1 ဒေါ အန် တီ အာစောဖ အီ မုး ဒူအီ အာမျုဝ် နေမာတ် ဝီ ကာလာင် ဂြုဝ်း။

2 အန် တဝ်း၊ “ဂြုဝ်း ကိူန် ပီ ကာလာင် ဒူအီ တီ၊ ဟဲ့ ကာအာပ် မိုဝ်း အီ ဝီ ဝျီ့။ ဒူအီ ဂြုဝ်း ကိူန် မူတ့် ကိူန် ပါယ် တီ အန် တူ ပွိုန် လွတ် ခမ် မှာပ် အန်။

3 အိုယ် အာယုဝ်ဘာ၊ မဲ ထာင် ကူပ် ဂြုဝ်း ပီ ကာလာင် မဲ တီ၊ န့ ဒီ ဘော တဲး ဒူအီ ဟဝ် ကွယ် နှိမ် ကွယ် ယေန်။း မဲ ထာင် ပဲ့ ဟဲ့ ဖျာက် ဟဲ့ နဲန မဲ တီ၊ န့ တူ ကာအာပ် ဘူင် တဲး မဲ မွှိုမ် ဆာယ်။း

4 မဲ ဟဲ့ ပီခိုက် ပီဖုင် မဲ တဝ်း၊ ပီ ညှိုမ် မဲ ဘော ဂြုဝ်း ပီ ကာလာင် မဲ ဟဲ့ မုး ဟဲ့ မှာန်။ မဲ မိူဝ် ဟဲ့ တဝ်း မဲ မုး ဒူအီ အီ ဆီငါ ဘွတ် ဒီ အာတ့် ဇဝ်ဖြာ။

5 အုဝ် ဘော ဆီ တဲး ကာဆဝ် ဇဝ်ဖြာ ကာလာင် ဒီ မဲ။ အုဝ် ဘော ဆီ တဲး ဇဝ်ဖြာ ကာလာင် အီ တူ မွှိုမ် လွင် မဲ။

6 တဲး အန် ဇဝ် ဘျ အာငျာန် အန် အီ လိုက် ကာဆဝ် ဒီ မဲ။ ခုဝ်၊ အာငျာန် အန် ဇဝ် ဟဲ့ မိုဝ်း ဘဲန် နှာင် မျုဝ်။ တဲး မဲ နပ်၊ ဇဝ်ဖြာ ယီ တူ နုဝ် မှာပ် မဲ မင် မျုဝ်၊ တူ တဲး မဲ ခမ် ခဲ့ ကာအာပ် မဲ ခမ်။

7 မဲ ထာင် မဲ ဒီ ဘော ပွိုန် ဇဲတ် ဒီ ယွတ်၊ တဲး မဲ နပ် တူတ့် လွင် ဇဝ်ဖြာ။း မဲ ထာင် မဲ ဒီ ဘော ပွိုန် နပ် တူတ့် ခဲ့ တာင် အာဖုင် ဒင်ခုဝ် ဇဝ်ဖြာ။း

8 အာဖုင် ဒင်ခုဝ် အန် ဇဝ် ယီ ဟဲ့ စာ လွှိုမ် ဘ့လေန့် ဂေ ဂါင်ဟြာဝ်။ ခုဝ်၊ မဲ ဒီ ဘော ပွိုန် ဘူင် မာဆေ ဒီ အန် ဇဝ်။း အန် ဇဝ် ပီ ဝီ ဇမ် ဒူင် လိုက် လွှိုမ် မိူင် မာရာန။ ခုဝ်၊ မှဝ် မဲ ဒီ ပါယ် ဒီ နပ် တူတ့် လွင် အန် တီ။း

9 ဆေ အီ တဝ်း ဒီ ဂဝ် ဒီ ယွတ် ပီ ပါယ် အာဖုင် ဒင်ခုဝ် ဇဝ်ဖြာ၊ န့ ဘော တူင့် လွှိုမ် ကာဒါယ်။ န့ ဘော ကာဝဝ်း လွှိုမ် အိုမ် နမ်မုက်ဆာရာ။

10 ဆေ ဇဝ်ဖြာ တဝ်း ဒီ မှေတ့် ဘော ဘူင် အာမူ ဟပ် ဒီ မဲ၊ အာဝ် မိုဝ်း အာဆေ အီ ပွိုန် ခြဲ ပွိုန် ရဲ အန် ဇဝ်။

11 ခုဝ်၊ ဟဲ့ မှာန် အာခါခ်ု။ အန် ဇဝ် ဟဲ့ နပ် ဝီ အီ ဟာယ် အီ မိူက်။ အန် ဘော နပ် တူတ့် အီ တူ မွှိုမ် ပီ ဘူင် ဂေ။

12 ဆေ ဒူအီ ဟဲ့ ရိုဝ်၊ ဂေ တူ နပ် ဒီ ဝီ ဘဲန် ဒူအီ အီ မိုဝ်း အာငျာန်။ န့ ဘော ပါယ် တီ ဘော ဂွန် မာလာ ပြဲ တူ နပ် ဒီ ဝီ ဂွိုတ် ဘဲန် ဂွန် ဒူအီ။

13 တဲး မဲ ယီ မ့ပြာယ် နဝ်း မဲ၊ တဲး န့ ဆိူဝ် ဆိူဝ် မှာန် မှာန်၊ ဝီ တး ညိူဝ် ဇဝ်ဖြာ။

14 တဲး မဲ ဝဲန် နာ တူ မွှိုမ် ပီ ဘူင် မဲ၊ ကွဲ့ တဲး န့ ဆီ မိုဝ်း အီ တူ မွှိုမ် ခဲင် ကာင် မဲ။

15 ဆေ မဲ ဘူင် ပါယ် တီ န့ ပီ မဲ ဒီ ဘော ဝီ ပွိုန် ဒီ ငိုဝ်း ဂိန့် မဲ။ အာဝ် ဟူ မိုဝ်း အီ မွှိုမ် ဆာယ် ဒီ မဲ။ မဲ မိူဝ် အာဝ် ဟူ မိုဝ်း ဒီ လုဝ် ယုဝ် ဘော ပွိုန် ကွယ် ဒါခိုယ်။

16 မဲ ဒီ ဘော ဝီ ပိဝ် ဒုက် တာင် ဒွန် မျုဝ် အီ ကွယ် ခဲင် နဝ်း ခဲင် ဖွိုမ် မဲ။ ဆေ မဲ ဘော ဝီ လှုဝ်း၊ န့ ဒီ ပီ အိုမ် အီ ဟဲ့ လှဲ အီ ဟဲ့ ပွုန် ဟာဝ်။

17 စုဝ် အာဆာက် မဲ ဒီ ဘော ဝီ ဆာဘ့လာင် ပီ ဒေါ ကာတဲ ဆီငဲ။ န့ ပီ ဘော ဟဲ့ အပ် ဝွင့် မိူဝ်၊ န့ ဒီ ဘော ဝီ ဘ့လာင် ပီ ပြဲ ဝး။

18 မဲ ဒီ ဘော ဝီ ပွိုန် ဒီ ကွယ် ဒါခိုယ် ကွယ် ဆီချာ ကူပ် မိုဝ်း မဲ ပီ နှဝ့် န့ဒဝ့်။ မဲ ပီ ဘော ဝီ ယွတ် ရူပ် မဲ၊ မဲ ဟူ ယိုဝ် အီ မွှိုမ် ယုဝ်။ မဲ ဒီ ဘော ဝီ ပွိုန် ဒီ အိတ် ဒါခိုယ်၊ အိတ် ဆီချာ။

19 ဒေါ အိတ် မဲ၊ မဲ မိူဝ် တူ လုဝ် ယုဝ် ရန်ဆူ မဲ။ န့ ဒီ ဘော မိုဝ်း ဒူအီ ကိူန် ဒီ တး ငျော မဲ ဘော မှာန့်၊ တဲး မဲ စွယ် ဂေ။

20 ဆေ န့ မုး ဒူအီ ဟာယ် ဒူအီ မိူက်၊ ငါယ် ဂေ ဒီ ကာပျွယ်။ န့တေန့် အီ ဒီ တဲး ဂေ လွတ်၊ န့ ဒီ ဟြာယ် ဒီ ဘျုဝ်း။ ပီ နှဝ့် န့ဒဝ့် ဂေ မိုဝ်း မီ အူ မျုဝ်၊ န့ တဲး ဂေ ယမ်။”