1 အာယုဝ်ဆီယာ ဟဲ့ ဘဲန် ခုန်ဒီခမ် ဒေါ အာဆာက် အန် ပွိုန် ဒါ ဆီနမ်။ အန် ဘော အိုပ် ဘိုင် မိူင်၊ ကွယ် ခဲင် မိူင် ယေရူဆာလဲမ် အာဒါ အူယ် ဂိုဝ် ဒီ အူ ဆီနမ်။ မာ အန် စိူဝ် နာင် ယီတီတ အီ မုး ဂွန် အာတာယာ၊ အီ တး ခဲင် မိူင် ပေါစာကာတ်။ 2 အန် ဘော ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ အန် ဘူင် ဒူပ် ပီ ပါယ် ဒါ အန် ဒီ ဘူင် အီ စိူဝ် အာဒါဝိတ်။ အန် ဒူပ် ဆီချာ၊ တူ ဝး၊ တူ ဘ့လိူင် မာဆေ။

3 အာယုဝ်ဆီယာ ဟဲ့ ဘဲန် ခုန်ဒီခမ် အာဒါ ဂိုဝ် ဒီ ဒါ ဆီနမ်၊ အန် ဘော စ်ု ဒါ စာရေ အန် ဟာဝ် ဒူင် ကွယ် ဟုဝ် ဇဝ်ဖြာ။ ဒါ စာရေ တီ၊ အန် စိူဝ် အာဆာဖာန်။ အန် မုး ဂွန် အာစာစီ၊ အီ ဝီ မုး ဂွန် အာမေဆူလမ်။ ခုန်ဒီခမ် ဘော တဝ်း ဒီ ဒါ စာရေ အန်၊ 4 “တဲး မဲ ဟုဝ့် ဒူင် ကွယ် ဒါ တာင် လှူ ဒီ ဇဝ်ဖြာ အီ စိူဝ် အာဟီလာခီ၊ တဲး အန် ဒိုဝ်း တိး ရွိုန် အီ ကွယ် ခဲင် ဟုဝ် ဇဝ်ဖြာ ပီ ဂဲပ် ဒါ အီ ဘ်ု မာလုဝ်း ဒီ ဒူအီ ကိူန် တွိုန်။ 5 တဲး မဲ ဝီ ဒွါ ဒီ ဂေ အီ အိုပ် ဒူအီ အီ ဘူင် ဂါန် ခဲင် ဟုဝ် ဇဝ်ဖြာ။ တဲး ဂေ ဝီ ကာဆာင် ရွိုန် တီ ဒီ ဂေ အီ ဘူင် ဂါန် ခဲင် ဟုဝ် ဇဝ်ဖြာ တီ၊ တဲး ဂေ မ့ပြာယ် ဒူင် ဟဲ့ လိုဝ် ဟဲ့ ကာပျာတ့်။ 6 တဲး ဂေ ဇာင် ဒူအီ အီ ဘဲန် လက်ဆာမာ၊ ဂေ အီ ဂုဝ် မာဝ် ဘော ဂေ အီ ဒဝ်း မာဝ်။ တဲး ဂေ စိုဝ်း ဟေ ဂေ ဘဲန် ဘော မာဝ် အီ ဟဲ့ ဟွတ့် ဒဝ်း၊ တဲး ဂေ မ့ပြာယ် ဟုဝ် ဇဝ်ဖြာ တီ။ 7 ဂေ ဒူအီ အီ အိုပ် ဒူအီ ဘူင် ဂါန်၊ ဂေ ယီ တူ လုဝ် ဒဲမ် ဒိုဝ်း ဇာရာင် ရွိုန်။ ဒွန် အီ ဘော မိုဝ်း နဝ်း ဆိူဝ်၊ တူ ပြာ၊ တူ ဒိုဝ်း မာဆေ။”

8 ဒါ တာင် အီ လှူ ဒီ ဇဝ်ဖြာ အီ စိူဝ် အာဟီလာခီ၊ အန် ဝီ တဝ်း ဒီ ဒါ စာရေ အီ စိူဝ် အာဆာဖာန်၊ “အုဝ် ဟဲ့ ယိုဝ် ဘပ် ဒါရာ ဇဝ်ဖြာ အူ ဖိူန် ခဲင် ဟုဝ် ဇဝ်ဖြာ။” အန် ဘော ဒွါ တဲး အာဆာဖာန် တိး။ အန် မိူဝ် ဘော တိး။ 9 ပန် တီ အာဆာဖာန် ဘော ဝီ ဟာဝ် ဒူင် ကွယ် ခုန်ဒီခမ် တဝ်း ဒီ အန်၊ “အုဝ် ဟဲ့ ဟွတ့် ဒိုဝ်း လေး ရွိုန် ခဲ့ ပီ ယိုဝ် အုဝ် ခဲင် ဟုဝ် ဇဝ်ဖြာ။ အုဝ် ဟဲ့ ဝီ အာပ် ဒွါ ဒီ ဂေ ဒါ အီ အိုပ် ဒူအီ အီ ဘူင် ဂါန် ခဲင် ဟုဝ် ဇဝ်ဖြာ။” 10 ဟဲ့ ဟွတ့်၊ အန် ပီ ဝီ တဝ်း ဒီ ခုန်ဒီခမ်၊ “အာဟီလာခီ အီ မုး ဒါ တာင် လှူ ဒီ ဇဝ်ဖြာ၊ အန် ဟဲ့ တိုယ် တး ဘော ဘပ် ဒီ အုဝ်။” အန် ဘော တိး တဲး ခုန်ဒီခမ် ထူမ်။

11 ခုန်ဒီခမ် ဘော ယိုဝ် ပီ တဝ်း ခဲင် ဘပ် ဒါရာ တီ၊ အန် ဝီ ကာယာတ့် ခြိုင် ပီ တာ အန်။ 12 ပန် တီ ခုန်ဒီခမ် ဝီ ဒဲ့ ဒူအီ လှူ ဒီ ဇဝ်ဖြာ အီ စိူဝ် အာဟီလာခီ၊ အာဟီကမ် အီ မုး ဂွန် အာဆာဖာန်၊ အာဆာဘူတ် အီ မုး ဂွန် အာမီခါယာ၊ အာဆာဖာန် အီ မုး ဒါ စာရေ အန် ဘော အာဆာယာ အီ မုး ဒဲစေန့် ခုန်ဒီခမ်။ အန် ဝီ တဝ်း ဒီ ဂေ၊ 13 “တဲး ဘေ ဟာဝ် ဒီမွှတ် ဇဝ်ဖြာ လွင် ဂြုဝ်း ခဲင် ဘပ် ပဲ့ ဟဲ့ တိး အုဝ် တီ။ တဲး ဘော အုဝ် ဘော ဒူအီ ဒွန် အီ အီ မုး အာမျုဝ် ဒူအီ အာယူဒါ ကော နပ် န့ ဒီ ပါယ် မှဝ်။ ဂုန့် ဒင် အေ တူ တိး၊ တူ ထူမ် ပီ ဒဲမ် ခဲင် ဘပ် တီ။ ခုဝ်၊ မှာပ် အေ ဟဲ့ ကိူန်၊ တဲး ဇဝ်ဖြာ ရူ ကာဆဝ် ဒီ အေ ကူပ် တူ ဒူပ် အေ ဇဝ်ဖြာ၊ တဲး န့ ပီ ပီ ဒဲမ် အုန် ခဲင် ဘပ် တီ။”

14 ပန် တီ အာဟီလာခီ အီ မုး ဒူအီ လှူ ဒီ ဇဝ်ဖြာ၊ အာဟီကမ်၊ အာဆာဘူတ်၊ အာဆာဖာန် ဘော အာဆာယာ၊ ဂေ ဘော ဟာဝ် ဒူင် ကွယ် အီဘိုန့် အီ မုး ဒူအီ ဘျာန် ဂြုဝ်း ဇဝ်ဖြာ။ အန် စိူဝ် နာင် ဟုဝ်လာတာ။ အီမာယ် အန် စိူဝ် အာဆာလူမ် အီ ဘ်ု ခြိုင် တာ ခဲင် ဟုဝ် ဇဝ်ဖြာ။ အန် မုး ဂွန် အာတီကာဝါ။ အာတီကာဝါ တီ မုး ဂွန် အာဟာရာဟတ်။ နာင် ဟုဝ်လာတာ ကွယ် ခဲင် မိူင် ယေရူဆာလဲမ် ဒူင် ဆမ် ဂေ ကာင် ကာမာယ်။ ဂေ ဘော ဒီမွှတ် အီဘိုန့် တီ လွင် ဘပ် တွိုန်။

15 အန် ဝီ တဝ်း ဒီ ဂေ၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ တဝ်း၊ တဲး ဘေ ဝီ ဝေန့် ဒူင် ကွယ် ဒါ အီ စ်ု ဘေ တး ဒူင် ကွယ် အုဝ် နီ။ 16 တဲး ဘေ ဝီ ခဲ ဂြုဝ်း ဇဝ်ဖြာ တီ ဒီ အန်။ ဇဝ်ဖြာ ဟဲ့ တဝ်း၊ ‘အုဝ် ဒီ တဲး န့ မိုဝ်း ဒုက် တာင် ဒီ ဂေ ဒူအီ အီ ကွယ် ဒီ နီ၊ တဲး န့ ဘဲန် ဒွန် မျုဝ် ပဲ့ ဟဲ့ ဒဲမ် အုန် ခဲင် ဘပ် ပီ တိး ခုန်ဒီခမ် တီ။ 17 ခုဝ်၊ ဂေ ဟဲ့ ဝဲန် အုဝ်။ ဂေ ဟဲ့ ဝီ လှူ ပီ လှူ အီ ဒုဝ့် ဒီ ငဝ် ဘော လှူ အီ အုး ငှုန် ဒီ ဇဝ် ဘဲန် ကာဒင် ဘဲန် ကာဒင် ပီ ကြိုပ် အီ ဟဝ်။ ကူပ် ဘူင် ဂေ ပါယ် တီ န့ တဲး အုဝ် ရူ ကာဆဝ်၊ အာဝ် နပ် ဒီ ဟြာယ် ဒေါ မှဝ်။’ 18 ပါယ် တီ တဲး ဘေ ဝီ ဝေန့် ကာလာင် ဒီ ခုန်ဒီခမ် ယူဒါ အီ ဟဲ့ စ်ု ဘေ တး ဒီမွှတ် ဇဝ်ဖြာ။ တဲး ဘေ တဝ်း ဒီ အန်၊ ‘ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ကာလာင် ခဲ့ တီ လွင် ဘပ် ပဲ့ ဟဲ့ တိး မဲ တီ။ 19 မာလဲ ဇဝ်ဖြာ တဝ်း၊ အန် ဟဲ့ ယိုဝ် လွင် ဟဲ့ ဝီ ကာပ့လု မဲ နဝ်း မဲ။ မဲ ဟဲ့ ဝီ ပီတျီမ် နဝ်း မဲ၊ ဝီ ဂူမ် ဒီ အာတ့် ဇဝ်ဖြာ ဒေါ ဟဲ့ ယိုဝ် မဲ ဂြုဝ်း အန် အီ ဟဲ့ တဝ်း၊ အန် ဒီ ဒမ် မှာပ် ဒီ ဂေ ဒူအီ ခဲင် မိူင် နီ၊ လုဝ် ပျာတ့် ဝဲန် ဘော တဲး ဂေ ခမ် ဒိူင်။ မဲ ဟဲ့ ဝီ ကာယာတ့် ခြိုင် တာ မဲ၊ ယာမ် ဒီ အာတ့် အန် ဇဝ်။ အန် မိူဝ် ဟဲ့ ဟွတ့် ယိုဝ် ဂြုဝ်း မဲ တီ။

20 ကူပ် န့ ပါယ် တီ ဇဝ်ဖြာ ဒီ ဝီ တဲး မဲ ပီ ဒါ ဒါ မဲ ဂေ တွိုန်။ ဂေ ဒီ ပွိုန် ဒီ ဒိပ် မဲ ခဲင် ဘာရေဝ် ဒေါ ဆီ ဒါခိုယ်။ မဲ အာဝ် ဟူ လုဝ် ယိုဝ် ဒုက် ပီ တဝ်း ဇဝ်ဖြာ ဒီ ဘူင်။’” နာင် ဟုဝ်လာတာ ဟဲ့ ဟွတ့် ကာလာင် ဂြုဝ်း တီ၊ ဂေ ဘော ဝီ တး ကာလာင် ဒီ ခုန်ဒီခမ် ပါယ် တီ။