ဇဝ်ဖြာ ပီ ဝီ ကာလာင် ဒီ အာယုဝ်ဘာ တဝ်း၊ “မဲ နပ် အာခြာဝ် ဒေါ ဂွိုတ် တး မင်ဂျီး ခဲင် ပြဲ။း မဲ ဟဲ့ ဒွိုမ် ဘ်ု ဒီ လိုမ်လာ ဒေါ မိုဝ်း မာဇ ဒီ ဂွန်။း

2 မဲ နပ် ဆိန့် ဒေါ ဒဲ ဂေ ဘာဒိက် ဆန်ထေ ကော ဇမ် ဂွိုတ် ဂွန် ဂေ၊ န့ လှေန့် ခဲ့ မှဝ်။း မဲ နပ် အာခြာဝ် ဒီ ဂွိုတ် ဂွန် ဂေ တီ။း

3 မဲ နပ် အာခြာဝ် ပန် ဒီ ဆဝ် ဝတ့် ဂေ ဘော အိတ် ဒဲင် ကာဒါယ်၊ တဲး ဂွန် ဂေ ဂွိုတ်။း ဟဲ့ ဟွတ့် ဂွိုတ်၊ ဆဝ် မိူဝ် ဟဲ့ ဟြာယ် အူ ဇေန့်။

4 ဂွန် ဂေ တီ ဘော နပ် ဒီ ကွယ် ဆီချာ ဘော ဟြေး တာင် ခဲင် ဂ့လင်။ ဂေ ဘော နပ် ဒီ ဂဝ်း မာ ဂေ၊ တူ ဝီ တး။

5 အာဆေ ဟဲ့ ဘ့လေး မာလာ ပြဲ၊ တဲး အန် ပွိုန် ဒီ ဟာဝ် ထင်ဟာင်၊ ဟာဝ် ဒါခိုယ်။း အာဆေ ဟဲ့ ဂဝ်း လေး ဝန် အီ ဟဲ့ ပက် အန်၊ တဲး အန် ပွိုန် ဒီ လဲ ဝိဝ် လဲ ဝေန့်။း

6 အုဝ် ဟဲ့ ဒမ် အုန် ခဲင် ပြဲ ကာဟဝ်း၊ တဲး န့ ဘဲန် ပီ ကာင် အန်။ အုဝ် ဘော ဘ့လေး တဲး အန် ကွယ် ခဲင် ဂ့လင် ဆယ့်။

7 အန် မိူဝ် နပ် ဒီ ကွယ်၊ တဲး န့ ကာတူင့် မိူင်၊ ဒူင် တူ ဆီနန် ဆီနိူင် ဒူအီ။ အန် မိူဝ် တူ ယိုဝ် ဂြုဝ်း အာဆေ အီ ဝဲတ် အီ ညွန် အန်။

8 အန် ဘော ဟြေတ့် ပီ ဒီ ဟူမ် အန် ဒဲင် နွန်။ အန် မိူဝ် ဟြေတ့် ဒီ ဟူမ် လှာ အီ ဆီ ငျီန် ဆီ အိမ် ဒွန် မျုဝ်။

9 မဲ ထာင်၊ မက် ပြဲ ဒီ ဘော စွယ် မဲ ဘူင် ဂါန်။း မဲ ထာင်၊ အန် ဒီ တး အိတ် ခူပ် ကာလယ့် ပီ ဘ့လေး အုန် မဲ။း

10 မဲ ထာင်၊ မဲ ပွိုန် ဒိုဝ်း ဝန် ပက် မက် ပြဲ၊ ဝီ တဲး အန် ထဲ မာန် မဲ။း ဆေ အာဝ် ပါယ် တီ မိူဝ်၊ မဲ ဒီ တဲး အန် လာက် မင်ဝှိုဝ် ခဲင် ဒူင် နာ မဲ။း

11 မဲ ထာင်၊ မဲ ဒီ ပွိုန် ဒီ ဘိုင် ကူပ် ဟဲ့ မိုဝ်း အန် ပ့လူမ် တာင် ပ့လူမ် ကိူန်။း မဲ ဆီ တဲး အန် ဘူင် ဂါန် မဲ အီ စန် ကာဆဝ်။း

12 မဲ ညှိုမ် အန် ဒီ ဒိုဝ်း အုန် ဆီဘယ့် ငှုဝ် ပီ ဆုဝ့် မဲ။း အန် ဒီ ဘော ဒိုဝ်း တး ဒီ အူင့် ကာင်နဝ်း မဲ။း

13 မာဆိမ် ကာဟာတ့် ဘော နပ် ဒီ ကာယပ် ဟဲ ကာဆဝ် ဖျီင် အန်။ မာလဲ၊ အန် ယီ တူ နပ် ဒီ ဘိုန့်။

14 မာဆိမ် ကာဟာတ့် တီ၊ ဘော နပ် ဒီ ဘ့လေး ဝဲန် ပွိုန် အန်၊ တဲး န့ ဆီအုန့် ခဲင် ကာဟာတ့်။

15 အန် မိူဝ် တူ နဝ်း မှဲ ယုဝ် အီ ဟဝ် တး ညဲတ့် ပွိုန် အန် တီ။ အန် တူ ယုဝ် ဘော မာဒုဝ် ပြဲ ဒီ တး ညဲတ့် ကာလာတ့်။

16 အန် ဘော ဘူင် ကာဆဝ် ဒီ ဂွန် အန် ကော နှဲန် အာဝ် မုး ဂွန် အန်။ ဒုက် ဂေ ဆဝ် ပဲ့ ဟဲ့ ခမ် ဒေါ ဂွိုတ် ဂွန် အန် တီ၊ အန် မိူဝ် တူ ယုဝ် အန် ခမ် ဒီလူယ် ဒီလာယ် ပီယေန့်။

17 ခုဝ်၊ ဇဝ်ဖြာ ဟဲ့ ဘူင် တဲး အန် ရိုဝ်၊ တူ ဒွါ အာငျာန် ဒီ အန်။

18 မာလဲ၊ ဒေါ ဝီ ယိတ့် ဒီဂြိုဝ်း အန် ဒုဝ် အန် တဝ်း ဒီ တဝ်၊ အန် ဘော နပ် ဒီ ကာညး ဒီ မင်ပြွင့် ဘော ဒီ ဒါ အီ ပဝ့် မင်ပြွင့် တီ။

19 အိုယ် အာယုဝ်ဘာ၊ န့ မုး မဲ အီ ဟဲ့ ဒွါ တဲး မင်ပြွင့် တီ မိုဝ်း ပ့လူမ် မိုဝ်း ဟဲန့်။း န့ မုး မဲ အီ ဟပ် တဲး မင်ပြွင့် တီ မိုဝ်း ကုက်။း

20 န့ မုး မဲ အီ ဘူင် တဲး အန် နပ် ဒီ ဒဲန် ပီ မာအာဇူင့်။း ဘော နပ် ဒီ ကာဘျုဝ် ဒူအီ ဆေ ဟမ် လေး ခဲင် ကာဒဝ် ဂုင်မုး အန်။း

21 အန် ဘော နပ် ဒီ ဂ့လုဝ့် ဒီ ကြိး ဘာင် ဘ့လဲင် ဂေ ဒူပ် ဒီလယ့်။ အန် ဘော နပ် ဒီ ဒဲန် ဟာဝ် ဒူင် ကာဂုဝ်း ဂေ ဒါ ဆိုက် ခဲ့ ဆီ ဒီ မိုဝ်း အန် ဟဲန့်။

22 အန် မိူဝ် တူ နပ် ဒီ ယုဝ် မာဆေ။ မာပွါ့ လာင် ဂေ ဘ့လာ လျီး မိူဝ်၊ အန် တူ နပ် ဒီ တဝ်။

23 ခြိုင် ကာဂုဝ်း ပီ ဂူင့် ဂေ ဒါ အီ ပဝ့် မင်ပြွင့် ဘော လာယ် ဒိုဝ် ပါယ် ကာချြီင် ကာချြီင်၊ ဘော မာဘြိဝ် မာဘြိဝ် ကူပ် ထွင် ဆီငဲ။

24 ဒေါ ဘုတ် ဂေ ဝဝ်၊ တဲး န့ ဒဲ့ တး ကာဇု ဂေ ဒါ ဆိုက်၊ အန် မိူဝ် အာဝ် ပွိုန် ကွယ် နှိမ် နှိမ်။ အန် ဘော ဘျာက် ဘော ဒိုဝ်း ဟူမ် ကာဒါယ်၊ ဆီ ဟာဝ် အူ ဇေန့်။

25 ဒေါ ဘုတ် ဂေ တီ၊ အန် မိူဝ် ဆော ဟမ် ကာဟဲ၊ ဘော နပ် ဒီ ထူမ် အုး ဒူင် ကာဂုဝ်း ဂေ ဒါ ဆိုက် အီ ဟဲ့ ကွယ် ကာတူင့်၊ အန် နပ် ဘော ဒူင် ဟဲ့ ဒတ် ဆီနန် ဆီနိူင် ဒီ ဘာင် ကာဂုဝ်း ဂေ။

26 မဲ ထာင်၊ ဟဲ့ မုး အာငျာန် မဲ အီ တဲး မာလင်ဒါ ပွိုန် ဒီ ဟာဝ် ဟာဝ် တး တး၊ တဲး အန် ဘော ဘ့လး ဖျီင် အန်၊ ဘိုန့် ဟာဝ် ဘ့လာက် နာ တေတ့်။း

27 မဲ ထာင် မဲ ဟဲ့ စ်ု မာဂ့လာင်၊ တဲး အန် ပွိုန် ဒီ ဘူင် ကာဟုန် အန် ဒဲင် နွန် စာ။း

28 အန် ဘော နပ် ဒီ ဂုဝ် ဘူင် ကာဟုန် အန် ဘာင် ဒီဂ့လဝ်း၊ ဘော ဒဲင် ဒါအာင် မာဝ် အီ ဟဲ့ စာ ကာဆဝ်။ ဒူင် တီ၊ အန် မိူဝ် ပွိုန် ဒီ ကွယ် ဒါခိုယ်၊ ကွယ် ဆီချာ။

29 အန် ဘော ကွယ် ဒူင် တီ ဘ်ု ဒီ ယွတ် ဒုဝ် ပီ ဒီ ပွိုန် အန် ဟူမ်၊ န့ ဘော ကွယ် ကာတူင့်၊ ကွယ် ကာတတ်၊ အန် ယိုဝ် တူတ့် ဒွန် ပ့လုဝ့်။

30 ဂွန် အန် ဘော နပ် ဒီ ညွှတ် ဒီ ဒျီင် နှာမ်။ ဆေ န့ မိုဝ်း ဒုဝ် ယမ် ဒီ မှဝ်၊ ဘော မာလင်ဒါ ဘော ကွယ် ဒီ တီ။”