ ပီ ဘော ဒိုဝ်း မာပွါ့ လာင် ဘော ဘ့လာ လျီး ကာဂုဝ်း ဒီ အန် မိူဝ်၊ အန် တူ နပ် ဒီ ဒိမ် ဒီ ဆဝ် ဒေါ မှဝ်။ ပီ ဘော မုး လျီး၊ ဘော မုး ဘ့လာ၊ ဘော မုး လျီး ဘတ့်၊ အာဝ် ပွိုန် ဘ့လုး၊ အာဝ် ပွိုန် ဆတ် အန်။

27 ဆေ န့ မုး ဟိန်၊ န့ ပီ ဟျြီင် ဒီ အန်။ ဆေ န့ မုး ဘွင့် ဒေန့်၊ န့ ဘော ပီ ဟေ အီ ရာမ် ဒီ အန်။

28 ဘ့လာ အ မိူဝ် တူ ပွိုန် ညွန် တဝ် အန်။ ပီ ဘော ဒိုဝ်း ဂွန် မာဝ်၊ ဝီ ပိူ့ အန် တာ အာပိူ့ မိူဝ်၊ န့ ဘော ပီ ခဲ့ ကာအး ဂေ ကာပုး ဒီ အန်။

29 ဆေ အီ ဒိုဝ်း မင် မး ဘော မး အန်၊ န့ ဘော ပီ ခဲ့ ဒျီပ် ငှုဝ်။ အန် ဘော နပ် ဒီ ဝီ ကာညး ဒီ ဘ့လာ လျီး ပီ ငှာ ဂေ ဒီ အန်။

30 ဂဲတ် အီ ကွယ် ဒီ ဝတ့် အန် နာ ခြိုမ်၊ န့ ဘော လမ် ပီ ကာလုဝ့် ကာလာတ့်။ အန် ဘော နပ် ဒီ ပ့လဝ်း ဟာဝ် ခဲင် ညုဝ့် ပီ ပန် မင်ဝှိုဝ် ဒူင် နာ။

31 အန် ဘော နပ် ဒီ ဝ်ု အိုမ် နမ်မုက်ဆာရာ၊ တဲး န့ ပီ အိုမ် အီ ဟဲ့ ဆီနမ်။ အန် ဘော ဘူင် တဲး အိုမ် နမ်မုက်ဆာရာ လေး ပုး အန်။

32 ဒေါ ကာလုဝ်း ဟာဝ် အန် ကာတဲ အိုမ်၊ အန် ဘော ဘူင် တဲး အိုမ် လေး ပုး လုယ် ပုး ရာဝ်၊ တဲး န့ ကော မာဘြိဝ် ဒူပ် ဒီ ပန် အန်။

33 ဒဲင် ကာဒါယ် နီ၊ အာဝ် မိုဝ်း ဒုဝ် ဆတ်ဒါဝါ အီ ပီ မာကြာယ် တီ။ အန် ဘော မုး ဒုဝ် ဆတ် အီ တူ နပ် ဒီ ယုဝ် မာဆေ။

34 အန် ဘော လုက်တာယ် ဂေ ဒုဝ် ဆတ်ဒါဝါ အီ ပီခိုက်။ အန် ဘော ပီ ခုန်ဒီခမ် အီ အိုပ် ဂေ ဒုဝ် ဆတ်ဒါဝါ ဘောကာဂ့လျီတ်။” ဇဝ်ဖြာ ဟဲ့ ကာလာင် ဒီ အာယုဝ်ဘာ ခဲ့ တီ။