1 ပါယ် တီ ဂေ အူယ် ဝီ အာဝ် ဟူ မိုဝ်း ပီ ဒီ တဝ်း မာဆေ ဒီ အာယုဝ်ဘာ။ ခုဝ်၊ အာယုဝ်ဘာ ယိုဝ် မီ နာ ဆိူဝ် နာ မှာန် ပီ ဘူင် အန်။

2 မာလဲ၊ အာအေလီဟူ အီ မုး ဂွန် အာဘာရာခီလာ ဘော ဒူအီ အာမျုဝ် ဘူစာ၊ န့ကြိုဝ်း အာရာမ် တွိုန်၊ အန် ဘော ရူ ကာဆဝ် ဒီ အာယုဝ်ဘာ ကူပ် အာယုဝ်ဘာ ဟဲ့ ထာင်၊ အန် ဟဲ့ မှာန် ဒီ အာတ့် ဇဝ်ဖြာ။

3 အာအေလီဟူ တီ ဘော ဝီ ရူ ဘော ဒီ ဂေ ဂိုက် အာယုဝ်ဘာ အူယ် ဝီ တွိုန် ကူပ် တူ မိုဝ်း ဂေ ဒီ ဘျ မှာပ် ပီ ဘူင် အာယုဝ်ဘာ။ မာလဲ၊ ဂေ ယီ တဝ်း အာယုဝ်ဘာ ဟဲ့ ကာလိုပ်။

4 အာအေလီဟူ ဟဲ့ ကွယ် ဘ်ု၊ တဲး အန် ပွိုန် ဒီ ကာလာင် ဒီ အာယုဝ်ဘာ ဝါယ် ဟဲ့ ဟွတ့် ကာလာင် ဂေ အူယ် ဝီ တီ။ ခုဝ်၊ အာဆာက် ဂေ ဟဲ့ ကိူန် လွှိုမ် အာဆာက် အန်။

5 ဒေါ ဝီ ယိုဝ် အန် ဂေ အူယ် ဝီ တီ၊ ဂေ အာဝ် ဟူ မိုဝ်း ပီ ဒီ ကာလာင် ဂေ ဒီ အာယုဝ်ဘာ အန် ဘော ရူ။

6 ခုဝ်၊ အာအေလီဟူ အီ မုး ဂွန် အာဘာရာခီလာ ဘော ဒူအီ အာမျုဝ် ဘူစာ ဝီ တဝ်း၊ “အုဝ် နီ၊ အာဆာက် အုဝ် ယီ ဆီ ပြေတ့်၊ အာဆာက် ဘေ ယီ ဟဲ့ ကိူန်။ ခုဝ်၊ အုဝ် ဟဲ့ ယုဝ်၊ တူ ယ ကာလာင် ခဲ့ ပီ နပ် အုဝ်။

7 အုဝ် တဝ်း၊ ‘န့ ကာအာပ် ဒူအီ ကတ် ဒူအီ ဂဲ ကာလာင် ဂြုဝ်း။ ဒူအီ အာဆာက် အီ ဟဲ့ ကိူန်၊ ဟဲ့ ကာအာပ် မာနုဝ် အာငျာန် ဒီ အီ။’

8 ဒူအီ အေ နီ၊ အေ မိုဝ်း နဝ်း ဖွိုမ် ပီ ဒွါ ဇဝ်ဖြာ ဒီ အေ။ နဝ်း ဖွိုမ် တီ တဲး အေ မိုဝ်း အာငျာန်။

9 အာဝ် မုး မီ ဒူအီ ကတ် ဒူအီ ဂဲ မိုဝ်း အာငျာန်။ အာဝ် မုး မီ ဒူအီ အာဆာက် အီ ဟဲ့ ကိူန် နပ် အီ မုး အီ မှာန်။

10 ကူပ် န့ ပါယ် တီ အုဝ် တဝ်း၊ ‘တဲး ဘေ ထူမ် ဂြုဝ်း အုဝ်၊ တဲး အုဝ် ပွိုန် ဒီ ကာလာင် နှဲ ဒီ ဘေ ခဲ့ ပီ နပ် အုဝ်။’

11 အုဝ် ဟဲ့ ဘ်ု ဒီ ထူမ် ဂြုဝ်း ပဲ့ ဟဲ့ ကာလာင် ဘေ။ အုဝ် ဘော ထူမ် ပီ ပါယ် အာငျာန် ဘေ။

12 အုဝ် ဟဲ့ အုန် နဝ်း ဒီ ထူမ် ဆီချာ ဆီချာ ဂြုဝ်း ဘေ။ အုဝ် ယီ တူ ယိုဝ် ခေါ အူ ဝီ အီ ပွိုန် ကာလာင် ဘျ လွင် မှာပ် အာယုဝ်ဘာ။ န့ မိူဝ် တူ မိုဝ်း ခေါ အူ ဝီ အီ ပဲ ဒီ ဝျီ့ ဂြုဝ်း အန်။

13 ဆေ ဟီ ပါယ် တီ ဘေ တူ ပွိုန် တဝ်း၊ ဘေ ဟဲ့ မိုဝ်း အာငျာန်။ တဲး န့ မုး ဇဝ်ဖြာ ကာလာင် အီ မုး အီ မှာန် ဒီ အာယုဝ်ဘာ။ ကွဲ့ တဲး န့ မုး ဒူအီ။

14 အာဝ် မုး အာယုဝ်ဘာ ဟဲ့ ကာလာင် ဂြုဝ်း အန် ဒီ အုဝ်။ အုဝ် မိူဝ် တူ ကာလာင် ဒီ အန် ပီ ပဲ့ ဟဲ့ ကာလာင် ဘေ။

15 အိုယ် အာယုဝ်ဘာ၊ ဒူအီ ဂေ နီ ဟဲ့ ဟွတ့် ဂ့၀ွင် ခဲင် နဝ်း ဂေ။ ဂေ အာဝ် ဟူ မိုဝ်း ဂြုဝ်း ပီ ဒီ ဝီ ဝျီ့ ဂေ ဒီ မဲ။

16 ခုဝ်၊ ဂေ မိူဝ် အာဝ် ဟူ ဂြုဝ်း။ ဂေ ဘော ဟာဝ် စွင့် ဂိူတ် ဒီ တီ။ ဂေ မိူဝ် အာဝ် ဟူ တဝ်း မာဆေ။ ပါယ် တီ အုဝ် မိူဝ် တူ ဆီ ဘ်ု ဒီ ကာလာင် ဂြုဝ်း ပေါ န့ ပွါ။

17 အုဝ် အာဝ် ဟူ ခမ် ဒီ ဘ်ု။ အုဝ် ဒီ ကာလာင် နှဲ ဂြုဝ်း အုဝ် ခဲ့ ပီ နပ် အုဝ်။

18 ခုဝ်၊ ခဲင် နဝ်း အုဝ် ဟဲ့ မိုဝ်း ကိူန် လွင် ပီ ဒီ လုဝ် ကာလာင်။ နဝ်း ဖွိုမ် အီ ကွယ် ခဲင် နဝ်း အုဝ် ဟဲ့ ဝီ ကာဆုး အုဝ်။

19 ဆေ အုဝ် တူ ပွိုန် ဒီ ကာလာင်၊ န့ ပီ ဒုဝ် ဘူင့် အုဝ် ဒီ ကာယာတ့် မာတုး ပီ ဟူ ဟုန် ဘြိမ် ပဲ့ ဟဲ့ ဟပ် အီ အိုမ် မာငုန် ကာမာယ်။

20 အုဝ် ဘော လုဝ် ကာလာင် လေး ခဲင် မူတ့် အုဝ်၊ တဲး န့ ဝီ ဒါခိုယ် ဒီ အုဝ်။

21 အုဝ် မိူဝ် တူ ဝါင် ဂြုဝ်း ဒီ အီ ဒေါ မှဝ်။ အုဝ် မိူဝ် တူ ဝွန် တူ ငျော အာဆေ။

22 ဆေ အုဝ် ဟီ ဘူင် ပါယ် တီ အန် ဇဝ် အီ ဟဲ့ ဖာန် ဘ့လေး အုဝ် ဒီ စေဝ် ဒိုဝ်း ဝဲန် အုဝ်။”