အာအေလီဟူ ပီ ဝီ ကာလာင် ဟာဝ် ပွါ တဝ်း၊ “ပွုန် ဇဝ်ဖြာ တီ တဲး နဝ်း အုဝ် ဒီယုး ဒီယေန့်။ ဖွိုမ် အုဝ် ကော နှဲန် ဒီ တူတ့်။

2 တဲး ဘေ ထူမ် ဂြုဝ်း ဇဝ်ဖြာ အီ ဟဲ့ တာင် ကာဆဝ်၊ ထူမ် ဘော ဟမ် ကာနမ် ဟဲ့ လေး ခဲင် မူတ့် အန်။

3 အန် ဇဝ် ဟဲ့ ဘ့လေး ပ့လ မ့ပ့လေတ့်၊ တဲး န့ ဟာဝ် ကာလတ့် ခဲင် ဘ့လေန့် ကော ဝီ ဇမ် ဒူင် ဆိူတ် ကာဒါယ်။

4 ဝါယ် အန် တီ ဟမ် ကာနမ် ဘော မာဘ့လိုင် တး၊ န့ ပီ ဂြုဝ်း ဇဝ်ဖြာ အီ တာင် ကာဆဝ် အီ ဘျ ခဲ့ တာင် ပွုန် အန်။

5 ဂြုဝ်း ပီ ကာလာင် ဇဝ်ဖြာ တီ န့ ဘော ပီ ဟမ် ကာနမ်။ န့ ဘော မွှိုမ် အာမ် ကာဆဝ်။ အန် ဇဝ် ဘော နပ် ဒီ ဘူင် အီ အာရေ တာင် ကာဆဝ် ပီ ဟူ နပ် အေ ဒီ ဇေန့်ဇာ။

6 အန် ဇဝ် မိူဝ် စ်ု အိုမ် ဒါတ်၊ တဲး န့ စုဝ်း ဒဲင် ကာဒါယ်။ အန် မိူဝ် စ်ု ဂ့လာယ်၊ တဲး န့ စုဝ်း ဟဲန့် ကာဆဝ်။

7 အန် ဇဝ် မိူဝ် ဘူင် တဲး ဂေ ဒူအီ ဒွန် အီ ပဲ့ ဟဲ့ ဖာန် ဘ့လေး အန် နပ်၊ န့ မုး ဇဝ်ဖြာ အီ ဟဲ့ ဘူင် ပါယ် တီ။ အန် ဘော ဘူင် တဲး ဂေ ဂိူတ် ဒီလှဝ် ဒီ ဘူင် ဂါန် ဂေ။

8 ခဲ့ ကွယ် ဂေ မာဒုဝ် ပြဲ မိူဝ် ဝီ လိုပ် ကွယ် ခဲင် ကာဒဝ် ဂေ။

9 ခုန် လာင် ဘော တး ဘ့လာက် နာ တေတ့်။ ခုန် ဂျီတ် ဘော တး ဘ့လာက် နာ ကွာ။

10 ဇဝ်ဖြာ ဘော ဟိုဝ်း ဖွိုမ် အန် အီ ဂျီတ် ကာဆဝ်၊ တဲး အိုမ် ကော ဂြုဝ့် ပ့လူမ်။ ဘော အိုမ် ဒိုင် ဘော အိုမ် နမ်မုက်ဆာရာ နပ် ဒီ ဂြုဝ့် ပ့လူမ် ပါယ် တီ။

11 အန် ဇဝ် ဘော ဟပ် ဂ့လာယ် ခဲင် န့အု၊ တဲး န့အု ဘော ဟေတ့် ကာဆဝ်။ ဟဲ့ ဟွတ့် အန် ဝီ တဲး ပ့လ မ့ပ့လေတ့် မာဘြိဝ် လေး ကာတဲ န့အု တီ။

12 အန် ဇဝ် ဘော တဲး ဂ့လာယ် ဂေ ခုန် လဲ လဲပ်၊ တဲး ဂေ ဘူင် ခဲ့ ပီ စ်ု အန်။

13 ဇဝ်ဖြာ တဲး ဂ့လာယ် တာင် စုဝ်း ဒဲင် ကာဒါယ် နီ၊ တဲး န့ ဒမ် မှာပ် ဒီ ဒူအီ။ အန် ဇဝ် ယွတ် မဲန် လိုမ်လာ ပြဲ ကာဒါယ်၊ တဲး ဒူအီ ဘော ယိုဝ် နဝ်း ရွက့် ကာဝေ အန်။

14 အိုယ် အာယုဝ်ဘာ၊ တဲး မဲ ထူမ် ဂြုဝ်း ပီ ကာလာင် အုဝ် နီ။ တဲး မဲ ဝီ ကာဒွါ့ ကာဖာ လွင် အီ ဟဲ့ မွှိုမ် အာမ် ကာဆဝ် ပဲ့ ဟဲ့ ဘူင် အန် ဇဝ်။

15 မဲ နပ်၊ ဇဝ်ဖြာ ပါယ် မှဝ် ဒီ အိုပ် န့အု၊ တဲး ဂေ ဘူင် ပီ အိုင် အန် ဘော ဘူင် တဲး န့ မိုဝ်း ပ့လ မ့ပ့လေတ့်။း

16 မဲ နပ်၊ မှဝ် ဇဝ်ဖြာ ပါယ် ဒီ ဘူင်၊ တဲး န့အု ဟာဝ် ခဲင် ဘ့လေန့်။း န့ ဘော ဘျ ပီ ဘူင် ဇဝ်ဖြာ ဟဲ့ မွှိုမ် အာမ် ကာဆဝ်။ န့ ဘော ဘျ လွင် အာငျာန် ဇဝ်ဖြာ ဟဲ့ ဇေ့ဇုင်၊ တဲး အန် ဘော နပ် ဒီ ဘူင် တူတ့် ဒွန် မျုဝ်။

17 ဆေ ခုန် ကာဟွာ့ ဟီ ဘုတ် တး ဘ့လာက် နာ တေတ့်၊ န့ ဒီ တဲး ခြိုင် တာ မဲ ကာဟွာ့ မှဲ ဒီ ဒုဝ် မဲ။

18 မဲ ယီ တူ ပွိုန် ဘ့လး ဘ့လေန့် ပီ ပီ ဘူင် အန် ဇဝ်။ မဲ တူ ပွိုန် တဲး န့ ကော ဝီ ပ့လူမ် ပီ ဘွင့် ဘော ကာလ မာဘြိဝ် ပီ အဲပ် ဇမ်။

19 တဲး မဲ မာနုဝ် ယေ၊ တဲး ယေ နပ် ပီ ဒီ ပါယ် ဒီ ကာလာင် ဒီ ဇဝ်ဖြာ။ ယေ အာဝ် ဟူ ပွိုန် ကာလာင် လွင် အာရေ ယေ။ ခုဝ်၊ ယေ ဟဲ့ ကွယ် ခဲင် အပ် ဝွင့်၊ အာဝ် ဟူ နပ် ပီ ဒီ ပါယ် ဒီ ကာလာင်။

20 န့ တူ ကာအာပ် အုဝ် ကာလာင် ဂြုဝ်း ဒီ ဇဝ်ဖြာ။ အာဝ် မိုဝ်း အာဆေ အီ ဟဲ့ ယ ကာလာင် ဆိူဝ် ဒီ ဇဝ်ဖြာ။ ခုဝ်၊ ဒွန် အီ ဘော ယုဝ် ဒီ ယမ်။

21 ဆေ ခုန် ဟဲ့ ဘုတ် ခဲင် ဂါင်ဟြာဝ်၊ တဲး ဘ့လာင် ဆီငဲ လိုဝ်း ဆီချာ၊ အာဝ် မိုဝ်း ဒူအီ အီ ပွိုန် ယွတ် ဘ့လာင် ဆီငဲ တီ။

22 အာရူင် ဘ့လာင် အီ ပီ ခြိဝ် ဘော တး ဘ့လာက် နာ ကွာ၊ န့ ပီ ဇဝ်ဖြာ ဟဲ့ ဘျ အာဖုင် ဒင်ခုဝ် အန် အီ မွှိုမ် ယုဝ် ကာဆဝ်။

23 အာဖုင် ဒင်ခုဝ် အန် ဇဝ် အီ အိုပ် တူတ့် ဒွန် မျုဝ် ဟဲ့ တာင် ကာဆဝ်။ အေ မိူဝ် တူ ပွိုန် ဟာဝ် ကာတတ် ဟာဝ် ချြီ့ အန် ဇဝ်။ အန် ဇဝ် ဘော မိုဝ်း နဝ်း ဆိူဝ် နဝ်း မှာန်၊ ဘော ဆုင်ဖျာတ် အာမူ ဒူအီ ဘောကာဂ့လျီတ် တဲး န့ ကာရမ်။

24 ခုဝ် အန် တီ၊ ဒူအီ ရုဝ်ဆေ အန် ဇဝ်။ အန် ဇဝ် ယီ တူ ယွတ် တူ ငွိုပ် ဒူအီ အီ ဟဲ့ ထာင် ဂေ ဟဲ့ လွှက့်၊ ဟဲ့ မိုဝ်း အာငျာန်။”