1 ဒေါ အန် တီ အာအေလီဖာတ် အီ မုး ဒူအီ အာမျုဝ် ထေမာန် ဝီ ကာလာင် ဂြုဝ်း။

2 အန် တဝ်း၊ “ဒူအီ အီ မိုဝ်း အာငျာန် ကိူန် ကာဆဝ် တူ ပွိုန် ဘူင် တဲး န့ ဘဲန် ဂေဇူ ဒီ ဇဝ်ဖြာ။ ဒူအီ တူ ပွိုန် ဘူင် တဲး န့ ဘဲန် အာဂျိုဝ် ဒီ အန် ဇဝ်။

3 မဲ ထာင်၊ ဇဝ်ဖြာ အီ အိုပ် တူတ့် ဒွန် မျုဝ် ဒီ ဘော ခူယ် ကူပ် နဝ်း ဆိူဝ် နဝ်း မှာန် မဲ တီ။း ဆေ ဇဝ်ဖြာ တူ ယိုဝ် အီ တူ မွှိုမ် လွင် မဲ၊ မဲ ထာင်၊ ဟဲ့ ဘဲန် အာဂျိုဝ် ဒီ ဇဝ်ဖြာ။း

4 အာဝ် မုး၊ ဇဝ်ဖြာ မာနုဝ် မဲ ဘော ဖျာက် မဲ ကူပ် ရုဝ်ဆေ မဲ ဒီ အန်။

5 နာ တူ မွှိုမ် ပဲ့ ဟဲ့ ဘူင် မဲ ဟဲ့ တာင် ကာဆဝ်။ မှာပ် ပဲ့ ဟဲ့ ဘူင် မဲ တီ၊ န့ ဟဲ့ ကိူန်။ အာဝ် နပ် ဒီ တူတ့် ဒီ ဆိူတ် ပီ ဒီ ပါယ် ဒီ ကာလာင်။

6 မဲ ဟဲ့ ဒိုဝ်း ကြုဝ် ပီ တး ကမ် တး ငါမ် ဂေ ဘီနွင် မဲ အီ တူ ကာဒါန် ဒိုဝ်း။ မဲ ဟဲ့ ဘုတ့် လေး ခြိုင် တာ ဂေ၊ ဝီ ဘ့လေး တဲး ဂေ ကွယ် ဒုဝ် ဂ့လ။

7 မဲ မိူဝ် တူ တဲး ဂေ အီ ဟဲ့ နုန် ဒျီင် အိုမ်။ မဲ တူ ဟျီင် ဂေ အီ ဟဲ့ အေတ့် အီ ဟဲ့ ကာပြာန့်၊ တဲး ဂေ ပွိုန် ဒီ ဟူမ်။

8 မဲ မုး ဝီ အီ မိုဝ်း ပ့လူမ် တာင်၊ ပီ ပွိုန် ဘိုင် မာန် မိူင်။ မဲ မုး ဝီ အီ မိုဝ်း ဆာရေ ကိူန်၊ အီ ပွိုန် ဒီ ကွယ် ဒူင် တီ။ မဲ ယီ တူ စွယ် အီ။

9 ဒဲင် တူ စွယ် မဲ ဂေ ယာ ဆီပြး၊ မဲ ပီ ဝီ ဖာတ် ဒိုဝ်း ဘော ကြုဝ်ကြာမ် ဒီ ဂေ ဂွန် အီ တူ မိုဝ်း ဂုန့် မာ။

10 ကူပ် ပါယ် တီ န့ ပီ ယွတ့် ဂေ ခိူမ် ဟဲ့ ရူပ် မဲ ဒွန် ဘ့လာက်။ အာဖေ အာရေ အီ မွှိုမ် ယုဝ်၊ န့ ဒီ ဘော တး ကာစွာ ဒီ မဲ အူ ဇေန့်။

11 အီ ဘ့လာင် ဒီ မဲ ဟဲ့ ဝီ ဘဲန် အီ အပ် ဝွင့်၊ ကွဲ့ တဲး မဲ ပွိုန် ဝီ ယိုဝ် မာဆေ။ န့ ပီ အိုမ် ပြဲ့ တာင် ဟဲ့ တး မ့ပုန် မဲ။

12 ဇဝ်ဖြာ ယီ ကွယ် နာ ဒဲင် ခဲင် ဂါင်ဟြာဝ်၊ အန် ဘော ယွတ် လူင် ဂေ ဆီမန့်။ ဆီမန့် တီ ယီ ဟဲ့ ကွယ် စာ ကော ဆိူတ် ခဲင် ဘ့လေန့်။

13 မာလဲ၊ မဲ ယီ ဝီ ဒီမွှတ် တဝ်း၊ မှဝ် ဇဝ်ဖြာ ဒီ ပါယ် ဒီ နပ်။း န့အု အီ ဟဲ့ ဟေတ့် ကာဆဝ် ဟဲ့ ဟွတ့် ပ့လိုက် တူတ့် ဒွန် မျုဝ်။ မှဝ် အန် ဒီ ပါယ် ဒီ ဆုင်ဖျာတ်။း

14 အန် ဇဝ် ယီ ဟာဝ် ဝိဝ် ဟာဝ် ဝေန့် ခဲင် ဂါင်ဟြာဝ်။ န့အု အီ ဟဲ့ ဟေတ့် ကာဆဝ် တီ ဒီ ဘော ပွိုန် ကွယ် ရူပ် အန် ဇဝ်၊ ကွဲ့ တဲး အန် ဇဝ် ယိုဝ် အေ။

15 မဲ ဒီ ဝီ ဆုင်ဖျာတ် ခဲင် နဝ်း မဲ မျုဝ် မှဝ်။း မဲ ဒီ ဝီ ဒူပ် န့တေန့် ဘြိမ် ပီ ဒူပ် ဂေ ဒူအီ အီ တူ မွှိုမ် တွိုန်။း

16 ဂေ ဟဲ့ ဟြာယ် ဆိန့် အာတ့် ဇေ့ဇုင် အာဆာက် ဂေ။ န့ ပီ ဂေ ဒီ ကာဒုး ဒီ ခမ် အိုမ် ပြဲ့ တာင် တး ဇုး ဟာဝ် ဂေ ဘောကာဂ့လျီတ်။

17 ဂေ ဟဲ့ ဒွိုမ် ကာလာင် ဒီ ဇဝ်ဖြာ တဝ်း၊ ‘တဲး မဲ လေး ဒူင် ကွယ် ယေ နီ။’ ဂေ ပီ ဝီ ကာလာင် ပေါ န့ ပွါ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ်၊ အန် ပွိုန် ဘူင် မာဆေ အာဒါ အေ။း’

18 ပီ ဘော ဟဲ့ ပါယ် တီ မိူဝ်၊ န့ ယီ မုး အန် ဇဝ် အီ ဟဲ့ တဲး ဂေ မိုဝ်း၊ တဲး ဂေ ခြမ်။ ခုဝ်၊ အာကျာမ် အာငျာန် ဒူအီ တူ မွှိုမ် တီ၊ အုဝ် တူ ဆီဖုဝ်။

19 ဆေ ဇဝ်ဖြာ ဒမ် မှာပ် ဒီ ဒူအီ တူ မွှိုမ် ဂေ တီ၊ ဂေ အီ နဝ်း ဆိူဝ် နဝ်း မှာန် ဒီ ဘော ယိုဝ် ဘော ခူယ်။ ဂေ အီ တူ မိုဝ်း မှာပ်၊ ဂေ ဒီ ဘော ပီ ဝါညာက် ကာညး ဂေ။

20 ဂေ တဝ်း၊ ‘ရန်ဆူ အေ ဟဲ့ ကာဒုး အီ ပျာတ့် ဝဲန် တူတ့် ဂေ။ အီ ဆီ ဂိတ် ဆီ ကာလူယ် ဒီ ဂေ မိူဝ်၊ ငဝ် ဝီ ကာဆိုမ် တူတ့်။’

21 အိုယ် အာယုဝ်ဘာ၊ မဲ လုဝ် ဝီ ဟြေတ့် ဒီ လာယ် ကာလဝ့် ဒီ ဇဝ်ဖြာ။ မဲ လုဝ် ဝီ လာယ် ဘဲန် အူ ဂိုက် ဒီ အန် ဇဝ်။ ဆေ မဲ ဘူင် ပါယ် တီ၊ အန် ဇဝ် ဒီ ဝီ မွင့်ကာရာ ဒွါ နာ မွှိုမ် ဒီ မဲ။

22 တဲး မဲ ခမ် ဒီ ဒူင် ပီ မာနုဝ် အန် ဇဝ် ဒီ မဲ။ တဲး မဲ အုန် ဂြုဝ်း အန် ခဲင် နဝ်း မဲ။

23 ဆေ မဲ ဝီ တး ညိူဝ် အန် ဇဝ် အီ အိုပ် တူတ့် ဒွန် မျုဝ်၊ အန် ဒီ ဝီ တဲး မဲ ဒါခိုယ်။ ဆေ မဲ မိူဝ် ဝဲန် အီ တူ မွှိုမ်၊ မဲ ဒီ ဝီ ဒါခိုယ် ပီ ဘြိမ်။

24 တဲး မဲ ဒိုဝ်း ခြိဝ် မဲ၊ ဝဲန် ခဲင် ကာပုး။ တဲး မဲ ဒိုဝ်း ခြိဝ် ဇဲတ် အီ တး မိူင် အုဝ်ဖီ၊ ဝဲန် ခဲင် ဘ့လဲင် အိုမ်။

25 တဲး ဇဝ်ဖြာ အီ အိုပ် တူတ့် ဒွန် မျုဝ်၊ ဝီ ဘဲန် ပီ ခါဂုန် ခြိဝ် ဒီ မဲ။ ဘော တဲး အန် ဇဝ် ဝီ ဘဲန် ပီ ခါဂုန် ရွိုန် အီ ငဝ်း တာင် ဒီ မဲ။

26 ပန် အန် တီ မဲ ဒီ ဝီ ဘျုဝ် ဒါခိုယ် ဒူပ် အန် ဇဝ် အီ အိုပ် တူတ့် ဒွန် မျုဝ်။ မဲ ဒီ ဝီ ပွိုန် ဆာကိုဝ်း မာငး ယွတ် နာ ကွယ် ဇဝ်ဖြာ။

27 မဲ ဒီ ဝီ ဆာခိုဝ် ဒီ ဇဝ်ဖြာ။ အန် ဇဝ် မိူဝ် ဒီ ဝီ ထူမ် ဂြုဝ်း မဲ ဘော ဘူင် ဒူပ် ဂြုဝ်း ပီ ကာဆဲန့် မဲ ဒီ အန် ဇဝ်။

28 မဲ ဒီ ဘော ဝီ ပွိုန် ဒီ ဘူင် ဒူပ် ခဲ့ ပီ ဆုင်ဖျာတ် မဲ။ န့ ဒီ ဘော မိုဝ်း ဘ့လာင် အီ ဆွိုန် ဒူပ် န့တေန့် မဲ။

29 ဇဝ်ဖြာ ဒီ တဲး ဂေ ဒူအီ ပီခိုက် စုဝ်း လူင် ဒူင် တျီမ်။ အန် ဘော ဝီ ချွတ် ဂေ အီ မိုဝ်း နဝ်း ဂူမ် နဝ်း တျီမ်။

30 အန် ဇဝ် မိူဝ် ဒီ ချွတ် ဝီ အီ မိုဝ်း မှာပ်။ ဆေ မဲ ဘူင် နာ ဆိူဝ် နာ မှာန်၊ အန် ဇဝ် ဒီ ချွတ် ဘော မဲ။”