1 ဝါယ် အန် တီ ခုန်ဒီခမ် ဘော စ်ု ဂေ ဒဲ့ အီ မုး ဒါ တာင် ခဲင် ကာဒါယ် မိူင် ယူဒါ ဘော ခဲင် မိူင် ယေရူဆာလဲမ်၊ တဲး ဂေ တး ကာဇု။ 2 အန် ဘော ဟုဝ့် ခဲင် ဟုဝ် ဇဝ်ဖြာ၊ ဒဲ့ ဘော ဂေ ဒူအီ အာယူဒါ ဘောကာဂ့လျီတ် ဘော ဒူအီ ခဲင် မိူင် ယေရူဆာလဲမ် ဘောကာဂ့လျီတ် ဘော ဒူအီ လှူ ဒီ ဇဝ်ဖြာ ဘော ဒူအီ ဘျာန် ဂြုဝ်း ဇဝ်ဖြာ ဘော တျီ့ ဘော တာင်၊ တဲး ဂေ ဒူပ် အန်။ ဂေ ဘော ဒိုဝ်း ဘော ဘပ် ပီ ယိုဝ် ဂေ ခဲင် ဟုဝ် ဇဝ်ဖြာ၊ တိး တဲး ဂေ ပွိုန် ဒီ ထူမ် ဒွန် အီ။ 3 ခုန်ဒီခမ် ဘော စွင့် ခူပ် ရွင့် ဆာခိုဝ်၊ ဝီ ကာဆဲန့် ဒီ ဇဝ်ဖြာ ပီ ဒွိုမ် ကာဆဲန့် ဂုန့် ဒင် အန်။ အန် တဝ်း ဒီ ဒူပ် ဆီချာ ဇဝ်ဖြာ၊ တဝ်း ဒီ ဒူပ် ဆီချာ ဒါရာ ဇဝ်ဖြာ ဘော ခတ် နဝ်း ခတ် ဖွိုမ် အန်။ ခဲ့ ပီ စ်ု ဇဝ်ဖြာ အီ ဘူင်၊ ခဲ့ မိုဝ်း အာကျာမ် အာငျာန် ဇဝ်ဖြာ၊ အန် တဝ်း ဒီ ခမ် ဒီ ဘူင် တူတ့်၊ တဲး န့ ဒူပ် ခဲ့ ပီ ဒဲမ် အုန် ခဲင် ဘပ် နီ။ ဂေ ဒူအီ အီ ကွယ် ဒူပ် အန်၊ ဂေ ဘော ဆာခိုဝ် ပါယ် တီ။ 4 ဝါယ် တီ၊ ခုန်ဒီခမ် ဝီ စ်ု ဒါ တာင် လှူ ဒီ ဇဝ်ဖြာ အီ စိူဝ် အာဟီလာခီ ဘော ဂေ အီ ဘဲန် ဒူအီ လှူ ဒီ ဇဝ်ဖြာ အီ ကွယ် ခြိုမ် အန် ဘော ဂေ အီ ဘ်ု မာလုဝ်း၊ တဲး ဂေ ဒိုဝ်း လေး န့ကြိုဝ်း ပီ တာ ဂေ ဒေါ ကြိုပ် ဂေ ဇဝ် ဘာလ ဘော နာင် ကာနမ် အေဆူရာ၊ တဲး ဂေ ဒိုဝ်း ဘော ခြိုင် ပီ တာ ဂေ ဒေါ ကြိုပ် ဂေ ဒွန် မျုဝ် အီ မိုဝ်း ပွုန် ခဲင် ဘ့လေန့်။ ဂေ ဘော ဒိုဝ်း လေး တူတ့် ဇိုဝ် တီ အီ ကွယ် ခဲင် ဟုဝ် ဇဝ်ဖြာ တွိုန်၊ ဘော ဝီ ဟာဝ် ဒုဝ့် ဝဲန် နာ ရေတ့် မိူင် ယေရူဆာလဲမ် ဒီ ခူပ် ဒီလယ့် ဘ့လဲင် ခီဒါရူန်။ ဘြဝ် အန်၊ ဂေ ဘော ဝီ ဒိုဝ်း ဟာဝ် ဒီ မိူင် ဘေဒါအေန်။ 5 ခုန်ဒီခမ် အာယုဝ်ဆီယာ ဘော ဘ့လွာ့ ဝဲန် ဘော ဂေ အီ မုး ဒူအီ လှူ ဒီ ဇဝ် ဘဲန် မျုဝ် ဘဲန် မျုဝ် ပဲ့ ဟဲ့ ဒါင် ခုန်ဒီခမ် ယူဒါ၊ တဲး ဂေ ဒုဝ့် ဆီနမ် အုး ငှုန် ဒီ ဒူင် စာ အီ ကွယ် ခဲင် မိူင် ဒွန် မိူင် ခဲင် ကာဒါယ် မိူင် ယူဒါ ဘော အီ ကာတတ် မိူင် ယေရူဆာလဲမ်။ အန် ဘော ဘ့လွာ့ ဝဲန် ဂေ အီ လှူ ဆီနမ် အုး ငှုန် ဒီ ဇဝ် ဘာလ။ ဘော ဂေ အီ ကြိုပ် ဆီငဲ၊ ဆီမန့် ဘော မာဂျီန်၊ ဂေ အီ ကြိုပ် ဘိုင် အီ ကွယ် ခဲင် ဘ့လေန့် ဒွန် မျုဝ်၊ အန် ဘော ဘ့လွာ့ ဝဲန် တူတ့်။

6 အန် ဘော ဒိုဝ်း လေး ကန်ထွန် ဒူင် ကြိုပ် ဂေ နာင် ကာနမ် အေဆူရာ အီ ကွယ် ခဲင် ဟုဝ် ဇဝ်ဖြာ၊ ဝီ ဟာဝ် ဝဲန် နာ ရေတ့် မိူင် ယေရူဆာလဲမ် အီ မုး ခူပ် ဘ့လဲင် ခီဒါရူန်၊ ဘော ဒိုဝ်း ငဝ် ဒုဝ့်၊ တဲး န့ ကာဆိုမ် ဒီ တီ။ အန် ဘော ဝီ ဒုး န့ကြိုဝ်း တီ တဲး န့ ကာမုန်၊ ဝီ ဒိုဝ်း ကာမုန် အန် တီ၊ ဘြတ် ဒဲင် ဘာရေဝ် ဒူအီ ကိူန်။

7 အန် ဘော ပျာတ့် ဝဲန် ကာင် ဂေ အီမာယ် အီ လာယ် လုတ့် လာယ် လာယ် ခဲင် ဟုဝ် ဇဝ်ဖြာ။ ဘော ဒူင် ဒဝ့် ဂေ အီဘိုန့် ဒီ ဂ့လာင် အာဒါ နာင် ကာနမ် အေဆူရာ တွိုန်။

8 အန် ဘော ဒဲ့ ခဲ့ ကွယ် ဒူအီ လှူ ဒီ ဇဝ်ဖြာ ခဲင် မိူင် ယူဒါ ဘော မိူင်၊ တဲး ဂေ တး ဒီ အန်။ ဟဲ့ ဟွတ့်၊ အန် ဝီ ကာဒါတ့် ဒူင် စာ၊ စုး ဒီ မိူင် ဂီဘာ ကော ဇမ် ဒီ မိူင် ဘီရာဆေဘာ အီ မုး ဒူင် ပဲ့ ဟဲ့ ဒုဝ့် ဂေ ဆီနမ် အုး ငှုန်။ အန် ဘော ပျာတ့် ဝဲန် ဘော ဒူင် စာ အီ ကွယ် ဒီ မာလုဝ်း မိူင် အီ စိူဝ် မာလုဝ်း မိူင် အာယုဝ်ဆူ၊ အီ မုး ဒါ တာင် အိုပ် မိူင် ယေရူဆာလဲမ်၊ အီ ကွယ် ဘ့လာက် အာဂ မာလုဝ်း မိူင် တွိုန်။

9 ဂေ ဒူအီ အီ ဒွိုမ် လှူ ဒီ ဒူင် စာ အာဝ် ဟူ ပွိုန် ဒီ လှူ ဒီ ဇဝ် ခဲင် မိူင် ယေရူဆာလဲမ်။ ဂေ ယီ ပွိုန် ဒီ ဟူမ် ခါမုန် အီ တူ မိုဝ်း ဆီနမ် ဘြး ဒူပ် ဖိုင် ဂေ အီ လှူ ဒီ ဇဝ်ဖြာ။

10 အာယုဝ်ဆီယာ ဘော ပျာတ့် ဒူင် အီ စိူဝ် တောဖေတ် အီ ကွယ် ဒူပ် ဒီလယ့် အီ စိူဝ် ဒီလယ့် ဘေန်ဟီနုမ် တွိုန်။ အန် ပျာတ့် ဒူင် တီ၊ ကွဲ့ တဲး အာဆေ ပွိုန် ဒီ လှူ ဂွန် အီဘိုန့် ဂွန် အီမာယ် အန် ဒီ ဇဝ် မူလွက့်၊ ဒုဝ့် ကာဆိုမ် ခဲင် ငဝ်။

11 အန် ဘော ဝဲန် မင်ပြွင့် ပီ လှူ ခုန်ဒီခမ် ယူဒါ ဒီ ဆီငဲ။ ဂေ ကွယ် ဘာင် မာလုဝ်း ဟုဝ် ဇဝ်ဖြာ၊ အီ ကွယ် ကာတတ် ကာင် အာနာထာန်မေလေက် အီ မုး ဒါ တာင် အီ ဘ်ု ဟုဝ် ခုန်ဒီခမ်။ အန် ဘော ဒိုဝ်း လက်လဝ် ဂေ တီ၊ ဘော ဒုဝ့် ကာဆိုမ် ခဲင် ငဝ်။

12 ကာစှူင့် လှူ ပီ ဒွိုမ် ဘူင် အုန် ခုန်ဒီခမ် ယူဒါ အီ ကွယ် ခဲင် ဟုဝ် ခုန်ဒီခမ် ဒီ ခြွင့် နာ ဒဲင် ပဲ့ ဟဲ့ ဒွိုမ် ဘူင် ခုန်ဒီခမ် အာခါတ် ဘော ကာစှူင့် ပီ ဘူင် အာမာနာဆေ အီ ကွယ် ခဲင် ဝဲင် ဟုဝ် ဇဝ်ဖြာ အာ ပ့လုဝ့် တွိုန်၊ ခုန်ဒီခမ် ဘော ပျာတ့် ဝဲန် ဘော မး၊ တဲး န့ ကာလာတ့် ကာမုန် တူတ့်။ အန် ဘော ဝီ ဒိုဝ်း ကာမွတ့် အန် တီ၊ ဟာဝ် ဝဲန် ခဲင် ဘ့လဲင် ခီဒါရူန် တွိုန်။

13 ခုန်ဒီခမ် တွိုန် ဘော ပျာတ့် ဝဲန် ဘော ကာစှူင့် ဂေ အီ ကွယ် နာ လေး ဆီငဲ မိူင် ယေရူဆာလဲမ်၊ အီ ကွယ် နာ တေတ့် နွန် အီ စိူဝ် နွန် ကာပျာတ့်။ ကာစှူင့် တီ အာဆာလုဝ်မုဝ် အီ မုး ခုန်ဒီခမ် ဒူအီ အီဆာရေလ၊ အန် ဟဲ့ ဘူင် တဲး ဂေ ပွိုန် ဒီ ကြိုပ် နာင် ကာနမ် အေဆာထာရိတ် အီ မွှိုမ် ကာအိး၊ ပီ ကြိုပ် ဒူအီ အာမျုဝ် ဆီဒူန်။ အန် ဟဲ့ ဘူင် ကာစှူင့် တီ ဘော အာဒါ ဇဝ် ခေမုက် အီ မွှိုမ် ကာအိး၊ ပီ ကြိုပ် ဒူအီ မုဝ်အာပ် ဘော အာဒါ ဇဝ် မူလွက့်၊ ပီ ကြိုပ် ဒူအီ အမ်မူန် အီ မွှိုမ် ကာအိး တွိုန်။ ခုန်ဒီခမ် အာယုဝ်ဆီယာ ဘော ဝဲန် ကာစှူင့် တီ ဒွန် ဘူင့်။ 14 အန် ဘော မး ဘော ဝဲန် အာရိုပ် ရာင် ပီ ကြိုပ် ဂေ၊ ဘော ဂ်ု ဝဲန် ဘော ကန်ထွန် ပီ ကြိုပ် ဂေ နာင် ကာနမ် အေဆူရာ တွိုန်။ အန် ဘော ဝီ ဒိုဝ်း ကာအာင် ဒူအီ ယမ် ဘ့လေး၊ တဲး န့ ကော နုဝ့် ဒူင် တီ။

15 ဒဲင် တီ ဘော ကာစှူင့် အီ ကွယ် ဒီ မိူင် ဘေဒါအေန် ဘော ကာစှူင့် ပီ ဘူင် အာယေရုဝ်ဘုဝ် အီ မုး ဂွန် အာနေဘတ်၊ အီ ဟဲ့ တဲး ဘော ဒူအီ အီဆာရေလ ကာလိုပ် ဒူပ် အန်၊ ခုန်ဒီခမ် အာယုဝ်ဆီယာ ဘော ပျာတ့် ဝဲန် တူတ့် ဒွန် မျုဝ် ကာစှူင့် ဂေ တီ။ အန် ဘော ဒိုဝ်း ဒုဝ့် ဘော မး တဲး န့ ကာလာတ့် တူတ့်။ ဘော ကန်ထွန် ပီ ကြိုပ် ဂေ နာင် ကာနမ် အေဆူရာ တွိုန် မိူဝ်၊ အန် ဘော ဒုဝ့်၊ တဲး န့ ကာဆိုမ် တူတ့်။ 16 အာယုဝ်ဆီယာ တွိုန် ဟဲ့ ဟွတ့် ဘူင် ဇိုဝ် တီ ဒွန် မျုဝ်၊ အန် ဘော ဝီ ယွတ် ဒွန် ပ့လုဝ့်။ အန် ဘော ယိုဝ် ကာဒဝ် ဘာရေဝ် အီ ကွယ် ဒဲင် နွန်၊ အန် ဘော စ်ု ဂေ ဒိုဝ်း လေး ကာအာင် ဒူအီ ယမ် ခဲင် ကာဒဝ် ဘာရေဝ် တီ၊ ဝီ ဝေန့် ဒုဝ့် ဒဲင် ကာစှူင့် ကြိုပ် ဂေ ဇဝ် ကာနမ် တွိုန်၊ တဲး န့ ဝီ ကာဒါတ့်၊ တဲး န့ ဒူပ် ပီ ဒဲမ် ခဲင် ဘပ် ဇဝ်ဖြာ ပဲ့ ဟဲ့ ဒွိုမ် ကာလာင် ဒူအီ ပီ တိုယ် ဇဝ်ဖြာ။

17 ပန် တီ အန် ဝီ ဒီမွှတ် တဝ်း၊ “မာဝ် ပီ ယိုဝ် အုဝ်၊ အီ ကွယ် ဒီ ဘာရေဝ်၊ န့ မုး မာဆေ။း” ဂေ ဒူအီ ခဲင် မိူင် တွိုန် ဝီ တဝ်း၊ “န့ မုး မာဝ် ပီ ဘ့လေး ဂေ ဒီ ဘာရေဝ် ဒူအီ တွိုန်၊ အီ မုး ဒူအီ ပီ တိုယ် ဇဝ်ဖြာ၊ အီ တး မိူင် ယူဒါ။ အန် ဟဲ့ ဒွိုမ် တး ကာလာင် တူတ့် ဒွန် မျုဝ် ပဲ့ ဟဲ့ ဘူင် မဲ ဒေါ တီ နီ ဒီ ကာစှူင့် လှူ အီ ကွယ် ဒီ မိူင် ဘေဒါအေန် တွိုန်။”

18 အန် ဝီ တဝ်း၊ “တဲး န့ ကွယ် ပါယ် တီ။ အာဝ် လုဝ် ဒိုဝ်း ကာအာင် အန်။ ခုဝ်၊ ဂေ တူ ဘူင် မာဆေ ဒီ ကာအာင် ဒူအီ တီ ဘော ဒီ ကာအာင် ဒူအီ ဘျာန် ဂြုဝ်း ဇဝ်ဖြာ အီ တး မိူင် ဆာမာရီ။

19 ခဲ့ ကွယ် ဟုဝ် ဂေ ဒူင် စာ ခဲင် မိူင် ဆာမာရီ အီ မုး ပီ ဘူင် ခုန်ဒီခမ် အီဆာရေလ၊ အီ တဲး ဇဝ်ဖြာ ရူ ဒီ ဂေ၊ ခုန်ဒီခမ် အာယုဝ်ဆီယာ ဟဲ့ ဟွတ့် ပျာတ့် ဝဲန် တူတ့်၊ တဲး န့ ပီ ပီ ပျာတ့် အန် ကာစှူင့် ခဲင် မိူင် ဘေဒါအေန် တွိုန်။

20 ဂေ ဒူအီ အီ လှူ ဒီ ဒူင် စာ တွိုန်၊ အန် ဘော ငဝ်း ယမ် ဂေ ဒဲင် ကာစှူင့် လှူ ဂေ တီ။ အန် ဘော ဒိုဝ်း ကာအာင် ဒူအီ ယမ် ဝီ ဒုဝ့် ဒဲင် ကာစှူင့် တီ။ ဟဲ့ ဟွတ့်၊ အန် ဘော ဝီ ဝေန့် ခဲင် မိူင် ယေရူဆာလဲမ်။”

21 ပန် တီ ခုန်ဒီခမ် ဝီ စ်ု ဂေ ဒူအီ ဒွန် အီ တဝ်း၊ “တဲး အေ ဘူင် ဘ့လွယ် လှုဝ်း အေ ဇဝ်ဖြာ ဒေါ ကာလုဝ်း အန် ကာင် အေ။ အန် မုး ဇဝ်ဖြာ ပီ ကြိုပ် အေ။ တဲး အေ ဒူပ် ခဲ့ ပီ ဒဲမ် ခဲင် ဘပ် ဇဝ်ဖြာ နီ၊ အီ မုး ဘပ် လွင် လာယ် ကာဆဲန့် ဇဝ်ဖြာ ဒီ အေ။” 22 ဆိန့် ဒေါ မုး ဘာန် ဒါ တာင် အီ ဆုင်ဖျာတ် ဒါရာ ဒီ ဒူအီ အီဆာရေလ ကော ဇမ် အာခြာဝ် ဂေ ခုန်ဒီခမ် ယူဒါ၊ ဒေါ ဟဲ့ အိုပ် ဂေ ဘဲန် ဝီ ဘဲန် ဝီ မိူင် တီ၊ ဂေ ဟူ ဘူင် ဘ့လွယ် တီ ခေါ အူ ဇေန့်။ 23 ယီ ဇမ် ဆီနမ် ဒေါ အိုပ် ခုန်ဒီခမ် အာယုဝ်ဆီယာ မိူင် အာဒါ ဂိုဝ် ဒီ ဒါ ဆီနမ်၊ ဂေ ဘော ဝီ ဘူင် ဘ့လွယ် တီ ခဲင် မိူင် ယေရူဆာလဲမ်။ ဂေ ဘော ဝီ လှုဝ်း ဇဝ်ဖြာ ဒေါ ကာလုဝ်း အန် ကာင် ဂေ။

24 ဒဲင် တီ၊ ခုန်ဒီခမ် အာယုဝ်ဆီယာ ငဝ်း ဝဲန် ယာ ပြေ ဘော ဂေ အီ ဘိုင် ကာနမ်။ အန် ဘော ပျာတ့် ဝဲန် အာရိုပ် ရာင် ပီ ဘ့လေး အုန် ဒူအီ ခဲင် ကာင် ဂေ အီ ဟဲ့ မွှိုမ် ကာအိး၊ အီ ကွယ် ခဲင် မိူင် ယူဒါ ဂါယ် မိူင် ယေရူဆာလဲမ်။ အန် ဘူင် ပါယ် တီ တဲး အန် ဒူပ် ဒါရာ ပီ ဒဲမ် အုန် ခဲင် ဘပ် တွိုန် အီ ကွယ် ခဲင် ဟုဝ် ဇဝ်ဖြာ။ န့ မုး ဘပ် ပီ ယိုဝ် ဒူအီ အီ လှူ ဒီ ဇဝ်ဖြာ အီ စိူဝ် အာဟီလာခီ။ 25 အာတ့် ဘဲန် အာယုဝ်ဆီယာ ခုန်ဒီခမ်၊ အာဝ် မိုဝ်း ခုန်ဒီခမ် အီ ပီ အန်။ ဝါယ် အန် တီ မိူဝ်၊ အာဝ် မိုဝ်း အီ ပီ အန်၊ အီ ဒူပ် ဆီချာ ပီ တဝ်း ဇဝ်ဖြာ၊ အီ ဟဲ့ ခတ် ဘော နဝ်း ဘော ဖွိုမ် ဘော ဒုဝ် ဘော ဟဲန့်၊ ဘူင် ဒူပ် ပီ အိုင် ဇဝ်ဖြာ၊ ဒူပ် ဒါရာ အာမုဝ်ဆဲ ဒွန် မျုဝ်။

26 မာလဲ၊ နဝ်း ရူ ကာဆဝ် ဇဝ်ဖြာ ယီ တူ ဟြာယ်။ အန် ဇဝ် ရူ ကာဆဝ် ဒီ ဂေ ဒူအီ အာယူဒါ ကူပ် မှာပ် ပဲ့ ဟဲ့ ဘူင် အာမာနာဆေ အီ တဲး ဇဝ်ဖြာ ရူ ဒီ ဂေ။ 27 ခုဝ်၊ ဇဝ်ဖြာ ဟဲ့ တဝ်း၊ “အုဝ် ဒီ ဝဲန် ဒူအီ အာယူဒါ၊ ကွဲ့ တဲး အုဝ် ဆီ ယိုဝ်၊ တဲး န့ ပီ ဒေါ ဝဲန် အုဝ် ဒူအီ အီဆာရေလ တွိုန်။ အုဝ် ဒီ ဝဲန် ယေရူဆာလဲမ် အီ မုး မိူင် ပဲ့ ဟဲ့ ရဝ်း အုဝ်။ အုဝ် ဒီ ဝဲန် ဘော ဟုဝ် နီ၊ ပဲ့ ဟဲ့ တဝ်း အုဝ်၊ အုဝ် ဒီ ကွယ် ဒီ တီ ဆေဆေ။”

28 လွင် ပီ ဘူင် အာယုဝ်ဆီယာ အီ ညှမ် ဒွိုမ် ကာလာင်၊ ဘော လွင် ပဲ့ ဟဲ့ ဘူင် အန် ဒွန် မျုဝ်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် ယူဒါ။ 29 ဒေါ မုး စုဝ် အာယုဝ်ဆီယာ၊ ခုန်ဒီခမ် ဖာရုဝ် အာနေခေါ အီ အိုပ် မိူင် အဲဂိုပ်၊ အန် ဘော တး ဒူင် ကွယ် ခုန်ဒီခမ် အာဆူရာ ဒီ ဘ့လဲင် အိုမ် အူဖာရာတ်။ ခုန်ဒီခမ် အာယုဝ်ဆီယာ ဘော ဟာဝ် ရဲ န့တေန့် ဂေ။ ဒေါ လာယ် ကာဂုဝ်း ဂေ၊ ခုန်ဒီခမ် ဖာရုဝ် အာနေခေါ ဘော ငဝ်း ယမ် အန် ဒီ မိူင် မီကီတော။ 30 ဂေ ဒဲစေန့် အန် ဘော ဒိုဝ်း ဒုဝ် အန် ဒီ မိူင် မီကီတော တီ၊ ဝီ ဒါင် ဒဲင် လက်လဝ် ဝေန့် ဒီ မိူင် ယေရူဆာလဲမ်၊ ဝေန့် ဒိပ် အန် ခဲင် ဘာရေဝ် အန်။ ဂေ ဒူအီ ခဲင် မိူင် ခဲင် ရဝ်၊ ဂေ ဘော ဝီ ကာဖြူမ် ဒီ ဒိုဝ်း ဂွန် အီမာယ် အန် အီ စိူဝ် အာယုဝ်ခတ် ဝီ ဖဝ်း နာမန် ဒီ ဂိန့် အန်၊ တဲး အန် ဘဲန် ခုန်ဒီခမ် အီ အိုပ် ဂေ ကာဒါင် ဂုန့် အန်။

31 အာယုဝ်ခတ် တီ၊ ဒေါ ဘဲန် အန် ခုန်ဒီခမ်၊ အာဆာက် အန် ဟဲ့ ပွိုန် အာ ဂိုဝ် ဒီ ဖွုန် ဆီနမ်။ အန် ဘော အိုပ် မိူင်၊ ကွယ် ခဲင် မိူင် ယေရူဆာလဲမ် အာဒါ အူယ် မာဂျီန်။ မာ အန် စိူဝ် နာင် ရာမူထာတ်၊ အီ မုး ဂွန် အာယေရေမီ။ အန် တး မိူင် လီပါနာ။ 32 အာယုဝ်ခတ် တွိုန် ဘူင် အီ တူ ဘွတ် အီ တူ မွှိုမ် ပီ တူ အိုင် ဇဝ်ဖြာ။ န့ ပီ ပီ ဘူင် ဒါ ဒါ အန်။ 33 ခုန်ဒီခမ် ဖာရုဝ် အာနေခေါ ဘော မှေတ့် အာယုဝ်ခတ်၊ ဘော ပက် အန်၊ တဲး အန် ကွယ် ခဲင် မိူင် ရီဘာလာဟာမာတ်၊ တူ တဲး အန် ကွယ် ခဲင် ဟုဝ် အန် ဒီ မိူင် ယေရူဆာလဲမ်။ အန် ဘော ဂဲပ် ရွိုန် စိုင် ဒီ ဒူအီ ခဲင် မိူင် ယူဒါ တီ။ ရွိုန် အူ မာယဝ်း ထာလေန် ဘော ခြိဝ် အူ ထာလေန် ဂေ လုဝ် ဟပ်။^a 34 ခုန်ဒီခမ် ဖာရုဝ် အာနေခေါ တွိုန် ဘော ဝီ ဒိုဝ်း အာယေဟုဝ်ျာခိမ် အီ မုး ဂွန် အာယုဝ်ဆီယာ တွိုန်၊ တဲး အန် ဝီ ဘဲန် ခုန်ဒီခမ် ကာဒါင် ဂုန့် အန်။ အန် ဝီ တဲး စိူဝ် ကာမာယ် ဒီ အာအေယာခိမ်၊ တဝ်း အန် စိူဝ် အာယောယာခိမ်။ အီ မုး အာယုဝ်ခတ် တွိုန်၊ ခုန်ဒီခမ် ဖာရုဝ် အာနေခေါ ဘော ဒိုဝ်း ဟာဝ် အန် ဒီ မိူင် အဲဂိုပ်၊ တဲး အန် ကော ယမ် ဒီ တီ။ 35 အာယေဟုဝ်ျာခိမ် ဘော ဂဲပ် ရွိုန် ဂေ ခြိဝ် ခဲင် မိူင် ယူဒါ ဘော မိူင်၊ ဟပ် ရွိုန် စိုင် ပီ စ်ု ခုန်ဒီခမ် ဖာရုဝ် အာနေခေါ ဂေ ဟပ်။ အန် ဘော မှာန့်၊ တဲး ဒူအီ ခဲင် ရဝ် ခဲင် မိူင် ဟပ် ဒွန် အီ ခဲ့ မိုဝ်း ဂေ။

36 အာယေဟုဝ်ျာခိမ် တွိုန် ဘဲန် ခုန်ဒီခမ် ဒေါ ဟဲ့ နုဝ့် အာဆာက် အန် အာ ဂိုဝ် ဒီ ဖန် ဆီနမ်။ အန် ဘော အိုပ် မိူင်၊ ကွယ် ခဲင် မိူင် ယေရူဆာလဲမ် ဂိုဝ် ဒီ အူ ဆီနမ်။ မာ အန် စိူဝ် နာင် ဆေဘူဒါ အီ မုး ဂွန် အာဘေတာယာ၊ အီ တး မိူင် ဒူမာ။

37 အာယောယာခိမ် ဘူင် မှာပ် ပီ တူ အိုင် ဇဝ်ဖြာ၊ တဲး န့ ပီ ပီ ဒွိုမ် ဘူင် ဒါ ဒါ အန်။