1 ဒေါ အန် တီ အာယုဝ်ဘာ ပီ ဝီ ကာလာင် ဟာဝ် ပွါ။

2 အန် တဝ်း၊ “အာလိုဝ် အုဝ် ဘော ကာပြာ ကာဆဝ်၊ တဲး န့ ဝီ ဘဲန် ပီ ဒေါ မွိုန် ဆီနမ် ဂေ မာဂျီန် အီ ဟဲ့ ပွုန် တး၊ ဆီငဲ တီ ဇဝ်ဖြာ ဟဲ့ စွယ် အုဝ်။

3 ဒေါ အန် တီ၊ န့ ပီ ငဝ် အွမ် အန် ဇဝ် ဆီ ဘ့လာင် ဘော ဘ့လာင် ဒဲင် ဂိန့် အုဝ်။ အုဝ် မိူဝ် ဘိုင် ဘ့လာင် အန် ဇဝ် တီ ဘော ပွိုန် ကာလုဝ်း ဟာဝ် ဆီချာ ဆီချာ ခဲင် အပ် ဝွင့်။

4 အုဝ် ဘော ဝီ ဆီ တဲး န့ ပီ ဒေါ ဆီ မိုဝ်း အုဝ် ပ့လူမ် ဂေ ဟဲန့်။ ဒေါ အန် တီ ဇဝ်ဖြာ မိူဝ် လာယ် ဘဲန် အူ ဂိုက် ဒီ အုဝ်။ အန် ဇဝ် မိူဝ် မွင့်ကာရာ ဒွါ ဒီ အုဝ်။

5 ဒေါ အန် တီ ဇဝ်ဖြာ အီ အိုပ် တူတ့် ဒွန် မျုဝ် မိူဝ် ကွယ် ရိုမ် ဒူပ် အုဝ်။ ဂေ ဂွန် အုဝ် မိူဝ် ကွယ် ရိုမ် ဒူပ် အုဝ်။

6 မာမက် ဂေ မာပဲ မိူဝ် မိုဝ်း အိုမ် ပူ ကိူန် ဒွါ ဒီ အုဝ်။ အိုမ် နာမန် မိူဝ် လှဲ တး ကိူန် ခဲင် မာဝ် အီ ကြိတ် နာမန်။

7 ဒေါ ဟုဝ့် အုဝ် ဒီ ဘာင် မာလုဝ်း မိူင် ဒူင် ကာဇု ကာမွုန် ဂေ ဒါ တာင်၊ အုဝ် မိူဝ် ဟာဝ် တုတ့် ဒူင် ဟဲ့ ရဲန် အုန် ဂေ အာဒါ အုဝ်။

8 ဂေ ဒူအီ နှိုမ် မိူဝ် ယိုဝ် အုဝ်၊ ဂေ မိူဝ် ဝး ဒူင် ဒီ ဝဝ့် အုဝ်။ ဘော ဒူအီ ကတ် ဒူအီ ဂဲ မိူဝ် ယိတ့် စွင့်၊ ဂူမ် ဘော ရုဝ်ဆေ အုဝ်။

9 ခဲ့ ကွယ် ဂေ ဒါ ကာညာ မိူဝ် ယေန်၊ အာဝ် မိုဝ်း အီ ဂြုဝ်း။ ဂေ ဘော ဝီ ကာဘိတ် မူတ့် ဂေ တာ ဒဲ ဂေ။

10 ခဲ့ ကွယ် ဂေ အာမူ အာမာတ် ခုန်ဒီခမ် မိူဝ် ဆီတွင့် ယေန်၊ တူ ယ ဂြုဝ်း မာဆေ။

11 ခဲ့ ကွယ် ဂေ အီ ဟဲ့ ဒွိုမ် ထူမ် ဂြုဝ်း အုဝ်၊ ဂေ မိူဝ် အိူပ် မျုက် အုဝ်။ ဂေ အီ ဟဲ့ ဒွိုမ် ယိုဝ် အုဝ်၊ ဂေ မိူဝ် ကာလာင် နာ မွှိုမ် လွင် အုဝ်။

12 ခုဝ်၊ ဂေ ဒူအီ ဒုက် ဒူအီ ဂိန် ဘော ဂေ ဂွန် ဆီပြး အီ တူ မိုဝ်း အီ စွယ် ဂေ၊ ဂေ ဟဲ့ တး မှာန့် ဒီ အုဝ်၊ အုဝ် မိူဝ် စွယ် ဂေ။

13 ဂေ ဒူအီ အီ ဟဲ့ ရိန် ဒီ ယမ်၊ ဂေ ဟဲ့ ဝီ မွင့်ကာရာ ဒွါ ဒီ အုဝ်။ အုဝ် မိူဝ် ဘူင် တဲး ဂေ ယာ ဆီပြး ဝီ ခူယ် ဒါခိုယ်၊ တဝ်း မှုဝ်။

14 အုဝ် ဟဲ့ ဂျုဝ်ဂျာ ဒီ ဒူပ် နာ ဆိူဝ် နာ မှာန် ဆေဆေ ပီ အုဝ် ဟဲ့ စှိုပ် ခြိုင်။ ပီ ဘူင် အုဝ်၊ ဟဲ့ ပီ ဆီတုဝ် တာင် ဘော ကာမယ့် ပီ စှိုပ် အုဝ်။

15 ငါယ် အုဝ် ဟဲ့ ဘျ နှဲ န့တေန့် ဒီ ဂေ ဒူအီ ငါယ် အပ်၊ ဘော ပ့လဝ် အုဝ် ဟဲ့ ဟာဝ် ကာဒါင် ဂေ ဒူအီ အီ တူ ပွိုန် ဟာဝ်။

16 အုဝ် ဟဲ့ ပီ ဂုန့် ဂေ ဒူအီ ဖ့လာန်၊ အုဝ် ဘော ဇဲတ် ဒီ ယွတ် အာမူ ဂေ ဒူအီ အာမျုဝ် ဟဝ်။

17 န့ ပီ အုဝ် ဟဲ့ ဘက် ဝဲန် ပ့လဲ့ ဒူအီ ဟာယ် ဒူအီ မိူက်၊ ဘော ဝီ ဒိူတ် လေး ဒီ မူတ့် ဂေ ပဲ့ ဟဲ့ ကဝ့် ဟာဝ် ဂေ။

18 အုဝ် မိူဝ် ထာင် အာဆာက် အုဝ် ဒီ တူင့်၊ ဘော အုဝ် ဒီ ယမ် ဒါခိုယ် ဒါခိုယ် ခဲင် ကာင် ဒူင် ကွယ် အုဝ်။

19 အုဝ် မိူဝ် ထာင် စုဝ် အာဆာက် အုဝ်၊ န့ ဒီ ပီ ဟေ အီ မိုဝ်း ရျီး အီ လိုပ် လူင် ဇမ် ခဲင် အိုမ်။ အိုမ် ဒီငါန် မိူဝ် ဒီ တဲး ရာ အန် အမ် ည ဆေဆေ။

20 အာဖုင် ဒင်ခုဝ် အုဝ် မိူဝ် ဒီ မန် ဆီချာ ဆေဆေ။ အ ပီ ဂူင့် အုဝ် မိူဝ် ဒီ ဘော ကျ ဆေဆေ။

21 ဒေါ ဒွါ အုဝ် အာကျာမ် အာငျာန် ဒီ အီ၊ ဂေ မိူဝ် ဟဲ့ ကွယ် ယေန် ယေန် ဘော ဘ်ု ဒီ ထူမ် ဆီချာ ဆီချာ ဂြုဝ်း အုဝ်။

22 ဝါယ် ဟဲ့ ဟွတ့် အုဝ် ကာလာင် ဂြုဝ်း တီ၊ ဂေ မိူဝ် အာဝ် ဟူ မိုဝ်း ပီ ဒီ ဝီ ဝျီ့ မာဆေ။ ဂြုဝ်း ပီ ကာလာင် အုဝ်၊ န့ ဘော ထူမ် ဒါခိုယ် ဒီ ဂေ။

23 ဂေ ဘ်ု အုဝ် ပီ ဒူအီ ဘ်ု ဂ့လာယ်။ ဂေ ဘော ထူမ် ဂြုဝ်း အုဝ် ပီ ကာဒါယ် ညွှတ် အိုမ် ဂ့လာယ် အီ စုဝ်း အာခြာဝ် ဒီယာင်။

24 အုဝ် မိူဝ် အေဝ် ကာညး ဒီ ဂေ ဒူအီ အီ တူ မိုဝ်း ဒူင် ဒီ ဘိုင်၊ န့ ဘော တဲး ဂေ အာမ်။ ဒေါ ယိုဝ် ဂေ နာ အုဝ် ဟဲ့ ဆာဘ့လာင် ဒါခိုယ် ပါယ် တီ န့ ဘဲန် ပ့လူမ် ဘဲန် ဟဲန့် ဒီ နဝ်း ဂေ။

25 အုဝ် ဘော ဘဲန် ဒါ တာင် ဂေ ဘော နှဲ ဘျ အီ မွှိုမ် အီ တူ မွှိုမ် ဒီ ဂေ။ အုဝ် မိူဝ် ယဲတ့် ဂေ ပီ ခုန်ဒီခမ် ဟဲ့ ယဲတ့် ဒါ ဆိုက် အန်။ အုဝ် ဘော စွယ် တဲး နဝ်း ဂေ ဝီ နှိမ် ဝီ ယေန် ဒေါ တူ မိုဝ်း ဂေ ဒီ နှဝ့် န့ဒဝ့် မာဆေ။”