1 ဝါယ် အန် တီ ဇဝ်ဖြာ ဟဲ့ ကွယ် ခဲင် ခုန် တာင်၊ ဝီ ကာလာင် ဂြုဝ်း ဒီ အာယုဝ်ဘာ တဝ်း၊

2 “န့ မုး အာဆေ အီ တူ မိုဝ်း အာငျာန်၊ အီ ကာလာင် ဂြုဝ်း ပီယေန့်၊ ယီ ယ တဝ်း အာကျာမ် အာငျာန် အုဝ် တူ မွှိုမ်။း

3 ဝီ အီ ကာလာင် ပါယ် တီ တဲး မဲ ပီကျ မဲ ပီ အီမာယ်၊ ဝီ ဝျီ့ ဂြုဝ်း ပီ ဒီမွှတ် အုဝ် နီ။

4 ဒေါ ကာစုး အုဝ် ဒီ ဒဲ ဒင် ကာဒါယ် နီ၊ မဲ ကွယ် ဒီ မှဝ်။း ဆေ မဲ ဟဲ့ နပ် ပါယ် မွက် တီ၊ တဲး မဲ ကာလာင် ဒီ အုဝ်။

5 အာဆေ ဟဲ့ မှာယ် အုန် ဂဝ် အုန် ခဲ့ ကာဝဝ်း ကာဒါယ် နီ။း အာဆေ ဟဲ့ ဒိုဝ်း ဆေန့် မင် ထတ်၊ ထတ် အုန်။း ဆေ မဲ နပ်၊ မဲ ပွိုန် ကာလာင် ဒီ အုဝ်။

6 ဒင် စေန့် ရွင့် ကာဒါယ်၊ န့ ဘ့လေး အုန် ဒဲင် မာဆေ။း အာဆေ ဟဲ့ ဘ့လေး အုန် မာဝ် ဒင် ရွင့် ဒီ ကာတုဝ့် အန်။း

7 ဘော ဒေါ ဟဲ့ မိုဝ်း ဆီမန့် အီ လေး စေဝ် ညှာ၊ အာဆေ ဟဲ့ ဒူပ် ဂေ အာမူ အာမာတ် ဇဝ်ဖြာ အီ ဟဲ့ တဝ်း မှုဝ် ဒါခိုယ် ကာဆဝ်။း

8 အာဆေ ဟဲ့ ဒိုဝ်း မာလုဝ်း၊ ကာဘိတ် အိုမ် နမ်မုက်ဆာရာ ဒေါ လေး တး အိုမ် တီ ခဲင် ကာဒဝ် တာင် အီ ပီ ဝတ့် ကာဒါယ်။း

9 အာဆေ ဟဲ့ ယိုဝ် ဒေါ ဒိုဝ်း အုဝ် န့အု၊ ဆီဘ့လိုက် အိုမ် နမ်မုက်ဆာရာ ဘော န့ဒိပ် အုန် အန် ခဲင် အပ် ဝွင့်။း

10 အာဆေ ဟဲ့ ယိုဝ် ဘော ဒေါ ဟဲ့ ဆိး ဟဲ့ မှာယ် အုန် အုဝ်၊ တဲး အိုမ် နမ်မုက်ဆာရာ မိုဝ်း ကာအုန် အန်။ ဟဲ့ ဝီ ကာဘိတ် အုန် ဘော မာလုဝ်း အန်။း

11 အာဆေ ဟဲ့ ယိုဝ် ဒေါ တဝ်း အုဝ် ဒီ အိုမ် နမ်မုက်ဆာရာ၊ ‘မဲ ပွိုန် လှဲ ဇမ် မီ ပုင် နီ၊ အာဝ် ပွိုန် ပွုန်။ မာ အိုမ် အီ ဆီလွယ် မိူဝ်၊ န့ တိူက် မီ ခဲ့ နီ။း’

12 အိုယ် အာယုဝ်ဘာ၊ မဲ ဟဲ့ ဒွိုမ် စ်ု ဆိန့်ဝး စေဝ်၊ တဲး အန် လေး တး။း မဲ ဟဲ့ ဒွိုမ် နှဲ အုန် ဒူင် ဒီ ဝး ပြဲ။း

13 မဲ ဟဲ့ ဒွိုမ် ကာလာင် တဲး ဆိန့်ဝး စေဝ် ဒိုဝ်း ဂူင့် ကာဒါယ်၊ ဘော ဟြတ် ဝဲန် တူတ့် ဂေ ဒူအီ ဟာယ် အီ ကွယ် ဒဲင် ကာဒါယ် တီ။း

14 ဘ့လာင် ဆီငဲ နပ် ဒီ ဘူင် တဲး ကာဒါယ် ကာပ့လု အာရိုပ် အန် ပီ ကာဒါယ် ကာပိတ် ပဲ့ ဟဲ့ ဒွက် အီ ဒီ ဇိုမ်။ န့ ဘော ပီ ဘော ခြိုင် ပဲ့ ဟဲ့ စု အီ ဆီနမ်။

15 ဘ့လာင် ဆီငဲ တီ ဘော ခြဲ ဂေ ဒူအီ ဟာယ် ဒူအီ မိူက်၊ ကွဲ့ တဲး ဂေ ဘူင် ဟာဝ် အီ ဟာယ် အီ မိူက်။

16 မဲ ဟဲ့ ဒွိုမ် ဟာဝ် ခဲင် ဒူင် တုဝ်း အိုမ် နမ်မုက်ဆာရာ။း မဲ ဟဲ့ ဒွိုမ် ညဲတ့် ဟာဝ် ဒီ ကာဒမ် အိုမ် ဒူင် လိုက် ကာဆဝ်။း

17 ဟဲ့ ဒွိုမ် မိုဝ်း အီ ဘျ မာလုဝ်း မိူင် မာရာန ဒီ မဲ။း မဲ ဟဲ့ ဒွိုမ် ယိုဝ် မာလုဝ်း အီ လိုပ် ခဲင် ကာဒဝ် ဒူင် ကွယ် ဒူအီ ယမ်။း

18 မဲ နပ် ခဲ့ ကာဝဝ်း ခဲ့ တာင် ကာဒါယ် နီ။း ဆေ မဲ ဟဲ့ နပ် တူတ့် ဒွန် မျုဝ် လွင် အန် တီ၊ တဲး မဲ ကာလာင် ဒီ အုဝ်။

19 န့တေန့် အီ တဲး အီ ဇမ် ဒူင် ဘ့လာင် ကွယ် ဒီ မှဝ်။း ဘော ဒူင် အပ် ဝွင့် ကွယ် ကာဆိူဝ် မှဝ်။း

20 မဲ ပွိုန် ဘူင် တဲး ဘ့လာင် ဘော အပ် ဝွင့် တီ ဝီ ဝေန့် ဒူင် ကွယ် ဘြိမ် ဂေ။း မဲ နပ် န့တေန့် အီ ဟာဝ် ဒူင် ကွယ် ဂေ တီ။း

21 မဲ ဟဲ့ ကာအာပ် နပ် လွင် အန် တီ။ ခုဝ်၊ န့ ပီ မဲ ဟဲ့ ဂွိုတ် ဒီ အာတ့် မိုဝ်း အပ် ဂါယ် ဘ့လာင်။ အာဆာက် မဲ မိူဝ် ပီ န့ ဟဲ့ ကိူန် လွှိုမ် ဂါယ် တီ။

22 မဲ ဟဲ့ ဒွိုမ် လိုပ် ယွတ် ခဲင် ဟူင် ဒူင် အုန် အုဝ် အိုမ် ဒါတ်၊ ဘော ဒူင် အုန် အုဝ် ဘျြီ။း

23 အုဝ် ဟဲ့ ချြီင် အုန် အာဒါ ပန် ဒီ မိုဝ်း ဒုက်၊ မိုဝ်း အာဖေ အာရေ ဘော ပန် ဒီ မိုဝ်း အာခြာဝ် ဒီ လာယ် ကာဂုဝ်း ဒူအီ။

24 မဲ ဟဲ့ ဒွိုမ် ဇမ် ဒူင် ကာယဝ်း လေး ဘ့လာင် ပ့လ မ့ပ့လေတ့် ဘော ဒူင် တး ခုန် နာ လေး ဆီငဲ အီ ဘုတ် ကာယဝ်း ဟာဝ် ဒွန် နာ ဒွန် ပ့လုဝ့်။း

25 အာဆေ ဟဲ့ ဂိုဝ်း ရူင် ဘူင် တဲး အိုမ် ဂ့လာယ် နုဝ့် နာ ခဲင်။း ဘော ယး အုန် န့တေန့် ဘ့လေ ကာဆး။း

26 အာဆေ ဟဲ့ တဲး ဂ့လာယ် စုဝ်း ခဲင် ပြဲ ကာဟဝ်း၊ ဒူင် တူ မိုဝ်း တူ ကွယ် ဒူအီ ခေါ အူ ဝီ။း

27 အာဆေ ဟဲ့ ဒိုဝ်း အိုမ်၊ ရိုက် ကာဒါယ် အီ ဟဲ့ ကာဟဝ်း တွင့်၊ ဝီ တဲး ပေတ့် ဂေ ပြဲ ဝီ မိုဝ်း ကာဒဲ့၊ မိုဝ်း န့လုဝ်း ကိူန် ကာဆဝ်။း

28 ကာလာင် ဒီ အုဝ် ယုဝ် ဂ့လာယ် တီ မိုဝ်း ဂုန့်။ တဲး အုဝ် ဘော နပ် အာဆေ ဟဲ့ ဘူင် အိုမ် ဒီငါန် ဘဲန် ဘူင့် ဘဲန် ဘူင့်။း

29 အိုမ် ဒါတ် ဂေ အိုမ် ဘျြီ လေး တး ခဲင် ဝတ့် အာဆေ။း အာဆေ ဟဲ့ ကာဒုး ဒီ တူ အး ဒီ ဂွိုတ် အိုမ် ဒါတ် ဘော အိုမ် ဘျြီ ခဲင် ဂါင်ဟြာဝ်၊ တဲး န့ ပီ အီဘိုန့် တူ အး ဒီ ဂွိုတ် ဂွန်။း

30 အာဆေ တဲး အိုမ် ပ့လူမ် ပီ မာဝ်၊ ဘော တဲး ကာငိဝ် အိုမ် ပ့လူမ် ဒီဂတ့်။း

31 မဲ ဘော ပွိုန် ဒိုဝ်း ဝန် ပက် ဖိုင် ဆီမန့် အီ စိူဝ် ပါလီအာတ်။း ဘော နပ် ဒီ ဂဝ်း လေး ဝန် ဒီ ဖိုင် ဆီမန့် အီ စိူဝ် အုဝ်ရီအူန်။း

32 မဲ ဘော ပွိုန် ဒဲ့ လေး ဖိုင် ဆီမန့် တီ ဆေ ဟဲ့ ဇမ် အာခြာဝ် အန်။း မဲ ပွိုန် ဒီ ယဲတ့် ဖိုင် ဆီမန့် အီ စိူဝ် မာဂြေး ဘော ဖိုင် ဆီမန့် အီ စိူဝ် ဂွန် မာဂြေး။း

33 မဲ နပ် လွင် ပွုန် အီ ပါယ် ဒီ အိုပ် ခဲင် ဂါင်ဟြာဝ်။း မဲ နပ် ဒီ ဘူင် တဲး ပွုန် တီ အိုပ် ဘော ဒဲင် ကာဒါယ် နီ။း

34 မဲ နပ် ဒီ ဒတ် တာင် တဲး န့အု ထူမ် ဂြုဝ်း မဲ ဘော တဲး ဂ့လာယ် တာင် စုဝ်း ဒဲင် မဲ အူ ဇေန့်။း

35 မဲ ပွိုန် စ်ု ပ့လ မ့ပ့လေတ့်၊ တဲး န့ မာဘြိဝ် ဟာဝ်။း ဟဲ့ ဟွတ့် န့ ဘော နပ် ဒီ ဝီ တဝ်း ဒီ မဲ၊ ‘အုဝ် ကွယ် ဒီ နီ’။း

36 အာဆေ ဟဲ့ နပ် ဒီ ဒိုဝ်း အာငျာန်၊ ဝီ ဟပ် ခဲင် နဝ်း ဒူအီ။း အာဆေ နပ် ဒီ ဒိုဝ်း အီ ကာလှုး ဒီ နဝ်း ဘဲန် မျုဝ် ဘဲန် မျုဝ်၊ ဝီ ဟပ် အုန် ခဲင် နဝ်း ဖွိုမ် ဒူအီ။း

37 အာဆေ ဟဲ့ မိုဝ်း အာငျာန်၊ ဟဲ့ နပ် ဒီ တိး ခဲ့ ကွယ် န့အု။း အာဆေ ဟဲ့ ပွိုန် ဟုး လေး ကာပဝ် အိုမ် အီ ကွယ် ခဲင် ဂါင်ဟြာဝ်

38 ဒေါ ကာပုး ဟဲ့ ဝီ ပ့လူမ် ပီ ဟိန်၊ ဘော ကာဒါယ် ဟဲ့ ဝီ လာယ် ကာဒိုက် ရိတ်။း

39 မဲ ဝိန် ဒီ ဟြေတ့် ပီ ဒီ ဟူမ် အာဒါ မာခြင်ဆီ၊ ဘော ဟျီင် တဲး ဘော ဂွန် အန် ပွိုန် ဒီ ဟူမ်။

40 ဒေါ ဟဲ့ ကွယ် ချြီင် ဂေ ခဲင် ကာဒဝ် မာဝ် ဘော ဒေါ ဟဲ့ ကာတပ် ဘ်ု ဂေ ပီ ဒီ ဟူမ် ဘော ကွယ် ခြိုမ် ပြဲ။း

41 အာဆေ ဟျီင် ဂေ မာကာအ ဒေါ ဟဲ့ ကာပြာန့် ဂေ ပီ ဒီ ဟူမ် ဘော ဘိုန့် ဝိဝ် ဘိုန့် ဝေန့် ဒေါ ဟဲ့ ဟမ် ဒဲ့ ဂေ ဒီ ဇဝ်ဖြာ ဘော မှာန့် ပီ ဒီ ဟူမ်။း”