1 အာယေဟုဝ်အာတ် အီ မုး ဂွန် အာယောခတ် ဟဲ့ ဘဲန် ခုန်ဒီခမ် အီ အိုပ် ဒူအီ အီဆာရေလ အာဒါ အာ ဆီနမ်။ ဒေါ အန် တီ အာမာဇီယာ အီ မုး ဂွန် အာယုဝ်အာတ် ဘဲန် ခုန်ဒီခမ် အီ အိုပ် မိူင် ယူဒါ။ 2 ဒေါ ဘဲန် အန် ခုန်ဒီခမ် တီ၊ အာဆာက် အန် ဟဲ့ ပွိုန် အာ ဂိုဝ် ဒီ ဖန် ဆီနမ်။ အန် ဘော အိုပ် မိူင်၊ ကွယ် ခဲင် မိူင် ယေရူဆာလဲမ် အာဒါ အာ ဂိုဝ် ဒီ ဒိမ် ဆီနမ်။ မာ အန် စိူဝ် နာင် ယေဟူအတ် အီ ဟဲ့ ဒွိုမ် ကွယ် ခဲင် မိူင် ယေရူဆာလဲမ် ဆေဆေ။ 3 အာမာဇီယာ တွိုန် ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ မာလဲ၊ န့ ညှမ် ပီ ပီ ဘူင် ဒါ အန် အီ မုး အာဒါဝိတ် တွိုန်။ အန် ဘူင် ခဲ့ ပီ ဘူင် ဂုန့် အန် အီ စိူဝ် အာယုဝ်အာတ် တွိုန်။ 4 အန် တူ ပျာတ့် ဝဲန် ဒူင် စာ၊ တဲး ဒူအီ ဆီ ပွိုန် ဒီ လှူ ဒီ တီ။ န့ မုး ပီ လှူ ဂေ အီ ဒုဝ့် ဒီ ငဝ် ဘော အီ အုး ငှုန်။

5 အန် ဟဲ့ ဟွတ့် ပွိုန် ဒီ အိုပ် ဆီချာ မာန် မိူင် အန်၊ အန် ဘော ဝီ စ်ု ဒူအီ အန် ငဝ်း ယမ် ဂေ ဒူအီ အီ ဟဲ့ ဒွိုမ် ငဝ်း ယမ် ဂုန့် အန် ဒေါ မုး အန် ခုန်ဒီခမ်။ 6 အန် ယီ တူ ငဝ်း ယမ် တူတ့် ဂွန် အီမာယ် ဂေ အီ ဟဲ့ ငဝ်း ယမ် ဂုန့် အန် တွိုန်။ အန် ဘူင် ပါယ် တီ ကူပ် ဒူပ် အန် ပဲ့ ဟဲ့ ဒဲမ် အုန် ခဲင် ဘပ် ဒါရာ အာမုဝ်ဆဲ ပီ တဝ်း ဇဝ်ဖြာ၊ “ဂုန့် တူ ပွိုန် ယမ် ကာဒါင် ဂွန်။ ဂွန် တူ ပွိုန် ယမ် ကာဒါင် ဂုန့်။ ဒွန် အီ လုဝ် ယမ် ကူပ် မှာပ် ပီ ဘူင် အန်။”

7 အာမာဇီယာ ဘော ငဝ်း ယမ် ဒူအီ အေဒူမ် အူ မှိုန့် ဝီ၊ အီ ကွယ် ဒူပ် ဒီလယ့် ဆယ့် တွိုန်။ အန် ဘော ကာဂုဝ်း ပွိုန် မိူင် ဆီလ။ အန် ဘော ဝီ တဲး မိူင် တီ စိူဝ် မိူင် ယူက်ထေလ။ ကော ဇမ် အာတိုဝ် နီ န့ စိူဝ် ပါယ် တီ။

8 ဝါယ် တီ၊ အာမာဇီယာ ဘော ဝီ စ်ု ဒါလာမ် အန် ဟာဝ် ဒီ မိူင် အီဆာရေလ ဒူင် ကွယ် ခုန်ဒီခမ် အာယေဟုဝ်အာတ် အီ မုး ဂွန် အာယောခတ်၊ အီ ဘော မုး လှာန် အာယေဟူ တွိုန်။ အန် ကာလာင် ဒီ ဒါလာမ် တီ တဝ်း၊ “တဲး မဲ ဒဲ့ အန် တး လဲ ဒီ အုဝ်၊ တဲး ယာယ် လာယ် ကာတုန့်၊ တဲး ယာယ် လာယ် ကာဂုဝ်း။”

9 အာယေဟုဝ်အာတ် အီ မုး ခုန်ဒီခမ် ခဲင် မိူင် အီဆာရေလ ပီ ဝီ ကာလာင် တး ဂြုဝ်း ဒီ အာမာဇီယာ အီ မုး ခုန်ဒီခမ် ခဲင် မိူင် ယူဒါ တဝ်း၊ “န့ ဒွိုမ် မိုဝ်း ဟေ မာအာတ့် အီ ကွယ် ဒီ နွန် လေဘာနုန်။ အန် ဟဲ့ စ်ု အီ ဟာဝ် ကာလာင် ဂြုဝ်း ဒီ ဟေ အာရိတ် အီ ကွယ် ဒီ နွန် လေဘာနုန် တဝ်း၊ ‘ဒိုဝ်း ဂွန် အီဘိုန့် မဲ၊ တဲး အန် ဝီ ခတ် ဒိုဝ်း ဂွန် အီမာယ် အုဝ်။’ ဟဲ့ ဟွတ့်၊ မာဒုဝ် ပြဲ အီ ဟာယ် အူ ဒုဝ် ဟဲ့ ညဲတ့် ဟေ မာအာတ့်၊ တဲး အန် ကေး ယမ်။ 10 ဟဲ့ မှာန် မဲ ဟဲ့ ကာဂုဝ်း၊ ဟဲ့ ပဲ ဒူအီ အေဒူမ်။ တဲး မဲ ဘော ပီခိုက် ပီဖုင် ဒုဝ် ဘြိမ် မဲ၊ ယီ ကွယ် ဒူင် ကွယ် မဲ တီ။ မှဝ် မ့ပါယ် ပီ ဆီ ဇမ် မဲ ဒုက် တာင်။း မှဝ် မ့ပါယ် ပီ ဆီ ဘူင် မဲ တဲး ဘော မဲ ဘော ဒူအီ အာယူဒါ ဘော မိူင် စှိုမ် တူတ့်။း”

11 အာမာဇီယာ ယီ တူ ထူမ် ဂြုဝ်း တီ။ ခုဝ်၊ အီ မုး ခုန်ဒီခမ် အီဆာရေလ ဘော ဟာဝ် ဒူင် ကွယ် အာမာဇီယာ၊ တဝ်း ဒီ ကာဂုဝ်း ဒီ အန်။ ဂါယ် ဘော လာယ် ယိုဝ်၊ လာယ် ကာတုန့် ခဲင် ဂ့လင် ဒီ မိူင် ဘေတ်ဆေမေတ် အီ ကွယ် ခဲင် မိူင် ယူဒါ တွိုန်။ 12 ဂေ ဒူအီ အာယူဒါ ဘော စှိုမ် ဒီ ဂေ ဒူအီ အီဆာရေလ၊ ဂေ ဒူအီ အာယူဒါ ဘော ဝီ တဝ် ဝေန့် ဒူင် ကွယ် ဂေ ဒွန် အီ။ 13 အာယေဟုဝ်အာတ် အီ မုး ခုန်ဒီခမ် အီဆာရေလ ဘော ပွိုန် ဒီ မှေတ့် အာမာဇီယာ အီ မုး ခုန်ဒီခမ် ယူဒါ၊ အီ မုး ဂွန် အာယေဟုဝ်အာတ်၊ အီ မုး လှာန် အာဟာဇီယာ။ ဂေ ဘော မှေတ့် အန် ဒေါ ကွယ် အန် ဒီ မိူင် ဘေတ်ဆေမေတ် တွိုန်။ အန် ဘော ဟာဝ် ဒီ မိူင် ယေရူဆာလဲမ်။ ဂေ ဘော ပျာတ့် ဝဲန် ရဲင် မိူင် အာဒါ ဖွုန် မာယဝ်း ကာနိး၊ စုး ဒီ မာလုဝ်း အာအေဖာရိမ် ကော ဇမ် ဒီ မာလုဝ်း အီ ကွယ် ဒီ ကာတုဝ့် မိူင် တွိုန်။ 14 အန် ဘော ဒိုဝ်း ဘော ရွိုန် ခြိဝ် ဂေ ခြိုင် တာ ပီ ယိုဝ် ဂေ ခဲင် ဟုဝ် ဇဝ်ဖြာ ဘော ကြုဝ်ကြာမ် အီ ကွယ် ခဲင် ဟုဝ် ခုန်ဒီခမ်။ အန် ဘော မှေတ့် ဘော ဒူအီ မင် အီ၊ တဲး ဂေ ဒူပ် အန် ဝေန့် ဒီ မိူင် ဆာမာရီ။

15 လွင် ပဲ့ ဟဲ့ ဘူင် အာယေဟုဝ်အာတ် အီ ညှမ် ဒွိုမ် ကာလာင်၊ ဘော လွင် အာဖုင် ဒင်ခုဝ် အန်၊ ဘော လွင် ပဲ့ ဟဲ့ ကာဂုဝ်း အန် ဒီ အာမာဇီယာ အီ မုး ခုန်ဒီခမ် ယူဒါ တွိုန်၊ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။ 16 အာယေဟုဝ်အာတ် ဘော ယမ်၊ ဂေ ဘော ဒိပ် အန် ခဲင် မိူင် ဆာမာရီ ဒူပ် ခုန်ဒီခမ် ဒူအီ အီဆာရေလ တွိုန်။ ဂွန် အီမာယ် အန် အီ စိူဝ် အာယေရုဝ်ဘုဝ် ဘော ဝီ ပ့လု အန်၊ ဝီ ဘဲန် ခုန်ဒီခမ်။^a

17 အာယေဟုဝ်အာတ် အီ မုး ဂွန် အာယောခတ်၊ အီ အိုပ် မိူင် အီဆာရေလ၊ ဝါယ် ဟဲ့ ဟွတ့် ယမ် အန်၊ အာမာဇီယာ အီ မုး ဂွန် အာယုဝ်အာတ်၊ အီ အိုပ် မိူင် ယူဒါ၊ အန် ဝီ ကွယ် ဘော ဂိုဝ် ဒီ ဖန် ဆီနမ်။ 18 လွင် ပဲ့ ဟဲ့ ဘူင် အာမာဇီယာ အီ ညှမ် ဒွိုမ် ကာလာင်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် ယူဒါ။

19 ဂေ အီ ကွယ် ခဲင် မိူင် ယေရူဆာလဲမ်၊ ဂေ ဘော ဝီ ခြာမ် ဒီ ဘ့လွာ့ ဝဲန် အန်။ အန် ဘော တဝ် ဟာဝ် ဒီ မိူင် လာခိတ်။ ဂေ ဘော တိုယ် အီ ဒူပ် အန် ဒီ မိူင် လာခိတ် တီ ဘော ငဝ်း ယမ် အန် ဒီ တီ။ 20 ဂေ ဘော ဒိုဝ်း မင်ပြွင့်၊ ဝီ ဒါင် တး ဒုဝ် အန် ဒီ မိူင် ယေရူဆာလဲမ်။ ဂေ ဘော ဒိပ် အန် ဒူပ် ဒါ ဒါ အန် အီ ကွယ် ခဲင် မိူင် အာဒါဝိတ် တွိုန်။

21 ဂေ ဒူအီ ရဝ် ဒူအီ ကာင် အီ ကွယ် မိူင် ယူဒါ ဘော ဝီ ကာဖြူမ် ဒီ ဒိုဝ်း အာဇာရီယာ တဲး အန် ဝီ ဘဲန် ခုန်ဒီခမ် ဂေ။ အာဆာက် အန် ဂိုဝ် ဒီ ဒဝ် ဆီနမ်။ အန် ဘော ဝီ ပ့လု ဂုန့် အန် အီ စိူဝ် အာမာဇီယာ တွိုန်။ 22 အန် ဘော ဝီ မ့ပြာယ် မိူင် အေလာတ်။ အန် ဘော ဝီ အိုပ် မိူင် ဂေ၊ တဲး ဂေ ဝီ ဟပ် စိုင် ဒီ အန်။ အန် ဘူင် ပါယ် တီ ဝါယ် ဟဲ့ ဟွတ့် ယမ် ဂုန့် အန်။

23 ခုန်ဒီခမ် အာမာဇီယာ အီ မုး ဂွန် အာယေဟုဝ်အာတ်၊ အန် ဝီ အိုပ် မိူင် ယူဒါ အာဒါ ဂိုဝ် ဒီ ဖန် ဆီနမ်။ ဒေါ အန် တီ အာယေရုဝ်ဘုဝ် အီ မုး ဂွန် ခုန်ဒီခမ် ခဲင် မိူင် အီဆာရေလ အီ စိူဝ် အာယုဝ်အာတ်၊ အန် ဘော ဝီ ဘဲန် ခုန်ဒီခမ်၊ ကွယ် ခဲင် မိူင် ဆာမာရီ အာဒါ ဖွုန် ဂိုဝ် ဒီ အူ ဆီနမ်။ 24 အာယေရုဝ်ဘုဝ် တွိုန် ယီ ဘူင် ပီ တူ အိုင် ဇဝ်ဖြာ။ အန် တူ ဝဲန် မှာပ် ပီ ဒွိုမ် ဘူင် အာယေရုဝ်ဘုဝ် အီ မုး ဂွန် အာနေဘတ် ဘော မှာပ် ပီ ကာဆုး အန် ဂေ ဒူအီ အီဆာရေလ ဘူင်၊ ဒူပ် အန်။ 25 အန် ဘော ဝီ ပွိုန် ဝိဝ် မာန် မိူင် အီဆာရေလ၊ စုး ဒီ န့တေန့် အီ ဟာဝ် ဒီ မိူင် လေဘုဝ်ဟာမာတ် ကော ဇမ် အိုမ် ဒိုင် ဆယ့် ဆွင့်။ ပါယ် တီ အန် ဘူင် ခဲ့ ပီ ဒွိုမ် ကာလာင် ဇဝ်ဖြာ ဒီ ဒဲစေန့် အန် အီ စိူဝ် အာယုဝ်နာ အီ မုး ဂွန် အာမိတ်တေ အီ ကွယ် ဒီ မိူင် ဂါထဟေဖာ။

26 ဇဝ်ဖြာ ဟဲ့ ယိုဝ် ဒူအီ အီဆာရေလ ဟဲ့ ဒုက် ကာဆဝ်၊ အာဝ် မိုဝ်း အီ လွတ် ခေါ အူ ဝီ။ ဘော ဂေ အီ မုး မှာယ် ဘော အီ တူ မုး မှာယ်၊ အာဝ် မိုဝ်း အာဆေ အီ ပွိုန် စွယ် ဂေ။ 27 ဇဝ်ဖြာ မိူဝ် တူ တဝ်း၊ အန် ဒီ ဝဲန် ဂေ ဒူအီ အီဆာရေလ။ ခုဝ်၊ အန် စ်ု အာယေရုဝ်ဘုဝ် အီ မုး ဂွန် အာယေဟုဝ်အာတ် တီ၊ တဲး အန် စွယ် ဂေ၊ တဲး ဂေ ဝီ ဒါခိုယ်။

28 လွင် ပဲ့ ဟဲ့ ဘူင် အာယေရုဝ်ဘုဝ် အီ ညှမ် ဒွိုမ် ကာလာင် ဘော လွင် အာဖုင် ဒင်ခုဝ် အန်၊ လွင် ပဲ့ ဟဲ့ ကာဂုဝ်း အန်၊ လွင် ဟဲ့ ဝီ ပွိုန် ဝိဝ် အန် မိူင် ဒါမာခူ ဂါယ် မိူင် ဟာမာတ် ပီ ဒွိုမ် အိုပ် ခုန်ဒီခမ် ယူဒါ အာတ့် နီ၊ န့ ဟဲ့ ဒဲမ် အုန် တူတ့် ဒွန် မျုဝ် ခဲင် ဘပ် ခုန်ဒီခမ် အီဆာရေလ။ 29 အာယေရုဝ်ဘုဝ် ဘော ယမ်၊ ဂေ ဘော ဟာဝ် ဒိပ် အန် ဒူပ် ဒါ ဒါ အန်၊ အီ မုး ခုန်ဒီခမ် အီဆာရေလ တွိုန်။ ဂွန် အီမာယ် အန် အီ စိူဝ် အာဆာခါရာ ဘော ဝီ ပ့လု အန်၊ ဝီ ဘဲန် ခုန်ဒီခမ်။