1 ပန် တီ ခုန်ဒီခမ် အာဟေစကီ ဘော ယိုဝ် ဂြုဝ်း တီ၊ အန် ဘော ကာယာတ့် ခြိုင် တာ အန် ဘော ဝီ စှိုပ် ခြိုင် စာန်၊ ဝီ ဟာဝ် ခဲင် ဟုဝ် ဇဝ်ဖြာ။ 2 အန် ဘော ဒဲ့ အာအေယာခိမ် အီ မုး ဒူအီ အီ အိုပ် တူတ့် ဒွန် မျုဝ် ခဲင် ဟုဝ် ခုန်ဒီခမ် ဘော ဒါ စာရေ အီ စိူဝ် အာဆေဘာနာ ဘော ဒါ တာင် အီ လှူ ဒီ ဇဝ်ဖြာ၊ တဲး ဂေ စှိုပ် တူတ့် ခြိုင် စာန်၊ ဝီ ဟာဝ် ဒူင် ကွယ် ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ အီ မုး ဂွန် အာမူတ်။ 3 ဂေ ဘော တဝ်း ဒီ အန်၊ “ခုန်ဒီခမ် အာဟေစကီ တဝ်း၊ ‘အာတိုဝ် နီ ဟဲ့ မုး ဆီငဲ ဒုက် တာင်၊ ဆီငဲ လုဝ် ထူမ် ပီ မာနုဝ် အီ ဟဝ်၊ အုဝ် ခမ် ပီ ကာလာင် နာ တူ မွှိုမ်။ န့ ကော ပီ ဂွန် င ဟဲ့ လုဝ် ဂွိုတ်၊ အာဝ် မိုဝ်း ပ့လူမ် ဒီ တဲး အန် ဂွိုတ်။ 4 ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ အန် ဒီ ဘော ယိုဝ် ဂြုဝ်း ပီ ကာလာင် ဒါ အီ အိုပ် တူတ့် ဒွန် မျုဝ် ခဲင် ဟုဝ် ခုန်ဒီခမ် အာဆူရာ၊ ပီ စ်ု ခုန်ဒီခမ် တဲး အန် တး ကာလာင် နာ စာဝ် ဒွန် မျုဝ် ဒီ ဇဝ်ဖြာ အီ မုး ဇဝ်ဖြာ အာခါခ်ု။ ဇဝ်ဖြာ ဒီ ဘော လှုဝ်း မှာပ် ပဲ့ ဟဲ့ ဘူင် အန် ဒေါ တဝ်း အန် ဂြုဝ်း တီ ဒီ ဇဝ်ဖြာ။ ခုဝ်၊ အုဝ် မှာန့်၊ တဲး မဲ ဆာခိုဝ် ဘော ဒါင် ဂေ အီ ဆီ ကွယ် ခဲင် မိူင် ယူဒါ အေ နီ။’”

5 ဟဲ့ ဟွတ့်၊ ဂေ ဒဲစေန့် အာဟေစကီ ဘော တး ဇမ် ဒူင် ကွယ် အာအီဆီယ။ 6 အာအီဆီယ ဘော တဝ်း ဒီ ဂေ၊ “တဲး ဘေ ဝီ ဝေန့်၊ ကာလာင် ဒီ ဒါ ကာညာ ဘေ တဝ်း၊ ‘ဇဝ်ဖြာ တဝ်း၊ မဲ ကွဲ့ ယုဝ် ဂြုဝ်း ပီ ယိုဝ် မဲ တီ၊ ပဲ့ ဟဲ့ ကာလာင် ဒဲစေန့် ခုန်ဒီခမ် အာဆူရာ နာ စာဝ် လွင် အုဝ် တီ။ 7 အုဝ် ဒီ ဟပ် ခဲင် နဝ်း အန် တဲး အန် မိုဝ်း နဝ်း ဆီ ဝေန့်။ ဆေ အန် ဟီ ယိုဝ် ဆာဒါင် အူ မျုဝ်၊ အုဝ် ဒီ တဲး အန် ဝေန့် ဒူင် ကွယ် ဘြိမ် အန်။ အန် ဒီ ဘော ယမ် ဒီ မာပွါ့ လာင် ဂေ အီ ကွယ် ရိုမ် ဒူပ် အန် တီ။’”

8 ပန် တီ ဒါ အီ အိုပ် တူတ့် ဒွန် မျုဝ် ခဲင် ဟုဝ် ခုန်ဒီခမ် အာဆူရာ၊ အန် ယိုဝ် ဆာဒါင် လွင် ခုန်ဒီခမ် ဟဲ့ ဟွတ့် ဟာဝ် တ မိူင် လာခိတ်။ ဒေါ အန် တီ အန် ဘော ဝေန့်၊ ဘော ကာတုန့် ခုန်ဒီခမ် ဒေါ ကာဂုဝ်း အန် ဒီ မိူင် လီပါနာ။

9 ဝါယ် တီ၊ ခုန်ဒီခမ် အာဆာခါရိပ် ဘော ဝီ ယိုဝ် အီ ဟဝ် ကာလာင် လွင် ခုန်ဒီခမ် အာတီရီကာ အီ မုး ဒူအီ ကူဆာ၊ အန် ဟဲ့ ဝီ အိုပ် မိူင် အဲဂိုပ်။ ဂေ ဘော တဝ်း၊ “ဘ်ု ဘေ ယွတ်၊ အန် ဒီ တး ကာဂုဝ်း ဒီ မဲ။” ဟဲ့ ဟွတ့်၊ ခုန်ဒီခမ် ဘော ဝီ စ်ု ဒါလာမ် အန်၊ တဲး ဂေ ဟာဝ် တိုယ် ပဲ့ ဒီ အာဟေစကီ တဝ်း၊ 10 “ကွဲ့ တဲး ဇဝ်ဖြာ ပီ ကြိုပ် မဲ ကာလုဝ် ဒီ မဲ တဝ်း၊ ‘ခုန်ဒီခမ် အာဆူရာ တူ ပွိုန် ဒီ အိုပ် မိူင် ယေရူဆာလဲမ်။’ 11 မဲ ဟဲ့ ယိုဝ် ပဲ့ ဟဲ့ ဘူင် ခုန်ဒီခမ် အာဆူရာ။ အန် ဟဲ့ ပျာတ့် ဝဲန် မိူင် ဒွန် မိူင်။ ဘော မဲ တူ နပ် ဒီ လွတ်။ 12 မဲ ဟဲ့ ဒွိုမ် ယိုဝ် ဇဝ် ဘဲန် ကာဒင် ဘဲန် ကာဒင် ပီ ကြိုပ် ဒူအီ ဟဝ် အာဝ် ပွိုန် စွယ် ဂေ။ န့ မုး ဒါ ဒါ အုဝ်၊ ဂေ ဟဲ့ ပျာတ့် ဝဲန် ဂေ ဘောကာဂ့လျီတ်။ အီ မုး ဇဝ် ပီ ကြိုပ် ဒူအီ ကောစန်၊ ဒူအီ ဟာရာန်၊ ဒူအီ ရေစ ဂေ ဒူအီ အာအေဒေန် အီ ကွယ် ဒီ မိူင် တေလဇာ၊ ဂေ ဇဝ် ဘောကာဂ့လျီတ် တူ ပွိုန် စွယ် မာဆေ။ 13 တဲး မဲ ဟြေတ့် ဘော ခုန်ဒီခမ် အီ အိုပ် မိူင် ဟာမာတ်၊ ခုန်ဒီခမ် အီ အိုပ် မိူင် အာရာဖာတ်၊ ခုန်ဒီခမ် အီ အိုပ် မိူင် ဆေဖာအိမ်၊ ခုန်ဒီခမ် အီ အိုပ် မိူင် ဟေနာ၊ ခုန်ဒီခမ် အီ အိုပ် မိူင် အီဝါ၊ မဲ အာဝ် ဟူ ပွိုန် ဒီ ယိုဝ် ဂေ။ ဂေ ဟူ ကွယ် ဒီ မှဝ်။”

14 အာဟေစကီ ဘော ဒိုဝ်း ပဲ့ ဒီ ဒါလာမ် တွိုန်။ ဟဲ့ ဟွတ့်၊ အန် ဘော ဝီ ဟာဝ် ဒီ ဟုဝ် ဇဝ်ဖြာ။ အန် ဘော ဘ့လး တဲး ဇဝ်ဖြာ ယွတ်။ 15 ဟဲ့ ဟွတ့်၊ အန် ဘော ဆာခိုဝ် ဒီ ဇဝ်ဖြာ တဝ်း၊ “အိုယ် မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် ဒူအီ အီဆာရေလ။ မဲ ဇဝ် ကွယ် ဒူင် ကွယ် ဂေ အာမူ အာမာတ် ဇဝ်ဖြာ အီ စိူဝ် ခေရုပ်။ မဲ ဇဝ်၊ မဲ မုး ဇဝ်ဖြာ အူ ကာဒင် အီ အိုပ် ဒွန် မိူင် ဒဲင် ကာဒါယ် နီ။ မဲ ဇဝ် ဟဲ့ ဘူင် ဘော ဂါင်ဟြာဝ် ဘော ကာဒါယ်။ 16 အုဝ် မှာန့် မဲ ဇဝ်ဖြာ၊ တဲး မဲ ထူမ်။ မှာန့်၊ တဲး မဲ ယွတ် လူင်၊ တဲး မဲ ယိုဝ် ဂြုဝ်း ပီ တဝ်း အာဆာခါရိပ်။ အန် ဟဲ့ တး ကာလာင် နာ စာဝ် လွင် မဲ ဇဝ်ဖြာ အာခါခ်ု။ 17 အိုယ် မဲ ဇဝ်ဖြာ၊ ခုန်ဒီခမ် အာဆူရာ ဂေ ဟဲ့ ပျာတ့် ဒူအီ ဒွန် မိူင် ဒွန် ပ့လုဝ့်၊ ဘော အိုမ် ဂေ ကာဒါယ်၊ ဂေ ဟဲ့ တဲး န့ လိုဝ်။ 18 ဂေ ဟဲ့ ဒိုဝ်း ဘော အာရိုပ် ပီ ကြိုပ် ဂေ၊ ဒုဝ့် ခဲင် ငဝ်။ မာလဲ၊ အာရိုပ် တီ အာဝ် မုး ဇဝ်ဖြာ ခါခ်ု။ န့ မုး မီ မာဝ် ဂေ ဟေ ပီ ရန့် ဒူအီ၊ ပဲ့ ဟဲ့ ပျာတ့် ဝဲန် ခုန်ဒီခမ် တီ။ 19 မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ ဒေါ တီ နီ၊ အုဝ် မှာန့်၊ တဲး ဒူအီ ဒွန် မိူင် ဒွန် ပ့လုဝ့် ကော နပ်၊ န့ မုး မဲ ဇဝ်ဖြာ အူ ကာဒင် အီ မုး ဇဝ်ဖြာ အာခါခ်ု။ အုဝ် ဆာခိုဝ် မှာန့်၊ တဲး မဲ ဇဝ် ချွတ် အုဝ်၊ တဲး အုဝ် လွတ် တ ခုန်ဒီခမ် တီ။”

20 ဟဲ့ ဟွတ့် ဆာခိုဝ်၊ အာအီဆာယ အီ မုး ဂွန် အာမူတ် တွိုန်၊ အန် ဘော ဝီ တး ဒူင် ကွယ် ခုန်ဒီခမ် အာဟေစကီ ဘော တဝ်း ဒီ အန်၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ တဝ်း၊ ‘အုဝ် ဟဲ့ ဟွတ့် ယိုဝ် ဂြုဝ်း ပီ ဆာခိုဝ် မဲ၊ လွင် အာဆာခါရိပ် အီ မုး ခုန်ဒီခမ် အီ အိုပ် ဒူအီ အာဆူရာ တွိုန်။’

21 ဇဝ်ဖြာ မိူဝ် ဟဲ့ ကာလာင် လွင် ခုန်ဒီခမ် အာဆူရီယာ တီ တဝ်း၊ ‘ဂေ ဒူအီ ခဲင် မိူင် ဇီအူန်၊ ဂေ ပီ ဂွန် ဒီဘျာ အီ ဟဲ့ လုက်တာယ် ဘော ကာညး မဲ။ ဂေ ဒူအီ ခဲင် မိူင် ယေရူဆာလဲမ်၊ ဂေ ပီ ဂွန် အီဘိုန့် အီ မာဝတ် ဂိန့် ဒီ မဲ ဒေါ တဝ် မဲ။ 22 အာဆေ န့ မုး ပဲ့ ဟဲ့ ကာခဲန့် မဲ။း အာဆေ န့ မုး ပဲ့ ဟဲ့ ဒတ် ဒဲ့ မဲ၊ ပဲ့ ဟဲ့ ပီခိုက် မဲ ဒီ အန်။း န့ ဘော မုး ဒီ ဇဝ်ဖြာ ဘွတ် ပီ ကြိုပ် ဒူအီ အီဆာရေလ ပဲ့ ဟဲ့ ဘူင် မဲ ဇိုဝ် တီ။’

23 မဲ ဟဲ့ တဲး ဒါလာမ် မဲ ကာလာင် နာ စာဝ် ဒီ ဇဝ်ဖြာ။ မဲ ဟဲ့ တဝ်း၊ ‘အုဝ် ဟဲ့ ဒိုဝ်း ကိူန် လက်လဝ် အုဝ်၊ ဟုဝ့် ဒဲင် နွန် လေဘာနုန် ဒွန် ပ့လုဝ့်။ အုဝ် ဟဲ့ ဂ်ု ဝဲန် ဘော ဟေ အာရိတ် အီ တူင့် အီ တာင် ဘော ဟေ န့ကေ အီ စှိတ်၊ တဲး ဂေ ကေး တူတ့်။ အုဝ် ဟဲ့ ဟာဝ် ဇမ် ဒူင် လိုက် ကာဆဝ် ဘော အိုပ် ပြဲ အီ မွှိုမ် လွှိုမ် တူတ့်။

24 အုဝ် ဟဲ့ ဂိုဝ်း ဒီ ဒျီင် အိုမ် ခိုမ် ခဲင် မိူင် အီ ဟဝ် ပီ တူ ဒွိုမ် ဇမ် အီ။ အုဝ် ဟဲ့ တာ ပ့လဝ် အုဝ်၊ ဂ့ဝါ ဘ့လဲင် အိုမ် ခဲင် မိူင် အဲဂိုပ်၊ တဲး ဂေ ကော ဟိတ် တူတ့်။’

25 အုဝ် ယီ တဝ်း၊ ‘မဲ တူ ဒွိုမ် ယိုဝ် ပီ တဝ်း အုဝ်။း’ ဆိန့် အာတ့် နီ အုဝ် ဟဲ့ ဟွတ့် ဆုင်ဖျာတ်။ ဒေါ မွိုန် အုဝ် ဟဲ့ ခြာမ် ဒီ ဘူင်။ ဒေါ တီ နီ၊ အုဝ် ယီ တဲး န့ ဘဲန် ပီ ဒွိုမ် တဝ်း အုဝ်။ အုဝ် ဟဲ့ တဲး မဲ ပွိုန် ပျာတ့် မိူင် အီ မိုဝ်း ရဲင်၊ တဲး ဂေ ဝီ လိုဝ်၊ ဘဲန် မ့ပိုမ် မာဝ်။

26 ကူပ် န့ ပါယ် တီ ဂေ ဒူအီ အီ ကွယ် ခဲင် မိူင် တီ၊ အာဝ် ဟူ မိုဝ်း ဟဲန့်။ န့ ဒီ ဘဲန် ကာဝှ်ု ကာဝျှီန် နဝ်း လိုဝ် ဒီ ဂေ၊ တဲး ဂေ ဘော စှိုမ် ဆာရေ။ ဂေ ဘော ပီ ပေတ့် အီ ကွယ် ခဲင် ပြဲ၊ ဘော ပီ ငှုဝ် အီ ဆီ န့စမ်၊ ဘော ပီ ပေတ့် အီ လတ့် ဒီ ကာတု ကာင်။ န့ ညှမ် ဒန် တာင်၊ ဟဲ့ ဟွတ့် ဝီ ယမ်။

27 အုဝ် ပီ ဘော ဟဲ့ တဲး မဲ ဘူင် ပါယ် တီ အုဝ် ယီ နပ် တူတ့် ဒွန် မျုဝ် ပီ ဒီ ပါယ် မဲ။ မဲ ဘော တုတ့် ဘော ယိတ့်၊ မဲ ဘော လိုပ် ဘော လေး၊ မဲ ဘော ရူ ဘော စာဝ်၊ အုဝ် ဟဲ့ ဟွတ့် နပ် တူတ့်။

28 ကူပ် ဟဲ့ ရူ မဲ ဒီ အုဝ်၊ ကူပ် ဟဲ့ ဟွတ့် နပ် တူတ့် အုဝ် လွင် ပီခိုက် မဲ နဝ်း မဲ။ အုဝ် ဒီ ဘော ဘူင် ဒီ မဲ တဲး န့ ပီ အုဝ် ဘ့လုး ဂုင် မုး မဲ၊ ဟပ် ဝန်၊ ဘော ဒိုဝ်း လ၊ ဟပ် ခဲင် မူတ့် မဲ။ အုဝ် ဒီ ဘော တိုန့် မဲ ဝီ ဝိဝ် ဒူပ် န့တေန့် ဘြိမ် မဲ။

29 အိုယ် မဲ ခုန်ဒီခမ် အာဟေစကီ၊ အုဝ် ဒီ ဘူင် လက်ဆာနာ၊ တဲး မဲ နပ်၊ ဂြုဝ်း အုဝ် ဟဲ့ မှာန်။ နမ် နီ၊ မဲ ဒီ ပွိုန် ဒီ ဟူမ် ဘ့လေ အီ လေး တး ရာင် အန်။ ဆီနမ် ဒီ တး မိူဝ်၊ မဲ ဒီ ပွိုန် ဒီ ဟူမ် ပါယ် တီ။ တ ဆီနမ် ဒီ တး၊ မဲ လုဝ် ဆုဝ့် ပီ ဆမ် ပီ ရန့် မဲ။ မာန် မာငုန် ပီ ဆမ် မဲ၊ မဲ ဒီ ပွိုန် ဒီ ဟူမ်။

30 ဂေ ဒူအီ အာယူဒါ အီ ဟဲ့ လွတ် အီ ဆီ ဂိတ် တွိုန်၊ ဂေ ဒီ ဝီ ပီ ဟေ အီ ဆမ်၊ တဲး န့ မိုဝ်း ရျီး အန် အီ ခြိုမ် ဘော ဘ့လေ အန် နာ ဒဲင်။

31 န့ ဒီ မိုဝ်း ဂေ အီ ဆီ ဂိတ်၊ အီ ဆီ ကွယ် ခဲင် မိူင် ယေရူဆာလဲမ်။ န့ ဘော မိုဝ်း ဂေ အီ ဟဲ့ လွတ် ဟဲ့ တး ဒီ နွန် ဇီအူန်။ ဇဝ်ဖြာ အီ အိုပ် တူတ့် ဒွန် မျုဝ်၊ အီ မိုဝ်း နဝ်း ဂျုဝ်ဂျာ ဒီ စွယ် ဘေ၊ အန် ဟဲ့ ဘူင် ပါယ် တီ။’

32 ခုဝ်၊ ဇဝ်ဖြာ ဟဲ့ တဝ်း လွင် ခုန်ဒီခမ် အာဆူရာ၊ အန် တူ ပွိုန် ဒီ လိုပ် ဟာဝ် ခဲင် မိူင် နီ၊ တူ ပွိုန် ဘန့် ဘ့လာ လိုပ် ခဲင် မိူင်၊ တူ ပွိုန် ဘျ ခြိုင် ကာဂုဝ်း အန် နာ အာတ့် မိူင် နီ၊ တူ ပွိုန် ဂိုဝ်း ကာဒါယ် ဘူင် ဘ့လဝ့် န့တဲင် နာ ရေတ့် မိူင် နီ။

33 အန် တး န့တေန့် မှဝ်၊ အန် ဒီ လုဝ် ဝီ ဝေန့် န့တေန့် တီ။ အန် တူ ပွိုန် လိုပ် ခဲင် မိူင် နီ။ ဇဝ်ဖြာ ဟဲ့ ကာလာင် ပါယ် တီ။

34 ဇဝ်ဖြာ ဘော တဝ်း၊ ‘အုဝ် ဒီ ရဲ ဒီ ချွတ် မိူင် နီ ကူပ် ဆီ တဲး အုဝ် အီ ဟဝ် ရုဝ်ဆေ အုဝ် ဘော ကူပ် လှုဝ်း အုဝ် ဒဲစေန့် အုဝ် အီ စိူဝ် အာဒါဝိတ်။’”

35 ဘော ဇမ် ခဲင် မှိုဝ် တီ၊ အာမူ အာမာတ် ဇဝ်ဖြာ ဘော ငဝ်း ယမ် ဒူအီ ခဲင် ဒပ် ဒူအီ အာဆူရာ အာဒါ အူ ဆဲန် ဒီ ဒါ မှိုန့် ဒီ ဖန် ဟြဲန့် ဝီ။ ဘော ဇမ် ဆိန့်ဝး ဝွင့်၊ ဒူအီ ဂေ တွိုန် ဟဲ့ ဟွတ့် ယမ် တူတ့်။ 36 ခုဝ် အန် တီ၊ အာဆာခါရိပ် အီ မုး ခုန်ဒီခမ် ဒူအီ အာဆူရာ တွိုန်၊ အန် ဘော ဝီ ဝေန့် ကွယ် ဒီ မိူင် နီနီဝေ။

37 ဝါယ် အန် တီ အူ ဆီငဲ အန် ဘော ဝီ ဟာဝ် ခဲင် ဟုဝ် ဇဝ် နီဆာရွက်၊ တဝ်း ဒီ ကြိုပ် အန် ဇဝ် တီ အီ မုး ဇဝ် ပီ ဒွိုမ် ကြိုပ် အန်။ န့ ယီ မုး ဂွန် အီမာယ် အန် အီ စိူဝ် အာတာရမ်မာလေက် ဂါယ် အာဆာရေဇာ၊ ဂါယ် ဘော ဒိုဝ်း မာပွါ့ လာင်၊ ငဝ်း ယမ် အန်၊ ဘော ဝီ တဝ် ဟာဝ် ခဲင် ကာဒါယ် မိူင် အာရာရာတ်။ ပန် တီ ဂွန် အန် အီ စိူဝ် အာဆာဟာဒူန် ဘော ဝီ ဘဲန် ခုန်ဒီခမ် ဝီ အိုပ် မိူင် အာဆူရီယာ။