1 ဒေါ အန် တီ အာအေလီဖာတ် အီ မုး ဒူအီ အာမျုဝ် ထေမာန် ဝီ ကာလာင် ဂြုဝ်း။

2 အန် တဝ်း၊ “အိုယ် အာယုဝ်ဘာ၊ ဒူအီ အီ မိုဝ်း အာငျာန် ပီ မဲ န့ တူ ကာအာပ် အန် ကာလာင် ဂြုဝ်း ဒီလူယ် ဒီလာယ် အီ ပီ ဟိုတ့် ဂေ ခုန်။ န့ မိူဝ် တူ ကာအာပ် တဲး ဂြုဝ်း အန် ပီ ခုန် ကာဟွာ့ အီ တး နာ လေး ဆီငဲ။

3 အန် မိူဝ် တူ လာယ် ဆင်ချာင် ဂြုဝ်း အီ တူ ဘဲန် အာဂျိုဝ်၊ အီ တူ ဘဲန် ဂေဇူ။ အန် မိူဝ် တူ ကာမွုန် ဟိူင် ဂြုဝ်း အီ တူ မိုဝ်း ဒီခုဝ်။

4 န့ ယီ မုး မဲ၊ ဂြုဝ်း ပီ ကာလာင် မဲ၊ ဟဲ့ ပီ မဲ တူ ရုဝ်ဆေ ဇဝ်ဖြာ၊ ဟဲ့ ပီ မဲ တူ ညှိုမ် ဇဝ်ဖြာ။

5 န့ မုး မှာပ် မဲ အီ တဲး မဲ ကာလာင် ပါယ် တီ။ န့ ဘော တဲး မဲ ကာလာင် ပီ ဒူအီ ဟာယ် ဒူအီ မိူက်။

6 ဂြုဝ်း ပီ ကာလာင် မဲ တီ၊ ဟဲ့ ဝီ ဒမ် မှာပ် ဒီ မဲ။ အာဝ် မုး အုဝ် အီ ကာလာင် လေး ပီ လုတ့် မဲ။

7 မဲ ထာင် မဲ မုး အီ ဂွိုတ် တး ဒီ အာတ့် အီ ဟဝ်။း မဲ ထာင် မဲ ဟဲ့ ဂွိုတ် ဆိန့် အာတ့် မိုဝ်း နွန် ဂေ နီ။း

8 ဒေါ လာယ် ကာမွုန် ဆင်ချာင် ဂေ အာမူ အာမာတ် ဇဝ်ဖြာ ဒီ အန် ဇဝ်၊ မဲ မိူဝ် ဟဲ့ ကာဒုး ဒီ ထူမ်။း မဲ ထာင် မဲ အူ ဝီ မိုဝ်း အာငျာန်။း

9 ပဲ့ ဟဲ့ နပ် မဲ ပီ တူ နပ် ယေ၊ န့ မိုဝ်း မာဆေ။း အီ ဟဲ့ ကာလှုး ဒီ နဝ်း မဲ ပီ တူ ကာလှုး ဒီ နဝ်း ယေ၊ န့ မိုဝ်း မာဆေ။း

10 ဂေ ဒူအီ ကတ် ဒူအီ ဂဲ ဂိန့် အီ ဟဲ့ လုယ်၊ အာဆာက် အီ ဟဲ့ ကိူန် လွှိုမ် ဂုန့် မဲ၊ ဂေ ဘော ကွယ် ဘ့လာက် ယေ။

11 ဇဝ်ဖြာ ပီ ဘော လှဝ် နဝ်း မဲ၊ မဲ ဒီ ထာင် န့ တူ ဂ့လိုမ်။း ဇဝ်ဖြာ ပီ ဘော ကာလာင် ဂြုဝ်း န့စု န့စမ် ဒီ မဲ၊ မဲ ဒီ ထာင် အာဝ် မိုဝ်း ဒီခုဝ်။း

12 မှဝ် န့ ပါယ် ပီ ဘူင် ဒူပ် မဲ နဝ်း ကာဟွာ့ နဝ်း မှဲ မဲ။း မှဝ် န့ ပါယ် ပီ ဝီ ပီရေန့် မဲ နာ မဲ ဒီ ယေ။း

13 ပီ ဘူင် မဲ တီ၊ န့ တဲး မဲ ကာခဲန့် ဒီ ဇဝ်ဖြာ ဘော ကာလာင် ဂြုဝ်း အီ တူ မွှိုမ် ဒီ အန် ဇဝ်။

14 ဒူအီ အေ နီ၊ အာဝ် မိုဝ်း အာဆေ အီ ဆီငါ။ ဒူအီ အီ ဂွိုတ် တး ဒီ အီဘိုန့်၊ အာဝ် မိုဝ်း အာဆေ အီ ဒီ မိုဝ်း နဝ်း ဆိူဝ် နဝ်း မှာန်။

15 ဇဝ်ဖြာ မိူဝ် တူ နဝ်း နဝ်း တာင် ဒီ ဂေ အီ ဆီငါ ဘွတ်။ အန် မိူဝ် တူ မာတ် ဂါင်ဟြာဝ် မုး ဒူင် ဆီငါ ဘွတ်။

16 ဆေ ယီ မုး ဒူအီ အီ ဘူင် မှာပ်၊ ဘူင် နာ တူ မွှိုမ် ကော ပီ ဂေ ဒျီင် အိုမ်၊ ဂေ ဘော ဟာယ် ကာဆဝ် ဘော မွှိုမ် ကာအိး ကာဆဝ်။ အာဝ် ဟူ နပ် ပီ ဒီ ပါယ် ဒီ ကာလာင် လွင် တူ မွှိုမ် ဂေ။

17 အိုယ် အာယုဝ်ဘာ၊ တဲး မဲ ထူမ်။ ခဲ့ ပီ နပ် အုဝ်၊ အုဝ် ဒီ ကာလာင် ဒီ မဲ။ ခဲ့ ပီ ယိုဝ် အုဝ်၊ အုဝ် ဒီ ဘျ ဒီ မဲ။

18 န့ မုး လွင် ပီ ကာလာင် အုန် ဂေ ဒူအီ အီ မိုဝ်း အာငျာန် အီ ဟဲ့ ခမ် ပီ မာနုဝ် ဂုန့် မာ ဒါ ယာ ဂေ၊ အီ တူ ချြီင် တူ ကာဘိတ် လွင် အန် တီ။

19 ဂေ တီ၊ ဂေ တူ ကွယ် ကာဆူ ကာဝ်ု ဒီ ဒူအီ အာမျုဝ် ဟဝ်။ န့ မုး မီ ဂေ အီ ပွိုန် မိူင် ပီ ဒွါ ဇဝ်ဖြာ ဒီ ဂေ။

20 ဂေ ဟဲ့ ကာလာင် လွင် ဒူအီ ဟာယ် ဒူအီ မိူက် အီ ဝိန် ဒီ ခါနှာပ် အီ ဟဝ်။ အန် ဒီ လုဝ် ခမ် ဒုက် ဘော စုဝ် အန်။ ဇဝ်ဖြာ ဟဲ့ ဟွတ့် ပွက့် အုန် နှာင် ဆီနမ် အန် ဒီ လုဝ် ခမ်။

21 ဂြုဝ်း အီ မွှိုမ် ယုဝ် ဒီ ဘော ဆီနန် ခဲင် ဟျုဝ့် အန်။ ဒေါ ဆီငျာ ကွယ် ဆီချာ အန်၊ ဒူအီ ဟဝ် ဒီ တး ဖာတ် တး ဒိုဝ်း ကြုဝ်ကြာမ် အန် ဒေါ တူ ထာင် အန်။

22 အန် မိူဝ် အာဝ် ဟူ ထာင် အန် ဒီ လွတ် အာဖေ အာရေ ခဲင် အပ် ဝွင့် ကာဆဝ်။ ခုဝ်၊ ဂေ အီ ဂူင့် မာပွါ့ လာင် ဟဲ့ ဘ်ု ဒီ ငဝ်း ယမ် အန်။

23 အန် ဘော ဟာဝ် ဝိဝ် ဟာဝ် ဝေန့်၊ ဟြေတ့် ပီ ဒီ ဟူမ် အန် ဘော တဝ်း၊ ‘န့ ကွယ် ဒီ မှဝ်။း’ အန် ဟဲ့ နပ်၊ ဆီငဲ အပ် ဝွင့် ဟဲ့ ချြီ့ ဒီ တး။

24 အီ ဒုက် အီ ဆဝ် ကာဆဝ် ဒီ နဝ်း၊ န့ ဘော ဘဲန် နဝ်း ယုဝ် ဆေဆေ။ န့ ဘော ပီ ခုန်ဒီခမ် ဟဲ့ ရဲန် ဆိုက် ဒီ ဟာဝ် ကာဂုဝ်း ဒီ ရန်ဆူ အန်။

25 ခုဝ်၊ န့ ပီ အန် ဟဲ့ ခြိုင် ဒီ လာယ် ဒိး ဒီ ဇဝ်ဖြာ၊ ဘော ကာခဲန့် ဒီ အန် ဇဝ် အီ အိုပ် တူတ့် ဒွန် မျုဝ်။

26 အန် ဘော မိုဝ်း နဝ်း ဆီ ဘူင် ကာဘး ဘော ဒိူဝ် ကာဆဝ်။ န့ ပီ အန် ဟဲ့ ဂူင့် ခြိုင် ကာဂုဝ်း ဘော ကာဘ့လဲပ် ဟာဝ်၊ တဲး အန် ပွိုန် ဒီ ကာဂုဝ်း ဒီ ဇဝ်ဖြာ။

27 အန် မိူဝ် ဟဲ့ ဂ့လန့် ကာဆဝ်။ နာ အန် မိူဝ် ဟဲ့ အူပ် တူတ့်။ ဝတ့် အန် မိူဝ် ဟဲ့ ဂိုဝ်း။

28 ပီ ဘော ပါယ် တီ မိူဝ်၊ အန် ယီ ကာဒုး ဒီ ကွယ် ခဲင် မိူင် အီ ဟဲ့ ရာမ်၊ ခဲင် ကာင် အီ တူ မိုဝ်း ဒူအီ။ န့ ဘော မုး မိူင် အီ ဟဲ့ ရိန် ဒီ ဒီဂ့လဝ်း ကာပျာတ့် လိုဝ် တူတ့်။

29 အန် မိူဝ် တူ ခြမ် ဆေဆေ။ ကြုဝ်ကြာမ် အန် မိူဝ် တူ ကွယ် ဆီချာ။ ဘော ဒုဝ် ဆတ်ဒါဝါ ပီ ဟျီင် အန် မိူဝ်၊ တူ ပွိုန် ဒီ ဘြဲ ကိူန် ခဲင် မိူင် ဒူင် ကွယ် အန်။

30 အန် မိူဝ် တူ လွတ် အာဖေ အာရေ ခဲင် အပ် ဝွင့်။ အန် ဒီ ဘော ပီ ရာ ဟေ ပဲ့ ဟဲ့ ဟိုဝ်း ငဝ်။ ဖွိုမ် ပီ ဟိုဝ်း ဇဝ်ဖြာ၊ န့ ဒီ ပီ ခုန် တး ဘုတ် တဝ် ဘုဝ်း အန်။

31 ကွဲ့ တဲး အန် ဝီ ကာလုဝ် ဒုဝ် ဘြိမ် အန် ဘော ဘိုင် အီ တူ မိုဝ်း ဒီခုဝ်။ ခုဝ်၊ အာဝ် ဘဲန် အာဂျိုဝ် မာဆေ ဒီ အန်။

32 အန် ဒီ ဘော ပီ ဟေ အီ ဟျီ့ ကာဟဝ်း အာတ့် ဇမ် အာခြာဝ် အန်။ အန် တူ နပ် ဒီ ဝီ အိမ် ဝီ ငျီန်။

33 အန် ဒီ ဘော ပီ ဟေ မာငုန် အီ မိုဝ်း ဘ့လေ အီ ဝီ ဆီဂ့လုး စုဝ်း အာတ့် ဂဲ အာတ့် ဆိန် အန်။ အန် ဒီ ပီ ဘော ဟေ နာမန် ဒေါ ဟဲ့ ဒိုမ် ဘုဝ်း အန် ဘော ဝီ ဆီဂ့လုး စုဝ်း တူတ့်။

34 ခုဝ်၊ ဖိုင် ဒူအီ အီ တူ ရုဝ်ဆေ ဇဝ်ဖြာ၊ ဂေ တူ မိုဝ်း လှုက်လှာန်။ ငဝ် ဒီ ကာဆိုမ် ဒူင် ကွယ် ဂေ ဒူအီ အီ ဒိုဝ်း ဒီ ဟူမ် ပီ ပြာ အီ ဒီ ဒွါ။

35 ဒူအီ ဇိုဝ် တီ၊ ဂေ မုး ဒူအီ အီ ခြာမ် ဒီ ဘူင် မီ နာ တူ မွှိုမ်၊ တဲး န့ ပီ ဂေ ဟဲ့ ဒဲ ဘာဒိက် ဆန်ထေ၊ န့ ဒီ ဂွိုတ် လေး မီ အီ ဟာယ် အီ မိူက်။ ခဲင် နဝ်း ဂေ မိူဝ်၊ ဟဲ့ မုး တူတ့် အီ ကာလုဝ် အီ တူ မှာန် ပီ ဂွန် အီ ကွယ် ခဲင် ဝတ့် မာ အန်။”