အာယုဝ်ဘာ ဝီ ကာလာင် တဝ်း၊ “အုဝ် ဟဲ့ ပိုဝ် ကာဆဝ် အာဆာက် အုဝ် နီ။ အုဝ် အာဝ် ဟူ ပဲ ခမ် ဒီ ယိူန်။ အုဝ် မိူဝ် ဒီ ကာလာင် လေး တူတ့် အီ ဒုက် အီ ဆွင့် ဒီ နဝ်း အုဝ်။

2 အုဝ် ဒီ ကာလာင် ဒီ ဇဝ်ဖြာ တဝ်း၊ ‘အုဝ် မှာန့်၊ ကွဲ့ တဲး မဲ ဇဝ် ဒမ် မှာပ် ဒီ အုဝ်။ အုဝ် မိုဝ်း အာဘြဲတ် မာဆေ၊ မှာန့် တဲး မဲ ကာလာင် ဒီ အုဝ်။

3 ဆေ မဲ ဇဝ် ခါနှာပ် အီ၊ န့ ဒါခိုယ် ဒီ မဲ။း မှဝ် န့ ပါယ် ပီ လုက်တာယ် မဲ ဇဝ် ဒီ ဒူအီ ပီ ဖာန် ဘ့လေး မဲ၊ ဘော ဒွါ နာ မွှိုမ် ဒီ ဒူအီ ဟာယ် ဒူအီ မိူက်။း

4 ငါယ် မဲ ဇဝ် ဘော ပီ ငါယ် ဒူအီ။း မဲ ဇဝ် မိူဝ် ပွိုန် ယိုဝ် ပီ ပီ ယိုဝ် ဒူအီ။း

5 ဆီငဲ မဲ ဇဝ် မိူဝ် ဟဲ့ ပြေတ့် ပီ ဆီငဲ ဒူအီ။း ဘော ဆီနမ် မဲ ဇဝ် ဒီ စေဝ် တူတ့် ပီ ဆီနမ် ဒူအီ။း

6 တဲး မဲ ဇဝ် ဝီ ဟြေတ့် ပီ လုတ့် အုဝ် ဟဲ ဟဲ၊ ဘော ဇဲတ် ဒီ ယွတ် မှာပ် အုဝ် ခြန် ခြန်။း

7 မဲ ဇဝ် ယီ ဟဲ့ နပ်၊ အုဝ် တူ မုး ဒူအီ ဟာယ်။ မဲ မိူဝ် ဟဲ့ နပ်၊ အာဝ် မိုဝ်း အာဆေ အီ ပွိုန် စွယ် တဲး အုဝ် လွတ် လေး တ မဲ ဇဝ်။

8 မဲ ဇဝ် ဟဲ့ တာ ဒဲ မဲ ဘူင် ဘ့လေး အုဝ်။ ဒေါ တီ နီ၊ န့ ပီ မဲ ဇဝ် ဒီ ဝီ ပျာတ့် ဝဲန် အုဝ်။

9 တဲး မဲ ဇဝ် ဝီ လှုဝ်း ဒေါ ဟဲ့ ဒိုဝ်း မဲ ကာဒါယ် ကာပိတ် ဘူင် အာရိုပ် အုဝ်။ ဒေါ တီ နီ မဲ ဇဝ် ပီ ဒီ ဝီ တဲး အုဝ် ဘဲန် ကာပုး။း

10 မဲ ဇဝ် ဟဲ့ ဟုး အုဝ် ခဲင် ဝတ့် မာ အုဝ် ပီ အီ ဟုး အိုမ် ပူ။ တဲး အုဝ် ကြဲ ဒီ ဘဲန် ပီ အီ ဘူင် အိုမ် ပူ ပ့လူမ်။

11 မဲ ဇဝ် ဟဲ့ ဝီ ဒိုဝ်း ဟုန် ဂေ ယင် ဝီ ကာဘန် ဒုဝ် ဘူင့် အုဝ်။ ဝီ ဒိုဝ်း ဘော ကာအာင် ဂေ ဆီန၊ ဝီ ဘူင် တဲး ဒုဝ် အုဝ် မိုဝ်း ပ့လူမ်။

12 မဲ ဇဝ် ဟဲ့ တဲး အုဝ် မိုဝ်း အာဆာက် အိမ် ဘော ဂေဇူ အုဝ်။ ပဲ့ ဟဲ့ ယွတ် မဲန် လိုမ်လာ မဲ ဇဝ် တီ၊ န့ ဘော တဲး နဝ်း ဖွိုမ် အုဝ် ဒါခိုယ် ဂျာမ်ဆာ။

13 အီ ဟဲ့ ဘဲန် ဒီ အုဝ် ဒေါ တီ နီ၊ န့ ဘော မုး ပဲ့ ဟဲ့ ချြီင် အုန် မဲ ဇဝ် ခဲင် နဝ်း မဲ။ အုဝ် ဟဲ့ နပ်၊ န့ ဒီ ဒူပ် အာကျာမ် အာငျာန် မဲ။

14 မဲ ဇဝ် ဟဲ့ ဘ်ု ဒီ ယွတ်၊ တဲး မဲ ယိုဝ် ပီ ကာလိုပ် အုဝ်။ မဲ မိူဝ် တူ တဲး အုဝ် လွတ် ခမ် မှာပ် အုဝ်။

15 မဲ ဇဝ် ယိုဝ် ပီ ကာလိုပ် အုဝ် အီ စဲက်၊ မဲ ဝီ တဲး အုဝ် ခမ် ဒုက် ကိူန်။ အုဝ် ပီ ဆ မိုဝ်း မှာပ် မိူဝ်၊ အုဝ် ယီ တူ ပွိုန် ဒီ ငိုဝ်း ဂိန့် အုဝ်။ ခုဝ်၊ ဒုက် တာင် ပဲ့ ဟဲ့ ခမ် အုဝ်၊ န့ တဲး အုဝ် မွှိုမ် ဆာယ် ကာဆဝ်။

16 ဆေ အုဝ် ဒီ ငိုဝ်း ဂိန့် အုဝ်၊ မဲ ဇဝ် ဘော ဝိန် ဒီလဲ လဲပ် ဒီ ယွတ် အုဝ် ပီ မာခြင်ဆီ။ မဲ ဇဝ် ဘော ဘျ ပွုန် မဲ အီ မွှိုမ် ယုဝ် ဘော အီ မွှိုမ် အာမ် ကာဆဝ်၊ တဲး အုဝ် ဝဲ ခမ် ဒုက် တာင်။

17 မဲ ဇဝ် ဘော ဒိုဝ်း ဆက်ဆေ ကာမာယ်၊ တဲး ဂေ ဝီ ဖျာက် အုဝ်၊ တဲး နဝ်း ရူ မဲ ဒီ အုဝ် ဝဲ ကိူန်။ န့ ဘော ပီ ဒါ ဆိုက် တး တိုက် အုဝ် ဘဲန် ဖိုင် ဘဲန် ဖိုင်။

18 မှဝ် န့ ပါယ် မဲ ဇဝ် ကော လုဝ် တဲး အုဝ် ဂွိုတ် တး။း ပါယ် တီ ဆေ ဖွိုမ် အုဝ် ဟဲ့ တူတ့် ဆိန့် အာတ့် မိုဝ်း ဒူအီ ခေါ အူ ဝီ အီ ယိုဝ် အုဝ်၊ န့ ဟဲ့ ဒါခိုယ် ဒီ အုဝ်။

19 ဆေ အုဝ် ယမ် အာတ့် ဂွိုတ် ဘဲန် အုဝ် ဒူအီ၊ န့ မွှိုမ် ကာဆဝ် ဒီ အုဝ်။ အုဝ် ဘော အိုင် ဆေ အုဝ် လေး ခဲင် ဝတ့် မာ အုဝ်၊ ဝီ ဟာဝ် လိုပ် ခဲင် ကာဒဝ် ဘာရေဝ် အူ ဇေန့်။

20 စုဝ် အာဆာက် အုဝ် နီ ဟဲ့ ရိန် ဒီ တူတ့်။ အုဝ် မှာန့်၊ တဲး မဲ ဝး အုဝ်၊ တဲး အုဝ် ပွိုန် ဒီ ကွယ် အုဝ် အူ ဝီ၊ တဲး န့ ဒါခိုယ် ဒီ နဝ်း အုဝ် ခေါ အူ ကာစန်။

21 တဲး မဲ ဘူင် ပါယ် တီ ဒီ အုဝ် အာတ့် ဟာဝ် အုဝ် မိူင် အီ တူ ပွိုန် ဝီ တး၊ အီ မုး မိူင် အီ အပ် ဝွင့်၊ မိုဝ်း မီ ကာမိုက်၊ ဒူင် ကွယ် ကာပြဝ် ဒူအီ ယမ်။

22 န့ ဘော မုး မိူင် အီ မိုဝ်း မီ ခဲင် မှိုဝ် ဘော အပ် ဝွင့် ကာဆဝ်။ ပီ ထာင် ဂေ ဟဲ့ မုး ဘ့လာင်၊ ယီ ဝီ မုး မီ အီ အပ် ဝွင့် ဒီလူယ်။’”