ဒေါ မုး စုဝ် ခုန်ဒီခမ် အာယောယာခိမ် တွိုန်၊ ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ ဘော လိုပ် ခဲင် မိူင် အာယေဟုဝ်ျာခိမ် တွိုန်။ အာယောယာခိမ် ဘော ကာဒုး ဒီ ဟပ် စိုင် ဒီ ခုန်ဒီခမ် အာနေဘူခတ်နေစာ အာဒါ အူယ် ဆီနမ်။ ဟဲ့ ဟွတ့်၊ အန် အာဝ် ဟူ ဝီ ယုဝ် ခုန်ဒီခမ် အာနေဘူခတ်နေစာ။ စိုင် မိူဝ် အန် အာဝ် ဟူ ဝီ ဟပ်။ 2 ဇဝ်ဖြာ ဘော စ်ု ဖိုင် ဒါ ဆိုက် အီ တး မိူင် ဘာဘဲ၊ မိူင် အာရာမ်၊ မိူင် မုဝ်အာပ် ဘော မိူင် အမ်မူန်၊ တဲး ဂေ တး ဇူန် ခဲင် မိူင် ယူဒါ၊ တဲး မိူင် ဂေ ကြဲ ဒီ ကာပျာတ့်။ ပါယ် တီ န့ ဘော ဘဲန် ပီ ဒွိုမ် ကာလာင် ဒဲစေန့် ဇဝ်ဖြာ အီ မုး ဒူအီ အီ ဘျာန် ဂြုဝ်း ဇဝ်ဖြာ။ 3 န့ ဘော ဘဲန် ပီ ဒွိုမ် တဝ်း ဇဝ်ဖြာ တီ၊ တဲး ဇဝ်ဖြာ ပွိုန် ဒီ ဝဲန် ဒူအီ အာယူဒါ ကူပ် မှာပ် ပီ ဘူင် အာမာနာဆေ တွိုန် ဒွန် မျုဝ်။ 4 အန် ဟဲ့ ဒွိုမ် ငဝ်း ဒူအီ တူ မိုဝ်း မှာပ်၊ န့ ကော ပီ နှာမ် ဂေ ဟဲ့ ကွယ် ခဲင် မိူင် ယေရူဆာလဲမ် ဘော မိူင်။ ခုဝ်၊ ဇဝ်ဖြာ တူ မိုဝ်း နဝ်း ဆီ ဂဝ်း ဝဲန် မှာပ် တီ။

5 လွင် ပဲ့ ဟဲ့ ဘူင် အာယောယာခိမ် ဒေါ စုဝ် အန် အီ ညှမ် ဒွိုမ် ကာလာင်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် ယူဒါ။ 6 အာယောယာခိမ် ဘော ယမ် ဒူပ် ဒါ ဒါ အန်။ ဂွန် အီမာယ် အန် အီ စိူဝ် အာယေခေါနီ ဘော ဝီ ဘဲန် ခုန်ဒီခမ် ပ့လု အန်။

7 ခုန်ဒီခမ် အီ အိုပ် မိူင် ဘာဘဲ တွိုန်၊ အန် ဘော ဒိုဝ်း ကာဒါယ် ပီ အိုပ် ခုန်ဒီခမ် မိူင် အဲဂိုပ်၊ စုး ဒီ ဘ့လဲင် အိုမ် အဲဂိုပ် ကော ဇမ် ဘ့လဲင် တာင် အူဖာရာတ် တွိုန်။ ကူပ် ပါယ် တီ ခုန်ဒီခမ် အဲဂိုပ် အာဝ် ဟူ ပွိုန် ဒီ လေး တ မိူင် အန်။

8 အာယေခေါနီ ဟဲ့ ဘဲန် ခုန်ဒီခမ် ဒေါ အာဆာက် အန် ဂိုဝ် ဒီ ဒါ ဆီနမ်။ အန် ဘော အိုပ် မိူင် ယေရူဆာလဲမ် အာဒါ အူယ် မာဂျီန်။ မာ အန် စိူဝ် နာင် နာဟူတ။ အန် မုး ဂွန် အာအေန်နာထာန် အီ ဒွိုမ် ကွယ် ခဲင် မိူင် ယေရူဆာလဲမ် ဆေဆေ။ 9 အန် ဘော ဘူင် မှာပ်၊ ဘူင် မိူက် ပီ တူ အိုင် ဇဝ်ဖြာ၊ တဲး န့ ပီ ပီ ဒွိုမ် ဘူင် ဂုန့် အန်။

10 ဝါယ် အန် တီ ဂေ ဒါ ဘုဝ် ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ တွိုန် ဘော တး ရူပ် မိူင် ယေရူဆာလဲမ်။ 11 ဒေါ ကွယ် ရူပ် ဂေ မိူင် ယေရူဆာလဲမ်၊ ခုန်ဒီခမ် အာနေဘူခတ်နေစာ အီ တး မိူင် ဘာဘဲ၊ အန် ဘော ဇမ် ဒီ မိူင် ယေရူဆာလဲမ် တွိုန်။ 12 ဒေါ အန် တီ ခုန်ဒီခမ် အာယေခေါနီ အီ အိုပ် ဒူအီ အာယူဒါ တွိုန် ဘော မာ အန်၊ ဒဲစေန့် အန်၊ အာမူ အာမာတ် အန် ဘော ဂေ အီ ဘူင် ဂါန် အန်၊ ဂေ ဘောကာဂ့လျီတ် ဟာဝ် ဒူင် ကွယ် ခုန်ဒီခမ် အီ အိုပ် မိူင် ဘာဘဲ တွိုန်၊ ခမ် ဒီ ဂူမ် အန်၊ တဲး အန် မှေတ့် ဂေ။ ဒေါ အန် တီ ခုန်ဒီခမ် အာနေဘူခတ်နေစာ ဟဲ့ အိုပ် မိူင် အာဒါ ဒါ ဆီနမ်။ 13 အန် ဘော ဒိုဝ်း ဟာဝ် ဘော ကြုဝ်ကြာမ် အီ ကွယ် ခဲင် ဟုဝ် ဇဝ်ဖြာ ဘော ခဲင် ဟုဝ် ခုန်ဒီခမ်။ အန် ဒိုဝ်း ဘော ခြိုင် ခြိဝ် ပဲ့ ဟဲ့ ဘူင် အုန် ခုန်ဒီခမ် အာဆာလုဝ်မုဝ် ခဲင် ဟုဝ် ဇဝ်ဖြာ။ 14 အန် ဘော မှေတ့် ဒူအီ ဘောကာဂ့လျီတ် ခဲင် မိူင် ယေရူဆာလဲမ်။ ဘော ဂေ အာမူ အာမာတ် ခုန်ဒီခမ်၊ ဂေ ဒါ ဆိုက် ဘော ဒူအီ အီ လှဲဝ် ဒီ ဘူင် ဘဲန် မျုဝ် ဘဲန် မျုဝ် အန် မှေတ့် တူတ့် ဂေ။ န့ ဘော မုး အူ မှိုန့် ဝီ။ အန် ဘော မှေတ့် ဟာဝ် တူတ့် ဂေ၊ တဲး ဂေ ဘဲန် မှာယ် အန်။ အန် အုန် မီ ဒူအီ ဂိန် အီ ကွယ် ခဲင် ရဝ် ခဲင် ကာင်။

15 အန် ဘော မှေတ့် ဟာဝ် အာယေခေါနီ ဒီ မိူင် ဘာဘဲ။ ဘော မာ အန်၊ နာင် ဟောခမ်၊ အာမူ အာမာတ် ခုန်ဒီခမ် ဘော ဂေ ဒါ တာင် အီ အိုပ် မိူင် အန် ဘော ဒိုဝ်း လေး တူတ့် ဂေ ခဲင် မိူင် ယေရူဆာလဲမ်၊ ဝီ တဲး ဂေ ဟာဝ် ဒီ မိူင် ဘာဘဲ။ 16 ခုန်ဒီခမ် ဘာဘဲ ဘော မှေတ့် ဟာဝ် ဂေ ဒါ ဆိုက် ဘောကာဂ့လျီတ် အီ ကျ၊ အီ မိုဝ်း ပ့လူမ် ဘူ ဟြဲန့် ဝီ။ ဘော ဒူအီ အီ နပ် ဒီ စိုမ်၊ အီ လှဲဝ် ဒီ ဘူင် ဘဲန် မျုဝ် ဘဲန် မျုဝ် အူ ဟြဲန့် ဝီ။ အန် ဘော မှေတ့် ဟာဝ် ဂေ ဘောကာဂ့လျီတ် ဒီ မိူင် ဘာဘဲ။ 17 အန် ဘော ဝီ ဒိုဝ်း အာမာထာနီ အီ မုး ဂုန့် တဲ့ အာယေခေါနီ တွိုန်၊ တဲး အန် ဝီ ဘဲန် ခုန်ဒီခမ် ကာဒါင် အာယေခေါနီ။ အန် ဘော ကာပ့လု ဘော စိူဝ် အာမာထာနီ၊ ဝီ တဲး အန် စိူဝ် အာဇေဒေကီ။

18 အာဇေဒေကီ တွိုန်၊ ဒေါ ဘဲန် အန် ခုန်ဒီခမ်၊ အာဆာက် အန် ဟဲ့ ပွိုန် အာ ဂိုဝ် ဒီ အူ ဆီနမ်။ အန် ဘော အိုပ် ဘိုင် မိူင်၊ ကွယ် ခဲင် မိူင် ယေရူဆာလဲမ် အာဒါ ဂိုဝ် ဒီ အူ ဆီနမ်။ မာ အန် စိူဝ် နာင် ရာမူထာတ် အီ မုး ဂွန် အာယေရေမီ၊ အီ ကွယ် မိူင် လီပါနာ။

19 အန် ဘူင် နာ တူ မွှိုမ် ပီ တူ အိုင် ဇဝ်ဖြာ၊ တဲး န့ ပီ ပီ ဘူင် အာယောယာခိမ် တွိုန်။ 20 ကူပ် န့ ပါယ် တီ ဇဝ်ဖြာ ဘော ရူ ကာဆဝ် ဒီ ဂေ ဒူအီ အီ ကွယ် ခဲင် မိူင် ယေရူဆာလဲမ် ဘော ခဲင် မိူင် ယူဒါ။ အန် ဘော ဘ့လေး ဝဲန် ဂေ၊ တူ ယွတ် တူ မဲန် ဂေ။

ဝါယ် အန် တီ အာဇေဒေကီ အာဝ် ဟူ ယုဝ် ခုန်ဒီခမ် အီ အိုပ် မိူင် ဘာဘဲ တွိုန်။