1 ဝါယ် အန် တီ အာယုဝ်ဘာ ဝီ ကာလာင် ဒီ ဇဝ်ဖြာ တဝ်း၊

2 “အုဝ် ဟဲ့ ဟွတ့် နပ်၊ မဲ ဇဝ် ပွိုန် ဘူင် တူတ့် ဒွန် မျုဝ်။ န့ မိူဝ် တူ မိုဝ်း အာဆေ အီ ပွိုန် ခြဲ ပီ ခြာမ် မဲ ဇဝ် ဒီ ဘူင်။

3 မဲ ဇဝ် မိူဝ် ဟဲ့ ဒီမွှတ် တဝ်း၊ ‘ဒူအီ အီ တူ မိုဝ်း အာငျာန် ယီ တဝ်း၊ အာကျာမ် အာငျာန် အုဝ် တူ မွှိုမ်၊ န့ မုး အာဆေ။း’ န့ မုး အုဝ် အီ ဟဲ့ ကာလာင် ဘဲန် မျုဝ် ဘဲန် မျုဝ် ပီ တူ နပ် အုဝ်။ အုဝ် မိူဝ် ဟဲ့ ကာလာင် လွင် အီ မွှိုမ် အာမ် ဘဲန် မျုဝ် ဘဲန် မျုဝ် အီ တူ ကာလှုး ဒီ နဝ်း အုဝ်။

4 မဲ ဇဝ် မိူဝ် ဟဲ့ တဝ်း၊ ‘တဲး မဲ ထူမ် ဂြုဝ်း ပီ ကာလာင် အုဝ်။ အုဝ် ဒီ ဒီမွှတ် မဲ၊ ဟဲ့ ဟွတ့် တဲး မဲ ဝီ ကာလာင် ဝျီ့ ဂြုဝ်း အုဝ်။’

5 အာတ့် နီ အုဝ် နပ် မီ ခဲ့ ပီ ကာလာင် အီ ဟဝ် လွင် မဲ ဇဝ်။ ဒေါ တီ နီ န့ ပီ အုဝ် ဟဲ့ ယိုဝ် မဲ ဇဝ် ဒီ ငါယ် အုဝ်။

6 ကူပ် န့ ပါယ် တီ အုဝ် ဟဲ့ ဝီ ဆာယ် ကူပ် ဂြုဝ်း ပဲ့ ဟဲ့ ဟွတ့် အုဝ် ကာလာင်။ အုဝ် ဝီ တုတ့် ခဲင် ကာပုး ဘော ခဲင် ကာဝှါင်၊ ဝီ လှုဝ်း မှာပ် ပဲ့ ဟဲ့ လုတ့် အုဝ် တီ။”

7 ဝါယ် ဟဲ့ ဟွတ့် ဇဝ်ဖြာ ကာလာင် ဂြုဝ်း ဒီ အာယုဝ်ဘာ အန် ဝီ ကာလာင် ဒီ အာအေလီဖာတ် အီ မုး ဒူအီ မိူင် ထေမာန် တဝ်း၊ “အုဝ် ဟဲ့ ရူ ဒီ မဲ ဘော ဒီ ဂိုက် မဲ။ ခုဝ်၊ ဘေ တူ ကာလာင် လွင် အုဝ် အီ မုး အီ မှာန် ပီ ပီ ကာလာင် ဒဲစေန့် အုဝ် အီ စိူဝ် အာယုဝ်ဘာ နီ။

8 ခုဝ် အန် တီ၊ တဲး ဘေ ဒိုဝ်း မက် အာလူင့် ဘူ ဒုဝ်၊ ဘော မာဘူ အာလူင့် ဘူ ဒုဝ်၊ ဟာဝ် ဒူင် ကွယ် အာယုဝ်ဘာ အီ မုး ဒဲစေန့် အုဝ်၊ တဲး အန် လှူ ပီ ဒီ လှူ အီ ဒုဝ့် ဒီ ငဝ် အာဒါ ဘေ။ ဒဲစေန့် အုဝ် အီ စိူဝ် အာယုဝ်ဘာ၊ အန် ဘော လုဝ် ဆာခိုဝ် ဒါင် ဘေ။ အုဝ် မိူဝ် ဒီ ထူမ် ဂြုဝ်း ပီ ဆာခိုဝ် အန်၊ တူ ဒမ် မှာပ် ပဲ့ ဟဲ့ ကာအာပ် ဘေ ခမ်။ ခုဝ်၊ ဘေ တူ ကာလာင် လွင် အုဝ် အီ မုး အီ မှာန် ပီ ပီ ကာလာင် အန်။”

9 ပါယ် တီ အာအေလီဖာတ် အီ မုး ဒူအီ မိူင် ထေမာန်၊ အာဘီလာဒတ် အီ မုး ဒူအီ မိူင် ဆူဟိတ် ဘော အာစောဖ အီ မုး ဒူအီ မိူင် နေမာတ်၊ ဂေ မိူဝ် ဘူင် ဒူပ် ခဲ့ ပီ ဒမ် ဇဝ်ဖြာ ဂေ ဘူင်။ ဇဝ်ဖြာ မိူဝ် ထူမ် ဂြုဝ်း ပီ ဆာခိုဝ် အာယုဝ်ဘာ။

10 အာယုဝ်ဘာ ဟဲ့ ဟွတ့် ဆာခိုဝ် ဒါင် ဂေ ဂိုက် အန် တီ၊ ဇဝ်ဖြာ ဝီ တဲး အန် မိုဝ်း ကြုဝ်ကြာမ် ကိူန် လွှိုမ် ခဲ့ ပီ ဒွိုမ် မိုဝ်း အန် အာတ့် နီ၊ တဲး န့ ဝီ ဘဲန် အာ ဘုန်။

11 ပါယ် တီ ဂေ ဘီနွင် အူကတ် အူဝါ အန် ဘော အီဘိုန့် အီမာယ်၊ ဂေ ဘောကာဂ့လျီတ် ဘော ဂေ ဂိုက် အန် အီ ဟဲ့ လာယ် ဒွိုမ် ဒီ အန် အာတ့် နီ၊ ဂေ ဒွန် အီ ဝီ တး စ်ု တး လဲ ဒီ အန်။ ဂေ မိူဝ် ဝီ တး ဟူမ် ကျဝ် ဟူမ် ဖဲ ဒီ ကာင် အန်။ ဂေ ဝီ ဘျ လွင် ရွက့် ကာဝေ ဂေ ဒီ အန်။ ဂေ မိူဝ် ကာလာင် ဂြုဝ်း တဲး န့ ဘဲန် ပ့လူမ် ဘဲန် ဟဲန့် ဒီ နဝ်း အန် ကူပ် ဒုက် ပဲ့ ဟဲ့ တဲး ဇဝ်ဖြာ အန် ခမ်။ ဂေ မိူဝ် ဒွါ ရွိုန် ဒီ အန်၊ အူ ဝီ အူ ဘူင့်။ ဂေ ဒွါ ဘော ဆီကာနူ ခြိဝ် အူ ဝီ အူ ဘူင့် ဒီ အန်။

12 ပါယ် တီ ဇဝ်ဖြာ ဝီ မွင့်ကာရာ ဒွါ နာ မွှိုမ် ဒီ အာယုဝ်ဘာ၊ တဲး န့ ကိူန် လွှိုမ် ခဲ့ ပီ ဒွိုမ် မိုဝ်း အန် အာတ့် နီ။ အန် ဝီ မိုဝ်း မာဘူ အူ မှိုန့် ဒီ ဖွုန် ဟြဲန့် ဒုဝ်၊ မင်ပြွင့် ကာဟာတ့် ဒဝ် ဟြဲန့် ဒုဝ်၊ မာမက် အူ ဟြဲန့် ဂူ။ မာလာ အာဟျာင် အူ ဟြဲန့် ဒုဝ်။

13 အန် ပီ ဝီ မိုဝ်း ဂွန် အီမာယ် ပေါ ဘူ ဝီ၊ ဂွန် အီဘိုန့် ပေါ အူယ် ဝီ။

14 အန် မိူဝ် တဲး ဂွန် အီဘိုန့် အန် ဝီ တာင် စိူဝ် နာင် ယေမီမာ။ ဂွန် အီဘိုန့် ဝီ ကာတဲ ဘော စိူဝ် နာင် ကေစီယာ ဘော ဂွန် အီဘိုန့် ဝီ တျီ့ စိူဝ် နာင် ကြေဟာဖုတ်။

15 ခဲင် မိူင် တီ ဘော မိူင်၊ အာဝ် မိုဝ်း ဂွန် အီဘိုန့် အီ စှိတ် ပီ ဂွန် အီဘိုန့် အာယုဝ်ဘာ ဂေ တီ။ ဂုန့် ဂေ မိူဝ် ကာဆာင် ခါဂုန် ဒီ ဂေ၊ တဲး န့ ကာရမ် ဂွန် အီမာယ်၊ တဲး န့ မုး အူ မျုဝ် ဒွန် အီ။

16 ဝါယ် အန် တီ အာယုဝ်ဘာ ဝီ ကွယ် ပေါ အူ မာယဝ်း ဒီ ဖွုန် ဂိုဝ် ဆီနမ်။ အန် ဝီ ပွိုန် ဒီ ယိုဝ် လှာန် အန် ဘော လှဲန် အန်၊ ကော ဝီ နုဝ့် ဖွုန် စုဝ်။

17 ဝါယ် အန် တီ အန် မိူဝ် ဟဲ့ ကတ် ကာဆဝ် ဘော ယမ်။