အိုယ် အာယုဝ်ဘာ၊ ဒေါ တီ နီ တဲး မဲ ထူမ် ဆီချာ ဂြုဝ်း ပီ ကာလာင် အုဝ်၊ တဲး မဲ နုဝ် တူတ့် ဒွန် မျုဝ် ဂြုဝ်း ပီ ကာလာင် အုဝ်။

2 အုဝ် မိူဝ် ဟဲ့ ဆီ ကာလာင် ကာဆဝ် ဂြုဝ်း။ ဂြုဝ်း ပီ ဆီ ကာလာင် အုဝ် မိူဝ်၊ ဟဲ့ ဆီ လေး ကာဆဝ် ခဲင် မူတ့် အုဝ်။

3 ဂြုဝ်း ပီ ကာလာင် အုဝ် တီ၊ န့ ဘော မုး ဂြုဝ်း ဆိူဝ် ဆိူဝ် မှာန် မှာန် ဒွန် ဒဲ။ အုဝ် မိူဝ် ဒီ ကာလာင် မီ ဂြုဝ်း အီ မုး အီ မှာန် ခဲ့ ပီ နပ် အုဝ်။

4 နဝ်း ဖွိုမ် ဇဝ်ဖြာ ဟဲ့ ဖာန် ဘ့လေး အုဝ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဟပ် ဖွိုမ် အန် ခဲင် ဒုဝ် ဘူင့် အုဝ်၊ တဲး အုဝ် မိုဝ်း အာဆာက်။

5 ဆေ မဲ နပ် ဒီ ဝီ ဝျီ့ ဂြုဝ်း အုဝ် တီ၊ တဲး မဲ ဝျီ့။ တဲး မဲ ရဲန် အုန် ဂြုဝ်း ပီ ဒီ ကာလာင် မဲ၊ တဲး မဲ ကာလာင် ဆိူဝ် ဒီ အုဝ်။

6 အုဝ် ဘော ပီ မဲ ဒီ အာတ့် ဇဝ်ဖြာ။ အန် ဇဝ် ဟဲ့ ဒိုဝ်း ကာဒါယ်၊ ဖာန် ဘ့လေး ဘော မဲ ဘော အုဝ်။

7 ပါယ် တီ မဲ တူ လုဝ် ယုဝ် အုဝ်။ အုဝ် မိူဝ် တူ ကာအာပ် ဘူင် တဲး န့ ဒုက် ညှာပ် ဒီ နဝ်း မဲ။

8 အုဝ် ဟဲ့ ယိုဝ် ဆီချာ ဂြုဝ်း ပီ ကာလာင် မဲ။ မဲ ဟဲ့ တဝ်း၊

9 ‘အုဝ် တူ မိုဝ်း ဒီ ဘူင် အီ တူ မွှိုမ်၊ တူ မိုဝ်း ဒီ ဘူင် လုတ့် ဒေါ မှဝ်။ နဝ်း အုဝ် ဟဲ့ ဆီငါ တူ မိုဝ်း မှာပ် မာဆေ။

10 န့ ယီ မုး ဇဝ်ဖြာ အီ တူ အိုင် အုဝ်၊ မာတ် အုဝ် မုး ရန်ဆူ အန်။

11 အန် ဇဝ် ဟဲ့ ဒိုဝ်း ထာင် စှိုပ် ဒီ ပ့လဝ် အုဝ် ဘော ဘ်ု ဒူပ် န့တေန့် ဒူင် ဝဝ့် အုဝ် ဒွန် ပ့လုဝ့်။’

12 အိုယ် အာယုဝ်ဘာ၊ အုဝ် ကာလာင် ဒီ မဲ၊ ပီ ကာဖာ မဲ တီ၊ န့ တူ မှာန်။ ခုဝ်၊ ဇဝ်ဖြာ ဟဲ့ ဘွတ် ဟဲ့ မျာတ် လွှိုမ် ဒူအီ။

13 မှဝ် န့ ပါယ် ပီ ပိုန့် မဲ ဒီ ဇဝ်ဖြာ ဘော တဝ်း၊ ‘အန် ဇဝ် တူ ထူမ် ဂြုဝ်း အုဝ် ခေါ အူ ဒဲ။’

14 ဇဝ်ဖြာ ယီ ဟဲ့ ဝျီ့ ဂြုဝ်း အီ။ အူ စိုပ် အန် ဟဲ့ ကာလာင် အူ မျုဝ်။ ပေါ အူ စိုပ် အန် ပီ ဝီ ကာလာင် ပေါ အူ မျုဝ်။ န့ ယီ မုး ဒူအီ အီ တူ နပ် ဒီ ထူမ်။

15 ခဲင် မှိုဝ် ဒေါ ဟဲ့ ပွိုန် ဂေ ဒီ အိတ် ဒါခိုယ် ဒါခိုယ် ဒဲင် ကာစှူင့် အိတ် ဂေ၊ ဇဝ်ဖြာ ဘော နပ် ဒီ ကာလာင် ဂြုဝ်း ဒီ ဂေ ဒေါ မ့ဘာဝ် ဂေ ဘော ဘျ နီမိက် ဒီ ဂေ။

16 အန် ဇဝ် တဲး ဂေ ထူမ် ဂြုဝ်း အန်၊ တဲး ဂေ ဘော ဝီ ကာစွာ လွင် ဂြုဝ်း ပီ မာနုဝ် အန် တီ။

17 အန် ဆီ တဲး ဂေ ဝဲန် ပီ ဘူင် ဂေ အီ တူ မွှိုမ်၊ တဲး ဂေ ဝဲန် ဘော နဝ်း ပီခိုက် ဂေ။

18 အန် ဇဝ် မိူဝ် ချွတ် ဂေ၊ ကွဲ့ တဲး ဂေ ဇမ် ခဲင် ကာဒဝ် ဘာရေဝ်။ ဘော ကွဲ့ တဲး အာဆာက် ဂေ စှိုမ် ဒီ မာပွါ့ လာင် အီ ဟဝ်။

19 ဇဝ်ဖြာ မိူဝ် မာနုဝ် ဂေ ဒူအီ၊ တဲး ဂေ မိုဝ်း ဆဝ် ရောဂါ၊ အာဝ် ပွိုန် ယိတ့် ဒဲင် ကာစှူင့် အိတ် ဂေ။ န့ ဘော ဆဝ် ဇမ် ခဲင် ကာအာင် ဂေ ဒွန် ပ့လုဝ့်။

20 န့ တဲး အန် ကော ပိုဝ် ပီ ဒီ ဟူမ်။ ကွဲ့ တဲး အန် မိုဝ်း နဝ်း ဆီ ဟူမ် မာဆေ အီ ဆီငဲး ကာဆဝ်။

21 ယင် အန် မိူဝ် ကြဲ ဒီ ယူမ် လူင်၊ တဲး န့ ကော ဂိတ် မီ ဟုန် ဂါယ် ကာအာင်။

22 အန် မိူဝ် ဟဲ့ ရိန် ဒီ ယမ် ဟာဝ် ကွယ် ခဲင် ဘာရေဝ်။ ဇဝ် မာရာန မိူဝ် ဟဲ့ ဘ်ု ဒီ ရွုး အန်။

23 ဆေ န့ ယီ မိုဝ်း အာမူ အာမာတ် ဇဝ်ဖြာ အူ ကာဒင် အီ ကွယ် ခဲင် ဖိုင် ဘဲန် ဟြဲန့် ဘဲန် ဟြဲန့်၊ အန် ဘော နပ် ဒီ ကာလာင် နာ မုး နာ မှာန် ဒီ ဒူအီ၊ ဘဲန် ဒူအီ ဒီ ကာတဲ။ ဆေ အန် ဘော မိုဝ်း နဝ်း ဆီ စွယ် ဒူအီ ဝီ တီ၊

24 ဆေ အန် ဘော ဝီ ကာလာင် ဒီ ဇဝ်ဖြာ တဝ်း၊ ‘ကွဲ့ တဲး အန် ယမ်။ ဟဲ့ ဟွတ့် မိုဝ်း အီ ဒီ ထုတ် လေး အန်။’

25 ဆေ န့ မိုဝ်း အာမူ အာမာတ် ဇဝ်ဖြာ အူ ကာဒင် အီ ဘူင် ပါယ် တီ ဒူအီ အီ ဟဲ့ ရိန် ဒီ ယမ် တွိုန်၊ အန် ဒီ ကဲန်၊ ဝီ မိုဝ်း ပ့လူမ် မိုဝ်း ဟဲန့် ပီ ဒေါ ဆီ နှိုမ် အန်။

26 ဒေါ ဆာခိုဝ် ဒူအီ တီ၊ ဇဝ်ဖြာ ဒီ ဝီ ထူမ် ဂြုဝ်း ပီ ဆာခိုဝ် အန်။ အန် မိူဝ် ဒီ ခူယ် ဒါခိုယ်၊ ဝီ အိူပ် မျုက် ဇဝ်ဖြာ။ ခုဝ်၊ ဇဝ်ဖြာ ဟဲ့ ဝီ ဒွါ နဝ်း ဆိူဝ် နဝ်း မှာန် ဒီ အန် ဘော တူ တဲး အန် ယမ်။

27 အန် ဒီ ဝီ တဝ်း မှုဝ် နာ အာတ့် ဂေ ဒူအီ ကိူန် တဝ်း၊ ‘အုဝ် ဟဲ့ ဟွတ့် ကာလိုပ်။ အုဝ် ဟဲ့ ဝီ ကာဘ့လျီ့ တဲး အီ မုး အီ မှာန်၊ ဝီ ဘဲန် အီ တူ မှာန်။ အုဝ် ယီ တူ လုဝ် ဝီ ခမ် မှာပ် ပီ ကာအာပ် အုဝ် ခမ်။

28 အန် ဇဝ် မိူဝ် ဟဲ့ ချွတ် အုဝ်၊ တူ တဲး အုဝ် လူင် ဇမ် မိူင် မာရာန။ အုဝ် မိူဝ် ဒီ ဝီ ဘျုဝ် ဒါခိုယ်၊ ဝီ ကွယ် ခဲင် ဘ့လာင်။’

29 ဇဝ်ဖြာ ဘော ဘူင် နာ မွှိုမ် ပါယ် တီ ဒီ ဒူအီ၊ တဲး န့ ကော နုဝ့် အာ စိုပ်၊ အူယ် စိုပ်။

30 အန် ဇဝ် ဘူင် တဲး ဒူအီ လွတ် စုဝ်း မိူင် မာရာန၊ တဲး ဂေ ဝီ ကွယ် ခဲင် ဘ့လာင်။

31 အိုယ် အာယုဝ်ဘာ၊ တဲး မဲ ဆာဒိက် ဘော ထူမ် ဂြုဝ်း အုဝ် နီ။ တဲး မဲ ကွယ် နှိမ် နှိမ်၊ တဲး အုဝ် ပွိုန် ဒီ ကာလာင် ဟာဝ် ပွါ။

32 ပီ ဘော ဟဲ့ ပါယ် တီ မိူဝ်၊ ဆေ မဲ ယီ မိုဝ်း ပီ ဒီ ကာလာင်၊ တဲး မဲ ကာလာင်။ အုဝ် ဆီ တဲး န့ ဘဲန် နာ မုး နာ မှာန် ဒီ မဲ။

33 ဆေ မဲ ယီ တူ မိုဝ်း ပီ ဒီ ကာလာင်၊ တဲး မဲ ကွယ် နှိမ် နှိမ်၊ ထူမ် ဂြုဝ်း အုဝ်။ အုဝ် ဒီ မာနုဝ် ဒွါ အာငျာန် ဒီ မဲ။