1 ဒေါ အန် တီ အာယုဝ်ဘာ ဝီ ကာလာင် ဂြုဝ်း။

2 အန် တဝ်း၊ “ဘေ ဒီ ဘော ပျာတ့် အုဝ် ဘော ကာလာင် ဂြုဝ်း အီ ဝ်ု နဝ်း အုဝ်။ ပန် မှဝ် ဘေ ဒီ စူ။း

3 ဘေ ဟဲ့ နဲန အုဝ်၊ ဟဲ့ နုဝ့် ဂိုဝ် ဇေန့်။ ဘေ မိူဝ် တူ နပ် ဒီ ဝီ ဆာယ် လွင် ပဲ့ ဟဲ့ ဘူင် ဘေ ဒီ အုဝ်။

4 ဆေ ဟဲ့ မှာန် အုဝ် ဟဲ့ ဘူင် ကာလိုပ်၊ မှာပ် အုဝ် တီ န့ တူ လာယ် ဘာ့ ဒီ ဘေ။

5 ဘေ ဘော ထာင် ဘေ ဟဲ့ မွှိုမ် လွှိုမ် အုဝ်။ ဘေ ဘော မာတ် ဒုက် ပဲ့ ဟဲ့ ခမ် အုဝ် တီ တဲး န့ လိုဝ်း ဆီချာ လွင် ဟဲ့ ကာလိုပ် အုဝ်။

6 အုဝ် ယီ ကာလာင် တဲး ဘေ နပ် ဆီချာ၊ န့ မုး ဇဝ်ဖြာ အီ ဘူင် တဲး အုဝ် ဇမ် ဒုက်။ န့ ပီ အန် ဇဝ် ဟဲ့ ဒိုဝ်း န့ရပ် ပ့လိုက် အုဝ်။

7 အုဝ် ပီ ဘော ဟဲ့ ဒတ် ဒဲ့ တဝ်း၊ ‘အီ ဟဝ် ဟဲ့ ထာင် ကာလိုပ် ဒီ အုဝ်၊’ န့ ယီ တူ မိုဝ်း အာဆေ ထူမ် ဂြုဝ်း အုဝ်။ အုဝ် ပီ ဘော ဝီ မှာန့် အီ စွယ် အုဝ် မိူဝ်၊ အာဝ် မိုဝ်း အာဆေ အီ ဆုင်ဖျာတ် ဒူပ် ဒါရာ။

8 ဇဝ်ဖြာ ဟဲ့ ဒူပ် ဒီ ရဲ န့တေန့် အုဝ်၊ တူ တဲး အုဝ် ပွိုန် ဒီ ဟာဝ်။ အန် ဇဝ် ဟဲ့ တဲး အပ် ဝွင့် ပ့လိုက် န့တေန့်၊ တူ တဲး အုဝ် ပွိုန် ယိုဝ်။

9 အန် ဇဝ် ဟဲ့ ဒိုဝ်း ဝဲန် ခဲ့ မိုဝ်း အုဝ် အာဖုင် ဂေ ဆာရေ၊ တဲး န့ ပီ အန် ဇဝ် ဟဲ့ ဘုတ့် လေး မင်ဂိုမ် ဒီ အုဝ်။

10 အန် ဇဝ် ဘော ပျာတ့် တဲး အုဝ် စှိုမ် လူင် ဒွန် ဘ့လာက်။ အန် ဟဲ့ တဲး အုဝ် စှိုမ် ဘော ဟြာယ် တူတ့် ဒွန် မျုဝ်။ အန် ဇဝ် ဟဲ့ ဒိုဝ်း ဝဲန် ပီ နှဝ့် န့ဒဝ့် အုဝ်၊ တဲး န့ ပီ အီ ရိုတ့် ဝဲန် ဟေ။

11 အန် ဇဝ် မိူဝ် ဟဲ့ ပီရူ ကာဆဝ် အန် ဒီ အုဝ်။ အန် မာတ် အုဝ် ပီ ရန်ဆူ အန်။

12 န့ ပီ အန် ဇဝ် ဟဲ့ စ်ု ဒါ ဆိုက် အန် တး ကာဂုဝ်း ဒီ အုဝ်။ ဂေ မိူဝ် ဟဲ့ တး ကွယ် ရူပ် ထိုပ် အုဝ်။

13 ဇဝ်ဖြာ ဟဲ့ ဘူင်၊ တဲး အီကတ် ဂေ ဝါ အုဝ် ဝီ လာယ် ကာယဝ်း ဒီ အုဝ်။ တဲး ဘော ဂေ ဂိုက် အုဝ် ဝီ ဝး ဝီ ဝဲန် အုဝ်။

14 ပါယ် တီ ဘီနွင် ဝေါဝဲ အုဝ် မိူဝ် ဟဲ့ ဘ့လေး ဝဲန် အုဝ်။ ဂေ ဂိုက် ကာလဝ့် အုဝ်၊ ဟဲ့ ဝီ ပိဝ် တူတ့် အုဝ်။

15 ခဲတ့် အီ ဟဲ့ ဒွိုမ် ကွယ် ခဲင် ကာင် အုဝ်၊ ဂေ မိူဝ် ဟဲ့ ဝီ ပိဝ် အုဝ်။ ဘော ဂေ အီဘိုန့် အီ မုး မှာယ် အုဝ်၊ ဂေ ဝီ မာတ် အုဝ် ပီ ခဲတ့် ပီ တူ ဒွိုမ် ယိုဝ် ဂေ။ ဂေ ဘော ယွတ် အုဝ်၊ ပီ ဂေ ယွတ် ဒူအီ အာမျုဝ် ဟဝ်။

16 အုဝ် ပီ ဘော ဝီ ဒဲ့ မှာယ် အုဝ် မိူဝ်၊ အန် တူ ဝျီ့ တူ ယဝ်း ဂြုဝ်း အုဝ်။ အုဝ် ကော ကာဒုး ဒီ ဝီ ဒွင်ဘာန် အန်။

17 အီဘိုန့် အုဝ် ဟဲ့ ကာအိး ဖွိုမ် အုဝ်။ အုဝ် ဟဲ့ ဝီ ဘဲန် ပီ ဇွင့် ဂေ အူကတ် အူဝါ အုဝ်။

18 ခဲ့ ကွယ် ဂေ ဂွန် ဒီရွယ် ဘော ကာဖြူမ် ဒီ ကာညး ပီ ဝါညာက် ဒီ အုဝ်။ ဒေါ ယိုဝ် ဂေ ဒီ အုဝ်၊ ဂေ ဘော နဲန အုဝ်။

19 ခဲ့ ကွယ် ဂေ ဂိုက် ကာလဝ့် အုဝ်၊ ဂေ ဟဲ့ ဝီ ကာအိး အုဝ်။ ဂေ ဒူအီ ပီ ရွက့် အုဝ်၊ ဂေ အာဝ် ဟူ ကွယ် ချြီ့ အုဝ်။

20 အုဝ် ဟဲ့ ဂိတ် မီ ဟုန် ဂါယ် ကာအာင်။ အုဝ် ယီ ညှမ် ယမ်၊ ဟဲ့ ဂိတ် မီ ဖွိုမ်။

21 အိုယ် ဘေ ဂိုက် အုဝ်၊ အုဝ် မှာန့် တဲး ဘေ ကာဝေ အုဝ်၊ တဲး ဘေ ကာဝေ အုဝ်။ ခုဝ်၊ ဇဝ်ဖြာ ဟဲ့ ခါနှာပ် အုဝ်။

22 မှဝ် န့ ပါယ် ပီ ခုင်ခြး ဘေ ဒီ အုဝ် ပီ ဇဝ်ဖြာ ဟဲ့ ခုင်ခြး။း ခဲ့ ပဲ့ ဟဲ့ ခါနှာပ် ဘေ ဒီ အုဝ် ကော ဇမ် ဒေါ တီ နီ၊ တဲး န့ ဘြေ့ ဒီ နဝ်း ဘေ။

23 အိုဝ်၊ အုဝ် ဆီ တဲး န့ မိုဝ်း အီ ဒဲမ် အုန် ဂြုဝ်း အုဝ် နီ။ အုဝ် ဆီ တဲး အီ ဒဲမ် အုန် ဂြုဝ်း အုဝ် နီ ခဲင် ဘပ်။

24 အုဝ် ဆီ တဲး ဂေ တာ ကမ်လမ် ဟိန် ဘော ဒဲမ် ဒိုက် ဒုဝ် ပဲ့ ဒဲင် ဒီဖ့လ မီစေတ့်၊ တဲး န့ ကွယ် ဆေဆေ။ ဆေ အာဝ် ပါယ် တီ အုဝ် ဆီ တဲး ဂေ ဒွက် ဒိုက် ဒီ မာဝ်။

25 ခုဝ်၊ အုဝ် ဟဲ့ နပ် ဆီချာ၊ အန် ဇဝ် အီ ဒီ ထုတ် လေး အုဝ်၊ အန် ဆီ ကွယ် ဆီ အိမ်။ ဆေ ဟီ ဇမ် အာခြာဝ် ပန် ဒီ တူတ့် ဇာတ် နီ၊ အန် ဒီ ဝီ တး ကွယ် ဒဲင် ကာဒါယ် နီ။

26 ဒုဝ် ဘူင့် အုဝ် ပီ ဘော ဟဲ့ ဟွတ့် လိုဝ် တူတ့် မိူဝ်၊ အုဝ် ယီ ဝီ မိုဝ်း ဒုဝ် ဘူင့် အီ ပွိုန် ယိုဝ် ဇဝ်ဖြာ။

27 အုဝ် ဒီ ဘော ယိုဝ် အန် ဇဝ် ဒီ ငါယ် အုဝ် နီ။ အုဝ် ဒီ ဘော ကာတုန့် အန် ဇဝ် ပီ နပ် အုဝ်။ ခဲင် နဝ်း ခဲင် ဖွိုမ်၊ အုဝ် ယီ ဟဲ့ နုန် ကာဆဝ် ကူပ် ဟဲ့ ဘ်ု လှေန့် အုဝ်။

28 ဆေ ဘေ ဘော တဝ်း ဒီ အုဝ်၊ ‘ယေ ဟဲ့ နပ် ဆီချာ၊ န့ မုး ကူပ် ပီ ကာလိုပ် မဲ၊ မဲ လုဝ် ခမ် ပါယ် တီ’ ဆေ ဘေ ယီ နဲ့ ဆီ ခါနှာပ် အုဝ်၊ တဝ်း န့ မုး မှာပ် အုဝ်၊ ဘေ လုဝ် ဆာဒိက်။

29 တဲး ဘေ ယုဝ် အာဖေ အာရေ အီ ဒီ တး ဒီ မာပွါ့ လာင်။ ခုဝ်၊ ဆေ ဇဝ်ဖြာ ဟီ ရူ၊ အန် နပ် ဒီ တဲး ဂေ အီ ဂူင့် မာပွါ့ လာင် တီ ဒမ် မှာပ် ဒီ အီ။ ပါယ် တီ ဘော ဘေ ဒီ ဘော နပ်၊ န့ ဆီ မိုဝ်း အန် ဇဝ် အီ ဒီ ဆုင်ဖျာတ် အာမူ အီ။”