1 ဒေါ အန် တီ အာဘီလာဒတ် အီ မုး ဒူအီ အာမျုဝ် ဆူဟိတ် ဝီ ကာလာင် ဂြုဝ်း။

2 အန် တဝ်း၊ “ပန် မှဝ် မဲ ဒီ စူ ကာလာင် ဂြုဝ်း တီ။း တဲး မဲ ဇေန့်ဇာ ဆီချာ။ ဟဲ့ ဟွတ့် အုဝ် ဒီ ကာလာင် ဒီ မဲ။

3 မှဝ် န့ ပါယ် ပီ ဆော မာတ် မဲ ဒီ ယေ ပီ ဒုဝ် ဆတ်။း မှဝ် န့ ပါယ် ပီ ဆော မာတ် မဲ ဒီ ယေ ပီ ဒူအီ ရိုဝ်။း

4 မဲ ဟဲ့ ပီရူ မဲ၊ တဲး န့ ပီ မဲ ဝီ ကဝ့် ကာဒတ် ဒုဝ် ဘြိမ် မဲ။ မဲ ထာင် အီ ဒီ ဝဲန် ကာဒါယ် နီ ကူပ် တူ အိုင် မဲ။း ဆေ အာဝ် ပါယ် တီ မိူဝ်၊ မဲ ထာင် အီ ဟဝ် ဒီ ဘော ဒိုဝ်း ကာထုဝ့် မာဝ် တာင် ကူပ် တူ လုဝ် မဲ။း

5 ဘ့လာင် ဒူအီ ဟာယ် ဒူအီ မိူက် ဟဲ့ ဟြာယ် အာခ်ု မှာန်။ ပ့လဲ့ ငဝ် အန် မိူဝ် အာဝ် ဟူ ကုး၊ အာဝ် ဟူ ဘ့လာင် ဒေါ မှဝ်။

6 အီ ဘ့လာင် ခဲင် ထိုပ် အန် ဒီ ဘျွင် ဘဲန် အီ အပ် ဝွင့်။ ငဝ် အွမ် အီ ကွယ် ခူပ် အန် မိူဝ် ဟဲ့ ယတ်။

7 အန် ပီ ဘော ဟဲ့ ဇာပ် ဟာဝ် ဆီချာ ဆီချာ မိူဝ်၊ ဒေါ တီ နီ အန် ဝီ ဒီပ့လာတ် ကေး။ အာကျာမ် အာငျာန် အန် ဘူင် တဲး အန် လိုဝ် စှိုမ်။

8 ပ့လဝ် အန် ဘော နပ် ဒီ ယဲတ့် ဟာဝ် အန် ခဲင် န့ရပ်။ အန် ဝီ ဟာဝ် လိုပ် ဘော ခဲင် ယွတ့် ဂေ ခဲင် ခိူမ်။

9 ဆေ ယွတ့် ဟီ လုတ်၊ န့ ဘော ခြွတ် ကာနှုတ့် အန်။ ယွတ့် ဂေ ခိူမ် မိူဝ် ဘော မှေတ့် ဆီချာ အန်။

10 ဝန် မိူဝ် ဟဲ့ ဒိန့် အုန် ခဲင် ကာဒါယ်။ ယွတ့် ဂေ ခိူမ် ဟဲ့ ဒိန့် အုန် ဒူပ် န့တေန့် အန်။

11 လွင် အီ မွှိုမ် ယုဝ် ဟဲ့ ကွယ် ရူပ် အန် ဒွန် ဘ့လာက်။ န့ ဘော ခုင်ခြး ဒူပ် ပန် ပ့လဝ် အန် ဒွန် န့ဇာပ်။

12 ဟဲန့် အန် ဂေ ပ့လူမ် အန် မိူဝ် ဟဲ့ ကြဲ ဒီ ယူမ် ကူပ် ဟဲ့ ကာပြာန့် အန် ပီ ဒီ ဟူမ်။ အာဖေ အာရေ အီ ဒီ ဘူင် တဲး အန် လိုဝ် စှိုမ် မိူဝ်၊ ဟဲ့ ဘ်ု ခူပ် အန်။

13 အာဖေ အာရေ အီ တဲး အန် ဆဝ်၊ တဲး အန် ယမ်၊ န့ ဟဲ့ ကာလတ့် ဒီ ဒုဝ် ဘူင့် အန် ဘော ဒုဝ်။ အာဖေ အာရေ တီ၊ န့ ပီ ဟဲ့ ခြုင်ခြး ခြပ် အန်။

14 န့ ပီ ဂေ ဟဲ့ ရိုတ့် လေး အန် ခဲင် ထိုပ် ဘိက် ဒူင် ကွယ် အန်။ ဂေ ဟဲ့ ဝီ တိုယ် အန် ဒီ ခုန်ဒီခမ် အီ အိုပ် အာဖေ အာရေ အီ နပ် ဒီ ဘူင် တဲး အန် လိုဝ် စှိုမ်။

15 အီ ဟဝ် ဟဲ့ ပွိုန် ဟာဝ် ကွယ် ခဲင် ထိုပ် ဘိက် အီ ဟဲ့ ရာမ် ပဲ့ ဟဲ့ ဝဲန် အန်။ ဂေ မိူဝ် ဒိုဝ်း ဂန်ဒိူက် ဘြတ် ဟာဝ် ဒဲင် ကာတု ထိုပ် အန် တီ။

16 ဒူအီ ဝီ တီ ဟဲ့ ပီ ဟေ။ ရျီး အန် အီ ကွယ် နာ ခြိုမ် ဟဲ့ ဟွတ့် ဟျီ့။ ဘော ရာ အန် အီ ကွယ် နာ ဒဲင် ဟဲ့ ဟွတ့် ကာဟဝ်း ယမ်။

17 အာဝ် ဟူ မိုဝ်း အာဆေ အီ ဝီ နမ်လှုဝ်း အန် ဒဲင် ကာဒါယ် နီ။ ဂေ အီ ဟာဝ် ဒူပ် န့တေန့် မိူဝ်၊ ဂေ တူ ကာလာင် လွင် အန်။

18 အန် လုဝ် ခမ် အီ ဟဝ် ဟုဝ် လေး အန် ခဲင် ဒူင် ဘ့လာင်၊ တဲး အန် ဝီ ဟာဝ် လိုပ် ခဲင် အပ် ဝွင့်။ အန် အာဝ် ဟူ ပွိုန် ကွယ် ဒဲင် ကာဒါယ် နီ။

19 ကာတဲ ဂေ ဒူအီ အာမျုဝ် အန် မိူဝ်၊ အာဝ် ဟူ မိုဝ်း လှုက်လှာန် အန်။ ဒူအီ ခဲင် န့ဟူမ် အန် မိူဝ်၊ အာဝ် ဟူ မိုဝ်း ခေါ အူ ဝီ။

20 ဂေ ဒူအီ အီ ကွယ် ဘ့လာက် နာ ဂေတ့် ဆီငဲ၊ ဂေ ဒီ ဘော ကာစွာ ကူပ် အီ ဟဲ့ ဘုဝ် ဘဲန် ဒီ အန် တီ။ ဂေ ဒူအီ အီ ကွယ် နာ လေး ဆီငဲ၊ ဂေ ကော ဒီ ယုဝ် ကူပ် အန် တီ။

21 ဟဲ့ မှာန် အာခါခ်ု၊ ဒူအီ ဟာယ် ဒူအီ မိူက်၊ ဂေ လုဝ် ခမ် ပါယ် တီ။ ဂေ အီ တူ နပ် ဇဝ်ဖြာ၊ ဂေ မိူဝ် လုဝ် ခမ် အူ မျုဝ် ပါယ် တီ။”