1 ဝါယ် အန် တီ အာယုဝ်ဘာ ဝီ ကာလာင် ဂြုဝ်း။

2 အန် တဝ်း၊ “ဟဲ့ မှာန်၊ န့ ပီ မီ ဘေ မုး ဒူအီ။ ဆေ ဘေ ယမ်၊ အာငျာန် မိူဝ် ဒီ ယမ် ရိုမ် တူတ့် ဒူပ် ဘေ။

3 အုဝ် မိူဝ် မိုဝ်း အာငျာန် ပီ ဘေ။ ခဲ့ ပီ နပ် ပီ ယိုဝ် ဘေ တီ၊ အုဝ် မိူဝ် ဟဲ့ ဟွတ့် ဒွိုမ် နပ် ဒွိုမ် ယိုဝ်။ အာဝ် မုး အုဝ် ဟဲ့ ချဝ့် ဟဲ့ တျီမ် လွှိုမ် ဘေ။ န့ မိူဝ် တူ မိုဝ်း အာဆေ အီ တူ နပ် လွင် အန် တီ။

4 အုဝ် မိူဝ် ဟဲ့ ဘဲန် ပီ ကာညး ပီ ဝါညာက် ဂေ ဂိုက် အုဝ်။ အုဝ် ဟဲ့ ဆာခိုဝ် ဒီ ဇဝ်ဖြာ။ အန် ဇဝ် မိူဝ် အိုဝ် ဂြုဝ်း အုဝ်။ အုဝ် ဟဲ့ မိုဝ်း နဝ်း ဆိူဝ် နဝ်း မှာန်။ အီ ဟဝ် မိူဝ် တူ မိုဝ်း ဒီ ကာလာင် နာ တူ မွှိုမ် လွင် အုဝ်။ အုဝ် ယီ လုဝ် ခမ် ဒီ ဘဲန် ပီ ကာညး ပီ ဝါညာက် အီ ဟဝ်။

5 ဒူအီ အီ ပွိုန် ကွယ် ဒါခိုယ် ဂေ နပ် ဒီ လုက်တာယ် ဒူအီ အီ ခမ် ဒုက်။ န့ မုး မီ ဂေ အီ ဒီပ့လာတ် ကေး အီ လုဝ် ခမ် ဒုက် တီ။

6 ဂေ အီ မုး ဒါ ဇူန် ဂေ ဒါ ပြာ၊ ဂေ ဘော ပွိုန် ကွယ် ဒါခိုယ်။ ဂေ ဒူအီ အီ ဘူင် တဲး ဇဝ်ဖြာ ရူ၊ ဂေ ဘော လွတ် အာဖေ အာရေ။ ဂေ ဘော ဘိုင် ပီ ဘူင် ဂေ ဒီ ဒဲ ဂေ၊ တဲး န့ ပီ အီ ဘိုင် ဇဝ်ဖြာ။

7 တဲး ဘေ ဒီမွှတ် ဒုဝ် ဆတ်ဒါဝါ၊ ဂေ ဒီ မာနုဝ် ဘေ။ တဲး ဘေ ဒီမွှတ် ဘော မာဆိမ် အီ ကွယ် ခဲင် ဘ့လေန့်၊ ဂေ ဒီ ကာလာင် ဒီ ဘေ။

8 ဆေ အာဝ် ပါယ် တီ၊ တဲး ဘေ ဒီမွှတ် ကာဒါယ်၊ အန် ဒီ မာနုဝ် ဘေ။ တဲး ဘေ ဒီမွှတ် ဘော ဂေ မာဂါ အီ ကွယ် ခဲင် အိုမ် နမ်မုက်ဆာရာ၊ ဂေ ဒီ ဘော ကာလာင် နှဲ ဒီ ဘေ။

9 ဂေ ဘောကာဂ့လျီတ် အာဝ် မိုဝ်း ခေါ အူ မျုဝ် အီ တူ နပ် လွင် ဇဝ်ဖြာ ဟဲ့ တာ ဒဲ အန်၊ ဘူင် ဇိုဝ် တီ ဒွန် မျုဝ် လွင် ပဲ့ ဟဲ့ ကာလာင် ဘေ။

10 ခဲ့ ကွယ် အာဆာက် ဒုဝ် ဆတ်၊ ဘော ဖွိုမ် ဒူအီ ပီ ဟိုဝ်း လိုပ် ဟိုဝ်း လေး ဂေ နီ၊ န့ မုး ဇဝ်ဖြာ အီ အိုပ်။

11 ဘေ ဘော နပ်၊ ဟျုဝ့် ဒူအီ နပ် ဒီ ထေဝ် ဒီ ဇဲတ် ဒီ ထူမ် ဂြုဝ်း ပီ ထူမ် အန်၊ တဲး န့ ပီ ဆီဒ အီ ထေဝ် ဒီ စိမ် ပီ ဒီ ဟူမ် အန်။

12 ဘေ ဘော နပ် ဒူအီ ကတ် ဒူအီ ဂဲ ဘော မိုဝ်း အာငျာန် ဘွတ် အာငျာန် မွှိုမ်။ ဒူအီ အီ မိုဝ်း အာဆာက် တူင့်၊ ဂေ မိူဝ် နပ် ဘဲန် မျုဝ် ဘဲန် မျုဝ်။

13 ဇဝ်ဖြာ ဟဲ့ မိုဝ်း အာငျာန် ဘော မိုဝ်း အာဖုင် ဒင်ခုဝ်။ အန် ဇဝ် ဘော မိုဝ်း အာကျာမ် အာငျာန် ဘော နပ် တူတ့် ဒွန် မျုဝ်။

14 ဆေ ဇဝ်ဖြာ ဟီ ပျာတ့် ဝဲန်၊ အာဝ် မိုဝ်း အာဆေ အီ ပွိုန် ဝီ ဆမ် ဝီ ဒဲ။ ဆေ ဇဝ်ဖြာ ဟီ မှေတ့် ခြွင့် ဒူအီ၊ အာဝ် မိုဝ်း အာဆေ အီ ပွိုန် ဘ့လေး တဲး အန် လွတ်။

15 ဆေ ဇဝ်ဖြာ တူ တဲး ဂ့လာယ် စုဝ်း၊ ကာဒါယ် ဒီ ဘော ကာဟဝ်း တွင့်။ ဆေ ဂ့လာယ် ယီ တး၊ အိုမ် ဒီ ဘော မ့ပုန် ကာဒါယ်။

16 ဇဝ်ဖြာ မိူဝ် မိုဝ်း အာဖုင် ဒင်ခုဝ်၊ မိုဝ်း ဘော အာငျာန် ဘော ပဲ တူတ့် ရန်ဆူ အန်။ ခဲ့ ကွယ် ဂေ အီ ဆီမာ ကာလုဝ် ဘော ဂေ အီ ခမ် အီ ဟဝ် ကာလုဝ် ဂေ၊ ဇဝ်ဖြာ အီ အိုပ် တူတ့် ဂေ။

17 အန် ဇဝ် ဒိုဝ်း ဝဲန် အာငျာန် ဂေ ဒါ ကာညာ အိုပ် မိူင်။ အန် ဘော ဘူင် တဲး ဂေ ဒါ တာင် အီ ဆုင်ဖျာတ် ဒါရာ ဝီ ရိုဝ် ခါမွှင့်။

18 အန် ဇဝ် ဘော နပ် ဒီ ဘ့လွာ့ ဝဲန် ဝန် ပီ ပက် ဂေ ခုန်ဒီခမ် ဒီ အီ၊ ပီ ဝီ စှိုပ် ဆဲ့ ဒီ ညွယ် ဂေ၊ ဝီ တဲး ဂေ ကွယ် ဆီချာ။

19 အန် ဇဝ် ဒိုဝ်း ဝဲန် ခြိုင် တာ ဂေ ဒါ အီ လှူ ဒီ ဇဝ်ဖြာ။ အန် ဝီ ဘူင် တဲး ဂေ အီ မိုဝ်း ပ့လူမ် တာင် စှိုမ် ဒီ အီ ဟဝ်။

20 အီ မုး ဒူအီ အီ မိုဝ်း အာကျာမ် အာငျာန် ဒူင် ဘိုင် အီ ဟဝ်၊ အန် ဇဝ် ဝီ ဘူင် ကွဲ့ တဲး ဂေ ပွိုန် ကာလာင် ဂြုဝ်း။ အန် ဘော ဒိုဝ်း ဝဲန် အာငျာန် ဂေ ဒူအီ ကတ် ဒူအီ ဂဲ။

21 အန် ဇဝ် ဘူင် တဲး ဂေ ဒါ တာင် စှိုမ် ဆာရေ။ အန် ဘော ဒိုဝ်း ဝဲန် ဟဲန့် ဂေ အီ မိုဝ်း ပ့လူမ် တာင်။

22 အန် ဇဝ် ဒီ ဝိုဝ်း အီ ကွယ် လိုက်၊ တဲး န့ လေး ခဲင် အပ် ဝွင့်။ အီ ကွယ် ခဲင် ကာမိုက် အပ် ဝွင့်၊ အန် ဒီ ဝီ ဘျ ခဲင် ဘ့လာင်။

23 အန် ဇဝ် ဟဲ့ ဘူင် တဲး အာမျုဝ် ဒူအီ ဘဲန် မျုဝ် ဘဲန် မျုဝ် ကြဲ ဒီ တာင်။ ဟဲ့ ဟွတ့်၊ အန် ပီ ဝီ ပျာတ့် ဝဲန် ဂေ။ အန် ဇဝ် ဟဲ့ ဘူင် တဲး ဂေ ဘြဲ ကိူန်၊ ပီ ဝီ တဲး ဂေ ကာယဝ်း ဟာဝ် ဘဲန် ပ့လုဝ့် ဘဲန် ပ့လုဝ့်။

24 အန် ဇဝ် ဘူင် တဲး ဂေ ဒါ တာင် အီ အိုပ် ဒဲင် ကာဒါယ် ဝီ ရိုဝ်။ အန် ဘော ဘ့လေး တဲး ဂေ ဂ့၀ွင် ဝိဝ် ဂ့၀ွင် ဝေန့် ခဲင် ပြဲ ကာဟဝ်း ဒူင် တူ မိုဝ်း န့တေန့်။

25 ဘ့လာင် မိူဝ် ဂေ တူ ယိုဝ်၊ တဲး ဂေ ဘော မွိုန် ခဲင် အပ် ဝွင့်။ အန် ဇဝ် မိူဝ် တဲး ဂေ ဟာဝ် ကာကျီင် ကာကေး ပီ ဒူအီ ယိုတ့် ပဝ်း။”