1 ဒေါ အန် တီ အာယုဝ်ဘာ ဝီ ကာလာင် ဂြုဝ်း။

2 အန် တဝ်း၊ “ဘေ ပီ ဘော ဟဲ့ တဝ်း ပါယ် တီ မိူဝ်၊ န့ ဟဲ့ ဆွင့် ကာဆဝ် ဒီ နဝ်း အုဝ် အာတိုဝ် နီ။ အုဝ် ပီ ဘော ဟဲ့ ငှုန် ဟဲ့ ပိုန့် မိူဝ်၊ န့ ယီ တူ စွယ် တဲး ဒုက် ပီ ခမ် အုဝ် ဟြာယ်။

3 အုဝ် ဟဲ့ ဆီ နပ်၊ ဒီ မှဝ် အုဝ် ဒီ ပွိုန် လာယ် ကာတုန့် ဒီ အန် ဇဝ်။ အုဝ် ဘော ဆီ နပ် န့တေန့် မှဝ် ဒီ ပွိုန် ဟာဝ် ဇမ် ဒူင် ကွယ် အန် ဇဝ်။

4 ဆေ ဟီ နပ်၊ အုဝ် ဒီ ဘော ဟာဝ် ကာလာင် အာမူ အုဝ် နီ ဒီ အန် ဇဝ်။ ဂြုဝ်း ပီ ဒီ ဟာဝ် ကာလာင် ဟာဝ် ဒါင် အုဝ် လွင် တူ လုတ့် အုဝ်၊ န့ ဒီ ကိူန် ကာဆဝ်။

5 န့ ဒီ ဘော ကာလှုး ဒီ နဝ်း အုဝ်၊ ဂြုဝ်း ပီ ဝီ ကာလာင် အန် ဇဝ် ဒီ အုဝ်။ အုဝ် ဒီ ဘော နပ် ဘော နုဝ် ဂြုဝ်း အန် ဇဝ်။

6 ဘေ ထာင် အန် ဇဝ် ဒီ ဘော တာ အာဖုင် ဒင်ခုဝ် အန် ဝီ ကာထဲန့် ဒီ အုဝ်။း အန် ဇဝ် တူ ဘူင် ပါယ် တီ။ အန် တူ ဖျာက် အုဝ်။

7 ဒေါ အန် တီ ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် ဒီ ပွိုန် ကာလာင် နှဲ လွင် အာမူ အန် ဒီ အန် ဇဝ်။ ဇဝ်ဖြာ အီ ဒီ ဆုင်ဖျာတ် ဒါရာ ဒီ အုဝ် တီ၊ အန် ဒီ ဂဝ်း ဝဲန် မှာပ် အုဝ် ဘော တဲး အုဝ် လွတ် ခမ် မှာပ် ဆေဆေ။

8 ဆေ အုဝ် ဘော ဟာဝ် နာ လေး ဆီငဲ၊ အုဝ် ယီ တူ ကာတုန့် အန် ဇဝ်။ ဆေ အုဝ် ဘော ဟာဝ် နာ ဂေတ့် ဆီငဲ၊ အုဝ် တူ ယိုဝ် အန် ဇဝ်။

9 အုဝ် ပီ ဘော ဟုဝ့် ဘ့လာက် နာ ကွာ ဒူင် ဘူင် အန် ဇဝ် ဂါန် အန်၊ အုဝ် ယီ တူ ယိုဝ် တူ ကာတုန့် အန် ဇဝ်။ အုဝ် ပီ ဘော လူင် ဘ့လာက် နာ တေတ့် မိူဝ်၊ အန် ဇဝ် ဘော ချြီင် အန် တူ တဲး အုဝ် ယိုဝ် အန်။

10 ပီ ဘော ဟဲ့ ပါယ် တီ မိူဝ်၊ အန် ဇဝ် ယီ ဟဲ့ နပ် န့တေန့် ပီ ဒူပ် အုဝ်။ ဒေါ တီ နီ အုဝ် ဘော ကာဒုး ဒီ ခမ် အန် ဇဝ် ဇဲတ်ဆေ ဆီချာ အုဝ်။ ဟဲ့ ဟွတ့်၊ အုဝ် ဘော ဝီ လေး တး ပီ ခြိဝ်။

11 န့ မိူဝ် ဟဲ့ ပီ အုဝ် ဇာပ် ဟာဝ် ဒူပ် ပန် ပ့လဝ် အန် ဇဝ် တူ ဝး ဒေါ မှဝ်။ အုဝ် မိူဝ် ဟာဝ် ဒူပ် န့တေန့် ပီ ဟာဝ် အန် ဇဝ်။

12 အုဝ် မိူဝ် တူ ဝး တူ ဝဲန် ဒါရာ ပီ ကာလာင် အန် ဇဝ်။ ဂြုဝ်း ပီ ကာလာင် အန် ဇဝ်၊ အုဝ် မိူဝ် ဂဲပ် အုန် ခဲင် နဝ်း အုဝ်၊ ကွဲ့ တဲး အုဝ် ပိဝ်။

13 ပီ ခြာမ် ပီ ဇေန့်ဇာ အန် ဇဝ် တူ ဘျွင် တူ ဘ့လိူင် ဒေါ မှဝ်။ အာဝ် မိုဝ်း အာဆေ အီ ပွိုန် ဘူင် တဲး အန် ဇဝ် ဘျွင်။ အန် ဇဝ် မိူဝ် ဘူင် ဒူပ် ပီ အိုင် အန် ဆေဆေ။

14 ပဲ့ ဟဲ့ ခြာမ်၊ ဟဲ့ ရဲန် အုန် အန် ဇဝ် ဒီ ဘူင် အာဒါ အုဝ်၊ အန် ဇဝ် ဒီ ဘူင် တဲး န့ ကော ဇေ့ဇုင် တူတ့် ဒွန် မျုဝ်။ ပဲ့ ဟဲ့ ခြာမ် အန် ဇဝ် ဒီ ဘူင် ဒီ အုဝ်၊ န့ ဆီ ကိူန် ကာဆဝ်။

15 ကူပ် ပါယ် တီ န့ ဘော ဘဲန် ယုဝ် ဒီယုး ဒီယေန့် ဒေါ ကွယ် အုဝ် ဒီ အာတ့် အန် ဇဝ်။ ဒေါ ဝီ လှုဝ်း ဝီ ဇေန့်ဇာ အုဝ် လွင် အန် တီ၊ အုဝ် ဘော ယုဝ် ကာဆဝ် အန် ဇဝ်။

16 ဇဝ်ဖြာ မိူဝ် ဟဲ့ ဘူင် တဲး န့ ဘဲန် ဒီလှး၊ ဘဲန် နဝ်း တျီ့ ဒီ အုဝ်။ အန် ဇဝ် အီ အိုပ် တူတ့် ဒွန် မျုဝ် ဟဲ့ ဘူင် တဲး အုဝ် ယုဝ် ကာဆဝ်။

17 ပီ ဘော ဟဲ့ အပ် ဝွင့် ဒီ အုဝ် မိူဝ်၊ အန် ယီ တူ တဲး အုဝ် ကွယ် ဆီတွင့် တူ ဂြုဝ်း။ အန် ဇဝ် မိူဝ် တူ ဒိုဝ်း ဝဲန် အပ် ဝွင့် အီ ဟဲ့ ဟေတ့် ကာဆဝ် အီ ပ့လိုက် နာ အုဝ်။