1 အာမာနာဆေ ဟဲ့ ဘဲန် ခုန်ဒီခမ် ဒေါ အာဆာက် အန် ဟဲ့ ပွိုန် ဂိုဝ် ဒီ အာ ဆီနမ်။ အန် ဘော အိုပ် ဘိုင် မိူင်၊ ကွယ် ခဲင် မိူင် ယေရူဆာလဲမ် အာဒါ ဖန် ဂိုဝ် ဒီ ဖန် ဆီနမ်။ မာ အန် စိူဝ် နာင် ဟီဆာဖာ။ 2 အန် ဘူင် မိူက်၊ ဘူင် အီ မွှိုမ် ကာအိး ပီ တူ အိုင် ဇဝ်ဖြာ။ အန် ဘူင် ပီ ဂေ ဒူအီ အာမျုဝ် ဟဝ်၊ အီ မုး ဒူအီ ပီ ဟုဝ် ဝဲန် ဇဝ်ဖြာ အာတ့် တး လိုပ် ဒူအီ အီဆာရေလ ခဲင် မိူင် ဂေ။

3 အန် ဝီ မ့ပြာယ် ဘူင် ကာစှူင့် စာ ပဲ့ ဟဲ့ ပျာတ့် ဝဲန် ဂုန့် အန်။ အန် ဘော ဝီ ဘူင် ကာစှူင့် လှူ ဒီ ဇဝ် ဘာလ ဘော ဘူင် ဘော ကန်ထွန် ဒီ ကြိုပ် နာင် ကာနမ် အေဆူရာ။ န့ ပီ ပီ ဘူင် အာဟပ် အီ မုး ခုန်ဒီခမ် ခဲင် မိူင် အီဆာရေလ တွိုန်။ အန် ဘော ဝီ ကြိုပ် ဘိုင် ဆီမန့် ဒွန် မျုဝ် အီ ကွယ် ခဲင် ဘ့လေန့်။ 4 ဇဝ်ဖြာ ဟဲ့ ဒွိုမ် တဝ်း၊ “အုဝ် ဒီ ကွယ် ခဲင် မိူင် ယေရူဆာလဲမ် ဆေဆေ။” ခုန်ဒီခမ် အာမာနာဆေ ယီ ဝီ ဘူင် ကာစှူင့် ဘဲန် မျုဝ် ဘဲန် မျုဝ်၊ ဘ့လေး ခဲင် ဟုဝ် ဇဝ်ဖြာ။ 5 ဘော ကာစှူင့် ဒီ ကြိုပ် ဆီမန့် ခဲင် ဘ့လေန့်၊ အန် ဘူင် ဘ့လေး ခဲင် ဝဲင် ဟုဝ် ဇဝ်ဖြာ ဘော အာ ပ့လုဝ့်။ 6 အန် ဘော ခမ် ဒီ ဒိုဝ်း ဂွန် အန်၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ အန် ဘော မဲန် ဘေဒါင် ဘော ဒါင် တဲး န့ မိုဝ်း ဒါ ဘူ မိူင် ဘော ဒီမွှတ် ယာ ကာနမ် လူင်။ အန် ဘော ဘူင် ကိူန် ကာဆဝ် အီ တူ ဘွတ် အီ တူ မွှိုမ် ပီ တူ အိုင် ဇဝ်ဖြာ၊ အီ တဲး ဇဝ်ဖြာ ဝီ ရူ ဒီ အန်။

7 အန် ဘော ဒိုဝ်း ကန်ထွန် ပီ ကြိုပ် အီ နာင် ကာနမ် အေဆူရာ ဝီ အုန် ခဲင် ဟုဝ် ဇဝ်ဖြာ။ ဇဝ်ဖြာ ဟဲ့ ဒွိုမ် တဝ်း ဒီ အာဒါဝိတ် ဂါယ် အာဆာလုဝ်မုဝ်၊ “အုဝ် ဒီ ကွယ် ခဲင် ဟုဝ် ဇဝ်ဖြာ အီ ကွယ် ခဲင် မိူင် ယေရူဆာလဲမ် နီ ဆေဆေ။ န့ မုး ဒူင် ပဲ့ ဟဲ့ ရဝ်း အုဝ် ခဲင် ဒူင် ကွယ် ဂေ ဒူအီ အီဆာရေလ ဒွန် နာ ဒွန် ပ့လုဝ့်။” 8 ဇဝ်ဖြာ မိူဝ် ဟဲ့ တဝ်း၊ “ဆေ ဒူအီ အီဆာရေလ ဘော ဘူင် ဒူပ် ဒါရာ ပီ ကာလာင် အုဝ် ဒီ ဒဲစေန့် အုဝ် အီ စိူဝ် အာမုဝ်ဆဲ တွိုန်၊ အုဝ် မိူဝ် တူ တဲး ဂေ ဒူအီ အီဆာရေလ ဝီ လေး ဟာဝ် တ မိူင် ပီ အာပ် အုဝ် ဒီ ဂုန့် ဒင် ဂေ တွိုန်။ 9 ဂေ ယီ တူ ထူမ်။ အာမာနာဆေ တွိုန် ဘော ဝဲ ယဲတ့် တဲး ဂေ ဘူင် မိူက် လွှိုမ် ဂေ ဒူအီ အာမျုဝ် ဟဝ်၊ အီ မုး ဒူအီ ပီ ဟုဝ် ဝဲန် ဇဝ်ဖြာ အာတ့် လိုပ် ဒူအီ အီဆာရေလ မိူင် ဂေ။”

10 ခုဝ်၊ ဇဝ်ဖြာ ဝီ ကာလာင် ဒီ ဒဲစေန့် အန် အီ မုး ဒါ အီ ဘျာန် ဂြုဝ်း ဇဝ်ဖြာ တဝ်း၊ 11 “အာမာနာဆေ အီ မုး ခုန်ဒီခမ် ဒူအီ အာယူဒါ၊ အန် ဟဲ့ ဘူင် မိူက်၊ ဟဲ့ ဘူင် အီ မွှိုမ် ကာအိး လွှိုမ် ပီ ဘူင် ဒူအီ အာမုဝ်ရိတ် အာတ့် နီ။ အန် ဟဲ့ ဘူင် တဲး ဘော ဂေ ဒူအီ အာယူဒါ ဝီ ကြိုပ် အာရိုပ် ရာင်၊ တဲး န့ ဘဲန် မှာပ် ဒီ ဂေ။”

12 ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ တဝ်း၊ “အုဝ် ဒီ တဲး ဒုက် တာင် ဒီ ဂေ ဒူအီ ခဲင် မိူင် ယေရူဆာလဲမ် ဘော ခဲင် မိူင် ယူဒါ တဲး ဂေ အီ ယိုဝ် ဒီ ထူမ် လွင် အန် တီ ဘဲန် ဟျုဝ့် ဂေ ကာအာဝ်။ 13 အုဝ် ဒီ ဘူင် ဒီ မိူင် ယေရူဆာလဲမ် ခဲ့ ပီ ဒွိုမ် ဘူင် အုဝ် ဒီ မိူင် ဆာမာရီ။ အုဝ် မိူဝ် ဒီ ဘူင် ဒီ လှုက်လှာန် ခုန်ဒီခမ် ယူဒါ ခဲ့ ပီ ဒွိုမ် ဘူင် အုဝ် ဒီ လှုက်လှာန် အာဟပ်၊ တဲး ကော ပီ ဒူအီ ခူတ့် ဆီလယ့်။ ဆေ ဟီ ဟွတ့် ခူတ့် ဘော ဝီ ဆာဂိုပ် အုန်၊ အာဝ် ဟူ မိုဝ်း မာဆေ နာ ခဲင်။ မိူင် ယေရူဆာလဲမ် ဘော ပီ ဆီလယ့် တီ။ အာဝ် ဟူ မိုဝ်း ဒူအီ အီ ဆီ ကွယ် ခဲင် မိူင်။ 14 အုဝ် ဒီ ဝဲန် ဂေ ဒူအီ ပဲ့ ဟဲ့ ရဝ်း အုဝ်၊ ဝီ အာပ် ဒီ ရန်ဆူ ဂေ။ ဂေ လုဝ် ခမ်၊ တဲး ရန်ဆူ ဂေ ဒိုဝ်း တူတ့် ကြုဝ်ကြာမ် ဂေ။ 15 ခုဝ်၊ ဆိန့် ဒေါ လေး ဂုန့် ဒင် ဂေ ခဲင် မိူင် အဲဂိုပ်၊ ကော ဝီ ဇမ် အာတိုဝ် နီ၊ ဂေ ဟဲ့ ဘူင် ပီ တူ အိုင် အုဝ် ဘဲန် စုဝ် ဘဲန် စုဝ်၊ တဲး အုဝ် ရူ။” ခဲ့ တီ ပီ တဝ်း ဇဝ်ဖြာ။

16 အာမာနာဆေ တွိုန်၊ ဒဲင် ဟဲ့ ဘူင် အန် မှာပ် ဒွန် မျုဝ် ပီ တူ အိုင် ဇဝ်ဖြာ၊ အန် ပီ ဝီ ငဝ်း ယမ် ကိူန် ဘော ဒူအီ တူ မိုဝ်း မှာပ်။ ခဲင် မိူင် ယေရူဆာလဲမ် န့ ပီ နှာမ် ဒူအီ ပီ ငဝ်း အန်၊ န့ ဟဲ့ ကာလတ့် ဘော မိူင်၊ စုး အူ ဘ့လာက်၊ ကော ဇမ် ပေါ ဘ့လာက်။

17 လွင် ပီ ဘူင် အာမာနာဆေ အီ ညှမ် ဒွိုမ် ကာလာင် ဘော လွင် ပဲ့ ဟဲ့ ဘူင် အန် မှာပ် ဘဲန် မျုဝ် ဘဲန် မျုဝ်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် ယူဒါ။ 18 အာမာနာဆေ ဘော ယမ် ဒူပ် ဒါ ဒါ အန်။ ဂေ ဘော ဒိပ် အန် ခဲင် ကာပိုမ် အီ ကွယ် ကာတတ် ဟုဝ် အန်၊ အီ စိူဝ် ကာပိုမ် အာအူဇာ။ ဂွန် အီမာယ် အန် အီ စိူဝ် အာမူန် ဘော ဝီ ဘဲန် ခုန်ဒီခမ် ပ့လု အန်။

19 ဒေါ ဘဲန် အာမူန် ခုန်ဒီခမ် အာဆာက် အန် ဟဲ့ ပွိုန် အာ ဂိုဝ် ဒီ အာ ဆီနမ်။ အန် ဘော အိုပ် ဘိုင် မိူင်၊ ကွယ် ခဲင် မိူင် ယေရူဆာလဲမ် အာဒါ အာ ဆီနမ်။ မာ အန် စိူဝ် နာင် မေဆူလမိတ် အီ မုး ဂွန် အာဟာရုတ်၊ အီ တး ခဲင် မိူင် ယုက်ဘာ။ 20 ဘော အန် ဘူင် ပီ တူ အိုင် ဇဝ်ဖြာ၊ ဒူပ် ပီ ပါယ် ဂုန့် အန် ဒီ ဘူင်။ 21 အန် ဘော ဒူပ် ပီ ပါယ် ဂုန့် အန် ဒွန် မျုဝ် ဘော ကြိုပ် ဇဝ် အာရိုပ်၊ တဲး န့ ပီ ပီ ကြိုပ် ဂုန့် အန်။ 22 အန် ဘော ဝဲန် ဇဝ်ဖြာ ပီ ကြိုပ် ဂုန့် ဒင် အန်၊ တူ ဒူပ် ဇဝ်ဖြာ။

23 ဂေ အာမာတ် အန် ဘော ဝီ ခြာမ် ဒီ ဘ့လွာ့ ဝဲန် အန် ဘော ငဝ်း ယမ် အန် ခဲင် ဟုဝ် ဒူင် ကွယ် အန်။ 24 ဂေ ဒူအီ ခဲင် မိူင် ဘော ကာဖြူမ် ဒီ ဝီ ငဝ်း ဂေ အီ ဟဲ့ ခြာမ် ဒီ ဘ့လွာ့ ဝဲန် ခုန်ဒီခမ် အာမူန် တီ။ ဒူအီ ဂေ တီ ဘော ဝီ ဒိုဝ်း ဂွန် အီမာယ် အန် အီ စိူဝ် အာယုဝ်ဆီယာ၊ ဝီ တဲး အန် ဘဲန် ခုန်ဒီခမ် ပ့လု ဂုန့် အန်။

25 လွင် ပဲ့ ဟဲ့ ဘူင် ခုန်ဒီခမ် အာမူန် အီ ညှမ် ဒွိုမ် ကာလာင်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် ဒူအီ အာယူဒါ။

26 ဂေ ဘော ဒိပ် အန် ခဲင် ဘာရေဝ် အီ မုး ခဲင် ကာပိုမ် အာအူဇာ တွိုန်။ ဂွန် အီမာယ် အန် အီ စိူဝ် အာယုဝ်ဆီယာ ဘော ဝီ ဘဲန် ခုန်ဒီခမ် ပ့လု အန်။