ခါန် 17
လွင် ခုန်ဒီခမ် အာဟုဝ်ဆေ အိုပ် မိူင် အီဆာရေလ
1 ခုန်ဒီခမ် အာခါတ် အိုပ် မိူင် ယူဒါ အာဒါ ဂိုဝ် ဒီ အာ ဆီနမ်။ ဒေါ အန် တီ အာဟုဝ်ဆေ အီ မုး ဂွန် အာအေလာဟာ ဘော ဝီ ဘဲန် ခုန်ဒီခမ် အီ အိုပ် မိူင် အီဆာရေလ။ အန် ကွယ် ခဲင် မိူင် ဆာမာရီ အာဒါ ဒိမ် ဆီနမ်။ 2 အာဟုဝ်ဆေ တွိုန် ယီ ဘူင် မှာပ်၊ ဘူင် မိူက် ပီ တူ အိုင် ဇဝ်ဖြာ။ ယီ ညှမ် ခြပ် မှာပ် ပီ ဘူင် ဂေ ခုန်ဒီခမ် အီဆာရေလ အီ ဟဲ့ ဘဲန် ခုန်ဒီခမ် နာ အာတ့် အန် တီ။
3-4 ဒေါ အန် တီ အာဟုဝ်ဆေ ဟဲ့ ဘဲန် မှာယ် ခုန်ဒီခမ် အာဆာမနေစ အီ အိုပ် မိူင် အာဆူရာ၊ ဟဲ့ ဟပ် ရွိုန် စိုင် ဒီ အန်။ ပန် တီ အာဟုဝ်ဆေ ယဲ့ ဟဲ့ တိုယ် ဟာဝ် ဒါလာမ် အန် ဒီ ခုန်ဒီခမ် အာဆုဝ် အီ အိုပ် မိူင် အဲဂိုပ်။ အန် မိူဝ် အာဝ် ဟူ ဒွါ ရွိုန် စိုင် ပီ ဒွိုမ် ဒွါ အန် ဒွန် ဆီနမ် ဒီ ခုန်ဒီခမ် ခဲင် မိူင် အာဆူရီယာ။ ခုန်ဒီခမ် ခဲင် မိူင် အာဆူရီယာ ဘော ယိုဝ် လွင် အန် တီ ဒွန် မျုဝ်၊ အန် ဘော နပ်၊ အာဟုဝ်ဆေ ဟဲ့ ခြာမ် ဒီ ဘ့လွာ့ ဝဲန် အန်။ ခုဝ်၊ အန် ဝီ ဟာဝ် ကာဂုဝ်း ဒီ အာဟုဝ်ဆေ။ 5 ခုန်ဒီခမ် အာဆူရာ ဘော ဒါ ဆိုက် အန်၊ ဂေ လိုပ် ခဲင် ကာဒါယ် မိူင် အီဆာရေလ ဘော ဟာဝ် ဇမ် ဒီ မိူင် ဆာမာရီ ဘော ကွယ် ရူပ် မိူင် ကော နုဝ့် အူယ် ဆီနမ်။ 6 အာဟုဝ်ဆေ ဟဲ့ အိုပ် မိူင် အန် အာဒါ ဒိမ် ဆီနမ်။ ဒေါ အန် တီ ခုန်ဒီခမ် အီ အိုပ် မိူင် အာဆူရာ ဘော တး လိုပ် ခဲင် မိူင် ဆာမာရီ ဘော ဒိုဝ်း ဟာဝ် ဂေ ဒူအီ အီဆာရေလ ဒီ မိူင် အာဆူရီယာ ဘော တဲး ဂေ ဝီ ကွယ် ဒီ မိူင် ဟာလာ ဘော ဒီ မိူင် ဟာပေါ ဘော ခူပ် ဘ့လဲင် အိုမ် ကောစန် အီ မုး ကာဒါယ် ဒူအီ မေဒီ။
7 ဒူအီ အီဆာရေလ လုဝ် ခမ် ပါယ် တီ ကူပ် တူ ဒူပ် ဆီချာ ဂေ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ၊ အီ ဒိုဝ်း တး ဂေ ခဲင် မိူင် အဲဂိုပ်၊ ကွဲ့ တဲး ခုန်ဒီခမ် ဖာရုဝ် တွိုန် အိုပ် ဂေ။ ဂေ ဟဲ့ ဝီ ကြိုပ် ဇဝ် ဘဲန် ကာဒင် ဘဲန် ကာဒင်။ 8 ဂေ ဝီ ဒူပ် ထုင်ဂျာမ် ဒူအီ အာမျုဝ် ဟဝ် ပဲ့ ဟဲ့ ညွန် ဝဲန် ဇဝ်ဖြာ အာတ့် လိုပ် ဂေ ဒူအီ အီဆာရေလ ခဲင် မိူင် ဂေ။ ဂေ ဝီ ဒူပ် ဘော ထုင်ဂျာမ် ပဲ့ ဟဲ့ စ်ု ခုန်ဒီခမ် အီဆာရေလ ဂေ ဘူင်။ 9 ဂေ ဒူအီ အီဆာရေလ ဝီ ပြာ ဒီ ဘူင် အီ တူ လဝ့် နဝ်း ဇဝ်ဖြာ၊ အီ မုး ဇဝ်ဖြာ ပီ ကြိုပ် ဂေ။ ဂေ ဝီ ဘူင် ဒူင် စာ၊ တဲး ဂေ ပွိုန် ဒီ ကြိုပ် ဒွန် နာ ဒွန် ပ့လုဝ့်။ ဘော ခဲင် မိူင် ဂေ ဘော ဒီ ကာစှူင့် ဘ်ု ဂေ မာန် မိူင်၊ ဂေ ဘူင် ပါယ် တီ။ 10 ဂေ ဝီ ဆမ် ကန်ထွန် ဂေ အာရိုပ် နာင် ကာနမ် အေဆူရာ ဒဲင် နွန် စာ ဒွန် ပ့လုဝ့် ဘော ဒီ ဒင် ဟေ တာင် ဒွန် ကာဒင်။ 11 ဂေ ဝီ လှူ ဆီနမ် အုး ငှုန်၊ ဒုဝ့် ဒီ ကာစှူင့် စာ ဒူင် လှူ ဂေ တီ၊ တဲး န့ ပီ ပီ ဘူင် ဂေ ဒူအီ အာမျုဝ် ဟဝ် အီ မုး ဒူအီ ပီ ညွန် ဝဲန် ဇဝ်ဖြာ အာတ့် လိုပ် ဂေ ဒူအီ အီဆာရေလ ခဲင် မိူင် ဂေ။ နာ တူ မွှိုမ် ဒွန် မျုဝ် ပီ ဘူင် ဂေ ဇိုဝ် တီ၊ န့ တဲး ဇဝ်ဖြာ ဝီ ရူ ဒီ ဂေ။ 12 ပဲ့ ဟဲ့ ဒွိုမ် တဝ်း ဇဝ်ဖြာ “ကွဲ့ ဘူင်၊” ဂေ ယီ ဝီ ဘူင်၊ ဝီ ကြိုပ် အာရိုပ် ဒွန် မျုဝ်။ 13 မာလဲ၊ ဇဝ်ဖြာ ဘော ဝီ ဒဲ့ ဒူအီ အီ ဘျာန် ဂြုဝ်း ဇဝ်ဖြာ ဘော ဂေ ဒူအီ အီ နပ် ဒီ ယိုဝ် ပီ ဘျ ဇဝ်ဖြာ၊ တဲး ဂေ ဝီ ကာလာင် ဒီ ဂေ ဒူအီ အီဆာရေလ ဘော ဒီ ဂေ ဒူအီ အာယူဒါ၊ တဲး ဂေ ကာလာင် ဒီ ဒူအီ တဝ်း၊ “ဘေ လုဝ် ဝဲန် နာ တူ မွှိုမ် ပီ ဘူင် ဘေ၊ ဝီ ဒူပ် ဒါရာ ပီ ဒမ် အုန် အုဝ် ဒီ ဒါ ဒါ ဘေ တွိုန်။ ဘေ လုဝ် ဘူင် တူတ့် ဒွန် မျုဝ် ပီ စ်ု အုဝ် ဘေ ဘူင် ဒေါ တိုယ် အုဝ် ဒဲစေန့် အုဝ် ဂေ ဒူအီ ဘျာန် ဂြုဝ်း အုဝ်၊ တဲး ဂေ တး ဒူင် ကွယ် ဘေ။”
14 ဂေ ဒူအီ အီဆာရေလ ယီ တူ ထူမ်။ ဂေ တဲး နဝ်း ဂေ ဒိူဝ် ကာဆဝ်၊ တဲး န့ ပီ ဒါ ဒါ ဂေ ဒေါ မွိုန်၊ အီ တူ ထူမ် ဂြုဝ်း ဇဝ်ဖြာ။ 15 ဂေ ဝီ ဝဲန် တူတ့် ဒါရာ ဇဝ်ဖြာ ဘော ပီ ဒွိုမ် ကာဆဲန့် ဒါ ဒါ ဂေ ဒီ ဇဝ်ဖြာ ဒေါ မွိုန်။ ဂေ ဘော ဝဲန် ဂြုဝ်း ပီ ကာလာင် ဇဝ်ဖြာ ဒီ ဂေ ဘဲန် ဇေန့် ဘဲန် ဇေန့်၊ တဲး ဂေ ဆာဒိက်။ ဂေ ဝီ ကြိုပ် အာရိုပ် အီ တူ မိုဝ်း ဒီခုဝ်၊ တဲး ဘော အာဆာက် ဂေ အာဝ် ဟူ မိုဝ်း ဒီခုဝ်။ ဂေ ဝီ ဘူင် ဒူပ် ဂေ ဒူအီ အီ ကွယ် ဒူပ် ဂေ၊ အီ မုး ဒူအီ ပီ တဝ်း ဇဝ်ဖြာ၊ “ကွဲ့ ဒူပ် ပီ ဘူင် ဂေ။”
16 ဂေ ဟဲ့ ဝဲန် တူတ့် ဒွန် မျုဝ် ဒါရာ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ။ ဂေ ဝီ ဘူင် အာရိုပ် မာမက် အာ ဒုဝ် ဘော ကန်ထွန် ပီ ကြိုပ် အီ နာင် ကာနမ် အေဆူရာ။ ဂေ ဘူင် ဘော ဟုဝ် ဇဝ် ဘာလ၊ ဝီ ကြိုပ် ဒွန် မျုဝ် ဇိုဝ် တီ။ 17 ဂေ ဝီ ဒိုဝ်း ဂွန် အီဘိုန့် ဂွန် အီမာယ် ဂေ၊ တဲး ဂေ ဝီ ဘဲန် ပီ ဒီ လှူ အီ ဒုဝ့် ဒီ ငဝ်။ ဂေ ဝီ ထူမ် ဒူပ် ပီ တဝ်း ဒါ ဘူ မိူင် ဘော ဂေ ဒူအီ အီ နပ် ဒီ ဘူင် မျလှယ့်။ ဂေ ဝီ ဘူင် အီ မွှိုမ် ကာအိး ပီ တူ အိုင် ဇဝ်ဖြာ။ ပီ ဘူင် ဂေ၊ န့ တဲး ဂေ စှိုမ်၊ တဲး ဇဝ်ဖြာ ရူ ဒီ ဂေ။
18 ခုဝ် အန် တီ၊ ဇဝ်ဖြာ ဘော ရူ ကာဆဝ် ဒီ ဂေ ဒူအီ အီဆာရေလ၊ ဘော ဝဲန် တူတ့် ဂေ၊ အာဝ် ဟူ ယွတ် ဂေ။ န့ ဘော ဂိတ် မီ ဂေ ဒူအီ အာယူဒါ၊ အီ ဆီ ဒူပ် ဇဝ်ဖြာ။ 19 ဂေ ဒူအီ အာယူဒါ မိူဝ် တူ ဒူပ် ဆီချာ ဒါရာ ဇဝ်ဖြာ။ ဘော ဂေ ဝီ ဒူပ် ပီ ဘူင် ဂေ ဒူအီ အီဆာရေလ တွိုန်။ 20 ဇဝ်ဖြာ ဘော ဝဲန် တူတ့် ခြိုဝ် ဒူအီ အီဆာရေလ၊ ဝီ တဲး ဂေ ကာဒုး ဒုက် ဒွန် မျုဝ်၊ ဘော တဲး အီ တး မှေတ့် ဂေ။ ဟဲ့ ဟွတ့်၊ ဇဝ်ဖြာ ဘော ဆုတ့် တဝ် ဂေ၊ အာဝ် ဟူ ယွတ် ဂေ။
21 ဒေါ ကာယဝ်း ဇဝ်ဖြာ ဒူအီ အီဆာရေလ ဒီ အာဒါဝိတ်၊ ဂေ ဝီ တဲး အာယေရုဝ်ဘုဝ် အီ မုး ဂွန် အာနေဘတ် တွိုန် ဘဲန် ခုန်ဒီခမ် ဂေ။ အန် ယဲ့ ဟဲ့ ကာဆုး ဒူအီ အီဆာရေလ၊ ကွဲ့ တဲး ဂေ ဒူပ် ဇဝ်ဖြာ၊ တဲး ဂေ ဝီ ဘူင် မှာပ် ကိူန် ကာဆဝ်။ 22 ပန် တီ ဒူအီ အာမျုဝ် အီဆာရေလ ဝီ ဘူင် ဟာဝ် မှာပ် တီ၊ ဒူပ် ပီ ဘူင် အာယေရုဝ်ဘုဝ်၊ တူ ဝဲန် မှာပ် ပီ ဘူင် ဂေ။ 23 ဂေ ဘူင် ပါယ် တီ တဲး ဇဝ်ဖြာ ကော ဝဲန် ဂေ ဒူအီ အီဆာရေလ၊ ကွဲ့ တဲး အန် ယိုဝ် ဂေ။ ပါယ် တီ န့ ဘဲန် ပီ ဒွိုမ် တဝ်း ဇဝ်ဖြာ ဒီ ဒူအီ ဘျာန် ဂြုဝ်း အန် ဘဲန် ဝီ ဘဲန် ဝီ။ ဒူအီ အီဆာရေလ၊ ဂေ မိူဝ် ဟူ ပွိုန် ဒီ ကွယ် ခဲင် မိူင် ဒူင် ကွယ် ဘြိမ် ဂေ။ ဂေ ကော ကာဒုး ဒီ ဟာဝ် ဘဲန် မှာယ် ဒူအီ အာဆူရာ ကော ဇမ် အာတိုဝ် နီ။
24 ခုန်ဒီခမ် အီ အိုပ် မိူင် အာဆူရာ ဘော ဒိုဝ်း ဒူအီ ခဲင် မိူင် ဘာဘဲ၊ မိူင် ဂူဆ၊ မိူင် အာဝါ၊ မိူင် ဟာမာတ် ဘော မိူင် ဆေဖာအိမ်၊ တဲး ဂေ ဟာဝ် ကွယ် ခဲင် မိူင် ဆာမာရီ၊ တဲး ဂေ ဝီ ကာဒါင် ဒူအီ အီဆာရေလ။ ဂေ ဒူအီ ဒွန် မိူင် တွိုန် တဲး မိူင် ဆာမာရီ ဝီ ဘဲန် မိူင် ဂေ၊ တဲး ဂေ ကွယ် ဒွန် နာ ဒွန် ပ့လုဝ့်။ 25 ဒေါ ဂုဝ် တး ကွယ် ဂေ ဒွန် နာ ဒွန် ပ့လုဝ့်၊ ဂေ တူ ကြိုပ် ဇဝ်ဖြာ။ ခုဝ်၊ ဇဝ်ဖြာ ဘော တဲး မာခြင်ဆီ တး ကဝ့် ယမ် ဂေ မင် အီ။ 26 ဂေ မင် အီ ဝီ ကာလာင် လွင် အန် တီ ဒီ ခုန်ဒီခမ် အာဆူရာ တဝ်း၊ “မဲ ဟဲ့ တဲး ဒူအီ ဒွန် ခြိုဝ် ဒွန် မျုဝ် တး ကွယ် ခဲင် ရဝ် ခဲင် မိူင် ဆာမာရီ တွိုန်။ ဂေ ယီ တူ နပ် ဒီ ကြိုပ် ဇဝ် အီ ဘ်ု မိူင် တီ။ အန် ဇဝ် တီ ဟဲ့ တဲး မာခြင်ဆီ တး ကဝ့် ယမ် ဂေ မင် အီ ကူပ် တူ နပ် ဂေ ဒီ ကြိုပ် အန် ဇဝ် အီ ဘ်ု မိူင် တီ။”
27 ပန် တီ ခုန်ဒီခမ် အီ အိုပ် မိူင် အာဆူရာ ဝီ တဝ်း၊ “တဲး ဘေ ဟာဝ် ဒဲ့ ဒူအီ လှူ ဒီ ဇဝ်ဖြာ ပဲ့ ဟဲ့ မှေတ့် ဘေ ခဲင် မိူင် ဆာမာရီ အူ ဝီ၊ တဲး အန် ဝီ ဝေန့် ကွယ် ခဲင် မိူင် ဘြိမ် အန်၊ တဲး အန် ဝီ မာနုဝ် ဘေ ပီ ဒီ ပါယ် ဘေ ဒီ ကြိုပ် ဇဝ်ဖြာ အီ ဘ်ု မိူင် တီ။” 28 ပါယ် တီ ဒါ အီ လှူ ဒီ ဇဝ်ဖြာ ပဲ့ ဟဲ့ မှေတ့် ဟာဝ် ဂေ ဒီ မိူင် ဆာမာရီ တွိုန်၊ အူ ဝီ ဘော ဝီ တး ကွယ် ဒီ မိူင် ဘေဒါအေန်၊ ဝီ မာနုဝ် တဲး ဂေ နပ် ပီ ဒီ ပါယ် ဒီ ကြိုပ် ဂေ ဇဝ်ဖြာ။
29 ဂေ ဒူအီ မျုဝ် မှဝ် မျုဝ် အန်၊ ဂေ ဘော ဘူင် အာရိုပ် ပီ ကြိုပ် ဂေ၊ ဘ့လေး ခဲင် မိူင် ဘဲန် မိူင် ဒူင် တး ကွယ် ဂေ။ ဂေ ဘော ဘ့လေး အာရိုပ် ရာင် ဂေ တီ ဒီ ဒူင် စာ ပဲ့ ဟဲ့ ဒွိုမ် ဘူင် ဂေ ဒူအီ ဆာမာရီ တွိုန်။ 30 ဂေ ဒူအီ အီ တး ကွယ် မိူင် ဘာဘဲ၊ ဂေ ဘော ဘူင် ဒီ ကြိုပ် နာင် ကာနမ် အီ စိူဝ် ဆူခုတ်ဘေနုတ်။ အီ မုး ဒူအီ ဂူဆ၊ ဂေ ဘူင် အာရိုပ် ရာင် ဇဝ် အာနေလ။ အီ မုး ဒူအီ မိူင် ဟာမာတ်၊ ဂေ ဘူင် ဒီ ကြိုပ် ဇဝ် အာဆီမ။ 31 ဂေ ဒူအီ အာဝါ၊ ဂေ ဝီ ဘူင် ဒီ ကြိုပ် ဇဝ် အာနီဘဟာစ ဘော ဇဝ် အာဒါတာက်။ အီ မုး ဒူအီ မိူင် ဆေဖာအိမ် ဂေ ဒိုဝ်း ဂွန် ဂေ၊ ဒုဝ့် ခဲင် ငဝ်၊ ဝီ လှူ ဒီ ဇဝ် အာတာရမ်မာလေက် ဘော ဒီ ဇဝ် အာနမ်မဲလေက်။ ဂေ တဝ်း၊ န့ မုး ဇဝ်ဖြာ အီ ဘ်ု မိူင် ဆေဖာအိမ် တွိုန်။ 32 အီ မုး ဇဝ်ဖြာ အာခါခ်ု မိူဝ် ဂေ ရုဝ်ဆေ။ ဂေ ယီ ကြိုပ် ဘော ဇဝ် ပီ ကြိုပ် ဂေ။ ဂေ ဝီ ဒိုဝ်း ဒူအီ ကာတဲ ဂေ၊ တဲး ဂေ ဝီ ဘဲန် ဒါ အီ လှူ ဒီ ဇဝ် ပီ ကြိုပ် ဂေ၊ တဲး ဂေ လှူ ပီ ဒီ လှူ ဂေ ဒီ ကာစှူင့် စာ တွိုန်။ 33 ပါယ် တီ ဂေ ဘူင် အာ မျုဝ်။ ဇဝ်ဖြာ မိူဝ်၊ ဂေ ကြိုပ်။ ဘော ဇဝ် အာရိုပ် ပီ ဒွိုမ် ကြိုပ် ဂေ ခဲင် မိူင် ဘြိမ် ဂေ၊ ဂေ တူ ဝဲန်။
34 ဂေ ဝီ ဒူပ် ဟိတ် ထုင်ဂျာမ် ဂေ အာတ့် နီ၊ ကော ဇမ် ဒေါ တီ နီ။ ဂေ တူ ကြိုပ် ဇဝ်ဖြာ၊ တူ ဒူပ် ဒါရာ ပီ ဒမ် အုန် ဇဝ်ဖြာ ဒီ ဂေ၊ အီ မုး ဒါရာ ပီ ကာလာင် အန် ဒီ လှုက်လှာန် အာကူပ် အီ မုး ဒူအီ အီဆာရေလ တွိုန်။ 35 ဂေ ဒူအီ အီဆာရေလ ယီ မုး အာမျုဝ် ပဲ့ ဟဲ့ ဒွါ ဇဝ်ဖြာ ကာဒိက် ဆတ်ဇာ တဝ်း၊ “ဘေ ကွဲ့ ကြိုပ် ဇဝ် ပေါ အူ ကာဒင်။ အာဝ် လုဝ် မုတ် ဂိုပ်၊ အာဝ် လုဝ် ဒူပ်၊ အာဝ် လုဝ် လှူ ပီ ဒီ လှူ။ 36 တဲး ဘေ ကြိုပ် ဂိုပ် ဘော လှူ မီ ဒီ ဇဝ်ဖြာ အီ မိုဝ်း ပွုန် တာင်၊ အီ ဟဲ့ ဒိုဝ်း လေး ဘေ ခဲင် မိူင် အဲဂိုပ် တွိုန်။ 37 တဲး ဘေ ဒူပ် ဆေဆေ မီ ဒါရာ အီ မုး ဒါရာ ပဲ့ ဟဲ့ ဒမ် အုန် ဇဝ်ဖြာ ဒီ ဘေ၊ ပဲ့ ဟဲ့ ဒဲမ် အုန် အန် ဒွါ ဒီ ဘေ။ အာဝ် လုဝ် ရုဝ်ဆေ ကြိုပ် ဇဝ် ဘဲန် ကာဒင် ဘဲန် ကာဒင်။ 38 ဘေ ကွဲ့ ပိဝ် ကာဒိက် ဆတ်ဇာ ပဲ့ ဟဲ့ ဒွါ အုဝ် ဒီ ဘေ တီ။ ဘေ ကွဲ့ ကြိုပ် ဇဝ် ဘဲန် ကာဒင် ဘဲန် ကာဒင်။ 39 တဲး ဘေ ကြိုပ် မီ ဇဝ်ဖြာ၊ အီ မုး ဇဝ်ဖြာ ပီ ကြိုပ် ဘေ။ အန် မုး အန် ဇဝ် အီ စွယ် ဘေ လွတ် ရန်ဆူ ဘေ ဒွန် မျုဝ်။”