1 ဝါယ် အန် တီ အာယုဝ်ဘာ ဝီ ကာလာင် ဂြုဝ်း။

2 အန် တဝ်း၊ “တဲး ဘေ ထူမ် ဆီချာ ဂြုဝ်း အုဝ်။ န့ ဒီ ပီ ဘေ ဒွါ အီ လှဝ် နဝ်း အုဝ်။

3 တဲး ဘေ အူတ် နဝ်း၊ ခမ် ဒီ ထူမ်၊ တဲး အုဝ် ပွိုန် ဒီ ကာလာင် တူတ့်။ ဆေ အုဝ် ဟဲ့ ဟွတ့် ကာလာင်၊ ဘေ ဆီ ကာညး၊ ဆီ ပီ ဝါညာက် ဒီ အုဝ်၊ ဟဲ့ ပွိုန်။

4 အီ ဘဲန် ရူ ဘဲန် စာဝ် ဒီ အုဝ် အာဝ် မုး အုဝ် လာယ် ကာထဲန့် ဒီ ဒူအီ။ ဆေ အုဝ် အူတ် နဝ်း၊ အာဝ် မိုဝ်း ဒီခုဝ်။

5 တဲး ဘေ ယွတ် အုဝ် နီ၊ တဲး န့ တဲး ဘေ ကွယ် ဆီတွင့်။ တဲး ဘေ ဝီ ဒိုဝ်း ဒဲ ဘေ ဝီ ကာဘိတ် မူတ့် ဘေ၊ ကွဲ့ တဲး ဂြုဝ်း လေး။

6 ဆေ အုဝ် ဟီ ဝီ ကာဖာ လှုဝ်း လွင် ပီ ကာလာင် အုဝ်၊ အုဝ် ဘော ဝီ ကာစွာ၊ ဘော ဘဲန် ဒီယုး ဒီယေန့် ဒီ အုဝ်။

7 မှဝ် န့ ပါယ် ပီ အုန် ဇဝ်ဖြာ အာဆာက် ဒူအီ ဟာယ်၊ တဲး ဂေ ကွယ် ကော ဇမ် ပန် ကတ် ဂေ ဘော တဲး ဂေ မိုဝ်း အာဖုင် မိုဝ်း ပ့လူမ် ဂေ ဟဲန့် ကာပွါ။း

8 ဂေ ဘော ယိုဝ် ဂွန် ဂေ ဟဲ့ ဒါခိုယ် ဂျာမ်ဆာ ကွယ် ခူပ် ဂေ။ ဂေ ဘော ယိုဝ် လှုက်လှာန် ဂေ ဟဲ့ ပ့လူမ် ခ၊ ကွယ် ဆီချာ။

9 ဇဝ်ဖြာ တူ တဲး ကာင် ဂေ ဇမ် ဒုက်။ ဂေ မိူဝ် လွတ် ဇဝ်ဖြာ ဒမ် မှာပ် ဒီ ဂေ။

10 မက် ဒီဆုဝ် ဂေ မိူဝ် ဒူပ် မာမက် ဘော ဒိုက် ဒွန် ဇေန့်။ မာမက် ဂေ မိူဝ် ရူမ် မိုဝ်း ဂွန်၊ အာဝ် မိုဝ်း အီ လိုဝ် အီ စှိုမ်။

11 ဂွန် ဂေ မိူဝ်၊ ကာဘ့လဲပ် ဝိဝ် ကာဘ့လဲပ် ဝေန့် ပီ ဖိုင် ဂွန် မာဘူ။ လှုက်လှာန် ဂေ မိူဝ် ခူယ် ဂါ ဆိန့် ဒီတဲတ် ဂေ။

12 ဂေ ဘော ဂါ ဒူပ် ဟမ် ဂြိုင် ဂေ ဟမ် ဒိင်။ ဂေ ဘော ခူယ် ဒူပ် ဟမ် ဝဝ်။

13 ဂေ ဘော ဘျုဝ် ဒါခိုယ် ဘော စုဝ် ဘော ဇာတ် ဂေ။ ဟဲ့ ဟွတ့်၊ ဂေ မိူဝ် ပွိုန် ဒီ ယမ် ဒါခိုယ်။

14 ဂေ ယီ နပ် ဒီ ဝီ ကာလာင် ဒီ ဇဝ်ဖြာ တဝ်း၊ ‘တဲး မဲ လေး ဒူင် ကွယ် ယေ။ ယေ တူ ဆီ နပ် န့တေန့် ပီ နှဲ မဲ။

15 ဇဝ်ဖြာ အီ အိုပ် တူတ့် ဒွန် မျုဝ်၊ အန် ပါယ် မှဝ်၊ အေ ကော လုဝ် ကြိုပ် အန်။း ဆေ အေ ဟီ ဆာခိုဝ် ဒီ အန်၊ အေ ဒီ ပွိုန် အာဂျိုဝ် မာဆေ။း’

16 ဂေ ဘော နပ် ဒီ ပီဖုင် ဂေ တဝ်း၊ ခဲ့ မိုဝ်း ဂေ ဒွန် မျုဝ်၊ န့ မုး တူတ့် ဂေ အီ ဘူင် အီ ရန့်။ ခုဝ်၊ အုဝ် တူ ဆီဖဝ် အာကျာမ် အာငျာန် ဂေ ဒူအီ အီ တူ ဒူပ် ဒါရာ။

17 နှာင် ဇေန့် ဘေ ဟဲ့ ဒွိုမ် ယိုဝ် ဒူအီ ဟာယ် ဒူအီ မိူက် ဟဲ့ ယမ် ဒေါ တူ ထာင် ဂေ။း နှာင် ဇေန့် ဘေ ဟဲ့ ယိုဝ် ဂေ လုဝ် ခမ် အာဖေ အာရေ ကူပ် ဟဲ့ ရူ ဇဝ်ဖြာ ဒီ ဂေ။း

18 နှာင် ဇေန့် ခုန် ဟဲ့ ဒွိုမ် ဘုတ် ဝဲန် ဂေ၊ တဲး န့ ပီ ခုန် ဘုတ် ဟျြီင် ကာဟဝ်း ဂေ ဒျီပ် ငှုဝ်။း

19 ဒူအီ ဘော နပ် ဒီ တဝ်း၊ ‘ဇဝ်ဖြာ ဟဲ့ ဒမ် မှာပ် ဒီ လှုက်လှာန်၊ တဲး န့ ကာဒါင် မှာပ် ဂုန့် ဂေ။’ အုဝ် ယီ တဝ်း၊ တဲး ဇဝ်ဖြာ ဘူင် ဝျီ့ ဒီ ဒူအီ ဟာယ် ဒူအီ မိူက်၊ တဲး အန် ဝီ ခမ် ရာင် အန် ပဲ့ ဟဲ့ ဘူင် အန်။

20 တဲး ဒုဝ် အန် ဝီ ယိုဝ် ပန် ဒီ လိုဝ် စှိုမ် အန်။ တဲး အန် ခမ် ပီ ပီရူ ဇဝ်ဖြာ ဒီ အန်။

21 ခုဝ်၊ ဆေ ဟီ ဇမ် ပန် ဒီ တူတ့် အာဆာက် ဒူအီ၊ အန် တူ နပ် ဒီ မိုဝ်း နဝ်း မှဲ ဒါင် ဂွန် အန် ယုဝ် ဂေ ဒီ ပါယ် မှဝ်။

22 န့ တူ မိုဝ်း အာဆေ အီ ဝီ ပွိုန် မာနုဝ် ဒွါ အာကျာမ် အာငျာန် ဒီ ဇဝ်ဖြာ။ အန် ဇဝ် မုး အီ အိုပ် ဘော ဂေ အာမူ အာမာတ် အန် ခဲင် မိူင် ဒဲင်။

23 ဒူအီ အူ ဝီ အန် ယမ် ဒေါ ဆီ ခြမ် အန် ဘော ဒေါ ဆီ ပ့လူမ် ခ အန်။

24 ဒုဝ် ဘူင့် အန် ဘော ဂ့လန့် ဘော ဟေတ့်၊ ကာငှဲတ့် ခဲင် ကာအာင် အန် ဘော ည ဘော အမ် ဆီချာ။

25 ပီ ဝီ မိုဝ်း ပေါ အူ ဝီ၊ အန် ယီ ယမ် ဒေါ ခမ် အန် ဒုက် ကာဆဝ် ဒီ နဝ်း ဒီ ဖွိုမ် အန်။ အန် မိူဝ် တူ ဒွိုမ် ယိုဝ် အီ မွှိုမ် အီ ဒါခိုယ်။

26 ဂါယ် အာ ဝီ တီ ဘော ယမ်၊ ယီ လုဝ် ဟာဝ် ဒိပ် ဂါယ် ခဲင် ကာဒါယ် မုး အူ မျုဝ်။ မင်ပြတ့် ဘော ဟူမ် ဂါယ် ဘော အာ ဝီ။

27 အုဝ် ဟဲ့ နပ် ပီ ကာဒွါ့ ကာဖာ ဘေ ဘော ပီ ခြာမ် ဘေ ဒီ ဘူင် အီ တူ မွှိုမ်၊ တဲး ဘေ ပွိုန် ဒီ ပျာတ့် အုဝ်။

28 ဘေ ဘော ဒီမွှတ် တဝ်း၊ ‘ကာင် ဒါ ကာညာ တွိုန် ကွယ် ဒီ မှဝ်။း ဂေ အီ တူ ဘွတ် တူ မွှိုမ် တွိုန် ကွယ် ဒီ မှဝ်။း’

29 မာလဲ၊ န့ ပီ ဘေ တူ ဒွိုမ် ဒီမွှတ် ဂေ အီ ဟာဝ် ဒူပ် န့တေန့် တူင့်။ ဘေ တူ ဒွိုမ် ထူမ် ဂြုဝ်း ပဲ့ ဟဲ့ ခဲ ဟဲ့ ကာလာင် ဂေ။

30 ဂေ ဟဲ့ တဝ်း၊ ‘ဆေ ဟီ ဇမ် ဆီငဲ ဒီ တဲး ဇဝ်ဖြာ အာဖေ အာရေ၊ ဂေ ဒူအီ ဟာယ် ဒူအီ မိူက် ဒီ ဘော လွတ်။’ ဆေ ဟီ ဇမ် ဆီငဲ ဒီ ဘျ ဇဝ်ဖြာ နဝ်း ရူ အန်၊ ဒူအီ ဝီ တီ တူ လုဝ် ခမ်။

31 အာဝ် မိုဝ်း အာဆေ အီ ဒီ ယ ကာလာင် ဆိူဝ် ဒီ ဒူအီ တူ မွှိုမ် လွင် ပဲ့ ဟဲ့ ဘူင် အန်။ အာဝ် မိုဝ်း အာဆေ အီ ယ ဝီ ဘူင် ဝျီ့ ဒီ အန်။

32 ဂေ ဘော ကာဂွတ် ဟာဝ် အန် ခဲင် ဘာရေဝ်။ ဟဲ့ ဟွတ့်၊ ဂေ ဝီ ဘ်ု ဒူင် ဒိပ် ဂေ ဒီ အန်။

33 ကာပုး ဂေ ကာဒါယ် ဘော မ့ပုန် ဒဲင် ဒုဝ် အန် ဟဲ့ န့ စိုဝ် ဒီ အန်။ ခဲ့ ကွယ် ဒူအီ အီ ဟာဝ် တိုယ် ဒုဝ် ယမ် အန်၊ ဂေ ဟဲ့ ကိူန် ကာဆဝ် ကော ဟူ နပ် ဒီ တိး။ ဂေ ဘော ဒူပ် ဒီ ပန် အန် ဘော ယဲတ့် ဒီ အာတ့် အန်။

34 မှဝ် န့ ပါယ် ပီ ဒိုဝ်း ဘေ ဂြုဝ်း ပီယေန့်၊ ဂြုဝ်း ဒီလူယ် ဒီလာယ်၊ တဝ်း တဲး န့ လှဝ် နဝ်း အုဝ်။း ဂြုဝ်း ပီ ဝီ ဝျီ့ ဘေ တီ၊ န့ မုး တူတ့် ဂြုဝ်း ကာလုဝ်။”