ဟဲ့ ဟွတ့်၊ အာယုဝ်ဘာ ပီ ဝီ ကာလာင် ဟာဝ် ပွါ တဝ်း၊ “ယွတ်၊ ငါယ် အုဝ် ဟဲ့ ယိုဝ် ဇိုဝ် တီ ဒွန် မျုဝ်။ ဟျုဝ့် အုဝ် မိူဝ် ဟဲ့ ထူမ် တဲး ဘော ကာလှုး ဒီ နဝ်း။

2 ခဲ့ ပီ ယိုဝ် ဘေ တီ၊ အုဝ် မိူဝ် ဟဲ့ ယိုဝ်။ အာဝ် မုး အုဝ် ဟဲ့ ချဝ့် ဟဲ့ တျီမ် လွှိုမ် ဘေ။

3 အုဝ် မိုဝ်း ပီ ဆီ ကာလာင် ဒီ ဇဝ်ဖြာ အီ အိုပ် တူတ့် ဒွန် မျုဝ်။ အုဝ် မိုဝ်း ပီ ဆီ ထဲန့်၊ ပီ ဆီ ဒီမွှတ် ဒီ ဇဝ်ဖြာ။

4 ပီ တူ နပ် ဘေ၊ ဘေ ဝီ ကာလုဝ် တဲး န့ ပီ ဟဲ့ မှာန်၊ တဲး န့ ပီ အီ ဖဝ်း ထုန် လုယ်။ ဘေ ဘောကာဂ့လျီတ် ပီ ဆာရာဝူန် အီ တူ မိုဝ်း ဒီခုဝ် မာဆေ။

5 ဘေ ဟဲ့ ကာအာပ် ကွယ် နှိမ် နှိမ်၊ ကွဲ့ တဲး ဘေ ကာလာင် ဂြုဝ်း မာဆေ။ ဆေ ဘေ ဘူင် ပါယ် တီ န့ ပီ ဘေ ဟဲ့ မိုဝ်း အာငျာန်။

6 တဲး ဘေ ထူမ်၊ အုဝ် ဒီ ကာလာင် လွင် အာမူ အုဝ်။ တဲး န့ ဘော ကာလှုး ဒီ ဘေ လွင် ပီ ဒီ ကာလာင် အုဝ် တီ။

7 ဘေ ဒီ ဘော ကွယ် ဘ့လာက် ဇဝ်ဖြာ၊ ဝီ ကာလာင် ဂြုဝ်း တူ မှာန်။း ဘေ ဒီ ဘော ကာလဝ့် ဒီ အန် ဇဝ်၊ ယီ ဝီ ကာလာင် ဂြုဝ်း ကာလုဝ်။း

8 ဘေ ဒီ ဘော ဖြူမ် ဘ့လာက် အန် ဇဝ်၊ ဝီ ကာလာင် တဲး အန် ဇဝ် အွင်။း

9 ဘေ ထာင် ဆေ ဇဝ်ဖြာ ဟီ ဝီ ဇဲတ် ဒီ ယွတ် ဘေ၊ အန် ဒီ ဘော ယိုဝ် ဘေ ဟဲ့ မုး ဒူအီ မွှိုမ်။း ဘေ ထာင် ဘေ ဒီ ဘော ပွိုန် ကာလုဝ် ဇဝ်ဖြာ ပီ ဘေ ကာလုဝ် ဒူအီ။း

10 ဆေ ဘေ မိုဝ်း ဒူင် ရွက့် ဒူင် ဇွင့်၊ ဇဝ်ဖြာ ဒိူန် ဒီ မာနုဝ် ဘော အေး ဘေ အာခါခ်ု။

11 ဆေ ဘေ ဟဲ့ ယိုဝ် ခဲ့ တာင် အာဖုင် ဒင်ခုဝ် အန် ဇဝ်၊ ဟဲ့ မှာန်၊ ဘေ ဒီ ဘော ကာစွာ ဘော ယုဝ် ဒီယုး ဒီယေန့်။

12 ဂြုဝ်း ထုင် ဂြုဝ်း မာကာထ ပီ နပ် ဘေ၊ န့ ပီ ကာဝှါင်။ ဂြုဝ်း ပီ ဒီ ဝီ ဝျီ့ ဝီ ကာလာင် ဘေ၊ န့ ပီ ကာဒါယ် ကာပိတ်။

13 အုဝ် ဆီ တဲး ဘေ ကွယ် ယေန် ယေန်၊ ကွဲ့ ဂြုဝ်း။ တဲး အုဝ် ပွိုန် ဒီ ကာလာင်။ ဟဲ့ ဟွတ့် အီ ဆီ ဘဲန် ဒီ အုဝ်၊ တဲး န့ ဘဲန်။

14 အုဝ် မိူဝ် တူ ပွိုန် ပါ အုန် အာဆာက် အုဝ်။ ခုဝ်၊ အုဝ် ဟဲ့ ဖြူမ် ဒီ စုန် အာဆာက် အုဝ်။

15 ဆေ ဇဝ်ဖြာ ပီ ဘော ဟဲ့ တဲး အုဝ် ယမ် မိူဝ်၊ အုဝ် ယီ ဒီ နဝ်း န့ဒဝ့် အန် ဇဝ်။ အုဝ် ဒီ ဝီ ကာလာင် လွင် အာမူ အုဝ် တီ ဒီ အန်။

16 အုဝ် ဟဲ့ နပ် ဆီချာ န့ မိုဝ်း မီ လွင် အန် တီ၊ အီ ဒီ ပွိုန် ချွတ် အုဝ်။ ခုဝ်၊ ဒူအီ အီ တူ ရုဝ်ဆေ ဇဝ်ဖြာ၊ အန် မိူဝ် တူ ယ တး ကာလာင် ဒီ ဇဝ်ဖြာ။

17 ဒေါ တီ နီ၊ တဲး ဘေ ထူမ် ဂြုဝ်း အုဝ် နီ၊ တဲး ဘေ နုဝ် ဆီချာ။

18 အုဝ် မိူဝ် ဟဲ့ ဖြူမ် ဒီ ကာလာင် လွင် အာမူ အုဝ် တီ။ ခုဝ်၊ အုဝ် ဟဲ့ ဟွတ့် နပ်၊ ဇဝ်ဖြာ ဒီ တဝ်း အုဝ် တူ မိုဝ်း မှာပ်။

19 အာဝ် မိုဝ်း အာဆေ အီ ပွိုန် ဖျာက် အုဝ်။ ဆေ န့ ယီ မိုဝ်း၊ အုဝ် ဟဲ့ ဖြူမ် ဒီ ယမ် အူ ဇေန့်။

20 အိုယ် မဲ ဇဝ်ဖြာ၊ အုဝ် မှာန့် ခဲ့ အာ မျုဝ် တီ ဒီ မဲ ဇဝ်။ ဆေ န့ ပါယ် တီ အုဝ် မိူဝ် တူ ဒီ ချြီင် ဒီ မဲ။

21 အုဝ် မှာန့်၊ တဲး မဲ စူ မး အုဝ်၊ ဘော တဲး မဲ စူ ကာဘျုဝ် အုဝ်။

22 ဝါယ် အန် တီ၊ တဲး မဲ ဇဝ် ဒဲ့ အုဝ်။ အုဝ် မိူဝ် ဒီ ဝီ ယဝ်း ဂြုဝ်း မဲ။ ဆေ အာဝ် ပါယ် တီ မိူဝ်၊ တဲး မဲ တဲး အုဝ် ကာလာင် ဂြုဝ်း ဒီ မဲ၊ တဲး မဲ ဇဝ် မိူဝ် ဝီ ဝျီ့ ဂြုဝ်း အုဝ် တီ။

23 တဲး အုဝ် နပ် မှာပ် အီ တူ မွှိုမ် ပဲ့ ဟဲ့ ကာလိုပ် အုဝ် ဒီ ဘူင်၊ န့ မိုဝ်း ခဲ့ မှဝ်။း တဲး အုဝ် ဘော နပ် လွင် ပဲ့ ဟဲ့ ဘူင် ကာဘး အုဝ် ဒီ မဲ။

24 မှဝ် န့ ပါယ် ပီ တူ အိုင် မဲ ဇဝ် ဒီ အုဝ်။း မှဝ် န့ ပါယ် ပီ ဝီ မာတ် မဲ ဇဝ် အုဝ် မုး ရန်ဆူ မဲ။း

25 မဲ ဇဝ် ဆီ ဘူင် တဲး အုဝ် ကာစွာ၊ တဲး အုဝ် ပီ လှာ ဟေ ပီ ဘုတ် ခုန်။း မဲ ဇဝ် ဒီ ဘော ညွန် ဘော ခုင်ခြး အုဝ်၊ တဲး အုဝ် ပီ ဟျြီင် ကာဟဝ်း။း

26 မဲ ဇဝ် ဟဲ့ ဒဲမ် အုန် မှာပ် အီ ဆွင့် ကာဆဝ် ဒီ နဝ်း အုဝ်။ မဲ ဝီ တဲး အုဝ် ခမ် မှာပ် ပဲ့ ဟဲ့ ဘူင် အုဝ် ဆိန့် ဒေါ နှိုမ် ဒေါ ဒီတဲတ် အုဝ်။

27 န့ ပီ မဲ ဇဝ် ဟဲ့ စှိုပ် ဝန် ဟိန် ဒီ ပ့လဝ် အုဝ်။ မဲ ဘော ဘ်ု ဒီ ယွတ် ဒူင် ဇာပ် အုဝ် ဒွန် ဇာပ်၊ ဘော ဇဲတ် ဒီ ယွတ် ပန် အုဝ် ဒွန် ပန်။

28 ပါယ် တီ အာဆာက် ဒူအီ ဟဲ့ လိုဝ် ပီ ကြုဝ် အီ ဟဲ့ ရာမ်။ န့ ဘော ပီ ဘော ခြိုင် ပဲ့ ဟဲ့ ကဝ့် ဟူမ် မာဝ။”