1 ဟဲ့ ဟွတ့် ပါယ် တီ အာယုဝ်ဘာ ဝီ ကာလာင် ဂြုဝ်း။

2 အန် တဝ်း၊ “ဟဲ့ မုး ဟဲ့ မှာန် လွင် အန် တီ၊ အုဝ် ဟဲ့ ဟွတ့် နပ် တူတ့်။ ပီ ဘော ဟဲ့ ပါယ် တီ မိူဝ်၊ အာမျုဝ် ဒူအီ အေ နီ၊ မှဝ် အေ ဒီ ပါယ် ဒီ ပွိုန် မိုဝ်း နဝ်း ဆိူဝ် နဝ်း မှာန် ဒီ အာတ့် ဇဝ်ဖြာ။း

3 အာဝ် မိုဝ်း အာဆေ အီ ပွိုန် ကာထဲန့် ဒီ အန် ဇဝ်။ ဂြုဝ်း ပီ ဒီမွှတ် အန် ဇဝ် အူ ဟြဲန့် ဒဲ၊ အာဝ် မိုဝ်း အာဆေ အီ ပွိုန် ဝီ ဝျီ့ ခေါ အူ ဒဲ။

4 ဇဝ်ဖြာ မိုဝ်း အာငျာန် ဘော အာဖုင် ဒင်ခုဝ် အီ တာင် ကာဆဝ်။ အာဝ် မိုဝ်း အာဆေ အီ ဒီ အွင်၊ ဆေ အန် ကာခဲန့် ဒီ အန် ဇဝ်။

5 အန် ဇဝ် နပ် ဒီ ကာထုဝ့် နွန် ဒေါ တူ လှုဝ်း ဂေ ဒုဝ် ဂေ။ ဆေ အန် ဇဝ် ဟဲ့ ရူ စာဝ်၊ အန် ဘော နပ် ဒီ ဆာဂိုပ် ဝဲန် ဂေ။

6 အန် ဇဝ် ဟဲ့ စ်ု မာအိမ်၊ တဲး န့ ယေန့် ကာဒါယ် နီ။ ခဲ့ ကွယ် ရွင့် ဂေ လွှက့် ဘော ဒီယုး ဒီယေန့် ဒွန် ပ့လုဝ့်။

7 အန် ဇဝ် ကာလာင် ဂြုဝ်း ဒီ ဆီငဲ၊ ဆီငဲ မိူဝ် တူ ပွိုန် ဒီ လေး တး။ အန် မိူဝ် ကာဘိတ် ဘ့လာင် ဆီမန့်၊ ကွဲ့ တဲး န့ ဘ့လာင် ခဲင် မှိုဝ်။

8 မီ အန် ဇဝ် အူ ကာဒင် အီ ပွိုန် ဘ့လး ဘ့လေန့်။ အန် ဇဝ် ဘော ညဲတ့် ဇာပ် ဒဲင် ဆီလွယ် အိုမ် နမ်မုက်ဆာရာ။

9 ဇဝ်ဖြာ မိူဝ် ဖာန် ဘ့လေး တဲး န့ မိုဝ်း ဖိုင် ဆီမန့် အီ စိူဝ် ဘဲန် မျုဝ် ဘဲန် မျုဝ်။ န့ ဘော ကွယ် ခဲင် ဘ့လေန့် ဘ့လာက် နာ ကွာ၊ ဒီ ကာတဲ ဘော ခဲင် ဘ့လေန့် ဘ့လာက် နာ တေတ့်။

10 အန် ဇဝ် ဟဲ့ ဘူင် အီ အာရေ တာင် ကာဆဝ် ပီ တူ ကာလှုး ဒီ နဝ်း အေ။ အန် ဘော ဘူင် ကိူန် အီ မွှိုမ် အာမ် ကာဆဝ် ကော ဟူ ပဲ ဒီ တိး။

11 ဆေ အန် ဝဝ့် ဟာဝ် ခူပ် အုဝ်၊ အုဝ် ယီ တူ ပွိုန် ယိုဝ် အန်။ ဆေ အန် ပီ ဝီ ဂဝ်း ဟာဝ် တ အုဝ်၊ အုဝ် ယီ တူ နပ် လွင် အန် တီ။

12 ဆေ အန် ဇဝ် ဘော ဒိုဝ်း ဟာဝ် ဒိုဝ်း ချြီင် မင် မျုဝ်၊ အာဝ် မိုဝ်း အီ ပွိုန် ခြဲ အန်။ ကူပ် မာဆေ အန် ဇဝ် ဘူင် ပါယ် တီ။း အာဝ် မိုဝ်း အာဆေ အီ ယ ဒီမွှတ် အန်။

13 ဆေ ဇဝ်ဖြာ ရူ၊ အန် ဒီ ဘူင် ပီ ဆီ ဘူင် အန်။ ဖိုင် အီ စွယ် မာကြာယ် အီ စိူဝ် ရာဟပ် အီ ဘူင် ကာဘး ဒီ အန်၊ အန် ဇဝ် မိူဝ် တဲး ဂေ စုဝ်း လူင် ဒူင် တျီမ် ဘော ဂိုပ် ဒီ ပ့လဝ် အန်။

14 ကူပ် ပါယ် တီ မှဝ် အုဝ် ဒီ ပါယ် ဒီ ထဲန့် ဇဝ်ဖြာ။း မှဝ် အုဝ် ဒီ ဝီ ဟာဝ် ဟြေတ့် ဂြုဝ်း ဒီ ဝီ ဝျီ့ ဒီ အန် ဇဝ်။း

15 အုဝ် ပီ ဘော ဟဲ့ မိုဝ်း နဝ်း ဆိူဝ် နဝ်း မှာန် မိူဝ်၊ အုဝ် ယီ တူ ပွိုန် ဝီ ကာလာင် ဒီ အန် ဇဝ်။ အုဝ် မိုဝ်း မီ ဂြုဝ်း ဒီ မှာန့် ဒီ အန် ဇဝ် အီ မုး ဒါ ကာညာ အီ ဆုင်ဖျာတ် အာမူ အုဝ်၊ တဲး အန် ကာဝေ အုဝ်။

16 ဆေ အုဝ် ဒီ ဘော ဒဲ့ အန် ဇဝ်၊ အန် ဇဝ် ပီ ဘော ယဝ်း ဂြုဝ်း အုဝ် မိူဝ်၊ အုဝ် ယီ တူ ထာင် အန် ဒီ ထူမ် ဂြုဝ်း အုဝ်။

17 အုဝ် ထာင် အန် ဇဝ် ဒီ ဝီ တဲး ခုန် တာင် ဝီ တး ဒွါ ဒုက် ဒီ အုဝ်။ ပီ ဆ မိုဝ်း ဒီလွင် ဒီဒါင် မာဆေ မိူဝ်၊ အန် ဇဝ် ယီ ဝီ တဲး ဆဝ် ဂေ ဒိမ် အုဝ် ဝဲ ဘြဲ ဝဲ ကိူန်။

18 အုဝ် ထာင် အန် ဇဝ် ဒီ ဘူင်၊ ကွဲ့ ဟူ တဲး အုဝ် ပွိုန် ဒီ ဟိုဝ်း ဖွိုမ် အုဝ်။ အန် ဒီ တဲး အုဝ် ခမ် ဒုက် အီ ကာဆဝ် ထွုန် ဒီ နဝ်း အုဝ်။

19 ဆေ န့ မုး မျုဝ် အီ လာယ် ကာခဲန့် ပ့လူမ် ဂေ ဟဲန့်၊ အန် ဇဝ် မိုဝ်း ပ့လူမ် ဂေ ဟဲန့် ဘော အာဖုင် ဒင်ခုဝ် အီ တာင် ကာဆဝ်။ ဆေ န့ မုး မျုဝ် လာယ် ဆုင်ဖျာတ် အာမူ၊ အာဝ် မိုဝ်း အာဆေ အီ ဒီ ယ လာယ် ကာလာင် ဒီ အန် ဇဝ်။

20 ဆေ အုဝ် ပီ ဘော ဟဲ့ မုး ဒူအီ အီ နဝ်း ဆိူဝ် နဝ်း မှာန် မိူဝ်၊ ဂြုဝ်း အုဝ် ဒီ ဝီ ဒမ် မှာပ် ဒီ အုဝ်။ အုဝ် ပီ ဆ မိုဝ်း အာဘြဲတ် မာဆေ မိူဝ်၊ အန် ဇဝ် ဒီ တဝ်း အုဝ် ယီ မိုဝ်း နဝ်း ဂုဝ့်။

21 အုဝ် ပီ ဆ မိုဝ်း နာ တူ မွှိုမ် မိူဝ်၊ အုဝ် ဟူ မာတ် ဒုဝ် ဘူင့် အုဝ်။ အုဝ် မိူဝ် ဟဲ့ ပိုဝ် ဟဲ့ ဇာန် ဒုဝ် ဘြိမ် အုဝ် နီ။

22 န့ ပီ အီ မွှိုမ် အီ တူ မွှိုမ် ဟဲ့ မုး အူ မျုဝ် ဘောကာဂ့လျီတ်။ ခုဝ် အုဝ် တဝ်း၊ ‘အန် ဇဝ် နပ် ဒီ ပျာတ့် ဘော ဂေ အီ မိုဝ်း နဝ်း ဘွတ် နဝ်း မွှိုမ် ဘော ဂေ အီ မိုဝ်း နဝ်း ဟာယ် နဝ်း မိူက်။’

23 ဂေ ဒူအီ အီ တူ မိုဝ်း မှာပ်၊ ဒေါ ကာဒုး ဂေ အာဖေ အာရေ အန် ဇဝ် ဘော ဝီ ကာညး ဂေ အီ မိုဝ်း နဝ်း လိုဝ် နဝ်း ကာပျာတ့်။

24 ဆေ ဂေ ဒူအီ ဟာယ် ဒူအီ မိူက် ပွိုန် ဒီ အိုပ် မိူင်၊ အန် ဇဝ် မိူဝ် ကာဘိတ် ငါယ် ဂေ ဒါ တာင် အီ ဆုင်ဖျာတ် ဒါရာ။ ဆေ အာဝ် မုး အန် ဇဝ် အီ ဘူင်၊ တူ နပ် အာဆေ ဒီ ဘော ဘူင်။

25 ဆီငဲ ကာဒုး အုဝ် ဒုက် ညှာပ် ကာဆဝ် တီ၊ အာဝ် မိုဝ်း အီ ဘွတ် အီ မွှိုမ် ခေါ အူ ဆီငဲ။ န့ ဘော ပွုန် ဟာဝ် ခြန် ခြန်။

26 န့ ဘော ပီ ရိုဝ် အီ ဟာဝ် ဟဲ ဟဲ ခဲင် အိုမ်။ န့ ဘော ပီ ဘော မာဂ့လာင် အီ ဟဲ့ ဘိုန့် ဟာဝ် ဆိူဝ် ဒီ ဆူက် ဒုဝ် ဆတ်၊ တဲး န့ ဘဲန် ပီ ဒီ ဟူမ် အန်။

27 ဆေ အုဝ် ဒီ ဘော တဝ်း၊ ‘တဲး အုဝ် ပိဝ် ဂြုဝ်း ပဲ့ ဟဲ့ ငှုန် ဟဲ့ ပိုန့် အုဝ်၊ ဘော ဝီ ဘျွင် နာ အီ ဟဲ့ ငှဝ် ဟဲ့ မှူင် နီ၊ တဲး န့ ဝီ ဘဲန် နာ အီ အေဝ် ကာညး မိူဝ်၊’

28 အုဝ် ယီ ဆီ ယုဝ် ဒုက် တာင် တီ။ ခုဝ်၊ အုဝ် ဟဲ့ ဟွတ့် နပ်၊ မဲ ဇဝ် တူ မာတ် အုဝ် တူ မိုဝ်း မှာပ်။

29 ဆေ ဒွန် အီ တဝ်း အုဝ် မိုဝ်း မှာပ်၊ ပီ ဂျုဝ်ဂျာ အုဝ် ဒီ ဘူင် ဟဲ့ ဒီလူယ် ဒီလာယ် ပီယေန့်။

30 အုဝ် ပီ ဘော ဒိုဝ်း အိုမ် အီ ဆီငါ ဘော ဆာပျာ အီ မွှိုမ်၊ ဘာယ် ဒဲ အုဝ် မိူဝ်၊

31 န့ ပီ အန် ဇဝ် ဟဲ့ ဇုန် စုဝ်း အုဝ် ခဲင် ညုဝ့် ဘော ခဲင် ကာဒဝ် ကာဒါယ်။ ခြိုင် ပီ တာ အုဝ် မိူဝ် ဒီ ကာဒိး တူတ့်။

32 ဇဝ်ဖြာ တူ မုး ဒူအီ။ ခုဝ်၊ အုဝ် တူ ပွိုန် ဝီ ကာလာင် ဒီ အန်။ အာဝ် ပွိုန် ဝီ ဒါင် ဒီ ဂေ ဒါ တာင်၊ တဲး န့ ဘဲန် အာမူ။

33 န့ မိူဝ် တူ မိုဝ်း ဒူအီ ခေါ အူ ဝီ အီ ပွိုန် ဘဲန် ဒီ ကာတဲ ယာယ်။ အာဝ် မိုဝ်း အာဆေ အီ ပွိုန် ဆုင်ဖျာတ် အာမူ တီ ဒီ ဇဝ်ဖြာ ဘော ဒီ အုဝ်။

34 အာဝ် မိုဝ်း အာဆေ အီ ပွိုန် ဒိုဝ်း ဝဲန် မ့ဖျီ့ အန် ဇဝ် ဒီ အုဝ်၊ ကွဲ့ တဲး အုဝ် လုဝ် ခမ် ဒုက် အီ မွှိုမ် ယုဝ် ကာဆဝ်။

35 ဆေ န့ ပါယ် တီ အုဝ် မိူဝ် တူ ယုဝ် အန် ဇဝ်၊ အုဝ် ဒီ ဘော ဝီ ယ ကာလာင် ဒီ အန်။ ဒေါ တီ နီ၊ န့ ယီ တူ ပါယ် တီ ခဲင် နဝ်း အုဝ်။”