ခါန် 16
လွင် ခုန်ဒီခမ် အာခါတ် အိုပ် မိူင် ယူဒါ
1 ခုန်ဒီခမ် အာဘေခါ အီ မုး ဂွန် အာရေမာလီ ဟဲ့ အိုပ် မိူင် အီဆာရေလ အာဒါ ဂိုဝ် ဒီ ဘူ ဆီနမ်။ ဒေါ အန် တီ အာခါတ် အီ မုး ဂွန် အာယုဝ်ထာမ် ဝီ ဘဲန် ခုန်ဒီခမ် ခဲင် မိူင် ယူဒါ။ 2 ဒေါ ဘဲန် အန် ခုန်ဒီခမ်၊ အာဆာက် အန် ဟဲ့ နုဝ့် အာ ဂိုဝ် ဆီနမ်။ အန် ဘော အိုပ် ဘိုင် မိူင်၊ ကွယ် ခဲင် မိူင် ယေရူဆာလဲမ် အာဒါ ဂိုဝ် ဒီ ဒဝ် ဆီနမ်။ အန် ယီ တူ ဘူင် နာ ဘွတ် နာ မွှိုမ် ပီ အိုင် ဇဝ်ဖြာ ပီ ကြိုပ် အန်။ အာဝ် ပီ ဒါ ဒါ အန် အီ စိူဝ် အာဒါဝိတ် တွိုန်။ 3 အန် ဘူင် ဒူပ် ထုင်ဂျာမ် ဂေ ဒူအီ ပဲ့ ဟဲ့ ဒွိုမ် ညွန် ဝဲန် ဇဝ်ဖြာ အာတ့် လိုပ် ဒူအီ အီဆာရေလ ခဲင် မိူင် တီ။ အန် ဘူင် အီ မွှိုမ် ကာအိး ပီ ပဲ့ ဟဲ့ ဘူင် ဂေ ဒူအီ အီ တူ ညှိုမ် ဇဝ်ဖြာ။ အန် ဘော ဒိုဝ်း ဂွန် အီမာယ် အန် တဲး အန် ဘဲန် ပီ လှူ အီ ဒုဝ့် ဒီ ငဝ်။
4 အန် ဘော လှူ ပီ လှူ အီ ဒုဝ့် ဒီ ငဝ် ဘော ပီ လှူ အီ အုး ငှုန် ဒီ ဒူင် စာ ဒွန် ပ့လုဝ့် ဘော ဒဲင် နွန် ဒွန် နွန် ဘော ဒီ ဒင် ဟေ တာင် ဒွန် ကာဒင်။
5 ဒေါ အန် တီ န့ မုး ခုန်ဒီခမ် အာရေဆိန် အီ အိုပ် မိူင် အာရာမ် ဘော ခုန်ဒီခမ် အာဘေခါ အီ မုး ဂွန် အာရေမာလီ အီ အိုပ် မိူင် အီဆာရေလ တွိုန် ဂါယ် ဘော တး တဝ်း ဒီ ကာဂုဝ်း ဒီ မိူင် ယေရူဆာလဲမ်။ ဂါယ် တး ရူပ် မိူင် ယေရူဆာလဲမ် ဒူင် ကွယ် ခုန်ဒီခမ် အာခါတ် တွိုန်။ မာလဲ၊ ဂါယ် တူ ပဲ အန်။ 6 ပန် တီ ခုန်ဒီခမ် အာရေဆိန် အီ အိုပ် မိူင် အာရာမ် တွိုန်၊ အန် ဘော ဝီ ဒိုဝ်း ဝိဝ် မိူင် အေလာတ်၊ တဲး န့ ဝီ ဘဲန် မိူင် အန်။ အန် ဘော ဆုတ့် တဝ် ဒူအီ အာယူဒါ ဂေ အီ ကွယ် မိူင် အေလာတ် တီ။ ဒူအီ အာရာမ် ဘော ဝီ တး ကွယ် မိူင် အေလာတ် တီ ကော ဇမ် အာတိုဝ် နီ။
7 ခုန်ဒီခမ် အာခါတ် တွိုန် ဘော စ်ု ဒါလာမ် အန် ဟာဝ် ဒူင် ကွယ် အာတီကာလာတ်ဘီလေဆာ အီ မုး ခုန်ဒီခမ် ခဲင် မိူင် အာဆူရာ တဝ်း၊ “အုဝ် မုး ဒဲစေန့် မဲ အီ ဟပ် စိုင် ဒီ မဲ။ အုဝ် မှာန့်၊ တဲး မဲ တး စွယ် အုဝ်၊ တဲး အုဝ် ပဲ ခုန်ဒီခမ် အာရာမ် ဂါယ် ခုန်ဒီခမ် အီဆာရေလ။ ဂါယ် ဟဲ့ တး ဘဲန် ရန်ဆူ အုဝ်၊ တဝ်း ဒီ ကာဂုဝ်း ဒီ အုဝ်။” 8 အာခါတ် ဘော ဒိုဝ်း ရွိုန် ဂေ ခြိဝ် အီ ကွယ် ခဲင် ဟုဝ် ဇဝ်ဖြာ ဘော ခဲင် ဟုဝ် အန်၊ ဒွါ ဟာဝ် ဒီ ခုန်ဒီခမ် အာဆူရာ၊ တဲး န့ ဘဲန် လက်ဆွင် အန်။ 9 ခုန်ဒီခမ် အာဆူရာ ဘော ထူမ် ဂြုဝ်း အာခါတ် တွိုန်။ အန် ဘော တး ကာဂုဝ်း ဒီ မိူင် ဒါမာခူ ဘော ပဲ မိူင် တီ။ အန် ဘော ဒိုဝ်း ဒူအီ မိူင် ဒါမာခူ တီ၊ တဲး ဂေ ကာထုဝ့် ကွယ် ဒီ မိူင် ကီရ။ အန် ဘော ငဝ်း ယမ် ခုန်ဒီခမ် အာရေဆိန်။
10 ခုန်ဒီခမ် အာခါတ် ဘော ဝီ ဟာဝ် ဒီ မိူင် ဒါမာခူ၊ ဟာဝ် လဲ ဒီ ခုန်ဒီခမ် အာဆူရာ အီ စိူဝ် အာတီကာလာတ်ဘီလေဆာ တွိုန်။ အန် ဘော ယိုဝ် ကာစှူင့် လှူ ဂေ ဒီ မိူင် တီ။ အန် ဘော မှာယ် ပီ ပါယ် အာရိုပ် ရာင် ကာစှူင့် တီ။ အန် ဘော ဂဝ် ပီ ပါယ် အီ ဒီ ဘူင်၊ ပီ ပါယ် အီ ဒီ ရန့်။ အန် ဘော ဝီ တိုယ် ဒီ အာအူရီယာ အီ မုး ဒါ အီ လှူ ဒီ ဇဝ်ဖြာ ခဲင် မိူင် ယေရူဆာလဲမ်။ 11 အာအူရီယာ ဘော ဘူင် ကာစှူင့် လှူ တီ၊ တဲး န့ ပီ ပီ ကာလာင် တး ခုန်ဒီခမ် အာခါတ် တွိုန် ဒွန် မျုဝ်။ အန် ဟဲ့ ဟွတ့် ဘူင် အာတ့် တး ဇမ် ခုန်ဒီခမ် အာခါတ် ဒီ မိူင် ယေရူဆာလဲမ်။ 12 ဒေါ ဝီ တး ဇမ် ခုန်ဒီခမ် အာခါတ် အန် ဘော တး ယိုဝ် ကာစှူင့် တီ။ အန် ဘော လှူ ပီ လှူ အန် ဒဲင် ကာစှူင့် တီ။ 13 အန် ဘော ဒိုဝ်း ပီ လှူ အီ ဒုဝ့် ဒီ ငဝ်၊ ပီ လှူ ကာပဲ့ ဂေ ဒီဂါဝ် ဘော ပီ လှူ ပီ ဒီ ဒျီင် ပီ ဒီ လုဝ် လှုဝ်။ အန် ဘော လှူ ပီ ဒီ လှူ အီ ကွယ် ကာဇု ဟူမ် ရိုမ်၊ ဒိုဝ်း ဘော နှာမ် ကာထေတ့် ဒီ ကာစှူင့် တီ။ 14 အီ မုး ကာစှူင့် ဘွင့် အီ ကွယ် နာ အာတ့် ဟုဝ် ဇဝ်ဖြာ၊ အန် ဘော ဝီ ကာထုဝ့် ဟာဝ် အုန် နာ ကွာ ကာစှူင့် ကာမာယ် တွိုန်။
15 ဟဲ့ ဟွတ့်၊ ခုန်ဒီခမ် အာခါတ် ဘော ဝီ ကာလာင် ဒီ ဒါ အီ လှူ ဒီ ဇဝ်ဖြာ အီ စိူဝ် အာအူရီယာ တဝ်း၊ “ကာစှူင့် လှူ ဘူင့် တာင် အီ ကာမာယ်၊ တဲး မဲ လှူ ပီ လှူ အီ ဒုဝ့် ဒီ ငဝ်၊ ဘော ပီ လှူ ကာပဲ့ ဂေ ဒီဂါဝ် ဘာ ဒီ အပ် ဘော ပီ ဒီ လှူ ခုန်ဒီခမ် အီ ဒုဝ့် ဒီ ငဝ် ဘော ပီ လှူ အန် အီ မုး ကာပဲ့ ဂေ ဒီဂါဝ် ဘော ပီ လှူ ဒူအီ ဘော ရဝ် ဘော ကာင် ဘော ကြုဝ် ပီ လှူ ဂေ အီ မုး ကာပဲ့ ဂေ ဒီဂါဝ် တွိုန်၊ တဲး ဂေ ဘောကာဂ့လျီတ် ဒိုဝ်း တး ဒုဝ့် ဒီ ငဝ် ဒဲင် ကာစှူင့် ဘူင့် နီ။ ဘော နှာမ် ပီ ဒီ လှူ ဒွန် မျုဝ် မိူဝ် ဒိုဝ်း ခြဝ်း ဒဲင် ကာစှူင့် ဘူင့် တီ။ အီ မုး ကာစှူင့် ဘွင့် အီ ဘြိမ်၊ တဲး န့ ဘဲန် ကာစှူင့် ဒူင် ဒီ ဒီမွှတ် အုဝ် ဇဝ်ဖြာ။” 16 ဒါ အီ လှူ ဒီ ဇဝ်ဖြာ အီ စိူဝ် အာအူရီယာ ဘော ဘူင် ဒူပ် ပီ တဝ်း ခုန်ဒီခမ် အာခါတ် တီ။
17 ခုန်ဒီခမ် အာခါတ် ဘော ဒိုဝ်း ဝဲန် ဘ့လ ဂေ ဘာင် ဘြေတ့် အီ ဒိုက် ဒီ ကာစှူင့် မ့ပါန် အိုမ် တွိုန်။ အန် ဘော ဒိုဝ်း ဝဲန် ဘော မ့ပါန် အီ ကွယ် ဒဲင် ကာစှူင့် တွိုန်။ အန် ဘော ဒိုဝ်း လေး မ့ပါန် တာင် အီ ကွယ် ဒဲင် အာရိုပ် မာမက် ဘွင့် တွိုန်၊ ဝီ ဘ့လေး အုန် ဒဲင် မာဝ်။ 18 အီ မုး ထိုပ် ပီ ဘူင် အုန် ဂေ ခဲင် ဝဲင် ဟုဝ် ဇဝ်ဖြာ တဲး အီ ကွယ် ဆီငဲ ဒီလှဝ် ဘော ဟုဝ် အီ ကွယ် ဒူင် လိုပ် ခုန်ဒီခမ် ခဲင် ဟုဝ် ဇဝ်ဖြာ၊ အန် ဘော ယဝ်း ဝဲန် တဲး န့ လဝ့် နဝ်း ခုန်ဒီခမ် အာဆူရာ တွိုန်။