1 ဒေါ အန် တီ အာယုဝ်ဘာ ဝီ ကာလာင် ဂြုဝ်း။

2 အန် တဝ်း၊ “အုဝ် ဟဲ့ ဒွိုမ် ယိုဝ် ဂြုဝ်း ဇိုဝ် တီ ဟဲ့ ကိူန် ကာဆဝ်။ ဘေ ဘောကာဂ့လျီတ် ဟဲ့ ကာလာင် ဂြုဝ်း၊ တဲး န့ လှဝ် နဝ်း အုဝ်။ န့ ယီ ဝီ တဲး ဝဲ ဒုက် ညှာပ် ဒီ နဝ်း အုဝ်။

3 မှဝ် န့ ပါယ် ပီ တူ စူ ဘေ ကာလာင် ဂြုဝ်း ဒီလူယ် ဒီလာယ် အီ တူ နပ် ဒီ တူတ့်။း ကူပ် မာဆေ ဘေ ကာလာင် ဂြုဝ်း ပါယ် တီ ဆေဆေ။း

4 ဆေ န့ မုး ဘေ အီ ခမ် ဒုက် ပီ အုဝ်၊ အုဝ် မိူဝ် ဟဲ့ ပွိုန် ကာလာင် တဲး န့ ပီ ပီ ကာလာင် ဘေ တီ။ အုဝ် ဒီ ပွိုန် ကာလာင် ဂြုဝ်း ကိူန် ဘော မာဝတ် ဂိန့် ဒီ ဘေ ကူပ် ပီ ခမ် ဘေ တီ။

5 အုဝ် ယီ နပ် ဒီ ဒွါ အာကျာမ် အာငျာန် အီ မွှိုမ်၊ တဲး န့ ဘဲန် ဟဲန့် ဒီ ဘေ။ ဂြုဝ်း အုဝ် ဒီ ဘော ဒါခိုယ် တဲး ဒူင် ဆဝ် ဘေ ဝီ ကဲန်။

6 န့ ယီ မုး အုဝ်၊ အုဝ် ပီ ဘော ကာလာင် မိူဝ်၊ ဒိမ် အုဝ် ယီ တူ ဟြာယ်။ အုဝ် ပီ ဆ ဂြုဝ်း မိူဝ်၊ န့ တူ ဘ့လိူင် မာဆေ။

7 မဲ ဇဝ်ဖြာ ဟဲ့ ဘူင် တဲး ပ့လူမ် ဂေ ဟဲန့် အုဝ် ကော တူတ့်။ မဲ ဇဝ် ဟဲ့ တဲး န့ဟူမ် အုဝ် စှိုမ်။

8 န့ ပီ မဲ ဇဝ် ဟဲ့ မှေတ့် အုဝ် ဘော ဘဲန် ဆက်ဆေ လွင် အုဝ်။ အာရိုပ် အုဝ် နီ ဘော ဘျ လွင် မှာပ် ပဲ့ ဟဲ့ ဘူင် ကာလိုပ် အုဝ်။

9 အန် ဇဝ် မိူဝ် ဟဲ့ ရူ ဒီ အုဝ်။ န့ ပီ အန် ဟဲ့ ဒိူတ် ကာယာတ့် ကာပျာတ့် တူတ့် ဒုဝ် ဘူင့် အုဝ်။ အန် ဇဝ် မိူဝ် ဟဲ့ ဇွင့် အုဝ် ဘော ဆီဂိတ် ဟြာင် အန် ဒီ အုဝ်။ ဂေ ရန်ဆူ အုဝ် မိူဝ် ဇဲတ် ဒီ ယွတ် အုဝ်။

10 ဂေ ဒူအီ ကိူန် မိူဝ် ကာညး အုဝ်။ ဂေ ဘော တး ကာဇု ရူပ် အုဝ်၊ ကာထ ကာလာ အုဝ် ဘော ဖျာက် ဆာရေ အုဝ်။

11 န့ ပီ ဇဝ်ဖြာ ဟဲ့ အာပ် အုဝ် ဒီ ဂေ ဒူအီ တူ မွှိုမ်။ ဟဲ့ ဇတ့် အုဝ် ဒီ ဂေ ဒူအီ ဟာယ် ဒူအီ မိူက်။

12 အုဝ် ပီ ဘော ဟဲ့ ကွယ် ဒါခိုယ် ဂျာမ်ဆာ မိူဝ်၊ ဇဝ်ဖြာ ယီ ဝီ ပျာတ့် အုဝ်။ အန် ဟဲ့ ဆီနျီ့ မဲင် အုဝ် ဘော ဘူင် တဲး အုဝ် စှိုမ်။ ဇဝ်ဖြာ မိူဝ် ဘူင် တဲး အုဝ် ပီ မှာယ် ဒူင် ဒီ ဘန့် အန်။

13 ဂေ ဒါ ကာညာ အ၊ ဂေ ဟဲ့ ဘန့် အုဝ် ဒွန် ဘ့လာက်။ ဘ့လာ အ ဂေ ဟဲ့ လဝ့် ဂဝ် ဘ့လေ လမ် အုဝ်။ ဂေ မိူဝ် တူ ကာဝေ အုဝ်။ ဂေ ဟဲ့ ဘ့လုး လှုး ဘော ဆွင့် အုဝ်၊ ဟဲ့ ဝီ လှဲ ဒဲင် ကာဒါယ်။

14 ဘဲန် ဇေန့် ဘဲန် ဇေန့် အန် ဇဝ် ဟဲ့ တး တိုက် အုဝ်။ အန် ဇဝ် မိူဝ် ပီခြန် အန် တဝ်း ဒီ ဒဲပ် အုဝ် ပီ ဒါ ဆိုက် ဒီ ဒဲပ် ရန်ဆူ အန်။

15 အုဝ် မိူဝ် ဟဲ့ ငှုန် ဟဲ့ ငှဝ်၊ ဝီ စှိုပ် ဒီ တာ ခြိုင် စာန်။ အုဝ် မိူဝ် ပီ ကာပုး၊ တူ မိုဝ်း ဒီ နှဝ့် န့ဒဝ့် မာဆေ။

16 အုဝ် မိူဝ် ဟဲ့ ယာမ်၊ တဲး ငါယ် အုဝ် ကော ရေန့် ဒီရျီင်။ ဟုန် ငါယ် အုဝ် မိူဝ် ဟဲ့ အူပ်၊ ဟဲ့ အဝ်း ကာဆဝ်။

17 ပီ ဘော ဟဲ့ ပါယ် တီ မိူဝ်၊ အုဝ် ယီ တူ ဘူင် နာ တူ မွှိုမ်။ ပီ ဆာခိုဝ် အုဝ် မိူဝ် ယီ ဆီငါ။

18 အိုယ် ကာဒါယ်၊ ကွဲ့ ကာဘိတ် ဝဲန် နှာမ် အုဝ်။ ကွဲ့ တဲး ယာမ် အုဝ် ဟာဝ် ဂိူတ် ဟဝ့် ဒီ မဲ။

19 ဒေါ တီ နီ ဆက်ဆေ အီ နပ် ဒီ ကာလာင် လွင် အုဝ် ဟဲ့ ကွယ် ခဲင် ဂါင်ဟြာဝ်။ ဝီ အီ ကွယ် ဘ့လာက် အုဝ်၊ အန် မုး အီ ကွယ် မိူင် ဒဲင်။

20 ခဲ့ ကွယ် ဂိုက် အုဝ်၊ ဂေ ဟဲ့ ဝီ နဲန အုဝ်။ အိုမ် ငါယ် အုဝ် လေး လှဲ ဒီ အာတ့် ဇဝ်ဖြာ။

21 ဝီ အီ ဘဲန် ဆက်ဆေ ဘ့လာက် အုဝ် တီ၊ အုဝ် ဆီ တဲး အန် ဆာခိုဝ် ဒီ ဇဝ်ဖြာ ဒါင် အုဝ် တဲး န့ ပီ ဒူအီ ဆာခိုဝ် ဒါင် ဂိုက် အန်။

22 ခုဝ်၊ အာဝ် ဟူ ဘော လှေန့် အုဝ် မိူဝ် ဒီ ယမ်။ န့ ဒီ ပီ ဒူအီ အီ ဟာဝ် ဒူပ် န့တေန့် အီ တူ ပွိုန် ဝီ တး။”