ဇဝ်ဖြာ အီ အိုပ် တူတ့် ဒွန် မျုဝ်၊ မှဝ် န့ ပါယ် ပီ တူ ပွက့် အုန် အန် အာခြာဝ် ဒီ ဆုင်ဖျာတ် အန် ဒါရာ ဒီ ဂေ ဒူအီ။း ဂေ အီ ဘူင် ဂါန် အန်၊ မှဝ် န့ ပါယ် ပီ တူ ယိုဝ် ဂေ အန် ဇဝ် ဒမ် မှာပ် ဒီ အီ။း

2 ဂေ ဒူအီ မင် အီ ဟဲ့ ကာထုဝ့် လွှက့် ကာအုန် ကာဒါယ်။ ဂေ ဟဲ့ ပြာ ဖိုင် မာဘူ အီ ဟဝ်၊ ဝီ ဟျီင် ဘဲန် ကြုဝ် ဂေ။

3 ဂေ ဟဲ့ ဖာတ် ဒိုဝ်း မာလာ ဂွန် ဆီပြး။ ဆေ ယာ ဆီပြး တး မှာန့် ဒီ ကာရဝ်း ကာဝါယ် ဒီ ဂေ အီ စီ အီ စဲက်၊ ဂေ ဘော ဝီ ဒိုဝ်း မက် ဒီဆုဝ် ယာ ဆီပြး တီ၊ တဲး န့ ဘဲန် ကြုဝ် ပီ ငါမ် ပီ ကမ် အန်။

4 ဂေ မိူဝ် ဂိး လေး ညွန် လေး ဒူအီ ဂိန် ဒူအီ ဖ့လာန် ဒူပ် န့တေန့် ဒူင် ဆီ ဟာဝ် ဂေ။ ခုဝ်၊ ခဲ့ ကွယ် ဒူအီ ဂိန် ဒူအီ ဖ့လာန် ဘော ကာဒုး ဒီ တဝ် ချြီင် ဂေ။

5 ပါယ် တီ ဂေ ဒူအီ ဂိန် ဒူအီ ဖ့လာန် ဘော လုဝ် ဂျုဝ်ဂျာ ဒီ ဘူင် ဂါန် ခဲင် ပြဲ ကာဟဝ်း။ ဂေ ဘော လုဝ် ဟြေတ့် ပီ ဒီ ဟူမ် အာဒါ ဂွန် ဂေ ပီ မာလာ ပြဲ။

6 ဂေ မိူဝ် ဝီ ဟာဝ် ဆုဝ့် ငှုဝ် အီ ဆီ ဂိတ် ခဲင် မာန် ဘော ခဲင် ဒူင် နာ အီ ဟဝ်။ ဂေ မိူဝ် ဝီ ဟာဝ် ဘေတ့် ဘ့လေ မာငုန် အီ ဆီ ဂိတ် ဆီ ကာလူယ် ခဲင် မာန် ဂေ ဒူအီ ဟာယ် ဒူအီ မိူက်။

7 ဂေ မိူဝ် တူ မိုဝ်း ဒီ တာ ခြိုင်။ ဂေ ဘော အိတ် ဂ့လ ဘော ဒွင် ခိူန်။ အာခြာဝ် ဂတ် ဂျီတ် ဂေ မိူဝ် တူ မိုဝ်း ဟိုပ် ဒီ ပ့လိုက် ဒီ ဂေ။

8 ဒေါ ကွယ် ဂေ ဒဲင် နွန်၊ ဂေ ဘော ကာဒုး ဒီ အမ် ည ခဲင် ဂ့လာယ် တူ မိုဝ်း ဒူင် ဒီ ခြုတ် ဒူင် ဒီ ဘိုင်။ ဂေ ဘော ကာဒုး ဒီ ချြီင် ကာဒး မာဝ် ဘော ယာပ် ဒါအာင်။

9 န့ ဘော မိုဝ်း ဒူအီ အီ ဖာတ် ဒိုဝ်း ဂွန် င အီ တူ မိုဝ်း ဂုန့်၊ တဲး အန် ကာဂဝ်း ဒီ မာ အန်။ ဂေ ဘော ဒိုဝ်း ဂွန် ဒီတဲတ် အီ မုး ဂွန် ဒူအီ ဒုက် ဒူအီ ဂိန်၊ တဲး န့ ကာလွာ့ နီ ဂေ။

10 ဒူအီ ဂိန် ဒူအီ ဖ့လာန် ဂေ တီ တူ မိုဝ်း ဒီ တာ ခြိုင်၊ ဂေ ဘော ကာဒုး ဒီ ဟာဝ် ဝိဝ် ဟာဝ် ဝေန့် အာဂ့လ ပါယ် တီ။ ဂေ ဘော ကာဒုး ဒီ ဂွတ် ဒီ တုဝ် ဆီဘယ့် ငှုဝ် ဒွါ ဒီ အီ ဟဝ်၊ ယီ တူ ပွိုန် ဒီ ဟူမ် ဖဲ။

11 ဂေ ပီ ဘော ဟဲ့ ကြိတ် ဘ့လေ နာမန်၊ တဲး အိုမ် နာမန် လေး ဘော ညဲတ့် ဘ့လေ မာငုန်၊ တဲး ဂေ ပွိုန် အိုမ် မာငုန် မိူဝ်၊ ဂေ ယီ ဝီ ကာပြာန့် ကာဆဝ် ပီ ဒီ ဟူမ်။

12 ဂေ ဒူအီ အီ ဟဲ့ ရိန် ဒီ ယမ် မိူဝ် ဟဲ့ ငှုန် ဟဲ့ ဒဲ့ ခဲင် မိူင်။ ဂေ အီ ဟဲ့ ဆဝ် ဟဲ့ ဒိမ် မိူဝ် ဟဲ့ ဒဲ့ ဟဲ့ မှာန့်၊ တဲး န့ မိုဝ်း အီ တး စွယ် ဂေ။ မာလဲ၊ ဇဝ်ဖြာ ယီ တူ ထူမ် ဂြုဝ်း ပီ ဆာခိုဝ် ဂေ။

13 န့ ယီ မိုဝ်း ဒူအီ အီ ကာဘး အီ ဇွင့် ဘ့လာင် ဒေါ ကာတဲ ဆီငဲ။ ဂေ မိူဝ် တူ နပ် န့တေန့် အီ ပွိုန် ဟာဝ် ဒေါ ဘ့လာင် ဆီငဲ။ ဂေ မိူဝ် တူ ဆီ ဟာဝ် တူ ဆီ ဒူပ် န့တေန့် တီ။

14 ဒူအီ အီ ငဝ်း ယမ် အာဆာက် အီ ဟဝ်၊ အန် ဘော နပ် ဒီ ယိတ့် ဘာ ဒီ အပ် ဘော ငဝ်း ယမ် ဒူအီ ဒုက် ဒူအီ ဂိန်။ ခဲင် မှိုဝ် အန် ဘော ဝိန် ဒီ ချွင် ပီ ဒါ ဇူန် ဂေ ဒါ ပြာ။

15 ငါယ် ဒူအီ အီ ဆီ လုတ့် အီဘိုန့် အီ ဟဝ်၊ အန် ဘော ကာပြာ တဲး န့ ဇမ် ဘာ ဒီ အပ်။ အန် ဘော ကာမှုဝ့် နာ အန် ဘော တဝ်း ခဲင် နဝ်း အန်၊ ‘အာဝ် မိုဝ်း အာဆေ ယိုဝ် အုဝ်။’

16 ခဲင် မှိုဝ် ဒူအီ အီ ဆီမာ ပြာ၊ အန် ဘော နပ် ဒီ ဝိုဝ်း ကာဒဝ် ရဲင်၊ တဲး အန် ပွိုန် ဒီ လိုပ် ခဲင် ကာင် အီ ဟဝ်။ ကာတဲ ဆီငဲ အန် ဘော ကာဘိတ် မာလုဝ်း၊ ချြီင် အန် ခဲင် ကာင် အန်၊ တူ ယ ကွယ် ခဲင် ဘ့လာင်။

17 ဂေ ဒူအီ ဇိုဝ် တီ ယုဝ် ဘ့လာင် ဆီငဲ။ ဆေ န့ မုး ခဲင် အပ် ဝွင့်၊ ဂေ မိူဝ် ဟဲ့ ဒွိုမ်၊ တူ ယုဝ် မာဆေ။

18 ဒူအီ ဟာယ် ဒူအီ မိူက် တီ၊ ဂေ ဒီ ဘော န့စိုဝ် ပီ ပုး ဘြိုယ် ဟာဝ် ဒဲင် ကာငိဝ် အိုမ်။ ဒူင် ကွယ် ဂေ၊ ဟဲ့ ဘဲန် ပီ အေး ပီ ဒိူင် ဇဝ်ဖြာ။ ဂေ မိူဝ် တူ ပွိုန် ဝီ ဟာဝ် ရန့် မာန် မာငုန် ဂေ။

19 မိူင် မာရာန ဒီ ဘော ဒိုဝ်း ဝဲန် ဒူအီ တူ မွှိုမ် ဂေ တီ၊ တဲး န့ ပီ ဆောဒါတ် ဂေ ကာဟွာ့ ဘူင် တဲး အိုမ် ဒါတ် လာတ့် ဟြာယ်။

20 မာ အီ ဂွိုတ် လေး အန် မိူဝ် ဟဲ့ ဝီ ပိဝ် အန်။ မင်ပြတ့် ဘော ဟူမ် ဒုဝ် အန်။ ဝါယ် အန် တီ အာဝ် မိုဝ်း အာဆေ အီ ဆီ ဝီ နမ်လှုဝ်း အန်။ အန် မိူဝ် ဒီ ကာဘက် လိုဝ် ပီ ဟေ အီ ဟဲ့ ကေး။

21 န့ ဘဲန် ပါယ် တီ ဒီ ဒူအီ ဟာယ် ဒူအီ မိူက် ကူပ် ဟဲ့ ဘူင် အန် နာ တူ မွှိုမ် ဒီ ယာ ဆီပြး ဘော ခါနှာပ် လုက်တာယ် ဂေ အီဘိုန့် အီ တူ မိုဝ်း ဂွန်။

22 ဇဝ်ဖြာ ဘော တာ အာဖုင် ဒင်ခုဝ် အန် ပျာတ့် ဂေ ဒူအီ အီ မိုဝ်း ပ့လူမ် တာင်။ ဒေါ ဘူင် အန် ဇဝ် ပါယ် တီ ဂေ ဒူအီ အီ တူ မွှိုမ် ဂေ ဘော ကေး ယမ် အူ ဇေန့်။

23 ဇဝ်ဖြာ ဟဲ့ ခ့ဝါင် တဲး ဂေ ကွယ် ဒါခိုယ် ကွယ် ထင်ဟာင်။ မာလဲ၊ အန် ယီ ယွတ် ပီ ပါယ် ဂေ။

24 ဒူအီ ဟာယ် ဒူအီ မိူက် ပီ အိူပ် မျုက် အီ၊ အူ ကာစန် ဂေ ဟဲ့ ဝီ ဟြာယ်။ အာဆာက် ဂေ မိူဝ် လိုဝ် စှိုမ် ပီ အီ ဟဝ်။ ဂေ ဘော လုဝ် ခမ် အီ ဒဲပ် ဝဲန် ဂေ ပီ အီ ဆုဝ့် ကာယူင့် ငှုဝ်။

25 ဆေ ဘေ တဝ်း၊ ဂြုဝ်း အုဝ် နီ တူ မှာန်၊ အာဆေ ဟဲ့ ပွိုန် ဝီ ဝျီ့ ဒီ အုဝ်၊ တဲး န့ ဘျ ဂြုဝ်း အုဝ် တီ တူ မှာန်။း”