အာယုဝ်ဘာ ဘော ကာလာင် ဟာဝ် ပွါ။ အန် တဝ်း၊ “အာဆာက် အုဝ် ဒီ တူတ့်။ အာခြာဝ် အုဝ် မိူဝ် ဟဲ့ ဟွတ့် တူတ့်။ ကာဒဝ် ဘာရေဝ် ဟဲ့ ဘ်ု ပန် ဒီ တး အုဝ်။

2 ဂေ အီ ဘ်ု ဒီ ကာညး ပီ ဝါညာက် ဒီ အုဝ်၊ ဂေ ဟဲ့ ကွယ် ရူပ် အုဝ် ဒွန် ဘ့လာက်။ အုဝ် ဒိူန် ဒီ လုဝ် ခမ် ပီ ဘူင် ကာဆဝ် ဂေ ဒီ အုဝ်။

3 အုဝ် မှာန့်၊ တဲး မဲ ဇဝ်ဖြာ ဒွါ ခဲ့ ပီ လုဝ် မဲ၊ တဲး န့ ထုတ် လေး အုဝ်။ ခုဝ်၊ ယီ တူ မိုဝ်း အာဆေ အီ ဒီ ဘူင် ကာဒါင် အုဝ်။

4 မဲ ဇဝ် ဟဲ့ ကာဘိတ် နဝ်း ဂေ၊ ကွဲ့ တဲး ဂေ နပ် ဒီ ဇေန့်ဇာ။ ပါယ် တီ မဲ ဇဝ် တူ တဲး ဂေ ပဲ အုဝ်။

5 ဆေ ဒူအီ ကာလာင် စာဝ် လွင် ဂိုက် အန်၊ ဘူင် တဲး န့ ဘဲန် အာဂျိုဝ် ဒီ အန်၊ ငါယ် လှုက်လှာန် အန် ဂေ ဒီ ဘော မုဝ် ဘော အပ် ဝွင့်။

6 ဒေါ တီ နီ အန် ဇဝ် ဟဲ့ တဲး အုဝ် ဘဲန် ပီ နဲန အီ ဟဝ် ဒွန် အီ။ ဂေ မိူဝ် ပတ့် နာ အုဝ်။

7 ကူပ် ဟဲ့ ဒုက် ကာဆဝ် ဒီ နဝ်း အုဝ်၊ ငါယ် အုဝ် မိူဝ် ဟဲ့ ကာပျွယ် ဟဲ့ မုဝ်။ ဒုဝ် ဘူင့် အုဝ် မိူဝ် ဟဲ့ ပီ ကာမိုက်။

8 ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ဘော ဂ့၀ွင် လွင် အာမူ တီ။ ဂေ ဒူအီ အီ တူ မိုဝ်း မှာပ်၊ ဂေ ဒီ ဘော လာယ် ကာဘး ဒီ ဂေ ဒူအီ အီ တူ မွှိုမ်။

9 ပီ ဘော ဟဲ့ ပါယ် တီ မိူဝ်၊ ဒူအီ အီ မိုဝ်း နဝ်း ဆိူဝ် နဝ်း မှာန် အန် မိုဝ်း နဝ်း မန် ဆီချာ။ ဒူအီ အီ တဲး ဒဲ အန် ဆီငါ၊ ပ့လူမ် အန် ကြဲ ဒီ ကာပွါ။

10 တဲး ဘေ ဒွန် အီ ဝီ တး ကာလာင် ဒီ အုဝ် ပေါ အူ ဇေန့်။ အုဝ် ညှမ် ကာတုန့် ဒူအီ အီ မိုဝ်း အာငျာန် ကာတဲ ဘေ။

11 အာခြာဝ် အုဝ် ဟဲ့ တူတ့်။ ပီ ခြာမ် အုဝ် မိူဝ် ဟဲ့ ဟြာယ်။ ဘော ပီ ကာပြာ အုဝ် ခဲင် နဝ်း အုဝ် မိူဝ်၊ အာဝ် ဟူ မိုဝ်း။

12 ဒူအီ ဂေ တီ၊ ဂေ ယီ ဘူင် တဲး မှိုဝ် ဝီ ပီ ကာတဲ ဆီငဲ။ ဆေ န့ ဆီ အပ် ဝွင့် ခဲင် မှိုဝ်၊ ဂေ တဝ်း အူ ကာစန် န့ ဒီ ဘ့လာင်။

13 ဆေ ပီ နှဝ့် န့ဒဝ့် အုဝ် မုး မီ မိူင် မာရာန၊ ဆေ အုဝ် ဘော အိတ် ခဲင် အပ် ဝွင့် တီ၊

14 ဆေ အုဝ် ဒီ ဘော ဒဲ့ ကာဒဝ် ဘာရေဝ် တဝ်း၊ ‘မဲ မုး ဂုန့် အုဝ်၊’ ဆေ အုဝ် ဘော တဝ်း ဒီ မင်ပြတ့် အီ ဟူမ် ယင် အုဝ်၊ ‘မဲ မုး မာ အုဝ် ဂေ ဝါ အုဝ်၊’

15 ဆေ အုဝ် တဝ်း ပါယ် တီ၊ အုဝ် အာဝ် ဟူ မိုဝ်း ပီ နှဝ့် န့ဒဝ့်။ အာဝ် မိုဝ်း အာဆေ အီ မိုဝ်း ပီ နှဝ့် န့ဒဝ့် အာဒါ အုဝ်။

16 ပီ နှဝ့် န့ဒဝ့် တီ တူ လူင် မိူင် မာရာန ဒူပ် အုဝ်။ န့ မိူဝ် တူ ကွယ် ခဲင် ကာပုး။”