ဇဝ်ဖြာ ပီ ဝီ ကာလာင် ဂြုဝ်း ဒီ အာယုဝ်ဘာ တဝ်း၊

2 “အိုယ် အာယုဝ်ဘာ၊ မဲ ထာင် ဒူအီ ဒီ ပွိုန် နဲ ဇဝ်ဖြာ အီ အိုပ် တူတ့် ဒွန် မျုဝ် ဘော တဝ်း ပီ ဘူင် အန် တူ မွှိုမ်။း ဝီ မှဝ် အီ တဝ်း ဒီ ဇဝ်ဖြာ ပါယ် တီ တဲး အန် ဝီ ဝျီ့ ဝီ ကာလာင် ဒီ အုဝ်။”

3 ဟဲ့ ဟွတ့် အာယုဝ်ဘာ ဝီ ကာလာင် ဒီ ဇဝ်ဖြာ တဝ်း၊

4 “အိုယ် မဲ ဇဝ်၊ အာဝ် ကာအာပ် အုဝ် ကာလာင် ဒီ မဲ။ အုဝ် အာဝ် ဟူ နပ် ပီ ဒီ ကာလာင် ဒီ မဲ။ အုဝ် ဟဲ့ ဝီ တာ ဒဲ အုဝ်၊ ဝီ ကာဘိတ် မူတ့် အုဝ်။

5 အုဝ် ဟဲ့ ကာလာင် အူ ဇေန့်၊ ဟဲ့ ဟွတ့် ပီ ဝီ ကာလာင် ပေါ အူ ဇေန့်။ ဒေါ တီ နီ၊ အုဝ် အာဝ် ဟူ မိုဝ်း ပီ ဒီ ကာလာင်၊ ပီ ဒီ ဝျီ့ အုဝ် ဒီ မဲ ဇဝ်။”

6 ဒေါ အန် တီ ဇဝ်ဖြာ ဘော ကာလာင် ဂြုဝ်း၊ တဲး န့ တး ဒူပ် ခုန် တာင်၊ တဝ်း ဒီ အာယုဝ်ဘာ၊

7 “ပီကျ မဲ ပီ အီမာယ်၊ တဲး မဲ ပဲ ဒီ ဂဝ်း ဂြုဝ်း ပီ ဒီမွှတ် အုဝ် နီ။

8 မဲ ဆီ တဝ်း ပီ ဆုင်ဖျာတ် အုဝ် အာဝ် မှာန်။း မဲ ဆီ တဝ်း၊ န့ မုး အုဝ် အီ ဟဲ့ ကာလိုပ် ဘော ဝီ တဝ်း ပီ ဘူင် မဲ ဟဲ့ မုး ဟဲ့ မှာန်။း

9 မဲ ထာင် မဲ မိုဝ်း ပ့လူမ် ဂေ ဟဲန့် ပီ အုဝ်။း မဲ ဟဲ့ ပွိုန် ဒတ် ရျီင် တဲး န့ ကော ပီ ဟမ် ပီ ဒတ် အုဝ်။း

10 ဆေ မဲ ဟဲ့ ပွိုန် ဘူင်၊ မဲ ဒီ ဘော ပွိုန် ဘျ အာဖုင် ဒင်ခုဝ် မဲ၊ ဘျ ဘော ခဲ့ တာင် ဆာရေ မဲ။

11 တဲး မဲ ဟုး လေး နဝ်း ရူ မဲ အီ ဟဲ့ ကာလွှိုမ်။ တဲး မဲ ယွတ် ဂေ ဒွန် အီ အီ မိုဝ်း နဝ်း ပီခိုက် ပီစာ၊ တဲး ဂေ ဝီ စုဝ်း လူင် ဒူင် တျီမ်။

12 ဂေ အီ မိုဝ်း နဝ်း ပီခိုက် ပီစာ၊ တဲး မဲ ဘူင် တဲး ဂေ စှိုမ် ဆာရေ၊ ဘော ညဲတ့် ဒူအီ အီ တူ မွှိုမ် ဒူင် ကွယ် ဂေ။

13 ဒိုဝ်း ဒူအီ ဂေ တီ ဘောကာဂ့လျီတ်၊ ဒိပ် ကာဒူပ် တူတ့် ဂေ ခဲင် ကာဒါယ်၊ ဘော ကာဘိတ် နာ ဂေ၊ အုန် ခဲင် မိူင် မာရာန။

14 ဆေ မဲ ဘူင် ပါယ် တီ အုဝ် ဒီ အိူပ် မျုက် မဲ တဝ်း၊ ပ့လူမ် မဲ ဂေ ဟဲန့် မဲ တီ၊ ဟဲ့ ပွိုန် ဝီ ချွတ် ဒုဝ် ဘြိမ် မဲ။

15 အုဝ် ဟဲ့ ဖာန် ဘ့လေး မင်ပြွင့် အိုမ်^a ပီ အုဝ် ဖာန် ဘ့လေး မဲ။ အန် ဘော နပ် ဒီ ဟူမ် ပေတ့် ပီ မက် ဒီဆုဝ်။

16 မာလဲ၊ အာဖုင် အန် ကွယ် ဒီ ညွယ် အန်။ ပ့လူမ် ဂေ ဟဲန့် အန်၊ န့ ဘော ကွယ် ဒီ ဆီန ဝတ့် အန်။

17 ဆီဒါ အန် ပ့လူမ် ပီ ဟေ အာရိတ်။ ဆီန ပ့လဝ် ဘော လာယ် ဒါန့် ကာဝဲ့ ဟာဝ်၊ တဲး န့ မိုဝ်း ပ့လူမ်။

18 ကာအာင် အန် ဘော ပီ ကာဆွင့် ဘွင့် ဒေန့်။ ပ့လဝ် အန် ဘော ပီ ဒီဂ်ု ဟိန်။

19 အန် ဘော မုး ဒုဝ် ဆတ်ဒါဝါ အီ မွှိုမ် အာမ် လွှိုမ် ဒုဝ် ဟဝ် ပဲ့ ဟဲ့ ဖာန် ဘ့လေး ဇဝ်ဖြာ။ န့ မိုဝ်း မီ ဒါ ကာညာ အီ ဟဲ့ ဖာန် ဘ့လေး အန် အီ ပဲ ဒီ အိုပ် အန် တာ မာပွါ့ လာင် အန်။

20 မင်ပြွင့် အိုမ် တီ ဘော ဟူမ် ပေတ့် အီ လတ့် ဒဲင် နွန်။ ဒုဝ် ဆတ်ဒါဝါ ဒွန် မျုဝ် အီ ကွယ် ခဲင် ပြဲ ဘော လာယ် ဒီလာဝ် ခူပ် အန်။

21 အန် ဘော အိုင် ဒီ အိတ် ခြိုမ် ဟေ မွက်မုဝ်၊ ဘော ချြီင် ခဲင် ကာဘာင် ဂ့လူင့် ဂေ ခဲင် နှူင်။

22 ယာပ် ဟေ မွက်မုဝ် တီ၊ န့ ဘော အပ် ဒီ အန်။ ဟေ အာရာပ် အီ ကွယ် ခူပ် ဘ့လဲင် ဘော ကွယ် ရူပ် အန်။

23 အိုမ်ပြဲ့ ပီ ဘော တး ဇုး အန် ဟဲန့် ခဲ့ မှဝ် မိူဝ်၊ အန် တူ ကာစွာ။ အိုမ် ဘ့လဲင် ယောဒါန် ပီ ဘော မ့ပုန် မူတ့် အန် မိူဝ်၊ အန် တူ ယုဝ်။

24 အာဝ် မိုဝ်း အာဆေ အီ ပွိုန် ဘ့လုး အပ် ငါယ် အန် တဝ်း ဒီ မှေတ့် အန်။ အာဝ် မိုဝ်း အာဆေ အီ ပွိုန် ဘ့လုး မုး အန် တဝ်း ဒီ မှေတ့် အန်။”