1 ဝါယ် အန် တီ အာစောဖ အီ မုး ဒူအီ အာမျုဝ် နေမာတ် ဝီ ကာလာင် ဂြုဝ်း။

2 အန် တဝ်း၊ “လွင် ပဲ့ ဟဲ့ ကာလာင် မဲ တီ၊ န့ ဟဲ့ ကာဆုး နဝ်း အုဝ်၊ တဲး အုဝ် ဝီ ကာလာင် ဝျီ့။ နဝ်း အုဝ် မိူဝ် ဟဲ့ မှဲ ဘော ဆီ ကာလာင် ကာဆဝ်။

3 ဂြုဝ်း ပီ ကာလာင် မဲ၊ န့ မုး ဂြုဝ်း အီ နဲန တဲး အုဝ် စှိုမ် ဆာရေ။ ခဲ့ ကာလှုး ဒီ နဝ်း အုဝ်၊ အုဝ် ဝီ ကာလာင် ဒီ မဲ။

4 ဆိန့် စုဝ် ဘာန် ဒေါ မွိုန်၊ ဆိန့် ဒေါ ဂုဝ် ဒေါ ကာစုး ဇဝ်ဖြာ ဒီ ဖာန် ဘ့လေး ဒူအီ ဒဲင် ကာဒါယ် နီ၊

5 ဒူအီ ဟာယ် ဒူအီ မိူက် ဟဲ့ ပွိုန် ဒီ ပီဖုင် အန် အာဒါ အူ ကာစန်။ ဒူအီ အီ တူ ရုဝ်ဆေ ဇဝ်ဖြာ ဟဲ့ ပွိုန် ဒီ ဘျုဝ် ဒါခိုယ် အာဒါ အီ စဲက်။ မဲ မိူဝ် ဟဲ့ နပ် လွင် အန် တီ။

6 နဝ်း ပီခိုက် အန် ပီ ဘော တာင် ဘော စာ ကော ဒုး ဘ့လေန့်၊ ဒုး န့အု မိူဝ်၊ အန် တူ ပွိုန် ကွယ် လှေန့်။

7 အန် ဒီ ဝီ လိုဝ် စှိုမ် ပီ အျီင် ဒုဝ် ဘြိမ် အန်။ ဂေ အီ ဟဲ့ ဒွိုမ် ယိုဝ် အန် ဒီ ဘော ဝီ ဒီမွှတ် တဝ်း၊ ‘မှဝ် အန် ကွယ်။း’

8 အန် ဒီ ဘော ဟြာယ် ပီ မ့ဘာဝ်။ ဝါယ် အန် တီ မိူဝ် အာဝ် ဟူ မိုဝ်း အီ ဝီ ယိုဝ် အန်။ အန် ဒီ ဘော ဟြာယ် ဝွင့် ပီ ပီ ယိုဝ် ဒေါ အိတ် ဂေ ခဲင် မှိုဝ်။

9 ဂေ ဂိုက် ဘော ဒူအီ ခဲင် န့ဟူမ် အန် အာဝ် ဟူ ဝီ ယိုဝ် အန် ဒေါ မှဝ်။ ဒူင် ဒွိုမ် ကွယ် အန် အန် အာဝ် ဟူ ဝီ ကွယ်။

10 လှုက်လှာန် အန် ကာဒုး ဒီ ဟာဝ် မှာန့်၊ တဲး ဂေ ဒူအီ ဒုက် ဒူအီ ဂိန် စွယ် ဂေ။ အန် ဒီ ကာဒုး ဒီ ဝီ ဝျီ့ ကြုဝ်ကြာမ် ပီ ဒွိုမ် ဒိုဝ်း အန် ဒီ ဂေ ဒေါ တူ ဒူပ် အန် နာ မုး နာ မှာန်။

11 အန် ပီ ဘော ဆီ နှိုမ် မိူဝ်၊ ကာအာင် အန် ဒီ ဝီ ကွယ် ခဲင် ကာပုး။

12 အီ တူ မွှိုမ် ပီ ဘူင် အန် န့ ပီ ပီ ဒီ ဟူမ် အီ ဆီငဲး ဒီ အန်။ အန် မိူဝ် တဲး န့ ကွယ် လာတ့် ခြိုမ် ဆီဒ အန်။

13 အန် ဘော အိုင် ဒီ တဲး အန် ငမ် အုန် လှေန့် ခဲင် မူတ့် အန်။

14 မာလဲ၊ န့ ပီ ပီ ဒီ ဟူမ် အန် တီ န့ ဒီ ဝီ ဘျွင် ဘဲန် အီ ပြာင် ခဲင် ဝတ့် အန်။ န့ ဒီ ပီ အာယ် မာဟန့် ကွယ် ခဲင် ဒုဝ် အန်။

15 န့ ဘော ပီ အန် ဟဲ့ မဲင် ဘ့လွိုပ် ကြုဝ်ကြာမ် အီ ဟဝ်၊ အန် ပီ ဝီ ကာဒုး ဒီ ဟိုဝ် လေး။ ဇဝ်ဖြာ ဒီ ဝီ ဘူင် ကွဲ့ တဲး န့ ကွယ် ခဲင် ဝတ့် အန်။

16 န့ ဒီ ဘော ပီ အန် ဟူမ် အာယ် မာဟန့် ဟာယ်။ အာယ် မာဟန့် ငျီန် ဘော ဘူင် တဲး အန် ယမ်။

17 အန် တူ ပွိုန် ဒီ ဟူမ် လိုင် တာ လိုင်။ အိုမ် ပူ ဂေ ငါမ် မာဖျီန် ပီ ဘော ဟဲ့ ကိူန် မိူဝ်၊ အန် တူ ပွိုန် ဟူမ်။

18 ကြုဝ်ကြာမ် ပဲ့ ဟဲ့ ဂျုဝ်ဂျာ အန် ဒီ ဟြေတ့် တး အန် ယီ တူ ပွိုန် ဒီ ဝီ စ်ု။ အန် လုဝ် ဝီ ဝျီ့ ဝိဝ် ဒီ အီ။ ကြုဝ်ကြာမ် အန် တီ၊ န့ ယီ တူ တဲး အန် ယိုဝ် ဒါခိုယ်။

19 ခုဝ်၊ အန် ဟဲ့ ခါနှာပ် ဘော ဘူင် တဲး ဒူအီ ဂိန် ဘော ဖ့လာန်။ အန် ဘော ဖာတ် ဒိုဝ်း ကာင် ပဲ့ ဟဲ့ ဆမ် အုန် အီ ဟဝ်။

20 ကူပ် နဝ်း လောဖ အန် တူ မိုဝ်း ခဲ့ ဆိူတ်။ ကြုဝ် ပီ ဂဲပ် အုန် အန် အီ လဝ့် နဝ်း အန်၊ အာဝ် မိုဝ်း ခေါ အူ မျုဝ် ဒီ အန်။

21 ဒေါ ဟူမ် အန်၊ အန် မိူဝ် တူ တဲး န့ ဂိတ် န့ ကာလူယ် မာဆေ။ ခုဝ်၊ ခြမ် အန် တူ ကွယ် ဆေဆေ။

22 ဒေါ ဆီငျာ ခြမ် အန်၊ အန် ဒီ ကာဒုး ဒုက်၊ ကာဒုး ဂိန် အူ ဇေန့်။ အီ ဒုက် အီ ညှာပ် ဒီ တး တဲး အန် စှိုမ်။

23 ဒေါ ဆီငျာ ဟူမ် အန်၊ ဇဝ်ဖြာ ဒီ ရူ ကာဆဝ် ဒီ အန်၊ တဲး န့ ပီ ဇဝ်ဖြာ တာ မင် မး ဂ့လွက် အန် ဘဲန် ဇေန့် ဘဲန် ဇေန့်။

24 အန် ပီ ဘော ဟဲ့ ပဲ ဒီ ဝး ခြိုင် ကာဂုဝ်း အီ မုး ဟိန်၊ ဘ့လာ ဘွင့် ယီ ဒီ ဝီ လဝ့် ကာလှန် ဒုဝ် အန်။

25 ကာဒဲ့ ဘ့လာ တီ ဒီ ဘော လဝ့် ကာတု အန်။ ဘ့လာ အ အီ ဟဲ့ ကာလ ရာဝ် တီ အန် ဒီ ဘော ဒိူတ် လေး ခဲင် ကာဒူမ် အန်။ အီ မွှိုမ် ယုဝ် ကာဆဝ် ဒီ တး ဒူင် ကွယ် အန်။

26 အီ အပ် ဝွင့် ဒီ တး ပ့လိုက် ကြုဝ်ကြာမ် ပဲ့ ဟဲ့ အုန် အန်။ ငဝ် ပီ တူ ကာဒုး ဒူအီ ဒီ ဘုတ် ဒီ ပီဒဝ့်၊ န့ ဒီ ဘော ကာဆိုမ် ဘော အန် ဘော ခဲ့ ကွယ် ခဲင် ကာင် အန်။

27 န့ ပီ ဂါင်ဟြာဝ် ဒီ ဘော န့ ဝိုဝ်း ဘျ မှာပ် အန်။ ကာဒါယ် ဒီ ဘဲန် ဆက်ဆေ အီ ဖျာက် အန်။

28 ခဲ့ မိုဝ်း အန် ကြုဝ်ကြာမ်၊ န့ ဒီ လိုဝ် ဟြာယ် တူတ့်။ န့ ဒီ ဘော လှဲ ဟာဝ် ဒူပ် အိုမ် ပြဲ့ ဒေါ ဟဲ့ ရူ ကာဆဝ် ဇဝ်ဖြာ ဒီ အန်။

29 အာတီ န့ ဘော မုး ရုး ပီ ဒီ ဒွါ ဇဝ်ဖြာ ဒီ ဒူအီ ဟာယ် ဒူအီ မိူက်။ န့ ဘော မုး ပီ ရဲန် အုန် ဇဝ်ဖြာ ဒီ အန်၊ တဲး န့ ဘဲန် ခါဂုန် အာဒါ အန်။”