ဝါယ် အန် တီ အာအေလီဟူ ပီ ဝီ ကာလာင် ဟာဝ် ပွါ တဝ်း၊

2 “အုဝ် မှာန့်၊ တဲး မဲ အူတ် နဝ်း၊ ကွယ် ထူမ် ပေါ အီ စဲက်။ အုဝ် ဒီ ဘျ ပီ ပါယ် လွင် အန် ဇဝ် ပေါ န့ ပွါ။

3 အုဝ် ဒိုဝ်း တး ခဲ့ ပီ နပ် အုဝ် ဒီ ဂေ အီ ဟဲ့ ကွယ် တူင့် ကာဆဝ်။ အုဝ် ဒီ ဝီ ကာလာင် လွင် ဇဝ်ဖြာ အီ မိုဝ်း နဝ်း ဆိူဝ် နဝ်း မှာန် အီ ဟဲ့ ဖာန် ဘ့လေး အုဝ်။

4 ဂြုဝ်း ပီ ကာလာင် အုဝ် န့ ဘော မုး ဂြုဝ်း မုး ဂြုဝ်း မှာန် အာခါခ်ု။ ဝီ အီ ဟဲ့ မိုဝ်း အာငျာန် အီ ဇေ့ဇုင် ဟဲ့ ကွယ် ရိုမ် ဒူပ် မဲ။

5 ဇဝ်ဖြာ မိုဝ်း ပွုန် တာင် ကာဆဝ်။ ပီ ဘော ဟဲ့ ပါယ် တီ မိူဝ်၊ အန် ဇဝ် ယီ တူ ကာအိး အာဆေ။ အန် ဇဝ် မိူဝ် နပ် တူတ့် ဒွန် မျုဝ်။

6 အန် တူ တဲး ဂေ ဒူအီ ဟာယ် မိုဝ်း အာဆာက် တူင့်။ အန် ဇဝ် ယီ ဆုင်ဖျာတ် တဲး န့ ကာရမ် ဒီ ဂေ ဒူအီ အီ ဟဲ့ ကာဒုး ဒုက်။

7 အန် ဇဝ် ဘော ယွတ် မဲန် ဂေ အီ မိုဝ်း နဝ်း ဆိူဝ် နဝ်း မှာန် ဆေဆေ။ အန် ဘော ခ့ဝါင် တဲး ဂေ အိုပ် မိူင်၊ ဘဲန် အာမူ အာမာတ် ခုန်ဒီခမ်။ အန် ဘော တဲး ဂေ ပွိုန် ပီ အိူပ် မျုက် အီ ဟဝ်။

8 မာလဲ၊ ဆေ န့ မိုဝ်း ဒူအီ အီ ကာဒုး ပက် တာ ဝန် ဟိန်၊ ဘော ဝီ ခမ် ဒုက် ကူပ် ပီ ကာလိုပ် ဂေ၊

9 ဇဝ်ဖြာ ဘော ဝီ ဘျ ဒီ ဂေ လွင် ပဲ့ ဟဲ့ ဘူင် ဂေ မုး မှာပ်။ အန် ဘော ဘျ ဒီ ဂေ လွင် မိုဝ်း ဂေ နဝ်း ပီခိုက်။

10 အန် ဇဝ် ဝီ တဲး ဂေ ထူမ် ဂြုဝ်း ပီ မာနုဝ် အန် ဘော ဝီ ကာလာင် တဲး ဂေ ဝဲန် အီ တူ မွှိုမ် ပီ ဘူင် ဂေ။

11 ဆေ ဂေ ထူမ် ဂြုဝ်း အန် ဇဝ် ဘော ဘူင် ဂါန် အန်၊ ဂေ ဒီ ဘော ပွိုန် ဒီ ကွယ် ဒါခိုယ်၊ ကွယ် ဂျာမ်ဆာ ဘော စုဝ် ဂေ။

12 ဆေ ဂေ ယီ တူ ဒိုဝ်း တူ ထူမ် ဂြုဝ်း အန် ဇဝ် တီ၊ ဂေ ဒီ ဘော ခမ် အာဖေ အာရေ။ ဂေ ဒီ လိုဝ် စှိုမ် ဒီ မာပွါ့ လာင် ဘော ယမ် ဟာဝ် ကူပ် တူ မိုဝ်း ဂေ အာငျာန် မာဆေ။

13 ဂေ ဒူအီ အီ တူ မိုဝ်း နဝ်း ဆီ ရုဝ်ဆေ ဇဝ်ဖြာ၊ ဂေ ဘော ရူ ဘော အုန် နဝ်း ဒီ အန် ဇဝ်။ ဂေ ပီ ဘော ဟဲ့ ကာဒုး ဒီ ခမ် မှာပ် ဂေ မိူဝ်၊ ဂေ ယီ တူ ဆာခိုဝ် တဲး အန် ဇဝ် စွယ် ဂေ။

14 ဒူအီ ဂေ တီ၊ ဂေ မိူဝ် ဒီ ဘော ယမ် ဒေါ ဆီ နှိုမ် ဆီ ဒီရွယ် ဂေ။ အာဆာက် ဂေ ဒီ ဘော စှိုမ် ဒေါ ကွယ် ရိုမ် ဂေ ဒူပ် ဒူအီ အီ ဘူင် အီ မွှိုမ် ဆာယ်။

15 မာလဲ၊ ဇဝ်ဖြာ ယီ ဒီ ပွိုန် ဒီ ချွတ် ဒူအီ အီ ခမ် ဒုက် တာင်။ ဒေါ ခမ် ဂေ ဒုက် တာင် တီ၊ န့ တဲး ဂေ ဝီ မိုဝ်း နဝ်း ဆီ ထူမ် ဂြုဝ်း ဇဝ်ဖြာ။

16 ပါယ် တီ ဇဝ်ဖြာ ဆီ ယဲတ့် တဲး မဲ လေး ခဲင် အီ ဒုက် အီ ညှာပ် ဒီ နဝ်း မဲ တီ၊ တဲး မဲ ဝီ ကွယ် ဒူင် ဒါခိုယ် ကာဝဝ်း အီ တူ မိုဝ်း အီ ဂိတ် အီ ခူင် မာဆေ။ အန် ဇဝ် ဒီ ဝီ ဒွါ ပီ ဒီ ဟူမ် အီ ဆီငဲး၊ တဲး န့ ကော ဝီ နုဝ့် ဒဲင် မာတိန့် ဘူမ် မဲ။

17 မာလဲ၊ ဒေါ တီ နီ မဲ ယီ ဟဲ့ ဟွတ့် ခမ် အန် ဇဝ် ဒမ် မှာပ် ဒီ မဲ ခဲ့ ကာအာပ် ခမ် ဒူအီ ဟာယ် ဒူအီ မိူက်။ အန် ဇဝ် ယီ ဟဲ့ ဟွတ့် ဆုင်ဖျာတ် ခဲ့ ပီ ဘူင် ကာလိုပ် မဲ။

18 တဲး မဲ ဆာဒိက် ယုဝ် အီ ဟဝ် ဝီ ကာဆုး မဲ၊ တဲး မဲ ဝီ မိုဝ်း နဝ်း ဆီ ပွိုန် ကိူန် ကြုဝ်ကြာမ်။ ကွဲ့ တဲး မဲ ကာလိုပ် ဒီ ဒိုဝ်း ရွိုန် ပီ ပြာ အီ ဟဝ် ဒီ ဒွါ။

19 ကြုဝ်ကြာမ် ဇိုဝ် တီ ဒွန် မျုဝ် ဘော ခဲ့ ဂျုဝ်ဂျာ မဲ ဒီ ဘူင်၊ န့ တူ ပဲ ဒီ တဲး မဲ လွတ် ခဲင် ဒုက်။

20 ကွဲ့ တဲး မဲ ကာပြာ တဲး န့ ဇမ် ခဲင် မှိုဝ်။ ခုဝ်၊ န့ မုး အာခြာဝ် ဟဲ့ ယမ် ဟဲ့ ဟြာယ် ဒူအီ ကိူန် ဘဲန် မျုဝ် ဘဲန် မျုဝ် ဒေါ ကာဂုဝ်း ဂေ။

21 တဲး မဲ ဆာဒိက်၊ ကွဲ့ တဲး မဲ ဝီ ဘူင် မှာပ်။ ဒုက် တာင် ပီ ကာဒုး မဲ တီ၊ န့ ဟဲ့ ခြဲ မဲ၊ တဲး မဲ ပဲ ဒီ ဝး မှာပ် တီ။

22 အာဖုင် ဒင်ခုဝ် ဇဝ်ဖြာ ယီ ဟဲ့ တာင် ကာဆဝ်။ အာဝ် မိုဝ်း အာဆေ အီ ဟဲ့ ပွိုန် မာနုဝ် မဲ ပီ အန် ဇဝ်။

23 အာဝ် မိုဝ်း အာဆေ အီ ဟဲ့ ပွိုန် စ်ု ဇဝ်ဖြာ ဘူင် ဂါန် အန်။ အာဝ် မိုဝ်း အာဆေ ဟဲ့ ပွိုန် တဝ်း၊ ‘မဲ ဇဝ် ဟဲ့ ဘူင် ကာလိုပ်။’

24 ဒူအီ ဟဲ့ တဝ်း မှုဝ် အီ အိူပ် မျုက် လွင် ပဲ့ ဟဲ့ ဘူင် အန် ဇဝ်။ တဲး ဘော မဲ ဝီ အိူပ် မျုက် အန် ဇဝ် ပါယ် တီ။ ကွဲ့ တဲး မဲ ပိဝ်။

25 ခဲ့ ကွယ် ဒူအီ ဘောကာဂ့လျီတ် ဒဲင် ကာဒါယ်၊ ဂေ ဟဲ့ ယိုဝ် ပဲ့ ဟဲ့ ဘူင် အန် ဇဝ် တီ။ ဂေ ယီ ကွယ် ကာတူင့် ယွတ်။

26 အေ တူ ပွိုန် နပ် ခဲ့ တာင် ဇဝ်ဖြာ။ အာဆာက် အန် ဇဝ် မိူဝ် တူ ပွိုန် တိး။

27 အန် ဇဝ် ဘော ဘူင် တဲး အိုမ် ဒဲင် ကာဒါယ် ဝီ ဟုဝ့် နာ ဒဲင်၊ တဲး န့ ဝီ ဘဲန် ဂ့လာယ်။

28 ဟဲ့ ဟွတ့်၊ အိုမ် ဂ့လာယ် ဝီ စုဝ်း လူင် ခဲင် န့အု၊ ဝီ ဘဲန် ဂ့လာယ် တာင် အာဒါ ဒူအီ ဘောကာဂ့လျီတ်။

29 အာဝ် မိုဝ်း အာဆေ အီ ဟဲ့ ပွိုန် နပ် လွင် န့အု အီ ကာယဝ်း ဟာဝ် ဒွန် ပ့လုဝ့်။ န့ မိူဝ် တူ မိုဝ်း အာဆေ အီ နပ် လွင် ဟမ် ကာနမ် အီ ဟဲ့ လေး တး ဒူင် ကွယ် အန် ဇဝ်။

30 အန် ဇဝ် မိူဝ် ဘ့လေး ပ့လ မ့ပ့လေတ့် အန်၊ တဲး န့ ကော ကာလတ့် ခဲင် ဘ့လေန့်။ အန် ဇဝ် ပီ ဝီ ဒိုဝ်း အပ် ဝွင့်၊ ဝီ ဆီဘ့လိုက် အုန် ကာဒမ် အိုမ် နမ်မုက်ဆာရာ ဒူင် လိုက် ကာဆဝ်။

31 အန် ဇဝ် မိူဝ် ဒိုဝ်း ပွုန် အန် တီ၊ ဝီ ဆုင်ဖျာတ် ဒါရာ ဒီ ဒူအီ ဘောကာဂ့လျီတ်။ အန် ဝီ ဒွါ ပီ ဒီ ဟူမ် ဒီ ဂေ၊ တဲး န့ ကော ဝီ ကာလူယ် ကာလွှိုမ်။

32 န့ ပီ အန် ဇဝ် ဟဲ့ ကာနျီမ် နုဝ့် ပ့လ မ့ပ့လေတ့် ခဲင် ဒဲ အန်၊ ဝီ ဘ့လေး အာမိင် ဒီ ပ့လ မ့ပ့လေတ့် တီ၊ တဲး အန် ဟာဝ် ဒူင် ဟဲ့ ယေင် အုန် အန် ဇဝ်။

33 ဟမ် ကာနမ် ပီ ဘ့လေး အန် ဇဝ်၊ န့ ဘော ဘျ လွင် ခုန် တာင် ဘော ဂ့လာယ် တာင် ဒီ တး။ ဘော ဖိုင် မာဘူ ဂေ ဖိုင် မာမက် နပ် လွင် ခုန် တာင် ဂေ ဂ့လာယ် တာင် ဒီ တး။”