ဝါယ် အန် တီ အာယုဝ်ဘာ ဝီ တဝ်း၊ “အုဝ် ဟဲ့ ဝီ ကာဆဲန့် ဒီ ငါယ် အုဝ် တဝ်း၊ အုဝ် တူ တဲး အုဝ် မိုဝ်း နဝ်း ကာဝါတ့် ဒေါ ယိုဝ် အုဝ် ဂွန် ဒီဘျာ။

2 အုဝ် ဘ်ု ဒီ ယွတ် ဇဝ်ဖြာ အီ ကွယ် နာ ဒဲင် ဒီ ဒွါ ရုး မျုဝ် မှဝ် ဒီ အုဝ်။ ဇဝ်ဖြာ အီ အိုပ် တူတ့် ဒွန် မျုဝ် ဒီ ဒွါ ခါဂုန် မာဆေ ဒီ အုဝ်။

3 ဂေ ဒူအီ ဟာယ် ဒူအီ မိူက်၊ အန် ဇဝ် ဒီ တဲး ဂေ လိုဝ် စှိုမ်။ ဂေ အီ တူ ဘူင် ဒူပ် ဒါရာ၊ ဂေ ဒီ ဇမ် ဒုက်။

4 အန် ဇဝ် မိူဝ် ဟဲ့ ဟွတ့် နပ် တူတ့် ဒွန် မျုဝ် ခဲ့ ပီ ဘူင် အုဝ်။ အန် ဇဝ် မိူဝ် နပ် ဒူင် ဝဝ့် အုဝ် ဒွန် ပ့လုဝ့်။

5 ဆေ အုဝ် ဘော ဟဲ့ ဘူင် ဒူပ် နာ တူ မှာန်၊ ဘော ဟဲ့ မိုဝ်း ဒီ ကာလုဝ် အီ ဟဝ်၊

6 တဲး ဇဝ်ဖြာ ဇဲတ် ဒီ ယွတ် အုဝ် ပီ အီ တာ လစူ အီ မှာန်၊ ဆ ကြုဝ်ကြာမ်။ ပါယ် တီ တဲး န့ လိုဝ်း ခဲ့ မိုဝ်း အုဝ် နဝ်း ဆိူဝ် နဝ်း မှာန်။

7 ဆေ အုဝ် ဘော ဟဲ့ ဘူင် ဘ့လိူင် ဘော ဟဲ့ ဝး န့တေန့်၊ အုဝ် မိူဝ် ဟဲ့ ဝီ ဘူင် ဒူပ် ပီ အိုင် နဝ်း ဘြိမ် အုဝ်၊ ဆေ ဒဲ အုဝ် မိူဝ် ဟဲ့ ကာလုတ့် ဒီ ဘူင် မှာပ်၊

8 တဲး အီ ဟဝ် တး ဒိုဝ်း ဟူမ် တူတ့် ခဲ့ ပီ ပိတ် ပီ ဆမ် အုဝ်။ ငှုဝ် ဒီဂါဝ် အုဝ်၊ တဲး ဂေ တး ဒိုဝ်း၊ တး ပျာတ့် တူတ့်။

9 ဆေ အုဝ် ဘော ဟဲ့ မိုဝ်း ဒီ ပြာ ဒီ အိုင် အီဘိုန့် အီ ဟဝ် ဘော ဝိန် ဒီ ချွင် ဒီ ယွတ် ဘာင် မာလုဝ်း ကာင် ဂေ အီ ကွယ် ကာတတ် အုဝ်၊

10 တဲး အီဘိုန့် အုဝ် ဝီ ဘဲန် အီ ကြိတ် ဒီဂါဝ် အီ ဟဝ်။ တဲး အီမာယ် ဝီ ဟဝ် ဝီ အိတ် ရိုမ် ဒူပ် အီဘိုန့် အုဝ်။

11 မှာပ် ဇိုဝ် တီ ဘော မုး မှာပ် အီ မွှိုမ် ဆာယ်။ န့ ဟဲ့ ကာအာပ် လုဝ် ခမ် မှာပ် ဇိုဝ် တီ။

12 ခုဝ်၊ လွင် လာယ် လုတ့် လာယ် လာယ် နီ၊ န့ တဲး အီ လိုဝ် စှိုမ် တူတ့် ဒွန် မျုဝ်။ ဘော ငဝ် ကာလုဝ့် ငါရာယ် ဒီ ဘော ကာဆိုမ် တူတ့် ခဲ့ မိုဝ်း အုဝ် ကြုဝ်ကြာမ်။

13 မှာယ် အုဝ် ဘော မုး အီဘိုန့် ဘော မုး အီမာယ်၊ ဆေ ဂေ ဟဲ့ မိုဝ်း ဒီ တး ကာလာင် လွင် အာမူ ဂေ ဒီ အုဝ်၊ ဆေ အုဝ် ယီ တူ ထူမ် တူ ညိုင်ရာင် ယိုဝ်၊

14 ဆေ ဇဝ်ဖြာ လာယ် ဒုဝ် နာ ဒီ အုဝ်၊ အုဝ် တူ ပွိုန် လာယ် ဒုဝ် နာ ဒီ ဇဝ်ဖြာ။ ဆေ အန် ဇဝ် ဟီ ဇဲတ် ဒီ ယွတ် ပီ ဘူင် အုဝ်၊ အုဝ် တူ ပဲ ဒီ ကာလာင် ဘျ ပီ ဘူင် အုဝ်။

15 ခုဝ်၊ ဇဝ်ဖြာ အီ ဖာန် ဘ့လေး အုဝ်၊ အန် ဟဲ့ ဖာန် ဘ့လေး ဘော မှာယ် အုဝ် ဂေ တီ။ ဇဝ်ဖြာ အူ ကာဒင် တီ ဟဲ့ ဘူင် ဘ့လေး ယာယ် ဘော အာ ဝီ ခဲင် ဝတ့် မာ ယာယ်။

16 ဘေ ဟဲ့ ယိုဝ် အုဝ် ဟဲ့ ဒွိုမ် ဂျြီ့ ဒီ ဂေ ဒူအီ ဒုက် ဒူအီ ဂိန်၊ ဟဲ့ ဒွိုမ် ဘူင် တဲး ငါယ် ဂေ ယာ ဆီပြး လိုဝ်။း

17 ဘေ ဟဲ့ ယိုဝ် အုဝ် ဟဲ့ ဒွိုမ် ဟူမ် အုဝ် အူ ဝီ၊ ယီ တူ ကာဆာင် ဒွါ ဒီ ဂေ ဂွန် အီ တူ မိုဝ်း ဂုန့် မာ။း

18 အာဝ် မုး ပါယ် တီ။ ဆိန့် ဒေါ ဒီတဲတ် အုဝ်၊ အုဝ် ဟဲ့ ဟျီင် ဂေ ဂွန် ဆီပြး၊ တဲး အုဝ် ပီ ဂုန့် ဂေ။ ဆိန့် ဒေါ ဂွိုတ် အုဝ် အုဝ် ဟဲ့ ဒွိုမ် စွယ် ဂေ ယာ ဆီပြး။

19 ဘော ဒေါ တီ နီ၊ ဆေ အုဝ် ဟဲ့ ယိုဝ် ဒူအီ အီ တူ မိုဝ်း ဒီ တာ ခြိုင် ဘော ဒူအီ အီ ဟဲ့ ဇုတ် လုတ် တူ မိုဝ်း ဟိုပ် ဒီ ပ့လိုက်၊

20 ဒူအီ တီ မိူဝ် ဟဲ့ ဝီ လှုဝ်း ဂုင် ဂေဇူ အုဝ် ခဲင် နဝ်း အန် ကူပ် ဟဲ့ ပွိုန် အန် ဒီ တာ ခြိုင် ဟိုက် မာဘူ ပီ ဒွါ အုဝ် ဒီ အန် ဘော ဟဲ့ ဒီ အန်။

21 ဆေ အုဝ် မိူဝ် ဟဲ့ ဒွိုမ် ကာလုဝ် ပုဝ်း ဒီ ဟူမ် ဂွန် ဆီပြး ကူပ် ဟဲ့ နပ် အုဝ်၊ ဂေ ဒါ တာင် အီ ကွယ် ဒီ ဘာင် မာလုဝ်း မိူင် ထူမ် ဂြုဝ်း အုဝ်။

22 ဆေ အုဝ် ဟဲ့ ဘူင် ပါယ် တီ တဲး ဒဲ အုဝ် နီ လုတ် လေး ဒီ ယ အုဝ်။ တဲး ဘော ကာအာင် ဒဲ အုဝ် နီ ကာဘက် ဒူင် ကာဒုတ့် အန် နီ။

23 အုဝ် ယီ ယုဝ် ဇဝ်ဖြာ ဒမ် မှာပ် ဒီ အုဝ် ဘော ပျာတ့် အုဝ်။ ခုဝ်၊ အုဝ် တူ ယ ဘူင် ဇိုဝ် တီ ဒေါ မှဝ်။

24 ဆေ အုဝ် ဟဲ့ ဒွိုမ် ခူယ် ဘော နဝ်း တာင် ဒီ ခြိဝ် ဇဲတ်၊ ဆေ အုဝ် မိူဝ် တဝ်း၊ န့ မုး ဒူင် ဒီ ဘိုင် အုဝ်၊

25 ဆေ အုဝ် မိူဝ် ဟဲ့ ပီဖုင် အုဝ် ဘော ခူယ် ကူပ် ဟဲ့ ကိူန် ကြုဝ်ကြာမ် ပဲ့ ဟဲ့ ကာဇု အုန် အုဝ်၊

26 ဆေ အုဝ် မိူဝ် ဟဲ့ ဒွိုမ် အာမ် ပီ ပါယ် ဘ့လာင် ဆီငဲ ဘော အာမ် ပီ ပါယ် ဘ့လာင် မာဂျီန်၊

27 ဆေ အုဝ် မိူဝ် ဟဲ့ ဒွိုမ် ရုဝ်ဆေ ဆီငဲ ဘော မာဂျီန် ခဲင် နဝ်း အုဝ်၊ ဘော ဟဲ့ ဒွိုမ် ဝီ အုး ဒဲ အုဝ် ပီ စုဝ့် ဆူင့် အုဝ် အိူပ် မာဂျီန် ဂါယ် ဆီငဲ၊

28 မှာပ် ဇိုဝ် တီ၊ န့ ဟဲ့ ကာအာပ် ဆုင်ဖျာတ်။ ခုဝ်၊ န့ ပီ အုဝ် ဟဲ့ ဝဲန် ဇဝ်ဖြာ အီ ကွယ် နာ ဒဲင်။

29 ဒေါ လိုဝ် စှိုမ် ရန်ဆူ အုဝ်၊ အုဝ် မိူဝ် တူ ခူယ်။ ဒေါ ကာဒုး ဂေ အာဖေ အာရေ၊ အုဝ် မိူဝ် တူ ဘျုဝ် ဒါခိုယ်။

30 အုဝ် မိူဝ် တူ တဲး မူတ့် အုဝ် ကာလာင် ဂြုဝ်း တူ မွှိုမ် အီ ဘဲန် မှာပ်။ အုဝ် မိူဝ် တူ ဒိူင် ရန်ဆူ အုဝ်၊ တဲး ဂေ ယမ်။

31 ဆေ န့ မိုဝ်း အီမာယ် အူ ဝီ အီ ဘူင် ဂါန် အုဝ် အီ ဟဲ့ ဒွိုမ် တဝ်း၊ အာယုဝ်ဘာ တူ တဲး အုဝ် ပွိုန် ဒီ ဟူမ် ဖဲ၊

32 အုဝ် ယီ ဟဲ့ ဘာင် ဂေ ဒူအီ အီ ဟာဝ် ဒူပ် န့တေန့်၊ တဲး ဂေ တး တမ် တး အိတ် ခဲင် ကာင် အုဝ်။ တူ ဒွိုမ် မိုဝ်း ဒီ တဲး ဂေ အိတ် ကာတဲ န့တေန့်။

33 ဆေ အုဝ် ဟဲ့ ဒွိုမ် မိုဝ်း ဒီ ချြီင် အုန် နာ တူ မွှိုမ် ပီ ဘူင် အုဝ်၊ ပီ အီ ဟဝ် နပ် ဒီ ဘူင်၊ ဘော ချြီင် အုန် မှာပ် ခဲင် နဝ်း အုဝ်၊

34 ဆေ အုဝ် ဟဲ့ ဘူင် ပါယ် တီ ကူပ် ယုဝ် အုဝ် ဖိုင် ဂေ ဒူအီ ကိူန်၊ ယုဝ် ဂေ ဒီ နဲန ဖျာက် အုဝ်၊ ဆေ အုဝ် မိူဝ် ချြီင် ကွယ် ခဲင် ကာင် အုဝ်၊ တူ ယ ဝိုဝ်း မာလုဝ်း ကာင် အုဝ်၊

35 ဆေ အုဝ် ဟဲ့ ဘူင် ဇိုဝ် တီ ဒွန် မျုဝ်၊ အုဝ် ဆီ တဲး န့ မိုဝ်း ဒူအီ အူ ဝီ အူ ဝီ ထူမ် ဂြုဝ်း အုဝ်။ န့ ပီ အုဝ် ဟဲ့ ဟွတ့် ပိ ကာနူ မာ အုဝ်၊ ဟဲ့ ဒါင် အာမူ အုဝ်၊ တဲး ဇဝ်ဖြာ အီ အိုပ် တူတ့် ဒွန် မျုဝ် ဝီ ဆုင်ဖျာတ်၊ တဲး ဘော ဂေ အီ ဖျာက် အုဝ် ဒဲမ် အုန် လွင် အန် တီ။

36 အုဝ် မိူဝ် ဒီ ခူယ် ဒါခိုယ်၊ ဝီ ဒိုဝ်း ပဲ့ တီ၊ ဝီ ဘ့လေး အုန် ဒဲင် ယ အုဝ်။ အုဝ် မိူဝ် ဒီ ဘ့လေး ဒဲင် ဂိန့် အုဝ်၊ တဲး န့ ပီ အီ စှိုပ် မင်ဂိုမ်။

37 အုဝ် မိူဝ် ဒီ ဝီ ကာလာင် လွင် ပဲ့ ဟဲ့ ဘူင် အုဝ် တီ ဒီ ဇဝ်ဖြာ။ အုဝ် မိူဝ် ဒီ ဝီ တး ကွယ် ချြီ့ အန် ဇဝ်၊ တဲး န့ ပီ အုဝ် မုး ခုန်ဒီခမ်။

38 ဆေ ကာဒါယ် ဒူင် ရန့် အုဝ် အာဝ် ဒါခိုယ် ကူပ် တူ ဘူင် အုဝ် နာ မွှိုမ် ဒီ အန်၊ ဘော ပန် ဘ့လာ န့ထဲ ဂေ တွိုန် မိူဝ် က့လိုဝ် ဘော ယာမ်၊

39 ဆေ အုဝ် မိူဝ် တူ တူတ့် ရွိုန်၊ ယီ ပွိုန် ဒီ ဟူမ် ငှုဝ် အီ လေး ခဲင် ကာဒါယ် တီ၊ ဆေ အုဝ် ဟဲ့ ဘူင် တဲး ဘော ဂေ အီ ခါတ် ဒီ ရန့် မာန် အုဝ် လုတ့် နဝ်း၊

40 အုဝ် ဒီ ဝီ မှာန့်၊ တဲး ယွုန် မာအာတ့် ဝီ လတ့် ပ့လု ခဝ်ချုင် ဘော ပေတ့် ဝီ ပ့လု ခဝ်ဘာလီ။” ဂြုဝ်း ပီ ကာလာင် အာယုဝ်ဘာ ဟဲ့ ဟွတ့် ပုင် နီ။