အာယုဝ်ဘာ ဘော ကာလာင် ဟာဝ် ပွါ တဝ်း၊ “ဒူအီ အီ ဂွိုတ် တး ဒီ အီဘိုန့်၊ ဂေ တူ ကွယ် လှေန့် ခဲ့ မှဝ်။ ဂေ မိုဝ်း မီ အီ ဒုက် အီ ညှာပ် ဒီလူယ်။

2 အေ ယီ နပ် ဒီ ဟြေး ဒီ တာင်၊ ဘော ဝီ ခြန် ဒီ ဟျီ့ ကာဟဝ်း ပီ ကာယူင့် ဘုဝ်း။ အေ ဘော ပီ ကာမိုက် အီ တူ ကွယ် လှေန့်။ အူ ကာစန် ဟဲ့ ဟြာယ်။

3 အိုယ် မဲ ဇဝ်ဖြာ၊ မဲ ဇဝ် ဒီ ဇဲတ် ဒီ ယွတ် ဒူအီ ဝီ တီ။း ဆေ အာဝ် ပါယ် တီ မိူဝ်၊ မဲ ဒီ ဆုင်ဖျာတ် ဒါရာ ဒီ အုဝ်။း

4 အာဆေ ဒီ ပွိုန် ဘူင် တဲး အီ ဆီငါ လေး ခဲင် အီ တူ ဆီငါ။း အာဝ် မိုဝ်း အာဆေ အီ ပွိုန် ဘူင်။

5 ခုဝ်၊ မဲ ဇဝ် ဟဲ့ ဟွတ့် ပွက့် အုန် အာဆာက် ဒူအီ။ မဲ ဘော နပ် အန် ဒီ ကွယ် နှာင် မာဂျီန်။ မဲ ဟဲ့ ဟွတ့် ဘ့လေး အုန် အာခြာဝ် အန်၊ တူ ပွိုန် တဲး န့ ပွုန်။

6 မှာန့်၊ ကွဲ့ တဲး မဲ ဇဝ် ယွတ် အန်၊ တဲး အန် ပွိုန် ဒီ ကွယ် ဘျုဝ် ဒါခိုယ်၊ တဲး န့ ကော တူတ့် ဆီငဲ အန်၊ ပီ ဒူအီ အီ ဝိန် ဒီ ဇာင်။

7 ဆေ န့ မုး ဟေ ပီ ဂ်ု ကေး အီ၊ န့ ဒီ မိုဝ်း ပီ နှဝ့် န့ဒဝ့်။ အန် ဒီ ဝီ မိုဝ်း န့လုဝ်း ကာမာယ်။ ဟဲ့ နပ် ဆီချာ ဒီ မိုဝ်း ဘော ရာ ကာမာယ် အီ ဒီ ဝီ လေး။

8 ရျီး အန် ပီ ဘော ဟဲ့ ဂဲ၊ ငူယ် အန် ဒဲင် ကာဒါယ် ပီ ဘော ဟဲ့ ယမ် မိူဝ်၊

9 ဆေ ယီ မိုဝ်း အိုမ် မီ အီ စဲက်၊ အန် ဘော နပ် ဒီ ဝီ န့လုဝ်း၊ မိုဝ်း ကာပ့လုယ် ကာမာယ်၊ ဝီ ပီ ဟေ အီ ဆီ နှိုမ်။

10 ဆေ န့ ယီ မုး ဒူအီ၊ ဆေ အန် ဟဲ့ ယမ်၊ အန် ဒီ အမ် လာတ့် ဟြာယ် တူတ့်။ အေ တူ နပ် ပီ ဒီ ပါယ် အန်။

11 အိုမ် နပ် ဒီ ဟြာယ် ခဲင် အိုမ် ဒိုင်။ အိုမ် ခဲင် ဘ့လဲင် မိူဝ် နပ် ဒီ ဟိတ် ဟေန့်။

12 ပါယ် တီ ဆေ ဒူအီ ဟဲ့ ဟွတ့် ယမ်၊ အာဝ် ပွိုန် ဝီ အိမ်။ ဂေ ဒိူန် တူ ဝီ န့ဆိုဝ်း ဒေါ မှဝ် ကော ဇမ် ပန် ဒီ ဟြာယ် တူတ့် ဘ့လေန့် ဂေ ဂါင်ဟြာဝ်။ ပီ ဘော ဟာဝ် ဘျိတ့် ယိတ့် ဂေ မိူဝ်၊ ဂေ တူ နပ် ဒီ ဝီ န့ဆိုဝ်း။

13 အုဝ် ဟဲ့ ဆီ တဲး ကာဆဝ် မဲ ဇဝ် ဒိုဝ်း ဟာဝ် ချြီင် အုဝ် ခဲင် ဘာရေဝ်။ တဲး အုဝ် ကွယ် ဒီ တီ၊ တဲး န့ ကော ဇမ် ပန် ဒီ ဟြာယ် နဝ်း ရူ မဲ ဇဝ်။ အုဝ် ဆီ တဲး မဲ ဇဝ် ပွက့် အာခြာဝ် အန် ဒီ အုဝ်။ ဟဲ့ ဟွတ့်၊ တဲး မဲ ဘော ဝီ နမ်လှုဝ်း အုဝ်။

14 ဆေ ဒူအီ ဟဲ့ ဟွတ့် ယမ်၊ အန် ဒီ ဘော နပ် ဒီ ဝီ ယိတ့် ဝီ အိမ်။း ဒေါ ဆီ လုဝ် ဘူင် အုဝ် ဂါန် အုဝ် နီ၊ အုဝ် ဒီ ဘ်ု တဲး န့ ကော ဇမ် အာခြာဝ် ပန် ဒီ လွတ် အုဝ်။

15 မဲ ဇဝ် ဒီ ဒဲ့ အုဝ်၊ အုဝ် မိူဝ် ဒီ အိုဝ် ဂြုဝ်း မဲ။ မဲ ဇဝ် မိူဝ် ဒီ ဝီ ဒီကေန် အုဝ် အီ မုး ဒူအီ ပဲ့ ဟဲ့ ဖာန် ဘ့လေး မဲ ဇဝ်။

16 မဲ ဇဝ် မိူဝ် တိး ဒီ ယွတ် ပန် ဒူင် ဇာပ် အုဝ် ဒွန် န့ ဇာပ်။ မဲ ဇဝ် ယီ တူ ဘ်ု ဒီ ယွတ် ပီ ကာလိုပ် အုဝ်။

17 န့ ပီ မဲ ဇဝ် ဟဲ့ ဒိုဝ်း ပီ ကာလိုပ် ပီ လုတ့် အုဝ် တီ၊ ဝီ ဟပ် အုန် ခဲင် ဟူ၊ ဝီ ဒွက် ဇိုမ်။ န့ ဘော ပီ မဲ ဇဝ် ဟဲ့ ဆီဘ့လိုက် အုန် မှာပ် ပီ ကာလိုပ် အုဝ် တီ။

18 နွန် ဟီ ဒီဂ့လဝ်း၊ န့ ဘော နပ် ဒီ ဟြာယ် တူတ့်။ မာဝ် ဂေ ဒါအာင် ဘော နပ် ဒီ ကာထုဝ့် ဒူင် ကွယ် ဂေ။

19 အိုမ် အီ လှဲ ဘော နပ် ဒီ ဇုး ကာထုဝ့် မာဝ်။ အိုမ် ပြဲ့ ဘော နပ် ဒီ ဇုး ဟာဝ် ကာဒါယ်။ ပါယ် တီ မဲ ဇဝ် ဘော နပ် ဒီ ပျာတ့် ဝဲန် ပီ နှဝ့် န့ဒဝ့် ဒူအီ။

20 မဲ ဇဝ် ဘော အွင် ဘော ပဲ ဒူအီ၊ တဲး အန် ဘော ယမ် အူ ဇေန့်။ မဲ ဇဝ် ဘော ဘျွင် နာ အန် ဒေါ ယမ် အန်။

21 ဂွန် အန် ပီ ဘော မိုဝ်း ဆာရေ မိူဝ်၊ အန် ယီ တူ နပ် လွင် အန် တီ။ ဂေ ပီ ဘော စုဝ်း တျီမ် မိူဝ်၊ အန် ယီ တူ ဝီ ယိုဝ် လွင် အန် တီ။

22 အန် ဝီ နပ် ဒုဝ် ဘူင့် အန် မီ ဒေါ ဟဲ့ ဆဝ် ကာဆဝ် အန်။ အန် ဝီ ငှုန် ဝီ ငှဝ် မီ လွင် ဒုဝ် ဘြိမ် အန်။”