1 ဝါယ် အန် တီ အာဘီလာဒတ် အီ မုး ဒူအီ အီ တး ခဲင် မိူင် ဆူဟိတ် ဝီ ကာလာင် ဂြုဝ်း။

2 အန် တဝ်း၊ “မဲ ဆီ ဒီ ဝီ ကာလာင် ဟာဝ် ပါယ် တီ ပေါ ခဲ့ မှဝ်။း ဂြုဝ်း ပီ ကာလာင် မဲ တီ၊ န့ ဘော ဟဲန့် ပီ ခုန် ဒီ ဟဲန့်။

3 ဇဝ်ဖြာ တူ ဘူင် အီ တူ ကာဆိူဝ်။ ဇဝ်ဖြာ အီ အိုပ် တူတ့် ဒွန် မျုဝ်၊ အန် တူ ဘျွင် အီ မုး အီ မှာန်။

4 ဒေါ ဟဲ့ လုတ့် ဂွန် မဲ ဒီ အန် ဇဝ် မိူဝ်၊ အန် ဇဝ် ဟဲ့ ဝီ တဲး ဂေ ခမ် မှာပ် ပီ လုတ့် ဂေ တီ။

5 ဆေ မဲ ကော ဝီ မှာန့် ဒီ ဒွင်ဘာန် အန် ဇဝ် အီ အိုပ် တူတ့် ဒွန် မျုဝ်၊

6 ဆေ မဲ မိူဝ် မိုဝ်း နဝ်း လုယ် ဆီငါ၊ အန် ဇဝ် ဒီ ဝီ တး စွယ် မဲ၊ တဲး န့ ဘော လိုဝ်း မဲ မိုဝ်း နဝ်း ဆိူဝ် နဝ်း မှာန်။

7 ဒေါ ဂုဝ် ဒီ ကာစုး အာဆာက် မဲ၊ န့ ပီ ဘော ဟဲ့ အာရေ တူ တာင် မိူဝ်။ ဒီ ကာဒဲ့ အန်၊ န့ ဒီ ဘော ဝီ တာင်၊ ဝီ ဘဲန် အာဂျိုဝ် ကိူန်။

8 တဲး မဲ ဝီ ဒီမွှတ် ဂေ ဒူအီ ဘာန် ဒေါ မွိုန်၊ တဲး မဲ ဟေန် ဒီ ဂေ ခဲ့ ပီ ဒွိုမ် ယိုဝ်၊ ဒွိုမ် ကာဒုး တး ဂေ။

9 အေ ဒူအီ အေ ပီ ဒူအီ အီ ဆီလွ့ ဂွိုတ် တး အာမှိုဝ်၊ တူ နပ် မာဆေ။ ဒေါ ကွယ် အေ ဒဲင် ကာဒါယ် နီ၊ န့ ပီ အပ် ဂေ ကာမိုက်။

10 ပါယ် တီ တဲး ဂေ ဒူအီ ဘာန် ဒေါ မွိုန် တီ ဝီ မာနုဝ် မဲ၊ တဲး မဲ ထူမ် လွင် ပဲ့ ဟဲ့ ဒွိုမ် ယိုဝ်၊ ဒွိုမ် ကာဒုး တး ဂေ။

11 ကာဘာင် ငး၊ ဆေ အာဝ် မိုဝ်း ညုဝ့် ဂေ နှူင်၊ အန် မိူဝ် တူ နပ် ဒီ တာင်။ ဘော ဂ့လူင့်၊ ဆေ အာဝ် မိုဝ်း အိုမ်၊ အန် မိူဝ် တူ နပ် ဒီ ဟြေး။

12 ငး ဂေ ဂ့လူင့် တီ ဘော ဟျီ့ ကာဟဝ်း ဒေါ ဆီ နှိုမ် ဆီ ငျီန် ဂေ အာတ့် ဒဲပ် အီ ဒီ ဂေ။ ဂေ ဘော ဟျီ့ ကာဟဝ်း ဒီ အာတ့် ပေတ့် မျုဝ် ဟဝ်။

13 ဒူအီ အီ ပိဝ် ဇဝ်ဖြာ၊ အန် ဘော ပီ ငး ဂေ ဂ့လူင့် တီ။ ပီ နှဝ့် န့ဒဝ့် ဒူအီ အီ တူ ညှိုမ် ဇဝ်ဖြာ၊ န့ ဒီ ဟြာယ် တူတ့်။

14 ဒူင် နဝ်း လေး နဝ်း တာင် အန်၊ န့ ဘော ပီ ကြုဝ် အီ ငှိုယ် ကာပျာတ့်။ ပီ တဝ်း အန် ဒီ ဘိုင်၊ န့ ဘော ပီ ကာင် ပုင်ပျေန့်။

15 ဆေ အန် ဒီ ဘိုင် ကာင် ပုင်ပျေန့် တီ၊ န့ တူ နပ် ဒီ ခမ်။ ဆေ အန် ဒီ ပုင်ပိုယ် ဒုဝ် အန်၊ န့ တူ ပဲ ခဲ့ စန် ဒုဝ် အန်။

16 ဒူအီ ဟာယ် ဒူအီ မိူက်၊ အန် ဘော ပီ ဒဝ် အီ ဟဲ့ ရိုက် အိုမ် ကိူန်၊ အီ ကွယ် ခဲင် ဆောဒါတ်။ န့လုဝ်း အန် မိူဝ် ဟဲ့ လေး ကော နုဝ့် ဘော မာန်။

17 ရျီး အန် မိူဝ် ဟဲ့ ကာဘန် မ့ပိုမ် မာဝ်။ အန် ဟဲ့ ပါ ရိတ် ပါ မန် မာဝ် တီ။

18 မာလဲ၊ ဒေါ ဝီ ရိုတ့် လေး အီ ဒီ အန်၊ အာဝ် မိုဝ်း အာဆေ အီ ဝီ နပ်၊ ဒဝ် တီ ဟဲ့ ဒွိုမ် ကွယ် ဒီ တီ။

19 အီ ဘျုဝ် ဒါခိုယ် ဂေ ဒူအီ ဟာယ် ဒူအီ မိူက်၊ န့ တိူက် ခဲ့ တီ။ န့ ဘော ပီ၊ ဒူင် ဒွိုမ် ကွယ် ဂေ တီ၊ န့ ဒီ ဝီ လတ့် ဒဝ် ပေါ အူ မျုဝ်။

20 ဒူအီ အီ မိုဝ်း နဝ်း ဆိူဝ် နဝ်း မှာန်၊ ဇဝ်ဖြာ ယီ တူ ဝဲန် ဒေါ မှဝ်။ ဂေ ဒူအီ ဟာယ် ဒူအီ မိူက်၊ ဇဝ်ဖြာ မိူဝ် တူ စွယ် တူ ဂမ်။

21 ဇဝ်ဖြာ ဒီ ဘော ဝီ တဲး မဲ ပွိုန် ဒီ ဝီ အေဝ် ကာညး၊ တဲး မဲ ဝီ ပွိုန် ကာလာင် ဘော ဂြုဝ်း အီ ဘျုဝ် ဒါခိုယ်။

22 ဂေ ဒူအီ အီ ဇွင့် မဲ၊ ဂေ လုဝ် ဝီ ခမ် အီ မွှိုမ် ဆာယ်။ ဒူင် ကွယ် ဂေ ဒူအီ ဟာယ် ဒူအီ မိူက် ဒီ ဘော လိုဝ် စှိုမ်။”