1 အာဟေစကီယာ အီ မုး ဂွန် ခုန်ဒီခမ် အာခါတ် ဟဲ့ အိုပ် မိူင် ယူဒါ ဒေါ ခုန်ဒီခမ် အာဟုဝ်ဆေ ဟဲ့ ဘဲန် ခုန်ဒီခမ် အီ အိုပ် မိူင် အီဆာရေလ။ 2 ဒေါ ဘဲန် အန် ခုန်ဒီခမ် အာဆာက် အန် ဟဲ့ နုဝ့် အာ ဂိုဝ် ဒီ ဖန် ဆီနမ်။ အန် ဘော အိုပ် ဘိုင် မိူင်၊ ကွယ် ခဲင် မိူင် ယေရူဆာလဲမ် အာဒါ အာ ဂိုဝ် ဒီ ဒိမ် ဆီနမ်။ မာ အန် စိူဝ် နာင် အေဖီ အီ မုး ဂွန် အာဆာခါရာ။ 3 အန် ဘော ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ အန် ဒူပ် ပီ ပါယ် ဒါ အန် အီ မုး အာဒါဝိတ် တွိုန်။ 4 အန် ဘော ပျာတ့် ဝဲန် ဒူင် စာ အီ မုး ဒူင် ကြိုပ် ဂေ။ အန် ဘော ဒွယ် ဝဲန် အာရိုပ် ရာင် ပီ ကြိုပ် ဒူအီ၊ ဂ်ု ဝဲန် ဘော ကန်ထွန် ပီ ကြိုပ် ဂေ နာင် ကာနမ် အေဆူရာ။ အန် ဘော ကာဒဲပ် ဘော မာဟန့် ဘွင့် ပီ ဘူင် အာမုဝ်ဆဲ တွိုန် ခုဝ်၊ ဂေ ဒူအီ ဟဲ့ ဒုဝ့် န့ကြိုဝ်း အုး ငှုန် ဒီ အာတ့် မာဟန့် ဘွင့် တီ။ ဂေ ဟဲ့ တဲး မာဟန့် တီ စိူဝ် နာဟုက်ဒါန်။

5 အန် ဘူင် ဒူပ် ဆီချာ ပီ အိုင် ဇဝ်ဖြာ၊ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ ခဲ့ ကွယ် ဂေ ခုန်ဒီခမ် ယူဒါ ဘော အာတ့် အန် တီ ဘော ဝါယ် အန် တီ အာဝ် မိုဝ်း အီ ပီ အန် ခေါ အူ ဝီ။ 6 အန် ရုဝ်ဆေ ဆီချာ ဇဝ်ဖြာ။ အန် လှုဝ်း ဇဝ်ဖြာ ဆေဆေ။ အန် ဘော ဒူပ် ဆီချာ ဒါရာ ဇဝ်ဖြာ ပီ ဒွိုမ် ကာလာင် အန် ဒီ အာမုဝ်ဆဲ တွိုန်။ 7 ဇဝ်ဖြာ မိူဝ် ဘော စွယ် အန်။ အန် ဘော ဟာဝ် နာ မှဝ်၊ အန် ဘော ဘူင် မာဆေ မိူဝ်၊ န့ ဘော အွင်။ အန် အာဝ် ဟူ လုဝ် ခမ် ပီ အိုပ် ခုန်ဒီခမ် အာဆူရာ။ ရွိုန် စိုင် မိူဝ် အန် အာဝ် လုဝ် ဟပ်။ 8 အန် ဘော ဝီ ဟာဝ် ကာဂုဝ်း ဒီ ဒူအီ ဖီလီထီ၊ ဝီ ပဲ ဘော ဂေ အီ ကွယ် ခဲင် မိူင် ဘဲန် မိူင် ဘော ဂေ အီ ကွယ် ဒီ ကာစှူင့် ဒူင် ဘ်ု ဂေ မာန် မိူင် တဲး န့ ကော ဇမ် မိူင် ဂါဆာ။

9 ခုန်ဒီခမ် အာဟေစကီ ဟဲ့ ဘဲန် ခုန်ဒီခမ် အာဒါ ဖွုန် ဆီနမ်၊ ဘော ခုန်ဒီခမ် အာဟုဝ်ဆေ အီ မုး ဂွန် ခုန်ဒီခမ် အာအေလာဟာ အီ အိုပ် ဒူအီ အီဆာရေလ ဟဲ့ ဘဲန် ခုန်ဒီခမ် အာဒါ ဘူ ဆီနမ်။ ဒေါ အန် တီ ခုန်ဒီခမ် အာဆာမာနေစ အီ အိုပ် ဒူအီ အာဆူရာ၊ အန် ဘော တး ရူပ် မိူင် ဆာမာရီ တွိုန်။ 10 န့ ဘော နုဝ့် အူယ် ဆီနမ်၊ ဂေ ဘော ပွိုန် မိူင် ဆာမာရီ တီ။ ဒေါ အန် တီ အာဟေစကီယာ ဟဲ့ ဘဲန် ခုန်ဒီခမ် အာဒါ ဒဝ် ဆီနမ်။ အာဟုဝ်ဆေ အီ မုး ခုန်ဒီခမ် အီ အိုပ် မိူင် အီဆာရေလ၊ အန် ဟဲ့ အိုပ် မိူင် အာဒါ ဒိမ် ဆီနမ်။ 11 ခုန်ဒီခမ် အာဆူရာ ဘော ဒိုဝ်း ခဲ့ ကွယ် ဒူအီ အီဆာရေလ ဟာဝ် ဒီ မိူင် အာဆူရီယာ။ အန် ဘော တဲး ဂေ ကွယ် ဒီ မိူင် ဟာလာ၊ ဒီ မိူင် ဟာပေါ ဘော ခူပ် ဘ့လဲင် အိုမ် ကောစန် ဘော ဒီ ရဝ် ဂေ ဒီ မိူင် ဒူင် ကွယ် ဂေ ဒူအီ အာမျုဝ် မေဒီ တွိုန်။ 12 ဇဝ်ဖြာ ဟဲ့ တဲး ဂေ ခမ် ပါယ် တီ ကူပ် တူ ထူမ် ဂေ ပီ ကာလာင် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ။ ဂေ ဟဲ့ ဝဲန် ပီ ကာဆဲန့် ဇဝ်ဖြာ၊ တူ ဒူပ် ပီ ဒွိုမ် စ်ု အာမုဝ်ဆဲ ဂေ ဘူင်။

13 ခုန်ဒီခမ် အာဟေစကီယာ ဟဲ့ အိုပ် မိူင် ယူဒါ အာဒါ ဂိုဝ် ဒီ ဖွုန် ဆီနမ်၊ ခုန်ဒီခမ် အာဆာခါရိပ် အီ အိုပ် မိူင် အာဆူရာ၊ အန် ဘော တး ကာဂုဝ်း ဒီ မိူင် အီ မိုဝ်း ရဲင် ဒွန် မိူင်၊ အီ ကွယ် ခဲင် ကာဒါယ် မိူင် ယူဒါ တွိုန်။ အန် ဘော ပွိုန် မိူင် တီ ဒွန် မိူင်။ 14 ခုန်ဒီခမ် အာဟေစကီယာ အီ အိုပ် မိူင် ယူဒါ တွိုန်၊ အန် ဘော စ်ု ဂေ ဟာဝ် ကာလာင် ဒီ ခုန်ဒီခမ် အာဆူရီယာ အီ ကွယ် ဒီ မိူင် လာခိတ် တဝ်း၊ “အုဝ် ဟဲ့ ဟွတ့် လုတ့်၊ အုဝ် ဒီ ဝီ မှာန့် တဲး မဲ ဝီ ဝိဝ်။ မဲ ဘော မှာန့် ခဲ့ မှဝ်၊ အုဝ် မိူဝ် ဒီ ဟပ်။” ခုန်ဒီခမ် အာဆူရာ ဘော မှာန့် ဒီ အန် ရွိုန် အူယ် မာယဝ်း ထာလေန်။ ဘော ခြိဝ် ဂိုဝ် ထာလေန်။^a 15 အာဟေစကီယာ ဘော ဒိုဝ်း ရွိုန် အီ ကွယ် ခဲင် ဟုဝ် ဇဝ်ဖြာ ဘော ရွိုန် အီ ကွယ် ခဲင် ဟုဝ် အန်၊ ဒွါ တူတ့်။

16 ဒေါ အန် တီ အာဟေစကီယာ ဘော ဒိုဝ်း ခြိဝ် အီ ကွယ် ဒီ မာလုဝ်း ဟုဝ် ဇဝ်ဖြာ ဘော ပီ ပိတ် ဂေ ဒီ ရွင့် ဘာင် မာလုဝ်း ဟုဝ် ဇဝ်ဖြာ။ အန် ဘော ဒွါ တူတ့် ဒီ ခုန်ဒီခမ် အာဆူရာ။

17 ဝါယ် အန် တီ ခုန်ဒီခမ် အာဆူရာ ဘော ဝီ ဒဲ့ ဒါ ဘုဝ် တာင် အန် ဘော အာမာတ် တာင် အန် ဘော ဒါ အီ အိုပ် တူတ့် ခဲင် ဟုဝ် ခုန်ဒီခမ်။ အန် ဘော စ်ု ဂေ အူယ် ဝီ ဒိုဝ်း ဘော ဒါ ဆိုက် ဂေ ကိူန် အီ ကွယ် ဒီ မိူင် လာခိတ် တွိုန်၊ တဲး ဂေ ဟာဝ် ဒူင် ကွယ် ခုန်ဒီခမ် အာဟေစကီ ဒီ မိူင် ယေရူဆာလဲမ်။ ဂေ ဘော တး ဇမ် နာ ရေတ့် မိူင် ယေရူဆာလဲမ်၊ တး ဇမ် ခူပ် အိုမ် ဒိုင် ဘူင့် နာ ကွာ အီ ကွယ် ခူပ် ကာဘိုက် အီ တဲး အိုမ် လှဲ ဒူင် လး အီ ဒီ ခြိုင်။ 18 ဒေါ တး ဇမ် ဂေ ဒီ တီ၊ ဂေ စ်ု အီ ဟာဝ် ကာလာင် ဒီ ခုန်ဒီခမ်။ န့ ဘော မုး အာအေယာခိမ် အီ မုး ဂွန် အာဟီလာခီ၊ အီ အိုပ် တူတ့် ဒွန် မျုဝ် ခဲင် ဟုဝ် ဘော ဒါ စာရေ အီ စိူဝ် အာဆေဘာနာ ဘော ဒါ အီ စွယ် ဒါ စာရေ အီ စိူဝ် အာယုဝ်အာ၊ အီ မုး ဂွန် အာဆာပ်၊ ဂေ အူယ် ဝီ တီ ဘော ဝီ ဟာဝ် ဒူင် ကွယ် ဂေ တွိုန်။

19 ဒါ အီ အိုပ် တူတ့် ခဲင် ဟုဝ် ခုန်ဒီခမ် အာဆူရာ တွိုန်၊ အန် ဝီ တဝ်း ဒီ ဂေ၊ “တဲး ဘေ ဝီ ဝေန့် ကာလာင် ဒီ အာဟေစကီ တဝ်း၊ ‘ခုန်ဒီခမ် တာင်၊ အီ အိုပ် မိူင် အာဆူရီယာ တဝ်း၊ မာဆေ န့ မုး၊ အီ တဲး နဝ်း မဲ ယ ခဲ့ တီ။း 20 မဲ တဝ်း၊ မဲ ဟဲ့ မိုဝ်း အာငျာန်၊ ဟဲ့ မိုဝ်း ပွုန်၊ ဟဲ့ ကျ ဒီ ကာဂုဝ်း ဒီ ဒါ ဆိုက်။ ဂြုဝ်း မဲ တီ ယီ တူ မိုဝ်း ဒီခုဝ်။ ဒေါ တီ နီ၊ မဲ ဘိုင် အာဆေ၊ တဲး မဲ ယ ကာခဲန့် ဒီ အုဝ်။း 21 ပီ ဘိုင် မဲ ခုန်ဒီခမ် အဲဂိုပ်၊ န့ ပီ မဲ ဘိုင် ဂုဝ်�လင် အူ ညွင့် အီ ဟဲ့ ဟွတ့် ကာဘက်။ ဂုဝ်�လင် မဲ တီ၊ အန် ဒီ ဝီ ဒုး ကာလှုး ဒဲ ဒူအီ အီ ဘိုင် အန်။ ဒါ တာင် အီ အိုပ် ခဲင် မိူင် အဲဂိုပ်၊ အီ မုး ခုန်ဒီခမ် ဖာရုဝ် တွိုန်၊ အန် ဟဲ့ ဘူင် ပါယ် တီ ဒီ ဂေ ဒွန် အီ အီ ဒွိုမ် ဘိုင် အန်။ 22 ဆေ မဲ ဘော တဝ်း၊ “ယေ ဒီ ဘိုင် ဇဝ်ဖြာ အီ မုး ဇဝ်ဖြာ ပီ ကြိုပ် ယေ၊” အန် ဇဝ် တီ ဟဲ့ မုး အာဆေ။း မဲ အာဟေစကီ ဟဲ့ ဟွတ့် ပျာတ့် ဝဲန် ဒူင် စာ အီ မုး ဒူင် လှူ အီ ဒီ အန်။ မဲ ပီ ဝီ တဝ်း ဒီ ဂေ ဒူအီ မိူင် ယူဒါ ဘော ဒီ ဒူအီ မိူင် ယေရူဆာလဲမ်၊ “ဘေ ပွိုန် ဒီ ကြိုပ်၊ ပွိုန် ဒီ လှူ မီ ခဲင် မိူင် ယေရူဆာလဲမ်။”

23 ခုဝ်၊ ဒေါ တီ နီ၊ တဲး မဲ တး ကာဆဲန့် ဒီ ဒါ ကာညာ အုဝ် အီ မုး ခုန်ဒီခမ် အာဆူရာ။ အန် ဟဲ့ တဝ်း ဒီ ဝီ ဒွါ မင်ပြွင့် အာ ဟြဲန့် ဒုဝ် ဒီ မဲ၊ ဆေ မဲ မိုဝ်း ဒါ ဆိုက် အီ နပ် ဒီ ပဝ့် မင်ပြွင့် တီ။ 24 ဒါ ဘုဝ် အုဝ် အီ အိုပ် ဒူအီ ပြေတ့် မိူဝ်၊ မဲ တူ ပဲ။ မှဝ် မ့ပါယ် ပီ ဆီ ဘိုင် မဲ ဒါ ဆိုက် ဂေ လက်လဝ် အီ တး ခဲင် မိူင် အဲဂိုပ်။း 25 ဒဲင် တီ၊ ဆေ မဲ ထာင် ဇဝ်ဖြာ တူ စွယ် အုဝ်၊ အာဝ် မုး အာဝ် မှာန်။ ဇဝ်ဖြာ ဟဲ့ စ်ု အုဝ်၊ ဟာဝ် ကာဂုဝ်း ဒီ မိူင် တီ၊ ပျာတ့် ဝဲန်၊ တဲး န့ လိုဝ် တူတ့်။’”

26 အန် ဟဲ့ ဟွတ့် ကာလာင် ဂြုဝ်း တီ၊ အာအေယာခိမ် အီ မုး ဂွန် အာဟီလာခီ ဘော အာဆေဘာနာ ဘော အာယုဝ်အာ၊ ဂေ ဘော ကာလာင် ဒီ ဒါ အီ တွိုန် တဝ်း၊ “ယေ မှာန့် တဲး မဲ ကာလာင် ဂြုဝ်း အာရာမီ ဒီ ယေ။ ယေ ဟဲ့ နပ် ဂြုဝ်း တီ။ ကွဲ့ ကာလာင် ဂြုဝ်း ဟဲဘြဲ ဒီ ဂေ အီ ကွယ် ဒဲင် ရဲင် မိူင် တီ၊ ကွဲ့ တဲး ဂေ ပွိုန် ဒီ ထူမ်။”

27 ဒူအီ တွိုန် ဝီ တဝ်း ဒီ ဂေ၊ “ဒါ ကာညာ အုဝ် တူ စ်ု အုဝ် ကာလာင် ဂြုဝ်း ပါယ် တီ မီ ဒီ ဘေ ဘော ဒီ ဒါ ကာညာ ဘေ။ အန် စ်ု အုဝ် ကာလာင် ဘော ဒီ ဂေ အီ ကွယ် ဒဲင် ရဲင် မိူင်။ ဘော ဂေ လုဝ် ဝီ ဟူမ် အျီင် ဂေ၊ ဝီ ဒျီင် အိုမ် စှီ ဂေ ဒူပ် ဘေ ပါယ် တီ။”

28 ဟဲ့ ဟွတ့် ဒူအီ တွိုန် ဘော ဝီ ဒတ် တာင်၊ ကာလာင် ဂြုဝ်း ဟဲဘြဲ တဝ်း၊ “အိုယ် ဘေ ဒွန် အီ၊ တဲး ဘေ ထူမ် ဂြုဝ်း ပီ ကာလာင် ခုန်ဒီခမ် အာဆူရာ။ 29 ခုန်ဒီခမ် အာဆူရီယာ တဝ်း၊ ‘ကွဲ့ တဲး ဘေ ထူမ် ဂြုဝ်း ပီ ကာလုဝ် အာဟေစကီ ဒီ ဘေ။ အန် တူ ပွိုန် စွယ် ဘေ တဲး ဘေ လွတ် တ ဒါ ကာညာ အုဝ်။’ 30 ကွဲ့ တဲး အာဟေစကီ ယဲတ့် ဘေ ဘိုင် ဇဝ်ဖြာ။ ဆေ အန် တဝ်း၊ ‘ဇဝ်ဖြာ အီ ပွိုန် စွယ် အေ အာခ်ု မှာန်။’ အန် တူ တဲး ခုန်ဒီခမ် အာဆူရာ ပွိုန် ဒီ အိုပ် မိူင် အေ နီ။ ကွဲ့ တဲး ဘေ ညှိုမ် ဂြုဝ်း တီ။ 31 အာဝ် လုဝ် ထူမ် ဂြုဝ်း အန်။ ခုန်ဒီခမ် အာဆူရာ တဝ်း၊ ‘တဲး ဘေ ဝီ တး လာယ် ဒါခိုယ် ဒီ အုဝ်။ ဝီ တး ဒူင် ကွယ် အုဝ် ဒွန် အီ။ အုဝ် ဒီ တဲး ဒွန် အီ ဝီ ပွိုန် ဒီ ဟူမ် ဘ့လေ မာငုန် အန်၊ ဟူမ် ဘ့လေ ဒီပူ အန်။ ဒွန် အီ ဒီ ဝီ ပွိုန် ဒီ ဒျီင် အိုမ် ဒီ အိုမ် ခိုမ် ဘြိမ် အန်။’ 32 တဲး ကော ဇမ် ပန် ဒီ ဝီ တဲး အုဝ် ဘေ ဟာဝ် ဒီ မိူင် ပေါ မိူင် အီ ပီ မိူင် ဘြိမ် ဘေ။ မိူင် အီ မိုဝ်း ဒွန် မျုဝ်၊ အီ မိုဝ်း ငှုဝ် ဒီဂါဝ်၊ မိုဝ်း ဘော နာမန် ဘော ငါမ် မာဖျီန်။ တဲး ဘေ ရဝ်း အုဝ်၊ ကွဲ့ တဲး ဘေ ယမ်၊ တဲး ဘေ အိမ်။ ဘေ ကွဲ့ ထူမ် ဂြုဝ်း အာဟေစကီ။ အန် ကာလုဝ် ဘေ၊ ဆေ အန် တဝ်း၊ ‘ဇဝ်ဖြာ ဒီ စွယ် တဲး အေ လွတ်။’ 33 ဘေ ဟဲ့ ဒွိုမ် ယိုဝ် ဇဝ်ဖြာ ကာဒင် မှဝ် အီ ဟဲ့ စွယ် မိူင် ဂေ ဒူအီ အီ ကြိုပ် အန်။း ခုန်ဒီခမ် အာဆူရာ ယီ ဟဲ့ ပွိုန် ဒီ အိုပ် ဂေ ဘောကာဂ့လျီတ်။ 34 ဇဝ် ပီ ကြိုပ် ဂေ ဒူအီ ခဲင် မိူင် ဟာမာတ် ဘော ဒီ မိူင် အာရာဖာတ် ဂေ ကွယ် ဒီ မှဝ်။း ဘော ဇဝ်ဖြာ ပီ ကြိုပ် ဂေ ဒူအီ ခဲင် မိူင် အာဘာတ်၊ ဂေ ဒူအီ ခဲင် မိူင် ဆေဖာအိမ်၊ မိူင် ဟေနာ၊ မိူင် အီဝါ တွိုန်၊ ဇဝ်ဖြာ ဂေ တီ ကွယ် ဒီ မှဝ်။း ဂေ တူ ပွိုန် ခြဲ အုဝ်၊ ကွဲ့ တဲး အုဝ် အိုပ် မိူင် ဆာမာရီ။ 35 န့ ဘော မိုဝ်း ဇဝ်ဖြာ ဒွန် မိူင် ဒွန် ကာဒင်၊ အာဝ် ဒွိုမ် မိုဝ်း အီ ပွိုန် ခြဲ အုဝ်၊ ကွဲ့ တဲး အုဝ် အိုပ် မိူင် ဘြိမ် ဂေ။ ဆေ ဘေ ယီ ထာင်၊ ဇဝ်ဖြာ ဒီ စွယ် မိူင် ယေရူဆာလဲမ်၊ ကွဲ့ တဲး အုဝ် ပွိုန် ဒီ အိုပ်၊ န့ တူ မှာန်။’”

36 အန် ဟဲ့ ဟွတ့် တဝ်း ပါယ် တီ ဒူအီ ဂေ တွိုန် တူ တဝ်း မာဆေ။ ခုဝ်၊ ခုန်ဒီခမ် ဟဲ့ တဝ်း၊ “ကွဲ့ ဂြုဝ်း။”

37 ပန် တီ အာအေယာခိမ် အီ မုး ဂွန် အာဟီလာခီ၊ အီ အိုပ် တူတ့် ဒွန် မျုဝ် ခဲင် ဟုဝ် ခုန်ဒီခမ် ဘော ဒါ စာရေ တာင် အီ စိူဝ် အာဆေဘာနာ ဘော ဒါ တာင် အီ စိူဝ် အာယုဝ်အာ အီ မုး ဂွန် အာဆာပ် တွိုန်၊ ဂေ ဘော ကာယာတ့် ခြိုင် တာ ဂေ၊ ဝီ ဝေန့် ဒူင် ကွယ် အာဟေစကီ၊ ဝီ တး ခဲ ဘော ဂြုဝ်း ပီ တဝ်း ဒါ အီ အိုပ် တူတ့် ခဲင် ဟုဝ် ခုန်ဒီခမ် အာဆူရီယာ တွိုန်။