ဝါယ် အန် တီ အာအေလီဟူ ပီ ဝီ ကာလာင် ဟာဝ် ပွါ တဝ်း၊

2 “အိုယ် ဘေ ဒူအီ အီ မိုဝ်း အာငျာန်၊ တဲး ဘေ ထူမ် ဂြုဝ်း အုဝ်။ ဘေ ဒူအီ အီ ထာင် ဘေ ဟဲ့ နပ် ကိူန်၊ တဲး ဘေ ထူမ် ပီ တဝ်း အုဝ်။

3 ခုဝ်၊ အာဟျဝ့် နပ် ဒီ ဇဲတ်ဆေ ဂြုဝ်း ပီ မူတ့် နပ် ဒီ စိမ် ပီ ဒီ ဟူမ်။

4 တဲး အေ ဆုင်ဖျာတ် ရာင် အေ အာ မှဝ် ဟဲ့ မှာန်၊ တဲး အေ ရဝ်း ကာတဲ အေ၊ အာ မှဝ် အီ ဟဲ့ မွှိုမ်။

5 အာယုဝ်ဘာ ဟဲ့ တဝ်း၊ ‘အုဝ် တူ မိုဝ်း ဒီ ဘူင် မှာပ်။ မာလဲ၊ ဇဝ်ဖြာ တူ တဝ်း၊ အုဝ် ဟဲ့ မိုဝ်း နဝ်း ဆိူဝ် နဝ်း မှာန်။’

6 အန် ဘော တဝ်း၊ ‘အုဝ် ပီ ဘော ဟဲ့ မိုဝ်း နဝ်း ဆိူဝ် နဝ်း မှာန် မိူဝ်၊ န့ ယီ ပီ အုဝ် မုး ဒူအီ အီ ဆီမာ ကာလုဝ်။ အုဝ် ပီ ဆ မိုဝ်း မှာပ် မိူဝ်၊ အုဝ် ယီ ဝီ ဒဝ့် ဆဝ် ရောဂါ အီ တူ နပ် ဒီ ဟြာယ်။’

7 အာဝ် မိုဝ်း အီ ခမ် ဒီ ဖျာက် ဇဝ်ဖြာ ခေါ အူ ဝီ အီ ပီ အာယုဝ်ဘာ။ အန် ဘော ခမ် ဒီ နဲန အီ ပီ အန် ဒျီင် အိုမ်။

8 အန် ဘော ကွယ် ရိုမ် ဒူပ် ဒူအီ အီ တူ မွှိုမ်။ အန် ဘော ဟာဝ် ဒူပ် ဒူအီ ဟာယ် ဒူအီ မိူက်။

9 ခုဝ်၊ အန် မိူဝ် တဝ်း၊ ‘ဆေ ဒူအီ ဒါခိုယ် ဒီ ဘူင် ပီ အိုင် ဇဝ်ဖြာ၊ အာဝ် မိုဝ်း အာဂျိုဝ် မာဆေ။’

10 ပါယ် တီ ဘေ အီ မိုဝ်း အာငျာန် မွှိုမ်၊ တဲး ဘေ ထူမ် ဂြုဝ်း အုဝ်။ ဇဝ်ဖြာ တူ ဘူင် နာ တူ မွှိုမ် ဒေါ မှဝ်။ ဇဝ်ဖြာ အီ အိုပ် တူတ့် ဒွန် မျုဝ် တူ နပ် ဒီ ဘူင် ကာလိုပ်။

11 အန် ဇဝ် ဝီ ဘူင် ဝျီ့ ခဲ့ ပီ ဘူင် အေ ဒူအီ။ အန် ဇဝ် တဲး ဒူအီ ဒွန် အီ ဝီ ခမ် ခဲ့ ကာဒါန် ပီ ဘူင် ဂေ။

12 န့ ဟဲ့ မှာန် အာခါခ်ု၊ ဇဝ်ဖြာ တူ ဘူင် နာ တူ မွှိုမ်။ ဇဝ်ဖြာ အီ အိုပ် တူတ့် ဒွန် မျုဝ်၊ အန် တူ ဆုင်ဖျာတ် အီ တူ ဒူပ် ဒါရာ။

13 အာဝ် မိုဝ်း အာဆေ အီ ဟဲ့ ဒွါ အာဖုင် ဒင်ခုဝ် ဒီ ဇဝ်ဖြာ။ အာဝ် မိုဝ်း အာဆေ အီ ဟဲ့ ဒွါ ပွုန် တဲး အန် ဇဝ် အိုပ် ကာဒါယ်။

14 ဆေ ဇဝ်ဖြာ အုန် နဝ်း ဒီ ဒိုဝ်း ဝိဝ် နဝ်း ဖွိုမ် အန်၊ 15 ဒူအီ ဘောကာဂ့လျီတ် ဒီ ဘော ယမ် တူတ့်၊ ဝီ ဘဲန် ကာဒါယ် ပီ ဘြိမ်။

16 ဆေ ဘေ မိုဝ်း အာငျာန် အီ တဲး န့ ကာလှုး ဒီ နဝ်း ဘေ၊ တဲး ဘေ ထူမ် ဂြုဝ်း အုဝ်။

17 ဒူအီ အီ ဇွင့် ဒါရာ အီ မုး အီ မှာန်၊ အာဝ် ကာအာပ် တဲး အန် အိုပ် ဒူအီ။ န့ မိူဝ် တူ မိုဝ်း အာဆေ အီ ယ ဝီ ဒမ် မှာပ် ဒီ ဇဝ်ဖြာ အီ ဟဲ့ မိုဝ်း နဝ်း ဆိူဝ် နဝ်း မှာန် ဘော မိုဝ်း အာဖုင် ဒင်ခုဝ် တာင်။

18 အန် ဇဝ် နပ် ဒီ ကာလာင် ဒီ ခုန်ဒီခမ် တဝ်း၊ ‘မဲ တူ မိုဝ်း ဒီခုဝ် မာဆေ။’ အန် ဘော နပ် ဒီ ကာလာင် ဒီ ဂေ ဒါ ကာညာ အီ အိုပ် မိူင် တဝ်း၊ ‘ဘေ မုး ဒူအီ ဟာယ်။’

19 အန် ဇဝ် မိူဝ် တူ ဝါင် ဂြုဝ်း ဒီ ဂွန် ခုန်ဒီခမ်။ အန် မိူဝ် တူ ရွက့် တူ ဇွင့် အာဆေ။ အန် မိူဝ် တူ ရွက့် ဒူအီ ခြမ် လွှိုမ် ဒူအီ ဒုက် ဒူအီ ဂိန်။ ခုဝ်၊ န့ ဘော မုး အန် ဇဝ် အီ ဖာန် ဘ့လေး ဂေ ဒွန် အီ။

20 ဒူအီ ဒွန် အီ ဂေ ကွယ် အူ ကာစန် အူ ကာဘြိုဝ်း၊ ဟဲ့ ဝီ ယမ် ဒေါ ကာတဲ ဆွိုမ်။ ဒူအီ ဘောကာဂ့လျီတ် ဒီယုး ဒီယေန့် ဘော ယမ် ဟာဝ်။ ဂေ အီ ဟဲ့ မိုဝ်း ပ့လူမ် တာင်၊ မိုဝ်း ဟဲန့် ကိူန်၊ ဂေ မိူဝ် ယမ်၊ ယီ တူ မုး ဒူအီ အီ ငဝ်း ယမ် ဂေ။

21 အန် ဇဝ် ဘော ယွတ် န့တေန့် ပီ ဒူပ် ဂေ ဒူအီ။ အန် ဘော ယွတ် ဒူင် ညဲတ့် ဒူင် ဇာပ် ဂေ ဒွန် ပန်။

22 န့ မိူဝ် တူ မိုဝ်း ဒူင် အပ် ဝွင့် ကာဆဝ် အီ မုး ဒူင် ဒီ ပွိုန် ဟာဝ် ချြီင် ဂေ ဒူအီ မိုဝ်း မှာပ်။

23 ဇဝ်ဖြာ တူ လုဝ် ဇဲတ်ဆေ ပီ ပါယ် ဒူအီ ဘော တူ လုဝ် ပွက့် အာခြာဝ် ဒီ ဆုင်ဖျာတ် အာမူ ဂေ။

24 အန် ဇဝ် ဘော ဘူင် တဲး ဂေ အီ မိုဝ်း ပွုန် တာင် စုဝ်း တျီမ်၊ ပီ ဝီ ဒါင် ဝီ ဟဝ်၊ တဲး န့ ဝီ ပ့လု ဂေ။ အန် ဇဝ် မိူဝ် တူ လုဝ် ဒီမွှတ် အာဆေ လွင် အန် တီ။

25 အန် ဟဲ့ ဟွတ့် နပ် ပီ ဘူင် ဂေ။ ခဲင် မှိုဝ် အန် မိူဝ် ဆာဂိုပ် ဝဲန် ဂေ၊ တဲး ဂေ ကော လိုဝ် စှိုမ် တူတ့်။

26 အန် ဇဝ် မိူဝ် ဆုင်ဖျာတ် အာမူ ဂေ အီ မိုဝ်း မှာပ်၊ တဲး န့ လိုဝ်း ဆီချာ ဘော ဒီ ဂေ ဒူအီ ကိူန်။

27 ခုဝ်၊ ဂေ ဟဲ့ ဝဲန် ဒါရာ အန် ဇဝ်။ ဂေ မိူဝ် တူ ဆီ ဒူပ် ပီ စ်ု အန် ဂေ ဘူင်။

28 ကူပ် ဘူင် ဂေ ပါယ် တီ ပီ ဒတ် ပီ ယာမ် ဂေ ဒူအီ အီ တူ မိုဝ်း ပ့လူမ် ဂေ ဟဲန့်၊ န့ ဘော လိုဝ်း ဇမ် ဒူင် ကွယ် အန် ဇဝ်။ အန် ဇဝ် မိူဝ် ဟဲ့ ထူမ် ပီ ယာမ် ဂေ ဒူအီ အီ ဟဲ့ ခမ် ပီ ခါနှာပ် အီ ဟဝ်။

29 ဆေ အန် ဇဝ် ယီ ကွယ် နှိမ် နှိမ်၊ အာဝ် မိုဝ်း အာဆေ အီ ပွိုန် ဒမ် မှာပ် ဒီ အန်။ ဆေ အန် ဇဝ် ဟဲ့ ချြီင် အန်၊ အာဝ် မိုဝ်း အာဆေ အီ ပွိုန် ယိုဝ် အန်။ အန် ဇဝ် အီ အိုပ် တူတ့် ဒူအီ ဘော မုး ဒူအီ ဝီ မှဝ် အာဝ် တဝ်း၊ ဒူအီ မျုဝ် မှဝ် အာဝ် တဝ်း၊ အန် ဇဝ် အိုပ် တူတ့် ဂေ။

30 အန် ဇဝ် မိူဝ် တူ တဲး ဂေ ဒူအီ အီ တူ မွှိုမ် ပွိုန် ဒီ အိုပ် ဒီ ဘိုင် မိူင်။ ကွဲ့ တဲး ဂေ ပွိုန် ဒီ ဒိန့် ယွတ့် ဂေ အာဒါ အီ ဟဝ်။

31 ဆေ န့ မိုဝ်း ဒူအီ အီ ကာလာင် ဒီ ဇဝ်ဖြာ တဝ်း၊ ‘အုဝ် ဟဲ့ ဟွတ့် ဘူင် မှာပ်။ ဝါယ် နီ အုဝ် မိူဝ် အာဝ် ဟူ ဘူင် ကာလိုပ်၊ အာဝ် ဟူ ဘူင် ဘ့လိူင် ပွါ။

32 မှာန့်၊ တဲး မဲ ဇဝ် မာနုဝ် ပီ တူ နပ် ပီ တူ ယိုဝ် အုဝ်။ ဆေ အုဝ် ဟဲ့ ဘူင် အီ တူ မွှိုမ် မိူဝ်၊ ဝါယ် နီ အုဝ် အာဝ် ဟူ ဘူင် ပေါ မ့ပွါ။’

33 ဆေ ဇဝ်ဖြာ ဆုင်ဖျာတ် လွင် အန် တီ၊ န့ တူ ပွိုန် တဲး န့ ဒူပ် ပီ အိုင် မဲ။ န့ ပီ မဲ တူ ဆီ ဝဲန် မှာပ် မဲ တီ။ န့ မုး မဲ အီ လုဝ် ဆုင်ဖျာတ် ခဲင် နဝ်း မဲ။ အာဝ် မုး အုဝ်။ ခဲ့ ပီ နပ် မဲ၊ တဲး မဲ ကာလာင် တူတ့် ဒီ အုဝ်။

34 ဂေ အီ နပ် ဘဲန် မျုဝ် ဘဲန် မျုဝ် အီ ကာလှုး ဒီ နဝ်း ဂေ၊ ဂေ နပ် ဒီ မာနုဝ် အီ။ ဂေ အီ မိုဝ်း အာငျာန် မွှိုမ် ဟီ ယိုဝ် ဂြုဝ်း ပီ ကာလာင် အုဝ် တီ၊ ဂေ ဒီ ဘော တဝ်း၊

35 ‘အာယုဝ်ဘာ နီ၊ အန် ကာလာင် ပီ ဒူအီ အီ တူ နပ် မာဆေ။ ဂြုဝ်း ပီ ကာလာင် အန်၊ အာဝ် မုး ဂြုဝ်း အီ မိုဝ်း အာငျာန်။’

36 အန် ဟဲ့ ဝီ ဝျီ့ ဂြုဝ်း ပီ ဒူအီ တူ မွှိုမ်။ ခုဝ်၊ န့ ကာအာပ် အီ ထေဝ် နဝ်း အန်၊ တဲး အီ ကော နပ် တူတ့် ပီ ပါယ် နဝ်း အန်။

37 ဒဲင် ဟဲ့ ဘူင် အန် မှာပ် အီ တူ မွှိုမ် တီ၊ အန် ဝီ ကာဘး ဘော ဒီ ဇဝ်ဖြာ။ အန် မိူဝ် လာယ် ကာခဲန့် ဘော ဒီ ယေ။ အန် မိူဝ် ဟဲ့ ကာလာင် ကိူန် နာ တူ မွှိုမ် လွင် ဇဝ်ဖြာ။”