အာယုဝ်ဘာ ဝီ တဝ်း၊ “ဒေါ တီ နီ အုဝ် လုဝ် ခမ် ဂေ အီ ဆီ နှိုမ် လွှိုမ် အုဝ် ဝီ ကာဖြူမ် ဒီ ကာညး အုဝ်။ ဂုန့် ဒူအီ ဂေ တီ၊ အုဝ် ယီ တူ မာတ် ဂေ ဒါန် မာဆုဝ် အီ ဘ်ု မာဘူ ဂေ မာပဲ အုဝ်။

2 ဒူအီ အီ ဟဲ့ ဒီလှး န့ စမ် တူ ဘဲန် အာဂျိုဝ် မာဆေ ဒီ အုဝ်။ ခဲ့ မိုဝ်း ဂေ ပ့လူမ် ဂေ ဟဲန့်၊ ဟဲ့ ဟွတ့် ဟြာယ် တူတ့်။

3 ဒူအီ ဂေ တီ ဟဲ့ ဂိန် ဟဲ့ ဖ့လာန် ကာဆဝ်။ ဂေ မိူဝ် ဟဲ့ အေတ့် ပီ ဒီ ဟူမ် ဘော ကာပြာန့် ကာဆဝ် ပီ ဒီ ဟူမ်။ ဂေ ဘော ကာဒုး ဒီ ဟြေတ့် ပီ ဒီ ဟူမ် ခဲင် မှိုဝ်၊ ဟာဝ် ခဲင် ပြဲ ကာဟဝ်း ဒူင် တူ မိုဝ်း အီ ကွယ်။

4 ဂေ ဘော နပ် ဒီ ဘေတ့် ဟူမ် ဒဝ် အီ ကွယ် ခဲင် ပြဲ ဘော ဒိုဝ်း ဟူမ် ရျီး ဟေ အီ ကွယ် ခဲင် ပြဲ ကာဟဝ်း။

5 ဂေ ဘော လုဝ် ခမ် အီ ဟဝ် ဟုဝ် တဝ် ဂေ ဘော ဒတ် ကာလာင် ဂြုဝ်း တာင်၊ တဲး န့ ကော ပီ အီ ဒတ် ခုင်ခြး ဒါ ပြာ။

6 ဂေ ဘော ကာဒုး ဒီ တဝ် ချြီင် ကွယ် ခဲင် ဒီလယ့် အီ မွှိုမ် ယုဝ်၊ ဘော ခဲင် ကာဒဝ် မာဝ် ဘော ခဲင် ကာဒဝ် ခဲင် ဒီဂ့လုဝ့်။

7 ဂေ ဘော ငှုန် ဘော ယာမ် ကွယ် ခဲင် နင် ကာလှိုပ်။ ဂေ ဘော ကွယ် လာယ် ကာဆျီ့ ခြိုမ် ယွုန်။

8 ဂေ ပီ ဂွန် ဒူအီ ရိုဝ် ဘော ဂွန် ဒူအီ အီ တူ မိုဝ်း ဒီခုဝ်။ န့ မိူဝ် တူ မိုဝ်း အာဆေ အီ နပ် စိူဝ် ဂေ။ ဂေ ဘော ကာဒုး ဒီ ခမ် အီ ဟဝ် ဟုဝ် လေး ဂေ နာ ရေတ့် ရဝ် ရေတ့် မိူင်။

9 ဒေါ တီ နီ၊ လှုက်လှာန် ဒူအီ ဂေ တီ ဝီ ပီ ဝါညာက် ကာညး အုဝ်။ အုဝ် ဟဲ့ ဘဲန် ပီ ကာညး ဂေ ဘော ပီ နဲန ဂေ။

10 ဂေ မိူဝ် ဟဲ့ ကာအိး ဟဲ့ ဇွင့် အုဝ် ဘော ဝး တူင့် ဒူင် ကွယ် အုဝ်။ ဂေ မိူဝ် ယ ပတ့် နာ အုဝ်။

11 ဒေါ တီ နီ ဇဝ်ဖြာ ဟဲ့ ဘူင် ကွဲ့ တဲး အုဝ် မိုဝ်း ပ့လူမ် မိုဝ်း ဟဲန့် ပီ ဝန် အ ဟဲ့ ကာဒတ်။ ခုဝ်၊ ဒူအီ ဂေ တီ ဘော ဘူင် တဲး န့ ဘျ လွင် တူ ရုဝ်ဆေ ဂေ ဒီ အုဝ်။

12 ဖိုင် ဒူအီ အီ တူ မွှိုမ် ဂေ မိူဝ် တး ကာပ့လုး ဘ့လာက် အာအး အုဝ်၊ ဘော ခတ် ပ့လဝ် အုဝ်၊ တဲး အုဝ် ကေး။ ဂေ ဘူင် ပါယ် တီ တဲး ဂေ ပွိုန် ဒီ ပျာတ့် ဝဲန် အုဝ်။

13 ဂေ မိူဝ် ပျာတ့် န့တေန့် အုဝ်၊ တဲး ဂေ ပွိုန် ဒီ ဝဲန် အုဝ်။ ပီ ဘူင် ဂေ တီ မိူဝ် အွင်၊ အာဝ် မိုဝ်း အာဆေ ခြဲ ဂေ။

14 ဂေ တး ဒူင် ကွယ် အုဝ် ပီ ဒါ ဆိုက် တး ခဲင် ကာဒဝ် ရဲင် မိူင် ပဲ့ ဟဲ့ ဘ့လုး လှုး ဂေ။ ဂေ မိူဝ် တး ဘဲန် ဖိုင် ဘဲန် ဖိုင် ဟုဝ့် ဒဲင် ရဲင် အီ ဟဲ့ ရာမ် ဟဲ့ လိုဝ် ကာပျာတ့် တွိုန်။

15 အုဝ် မိူဝ် ဟဲ့ ကာတုန့် ဟဲ့ ယိုဝ် အီ မွှိုမ် ယုဝ် ကာဆဝ်။ အာဖုင် ဆာရေ အုဝ် မိူဝ် ဟဲ့ ဟွတ့် ဟြာယ် တူတ့်၊ န့ ဘော ပီ ခုန် ဟဲ့ တး ဘုတ် ဝဲန်။ ကြုဝ်ကြာမ် အုဝ် မိူဝ် ဟဲ့ ကာစှူတ့် ဟာဝ် ဒွန် ဘ့လာက် ပီ န့အု။

16 ဒေါ တီ နီ နဝ်း အုဝ် ဟဲ့ ဟွတ့် လိုဝ် တူတ့် ကူပ် ဒုက် တာင် ပဲ့ ဟဲ့ ခမ် အုဝ် ဒွန် ဆီငဲ ဒွန် ဆီငဲ။

17 ခဲင် မှိုဝ် ကာအာင် အုဝ် မိူဝ် ဟဲ့ ဆဝ် ဘော ဒုဝ်။ အီ ဆဝ် ခဲင် ဒုဝ် ဘူင့် အုဝ် တီ၊ အာဝ် ယေန် ဒေါ မှဝ်။

18 န့ ပီ အန် ဇဝ် အီ မိုဝ်း ပွုန် အီ ဟဲန့် ကာဆဝ် ဟဲ့ ပါ အုဝ် တဲး ခြိုင် တာ အုဝ် ကော ကာပျာတ့် တူတ့်။ န့ ဘော ပီ အန် ဟဲ့ ပါ ဒိုက် ဆီတုဝ် အုဝ် ဒီ မဲင် အုဝ်။

19 န့ ပီ အန် ဇဝ် ဟဲ့ ဇုန် စုဝ်း အုဝ် ခဲင် ညုဝ့် ည။ အုဝ် မိူဝ် ဟဲ့ ပီ ကာပုး ဂေ ကာဝှါင်။

20 အိုယ် မဲ ဇဝ်ဖြာ၊ အုဝ် ဟဲ့ ဒတ် ဒဲ့ မဲ ဇဝ်၊ မဲ ဇဝ် ယီ တူ အိုဝ် ဂြုဝ်း အုဝ်။ ဒေါ ယိတ့် ဆာခိုဝ် အုဝ် ဒီ မဲ ဇဝ် မိူဝ်၊ မဲ ဇဝ် ယိုဝ် အုဝ်၊ ယီ တူ ထူမ် ဂြုဝ်း ပီ ဆာခိုဝ် အုဝ်။

21 န့ ပီ မဲ ဇဝ် ခူယ် ဒီ ဘူင် နာ စာဝ် ဒီ အုဝ်။ မဲ ဟဲ့ တာ အာဖုင် ဒင်ခုဝ် မဲ ခါနှာပ် အုဝ်။

22 မဲ ဇဝ် မိူဝ် ဟဲ့ စ်ု ခုန် တး ဘုတ် အုဝ်၊ တဲး အုဝ် ဘိုန့် ဒူပ် ခုန် တီ။ န့ ပီ မဲ ဇဝ် ဟဲ့ စုဝ့် ဘ့လေး အုဝ် ဒူင် ဟဲန့် ကာဆဝ် ခုန်၊ တဲး အုဝ် ကော လာလျီ့ ဟုဝ့် လာလျီ့ လူင်။

23 အုဝ် ဟဲ့ ဟွတ့် နပ်၊ မဲ ဇဝ် ဟဲ့ ဆီ တဲး အုဝ် ယမ်၊ မဲ ဝီ တိုယ် အုဝ် ဟာဝ် ဒူင် ဒီ ဘ့လေး အုန် မဲ ဒူအီ ဒွန် အီ အီ ဆီ အိမ်၊ အီ ဆီ ကွယ် ဒေါ တီ နီ။

24 ဟဲ့ မှာန်၊ န့ တူ ဒွိုမ် မိုဝ်း အာဆေ အီ စွယ် ဒူအီ အီ ဟဲ့ ဇမ် ဒုက် ညှာပ်။ ဆေ အန် မှာန့်၊ တဲး အီ စွယ် အန်၊ တဲး အန် လွတ် တ ဒုက် တီ၊ အာဝ် မိုဝ်း အာဆေ အီ ထူမ်။

25 အုဝ် ယီ ဟဲ့ ဒွိုမ် ကာဒုး ဒီ ယာမ် ဒေါ ယိုဝ် အုဝ် ဂေ ဒူအီ အီ ဟဲ့ ဇမ် ဒုက်။ နဝ်း အုဝ် ဘော က့လိုဝ် ဒေါ ယိုဝ် အုဝ် ဂေ ဒူအီ ဟဲ့ အေတ့် ဟဲ့ ဇုတ် လုတ်။

26 မာလဲ၊ ဒေါ နှဝ့် ဘ်ု အုဝ် ပန် ဒီ တး နာ ဘွတ် နာ မွှိုမ်၊ အီ ဟာယ် အီ စီစိဝ် ယီ ဝီ တး။ ဒေါ နှဝ့် ဘ်ု အုဝ် ဒီ ယိုဝ် နာ ဘ့လာင်၊ အပ် ဝွင့် ယီ ဝီ တး။

27 ခဲင် နဝ်း အုဝ် ဟဲ့ ကာဝှ်ု ကာဝျှီန်၊ အာဝ် ယေန် ဒေါ မှဝ်။ ဒေါ တး ဇမ် ဒုက် တာင် တီ န့ ဘော ကာငျာ အုဝ် ဒွန် ဆီငဲ။

28 စုဝ် အာဆာက် အုဝ် နီ၊ ဟဲ့ အပ် ဝွင့် ဒီတိန့်၊ အာဝ် မိုဝ်း ဘ့လာင် ဆီငဲ။ အုဝ် မိူဝ် ယိတ့် စွင့် ကာတဲ ဂေ ဒူအီ ကိူန်၊ ဘော ဒတ် ဒဲ့ ဂေ တဲး ဂေ တး စွယ် အုဝ်။

29 ဂြုဝ်း ပီ ဒတ် ဒဲ့ အုဝ် တီ၊ န့ ဘော မုး ဂြုဝ်း က့လိုဝ် ဘော ဂြုဝ်း ငွင့်၊ ဘော ပီ ခဲ့ ဟမ် မာဆုဝ် ပြဲ၊ ဘော ဟမ် မာဆိမ် ကာဟာတ့်။

30 ဟုန် အုဝ် မိူဝ်၊ ဟဲ့ ဝွင့် ဟဲ့ မ့ဘုတ့် စုဝ်း။ ဒုဝ် အုဝ် မိူဝ် ဟဲ့ ကာဟွာ့ ဟဲ့ ဒါတ် ပီ ငဝ်။

31 ဒိင် ပီ ဘး အုဝ် ဘော ဝီ လေး ဟမ် ပီ အီ ငှုန် အီ က့လိုဝ်။ ဝဝ် ပီ ဘုတ် အုဝ်၊ ဘော ဝီ လေး ဟမ် ပီ အီ ယာမ်။”