ခါန် 20
လွင် အာဟေစကီ မိုဝ်း ဆဝ်
1 ဝါယ် အန် တီ အာဟေစကီ ဟဲ့ မိုဝ်း ဆဝ်၊ ဟဲ့ ရိန် ဒီ ယမ် ဒီ ဆဝ် တီ။ ဒူအီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ အီ မုး ဂွန် အာမူတ်၊ အန် ဘော တး ဒူင် ကွယ် အန်၊ တဝ်း ဒီ အန်၊ “ဇဝ်ဖြာ တဝ်း၊ ‘တဲး မဲ မ့ပြာယ် အုန် ဆီချာ တူတ့် ဒွန် မျုဝ်။ ခုဝ်၊ မဲ အာဝ် ဟူ နပ် ဒီ ကဲန်၊ မဲ ဒီ ယမ်။’”
2 အန် ဘော ဝီ မာငး ဒီ ရဲင်၊ ဆာခိုဝ် ဒီ ဇဝ်ဖြာ တဝ်း၊ 3 “အိုယ် မဲ ဇဝ်ဖြာ၊ မှာန့် တဲး မဲ ကာဝေ အုဝ် ဘော လှုဝ်း ပီ ဘူင် အုဝ်။ အုဝ် ဟဲ့ ခတ် နဝ်း ဒီ ဘူင် နာ ဘွတ် နာ မွှိုမ် ပီ အိုင် မဲ။” အန် ဟဲ့ ဟွတ့် တဝ်း ပါယ် တီ၊ အန် ဘော ယာမ် တာင်။
4 အာအီဆာယ တွိုန် ညှမ် ဒန် ဟာဝ် တူင့်။ ဒေါ ဆီ ကွယ် အန် ခဲင် ဝဲင် ဟုဝ် တွိုန်၊ ဇဝ်ဖြာ ဝီ တဝ်း ဒီ အန်၊ 5 “တဲး မဲ ဝီ ဝေန့် ဒူင် ကွယ် ခုန်ဒီခမ် အီ အိုပ် ဒူအီ ပီ အိုပ် အုဝ်၊ တဝ်း ဒီ အန်၊ ‘ဇဝ်ဖြာ အီ မုး ဇဝ်ဖြာ ပီ ကြိုပ် ဒါ မဲ အီ စိူဝ် အာဒါဝိတ် တွိုန် အန် တဝ်း၊ အုဝ် ဟဲ့ ဟွတ့် ယိုဝ် ဂြုဝ်း ပီ ဆာခိုဝ် မဲ ဘော အိုမ် ငါယ် မဲ။ အုဝ် ဒီ တဲး ဆဝ် မဲ ကဲန်။ ဝါယ် အူယ် ဆီငဲ၊ မဲ ဟဲ့ ပွိုန် ဝီ ဟာဝ် ဟုဝ့် ခဲင် ဟုဝ် ဇဝ်ဖြာ။ 6 အုဝ် ဒီ တဲး မဲ ဝီ ကွယ် ပေါ ဂိုဝ် ဒီ ဖန် ဆီနမ်။ အုဝ် ဒီ ချွတ် မဲ ဘော မိူင် နီ၊ ကွဲ့ တဲး ခုန်ဒီခမ် အာဆူရာ ပွိုန် ဒီ အိုပ်။ ကူပ် ဆီ တဲး အုဝ် အီ ဟဝ် ရုဝ်ဆေ အုဝ် ဘော ကူပ် လှုဝ်း အုဝ် ဒဲစေန့် အုဝ် အီ စိူဝ် အာဒါဝိတ် တွိုန်၊ အုဝ် ဒီ ရဲ ဒီ ဂွင့် မိူင် နီ။’”
7 ဟဲ့ ဟွတ့်၊ အာအီဆာယ ပီ ဝီ တဝ်း၊ “လုဝ် ဒိုဝ်း ဘ့လေ ဒီပူ အိုပ်။” ဂေ ဘော ဒိုဝ်း အိုပ် ဒူင် ဒိမ် တွိုန်၊ အန် ဘော ကြဲ ဒီ ကဲန်။
8 အာဟေစကီ ဝီ ဒီမွှတ် အာအီဆာယ တဝ်း၊ “မာဆေ န့ မုး၊ လက်ဆာနာ အီ တဲး အုဝ် နပ်၊ ဆဝ် အုဝ် ဒီ ဟြာယ် ဝါယ် အူယ် ဆီငဲ၊ ဟဲ့ ဟွတ့် အုဝ် ဒီ ဝီ ပွိုန် ဒီ ဟုဝ့် ဒီ ဟုဝ် ဇဝ်ဖြာ။း”
9 အာအီဆာယ ဝီ တဝ်း၊ “လက်ဆာနာ ပီ ဒီ ဘျ ဇဝ်ဖြာ ဒီ မဲ၊ န့ ပါယ် နီ။ ဇဝ်ဖြာ ဒီ ဘူင် တဲး န့ ဒူပ် ပီ အိုင် မဲ။ ဆေ မဲ ဆီ တဲး န့ မိုဝ်း ကာမိုက် ဟာဝ် နာ အာတ့် မဲ ဂိုဝ် န့ဇာပ်၊ အန် ဒီ ဘူင် ပါယ် တီ။ ဆေ မဲ ယီ ဆီ တဲး န့ ဝိဝ် နာ ပန် ဂိုဝ် န့ဇာပ်၊ ဟဲ့ ပွိုန်။”
10 အန် ဟဲ့ ဟွတ့် တဝ်း ပါယ် တီ။ အာဟေစကီ ဝီ တဝ်း၊ “ဆေ ကာမိုက် ဒီ ဘော ဟာဝ် နာ အာတ့် ဂိုဝ် န့ဇာပ်၊ န့ ငှိုယ်။ အုဝ် ဆီ တဲး အန် ဝိဝ် နာ ပန် ဂိုဝ် န့ဇာပ်။”
11 အာအီဆာယ အီ မုး ဒူအီ ဘျာန် ဂြုဝ်း ဇဝ်ဖြာ တွိုန်၊ အန် ဘော ဝီ ဆာခိုဝ် ဒီ ဇဝ်ဖြာ။ ဇဝ်ဖြာ ဘော ဘူင် ကာမိုက် တွိုန် တဲး န့ ဝိဝ် နာ ပန် ဂိုဝ် န့ဇာပ်၊ တဲး ကာမိုက် တီ ဝီ လူင် အာဒါ ဂိုဝ် ဘ့လဝ့် ဒဲင် န့တဲင်a ပဲ့ ဟဲ့ ဒွိုမ် ဘူင် ခုန်ဒီခမ် အာခါတ် တွိုန်။
12 ဒေါ အန် တီ ခုန်ဒီခမ် အာမေရောဒပ်ဘာဒါန် အီ မုး ဂွန် အာဘာဒါန်၊ အီ အိုပ် မိူင် ဘာဘဲ၊ အန် ဘော ဒဲမ် ပဲ့ ဘော တိုယ် လက်ဆွင် ဒီ အာဟေစကီ တွိုန် ကူပ် ဟဲ့ ယိုဝ် အန် လွင် ဆဝ် အာဟေစကီ ဟဲ့ ဝီ ကဲန်။ 13 အာဟေစကီ ဘော ရွုး ဒါလာမ် ခုန်ဒီခမ် ဘာဘဲ ဘော ဘျ တူတ့် ခဲ့ ကွယ် ကြုဝ်ကြာမ် အန် ဒွန် မျုဝ်။ ဘော မုး ကြုဝ် အီ ငဝ်း တာင်၊ ရွိုန် ဂေ ခြိဝ်၊ ဘော န့ကြိုဝ်း အုး ငှုန်၊ နာမန် အုး ငှုန်၊ ခြိုင် ကာဂုဝ်း အီ ဘွတ် အီ မွှိုမ် ဒွန် မျုဝ်၊ ခဲ့ ပီ အုန် အန်၊ အန် ဘျ တူတ့် ဒီ ဂေ။ ဘော အီ ကွယ် ခဲင် ဟုဝ် ခဲင် မိူင် အန် ဒွန် ပ့လုဝ့်၊ အန် ကာလာင် တူတ့် ဒီ ဂေ။ အူ မျုဝ် မိူဝ်၊ အန် တူ ချြီင်။
14 ဝါယ် တီ အာအီဆာယ အီ မုး ဒူအီ ဘျာန် ဂြုဝ်း ဇဝ်ဖြာ ဘော ဝီ တး ဒူင် ကွယ် ခုန်ဒီခမ် အာဟေစကီ ဘော ဝီ ဒီမွှတ် အန် တဝ်း၊ “ဒူအီ ဂေ တွိုန် တဝ်း မာဆေ ဒီ မဲ။း ဂေ တး မိူင် မှဝ်၊ တး ဇမ် ဒူင် ကွယ် မဲ။း” အာဟေစကီ ဝီ တဝ်း၊ “ဂေ တး တူင့် ကာဆဝ်၊ ဂေ တး ဒီ မိူင် ဘာဘဲ။”
15 အာအီဆာယ ပီ ဝီ ဒီမွှတ် တဝ်း၊ “ခဲင် ဟုဝ် မဲ နီ၊ ဂေ ဟဲ့ ယိုဝ် မာဆေ။း” အာဟေစကီ ဝီ တဝ်း၊ “ခဲ့ ကွယ် ခဲင် ဟုဝ် အုဝ် နီ၊ ဂေ ဟဲ့ ဟွတ့် ယိုဝ် တူတ့်၊ ဘော ကြုဝ် အီ ကွယ် ခဲင် ဇီဒိူက် ပီ အုန် အုဝ် တွိုန်၊ အုဝ် ဟဲ့ ဟွတ့် ဘျ တူတ့် ဒီ ဂေ။”
16 ဟဲ့ ဟွတ့်၊ အာအီဆာယ ဝီ တဝ်း ဒီ အာဟေစကီ၊ “တဲး မဲ ထူမ် ဂြုဝ်း ဇဝ်ဖြာ။ အန် ဟဲ့ တဝ်း၊ 17 ‘န့ ဒီ ဇမ် အာခြာဝ် အန်၊ ခဲ့ မိုဝ်း အီ ကွယ် ခဲင် ဟုဝ် မဲ နီ ဘော ပဲ့ ဟဲ့ ဒိုဝ်း တး ကာဇု အုန် ဒါ ဒါ မဲ၊ ကြုဝ် အီ ကွယ် ကော ဇမ် အာတိုဝ် နီ ဒွန် မျုဝ်၊ န့ ဒီ ဇမ် တူတ့် မိူင် ဘာဘဲ။ အူ မျုဝ် မိူဝ် အာဝ် ဟူ ဂိတ်။’ ဇဝ်ဖြာ တဝ်း ပါယ် တီ။ 18 ဂေ ဒီ ဘော ဒိုဝ်း ဂွန် အာရာင် မဲ ဘော လှာန် အာရာင် မဲ မင် အီ၊ တဲး ဂေ ဟာဝ် ဘဲန် ဒူအီ ဆး ကွယ် ခဲင် ဟုဝ် ခုန်ဒီခမ် ဘာဘဲ တွိုန်။”
19 အာဟေစကီ ဝီ တဝ်း ဒီ အာအီဆာယ၊ “ဟဲ့ ဘွတ်၊ ဂြုဝ်း ဇဝ်ဖြာ ပီ ကာလာင် မဲ တီ။” အန် ပီ ဝီ တဝ်း ခဲင် နဝ်း အန်၊ “ဟဲ့ မုး ဟဲ့ ဘွတ်၊ န့ ဒီ ဒါခိုယ် ဂတ် ယေန် ဒေါ မုး စုဝ် အုဝ် နီ။”