1 ခုန်ဒီခမ် အာယေရုဝ်ဘုဝ် ဘော အိုပ် ဘိုင် မိူင် အီဆာရေလ အာဒါ အာ ဂိုဝ် ဒီ ဘူ ဆီနမ်။ ဒေါ အန် တီ အာဇာရီယာ အီ မုး ဂွန် ခုန်ဒီခမ် အာမာဇီယာ အိုပ် မိူင် ယူဒါ တွိုန်။ အန် ဝီ ဘဲန် ခုန်ဒီခမ် ပ့လု ဂုန့် အန်။ 2 ဒေါ ဘဲန် အာဇာရီယာ ခုန်ဒီခမ် အာဆာက် အန် ဟဲ့ ဂိုဝ် ဒီ ဒဝ် ဆီနမ်။ အန် ဘော အိုပ် ဘိုင် မိူင် ယူဒါ၊ ကွယ် ခဲင် မိူင် ယေရူဆာလဲမ် အာဒါ ဖန် ဂိုဝ် ဒီ အာ ဆီနမ်။ မာ အန် စိူဝ် နာင် ယေခေါလီ အီ ဒွိုမ် ကွယ် ခဲင် မိူင် ယေရူဆာလဲမ် ဆေဆေ။ 3 အာဇာရီယာ တွိုန် ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ အန် ဘူင် ဒူပ် ပီ ပါယ် ဂုန့် အန် အီ စိူဝ် အာမာဇီယာ တွိုန်။ 4 အန် ယီ တူ ပျာတ့် ဝဲန် ဒူင် စာ တွိုန်။ ဒူအီ ဂေ ဆီ လှူ ပီ လှူ ဂေ အီ ဒုဝ့် ဒီ ငဝ် ဘော အီ အုး ငှုန် ဒီ တီ။

5 ဇဝ်ဖြာ ဘော တဲး ခုန်ဒီခမ် အာဇာရီယာ တီ မိုဝ်း ဆဝ် ဒု ကော ဇမ် ပန် ကတ် ယမ် အန်။ အန် ဟဲ့ ကွယ် ခဲင် ဟုဝ် ပေါ အူ ပ့လုဝ့်။ ဂွန် အီမာယ် အန် အီ စိူဝ် အာယုဝ်ထာမ် ဘော ဝီ ကာဒါင် အန်၊ ဘဲန် အီ အိုပ် ခဲင် ဟုဝ် ခုန်ဒီခမ် ဘော အိုပ် ဒူအီ အီ ကွယ် ခဲင် မာန် မိူင် တွိုန်။ 6 လွင် ပဲ့ ဟဲ့ ဘူင် အာဇာရီယာ အီ ညှမ် ဒွိုမ် ကာလာင်၊ ဂေ ဟဲ့ ဒဲမ် အုန် ခဲင် ဘပ် ခုန်ဒီခမ် ယူဒါ။ 7 အာဇာရီယာ တွိုန် ဘော ယမ်၊ ဂေ ဘော ဒိပ် အန် ခဲင် မိူင် အာဒါဝိတ် ဒူပ် ဒါ ဒါ အန်။ ဂွန် အီမာယ် အန် အီ စိူဝ် အာယုဝ်ထာမ် ဘော ဝီ ပ့လု အန် ဘဲန် ခုန်ဒီခမ်။

8 အာဇာရီယာ ဟဲ့ ဘဲန် ခုန်ဒီခမ် အီ အိုပ် မိူင် ယူဒါ အာဒါ အူယ် ဂိုဝ် ဒီ ဒါ ဆီနမ်။ ဒေါ အန် တီ အာဆာခါရာ အီ မုး ဂွန် အာယေရုဝ်ဘုဝ် ဘော ဝီ အိုပ် ဘိုင် မိူင် အီဆာရေလ၊ ကွယ် ခဲင် မိူင် ဆာမာရီ အာဒါ ဒဝ် မာဂျီန်။ 9 အာဆာခါရာ တွိုန် ယီ ဘူင် ပီ တူ အိုင် ဇဝ်ဖြာ၊ ဘူင် ပီ ပီ ဒွိုမ် ဘူင် ဒါ အန် အီ စိူဝ် အာယေရုဝ်ဘုဝ်၊ အီ မုး ဂွန် အာနေဘတ် တွိုန်။ အန် ဘူင် ဒူပ် ဘော ပဲ့ ဟဲ့ ကာဆုး ဒါ အန် တဲး ဂေ ဒူအီ အီဆာရေလ ဘူင်။

10 န့ ယီ မုး အာဆာလူမ် အီ မုး ဂွန် အာယာဘေတ်၊ အန် ဘော ဝီ ခြာမ် ဒီ ဘ့လွာ့ ဝဲန် အာဆာခါရာ။ အန် ဘော ဝီ ငဝ်း ယမ် အာဆာခါရာ ဒီ အာတ့် ဒူအီ ကိူန်။ ဟဲ့ ဟွတ့်၊ အန် ဘော ဝီ ဘဲန် ခုန်ဒီခမ်။ 11 လွင် ပဲ့ ဟဲ့ ဘူင် အာဆာခါရာ တွိုန်၊ ဟဲ့ ဒဲမ် အုန် ခဲင် ဘပ် ခုန်ဒီခမ် ဒူအီ အီဆာရေလ။

12 ပါယ် တီ န့ ဘော ဘဲန် ပီ ဒွိုမ် ကာလာင် ဇဝ်ဖြာ ဒီ အာယေဟူ ဒေါ တဝ်း အန်၊ “လှုက်လှာန် မဲ ဒီ ပွိုန် ဒီ အိုပ် မိူင် အီဆာရေလ အာဒါ ဖွုန် စုဝ်။”

13 အာအူဇီယာ ဟဲ့ အိုပ် မိူင် ယူဒါ အာဒါ အူယ် ဂိုဝ် ဒီ ဒိမ် ဆီနမ်၊ အာဆာလူမ် အီ မုး ဂွန် အာယာဘေတ်၊ အန် ဘော ဝီ ဘဲန် ခုန်ဒီခမ် ခဲင် မိူင် ဆာမာရီ။ အန် အိုပ် မိူင် အာဒါ အူ မာဂျီန်။ 14 ပန် တီ န့ မုး အာမေနာဟဲမ် အီ မုး ဂွန် အာကာတီ။ အန် ဘော တး ဒီ မိူင် ဒီရာစာ၊ တး ဇမ် ဒီ မိူင် ဆာမာရီ ဘော ငဝ်း ယမ် အာဆာလူမ် အီ မုး ဂွန် အာယာဘေတ်။ အန် ဘော ဝီ ဘဲန် ခုန်ဒီခမ် ကာဒါင် အာဆာလူမ် တွိုန်။

15 လွင် ပဲ့ ဟဲ့ ဘူင် အာဆာလူမ် ဘော လွင် ပဲ့ ဟဲ့ ခြာမ် အန် ဒီ ဘ့လွာ့ ဝဲန် အာဆာခါရာ၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။

16 ဒေါ အန် တီ အာမေနာဟဲမ် ဘော လေး ခဲင် မိူင် ဒီရာစာ၊ ဟာဝ် ကာဂုဝ်း ဘော ပျာတ့် မိူင် ထီဖာဆာ ဘော ဒူအီ အီ ကွယ် ခဲင် မိူင် တီ ကူပ် တူ ဝိုဝ်း ဂေ မာလုဝ်း မိူင်၊ တဲး အန် လိုပ်။ အန် ဘော ပြေး ဘော ဝတ့် ဂေ ယာ တူ အး ဒွန် အီ ခဲင် မိူင် တီ။

17 အာဇာရီယာ အီ မုး ခုန်ဒီခမ် ယူဒါ တွိုန် ဘော အိုပ် မိူင် အာဒါ အူယ် ဂိုဝ် ဒီ ဒိမ် ဆီနမ်။ ဒေါ အန် တီ အာမေနာဟဲမ် အီ မုး ဂွန် အာကာတီ ဘော ဝီ ဘဲန် ခုန်ဒီခမ် အိုပ် ဘိုင် မိူင် အီဆာရေလ၊ အိုပ် ကွယ် ခဲင် မိူင် ဆာမာရီ အာဒါ ဂိုဝ် ဆီနမ်။ 18 အန် ယီ ဘူင် ပီ တူ အိုင် ဇဝ်ဖြာ။ အန် တူ ဝဲန် မှာပ် ပီ ဒွိုမ် ဘူင် အာယေရုဝ်ဘုဝ် အီ မုး ဂွန် အာနေဘတ် ဘော ပဲ့ ဟဲ့ ကာဆုး အန် ဒူအီ အီဆာရေလ ဘူင်။

19 ဒေါ အန် တီ ခုန်ဒီခမ် အာဘူလာ အီ အိုပ် မိူင် အာဆူရာ၊ အန် ဘော ဝီ တး ကာဂုဝ်း ဒီ မိူင် အီဆာရေလ။ အာမေနာဟဲမ် ဘော ကာဒုး ဒီ ဒွါ ရွိုန် အူ ဟြဲန့် ထာလေန် ဒီ အန်။^a 20 အာမေနာဟဲမ် ဘော ကာဒုး ဒီ ဂဲပ် ရွိုန် ဒီ ဂေ ဒူအီ အီဆာရေလ။ ဒူအီ ခြမ် ဒွန် အီ လုဝ် ဒွါ ရွိုန် ညဲတ့် အူ ဝီ ဖန် ဂိုဝ် ဘူင့်၊ တဲး ဂေ ပွိုန် ဒီ ဒွါ ဒီ ခုန်ဒီခမ် ခဲင် မိူင် တွိုန်။ ပန် တီ ခုန်ဒီခမ် ခဲင် မိူင် အာဆူရာ ဘော ဝီ ဝိဝ်၊ အာဝ် ဟူ ကာဂုဝ်း ဒီ မိူင် အီဆာရေလ။ 21 လွင် ပဲ့ ဟဲ့ ဘူင် အာမေနာဟဲမ် အီ ညှမ် ဒွိုမ် ကာလာင်၊ ဟဲ့ ဒဲမ် အုန် တူတ့် ဒွန် မျုဝ် ခဲင် ဘပ် ခုန်ဒီခမ် အီဆာရေလ။ 22 အာမေနာဟဲမ် ဘော ယမ်၊ ဂေ ဘော ဒိပ် အန် ဒူပ် ဒါ ဒါ အန်။ ဂွန် အီမာယ် အန် အီ စိူဝ် အာဘေခါဟီ ဘော ဝီ ပ့လု အန်၊ ဘဲန် ခုန်ဒီခမ်။

23 ခုန်ဒီခမ် အာဇာရီယာ အီ မုး ခုန်ဒီခမ် ဒူအီ အာယူဒါ ဘော အိုပ် မိူင် အာဒါ ဖန် ဂိုဝ် ဆီနမ်။ ဒေါ အန် တီ အာဘေခါဟီ အီ မုး ဂွန် အာမေနာဟဲမ် ဘော ဝီ အိုပ် ဘိုင် မိူင် အီဆာရေလ၊ ကွယ် ခဲင် မိူင် ဆာမာရီ အာဒါ အာ ဆီနမ်။ 24 အာဘေခါဟီ တွိုန် ဘူင် ပီ တူ အိုင် ဇဝ်ဖြာ။ အန် တူ ဝဲန် မှာပ် ပီ ဒွိုမ် ဘူင် အာယေရုဝ်ဘုဝ် အီ မုး ဂွန် အာနေဘတ်။ အန် မိူဝ် တူ ဝဲန် မှာပ် ပဲ့ ဟဲ့ ကာဆုး အန် ဂေ ဒူအီ အီဆာရေလ ဘူင်။ 25 န့ ဘော မုး အာဘေခါ အီ မုး ဂွန် အာရေမာလီ အီ မုး အာမူ အာမာတ် အာဘေခါဟီ။ အန် ဘော ဝီ ခြာမ် ဒီ ဘ့လွာ့ ဝဲန် အာဘေခါဟီ။ အန် ဘော ဝီ ဒဲ့ ဒူအီ အာဂီလေအာတ် ဖန် ဂိုဝ် ဝီ တး ငဝ်း ယမ် ခုန်ဒီခမ်။ အန် ဘော ငဝ်း ဘော အာကောဖ ဂါယ် အာလေဟ၊ အီ ကွယ် ရိုမ် ဒူပ် ခုန်ဒီခမ် ခဲင် ဟုဝ် အန် ခဲင် မိူင် ဆာမာရီ တွိုန်။ ပန် တီ အာဘေခါ ဘော ဝီ ဘဲန် ခုန်ဒီခမ်။

26 လွင် ပဲ့ ဟဲ့ ဘူင် အာဘေခါဟီ အီ ညှမ် ဒွိုမ် ကာလာင်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။

27 ခုန်ဒီခမ် အာဇာရီယာ အီ မုး ခုန်ဒီခမ် ခဲင် မိူင် ယူဒါ ဘော အိုပ် မိူင် အာဒါ ဖန် ဂိုဝ် ဒီ အာ ဆီနမ်။ ဒေါ အန် တီ အာဘေခါ အီ မုး ဂွန် အာရေမာလီ ဘော ဝီ ဘဲန် ခုန်ဒီခမ် အီ အိုပ် ဘိုင် မိူင် အီဆာရေလ ဘော ကွယ် ခဲင် မိူင် ဆာမာရီ အာဒါ အာ ဂိုဝ် ဆီနမ်။ 28 အာဘေခါ တွိုန် ယီ ဘူင် ပီ တူ အိုင် ဇဝ်ဖြာ။ အန် တူ ဝဲန် မှာပ် ပီ ဒွိုမ် ဘူင် အာယေရုဝ်ဘုဝ် အီ မုး ဂွန် အာနေဘတ် တွိုန်၊ ဘော ပဲ့ ဟဲ့ ကာဆုး အန် ဒူအီ အီဆာရေလ ဘူင်။

29 ဒေါ မုး စုဝ် ခုန်ဒီခမ် အာဘေခါ တီ၊ ခုန်ဒီခမ် အီ အိုပ် မိူင် အာဆူရာ အီ စိူဝ် အာတီကာလာတ်ဘီလေဆာ ဘော တး ကာဂုဝ်း ရိုပ် မိူင် အီယူန်၊ မိူင် ဘေန်ဘေတ်မာခါ၊ မိူင် ယာနော၊ မိူင် ကေဒေဆ၊ မိူင် ဟာစော၊ မိူင် ဂီလေအာတ် ဘော မိူင် ဂါလီလေ။ အန် ဘော ဒိုဝ်း ဒူအီ ခဲင် မိူင် နာပ်ထာလီ ဘော မိူင်၊ တဲး ဂေ ဟာဝ် ဇမ် ခဲင် မိူင် အာရာမ်။ 30 အာယုဝ်ထာမ် အီ မုး ဂွန် အာအူဇီယာ ဘော ဝီ အိုပ် မိူင် ယူဒါ အာဒါ အာ ဂိုဝ် ဆီနမ်။ ဒေါ အန် တီ အာဟုဝ်ဆေ အီ မုး ဂွန် အာအေလာဟာ ဘော ဝီ ခြာမ် ဒီ ဘ့လွာ့ ဝဲန် ခုန်ဒီခမ် အာဘေခါ အီ မုး ဂွန် အာရေမာလီ။ အန် ဝီ ငဝ်း ယမ် အာဘေခါ၊ တဲး အန် ဝီ ဘဲန် ခုန်ဒီခမ်။

31 လွင် ပဲ့ ဟဲ့ ဘူင် အာဘေခါ အီ ညှမ် ဒွိုမ် ကာလာင် ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။

32 ခုန်ဒီခမ် အာဘေခါ အီ မုး ဂွန် ခုန်ဒီခမ် အာရေမာလီ အီ အိုပ် မိူင် အီဆာရေလ အန် ဘော အိုပ် မိူင် အာဒါ အာ ဆီနမ်။ ဒေါ အန် တီ အာယုဝ်ထာမ် အီ မုး ဂွန် ခုန်ဒီခမ် ယူဒါ အီ စိူဝ် အာအူဇီယာ ဘော ဝီ အိုပ် မိူင် ယူဒါ။

33 ဒေါ ဘဲန် အာယုဝ်ထာမ် ခုန်ဒီခမ်၊ အာဆာက် အန် ဟဲ့ နုဝ့် အာ ဂိုဝ် ဒီ ဖန် ဆီနမ်။ အန် ဘော အိုပ် ဘိုင် မိူင်၊ ကွယ် ခဲင် မိူင် ယေရူဆာလဲမ် အာဒါ ဂိုဝ် ဒီ ဒဝ် ဆီနမ်။ မာ အန် စိူဝ် နာင် ယေရူဆာ အီ မုး ဂွန် အာဇာဒူက်။ 34 အန် ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ အန် ဘူင် ဒူပ် ပီ ပါယ် ဂုန့် အန် အီ စိူဝ် အာအူဇီယာ တွိုန်။ 35 အန် ယီ တူ ပျာတ့် ဝဲန် ဒူင် စာ တွိုန်။ ဂေ ဒူအီ ဆီ ပွိုန် ဒီ လှူ ပီ လှူ ဂေ အီ ဒုဝ့် ဒီ ငဝ် ဘော အီ အုး ငှုန် ဒီ တီ။ အန် ဘော ဘူင် မာလုဝ်း ခဲင် ဟုဝ် ဇဝ်ဖြာ တွိုန်။

36 လွင် ပဲ့ ဟဲ့ ဘူင် အာယုဝ်ထာမ် အီ ညှမ် ဒွိုမ် ကာလာင်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် ယူဒါ။

37 ဒေါ အန် တီ ဇဝ်ဖြာ ဘော စ်ု အာရေဆိန် အီ မုး ခုန်ဒီခမ် အာရာမ် ဘော အာဘေခါ အီ မုး ဂွန် အာရေမာလီ တွိုန်၊ တဲး ဂါယ် ဟာဝ် စုး ဒီ ကာဂုဝ်း ဒီ မိူင် ယူဒါ။

38 အာယုဝ်ထာမ် တွိုန် ဘော ယမ်။ ဂေ ဘော ဟာဝ် ဒိပ် အန် ဒူပ် ဒါ ဒါ အန် ခဲင် မိူင် အာဒါဝိတ် တွိုန်။ ဂွန် အီမာယ် အန် အီ စိူဝ် အာခါတ် ဘော ဝီ ပ့လု အန် ဘဲန် ခုန်ဒီခမ်။