1 ခုန်ဒီခမ် အာယုဝ်အာတ် အီ မုး ဂွန် အာဟာဇီယာ ဟဲ့ ဘဲန် ခုန်ဒီခမ် ခဲင် မိူင် ယူဒါ အာဒါ အာ ဂိုဝ် ဒီ အူယ် ဆီနမ်။ ဒေါ အန် တီ အာယောခတ် အီ မုး ဂွန် အာယေဟူ ဘော ဝီ ဘဲန် ခုန်ဒီခမ် အီ အိုပ် မိူင် အီဆာရေလ၊ ကွယ် ခဲင် မိူင် ဆာမာရီ အာဒါ ဂိုဝ် ဒီ ဘူ ဆီနမ်။ 2 အာယောခတ် တီ ဘူင် ပီ တူ အိုင် ဇဝ်ဖြာ။ အန် တူ ဝဲန် မှာပ် ပီ ဘူင် အာယေရုဝ်ဘုဝ် အီ မုး ဂွန် အာနေဘတ်၊ အီ ဟဲ့ ကာဆုး ဘော ဂေ ဒူအီ အီဆာရေလ ဘူင် မှာပ်။ 3 ခုဝ်၊ ဇဝ်ဖြာ ဟဲ့ ရူ ဒီ ဂေ ဒူအီ အီဆာရေလ။ အန် တဲး အာဟာစေလ အီ မုး ခုန်ဒီခမ် အီ အိုပ် မိူင် အာရာမ် ဝီ အိုပ် ဘော ဂေ။ ဘော အန် ဘော အာဟာခါတ် အီ မုး ဂွန် အာဟာစေလ တွိုန်၊ ဂါယ် ဘော ပွိုန် ဒီ အိုပ် လှေန့် ဒူအီ အီဆာရေလ။

4 အာယောခတ် ဘော ဆာခိုဝ် ဒီ ဇဝ်ဖြာ။ ဇဝ်ဖြာ ဘော ထူမ် ဂြုဝ်း အန် ကူပ် ဟဲ့ ယိုဝ် ဇဝ်ဖြာ ခဲ့ ခါနှာပ် ခုန်ဒီခမ် အာရာမ် ဒီ ဒူအီ အီဆာရေလ။ 5 ဇဝ်ဖြာ ဘော တဲး န့ မိုဝ်း အီ ချွတ် ဒူအီ အီဆာရေလ၊ ကွဲ့ ဟူ တဲး ဒူအီ အာရာမ် ခါနှာပ် ဂေ။ ဒူအီ အီဆာရေလ၊ ဂေ ဘော ဝီ ပွိုန် ဒီ ကွယ် ဒူင် ကွယ် ဘြိမ် ဂေ ပီ ခါ အာတ့်။ 6 မာလဲ၊ ပီ ဘော ပါယ် တီ မိူဝ်၊ ဂေ ယီ တူ ဝဲန် မှာပ် ပီ ဒွိုမ် ကာဆုး အာယေရုဝ်ဘုဝ် ဂေ ဒူအီ အီဆာရေလ ဘူင်။ ဂေ ဘူင် ဟာဝ် မှာပ် တီ။ ဘော ကန်ထွန် နာင် ကာနမ် အေဆူရာ ဆီ ကွယ် ခဲင် မိူင် ဆာမာရီ။

7 ဘော ဂေ ဒါ ဆိုက် အာယောခတ် တွိုန် အာဝ် ဟူ မိုဝ်း။ န့ ဂိတ် ဒါ ဆိုက် အီ ပဝ့် မင်ပြွင့် မီ ဖန် ဂိုဝ် ဝီ၊ လက်လဝ် ဂိုဝ် လှာင်။ ဂေ ဒါ ဆိုက် အီ ဟာဝ် ဒီ ပ့လဝ် အူ မှိုန့် ဝီ။ ဒဲင် တီ၊ ခုန်ဒီခမ် အာရာမ် ဟဲ့ ငဝ်း ဝဲန် တူတ့်၊ ဘူင် တဲး ဂေ ပီ ကာပုး အီ ကွယ် ဒူင် မး အီ ငှုဝ်။

8 လွင် ပီ ဘူင် အာယောခတ် အီ ညှမ် ဒွိုမ် ကာလာင်၊ ဘော လွင် အာဖုင် ဒင်ခုဝ် အန် န့ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။ 9 အာယောခတ် တွိုန် ဘော ယမ်၊ ဂေ ဘော ဟာဝ် ဒိပ် အန် ဒူပ် ဒါ ဒါ အန် ခဲင် မိူင် ဆာမာရီ တွိုန်။ ဂွန် အီမာယ် အန် အီ စိူဝ် အာယေဟုဝ်အာတ် ဘော ဝီ ပ့လု အန်၊ ဝီ ဘဲန် ခုန်ဒီခမ်။

10 ခုန်ဒီခမ် အာယုဝ်အာတ် အီ မုး ခုန်ဒီခမ် ခဲင် မိူင် ယူဒါ ဘော အိုပ် မိူင် အာဒါ အူယ် ဂိုဝ် ဒီ အူယ် ဆီနမ်။ ဒေါ အန် တီ အာယေဟုဝ်အာတ် အီ မုး ဂွန် အာယောခတ် တွိုန်၊ အန် ဘော ဝီ ဘဲန် ခုန်ဒီခမ် အီ အိုပ် ဘိုင် မိူင် အီဆာရေလ ဘော ကွယ် ခဲင် မိူင် ဆာမာရီ အာဒါ ဂိုဝ် ဒီ ဒဝ် ဆီနမ်။ 11 အာယေဟုဝ်အာတ် တွိုန် ယီ ဘူင် ပီ တူ အိုင် ဇဝ်ဖြာ။ အန် တူ ဝဲန် မှာပ် ပီ ဘူင် အာယေရုဝ်ဘုဝ် အီ မုး ဂွန် အာနေဘတ်။ အန် မိူဝ် တူ ဝဲန် မှာပ် ပီ ကာဆုး အာယေရုဝ်ဘုဝ် ဘော ဂေ ဒူအီ အီဆာရေလ ဘူင် ဒူပ် အန်။

12 လွင် ပီ ဘူင် အာယေဟုဝ်အာတ် အီ ညှမ် ဒွိုမ် ကာလာင် ဘော လွင် အာဖုင် ဒင်ခုဝ် အန် ဘော လွင် ပီ ကာဂုဝ်း အန် ဒီ ဒါ ဆိုက် အာမာဇီယာ အီ မုး ခုန်ဒီခမ် ယူဒါ၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။ 13 အာယေဟုဝ်အာတ် ဘော ယမ်၊ ဂေ ဘော ဒိပ် အန် ဒူပ် ဒါ ဒါ အန် ခဲင် မိူင် ဆာမာရီ။ ဂွန် အီမာယ် အန် အီ စိူဝ် အာယေရုဝ်ဘုဝ် ဘော ဝီ ပ့လု အန် ဘဲန် ခုန်ဒီခမ်။

14 ဒေါ အန် တီ အာအေလီဆာ မိုဝ်း ဆဝ် အီ ဒီ တဲး အန် ယမ်။ အာယေဟုဝ်အာတ် အီ မုး ခုန်ဒီခမ် အီ အိုပ် မိူင် အီဆာရေလ၊ အန် ဘော ဟာဝ် ဒူင် ကွယ် အာအေလီဆာ ဘော ယာမ် ဂိုပ် ကာဘိတ် နာ အန် တဝ်း၊ “အိုယ် ဂုန့် အုဝ်၊ အိုယ် ဂုန့် အုဝ်။ မဲ ဟဲ့ ပီ လက်လဝ် အီဆာရေလ ဘော မင်ပြွင့် အီဆာရေလ။”

15 အာအေလီဆာ ဝီ တဝ်း ဒီ အန်၊ “ဒိုဝ်း တး အ ဂါယ် ဘ့လာ။” အန် ဘော ဒိုဝ်း တး။ 16 အာအေလီဆာ ပီ ဝီ တဝ်း ဒီ အန်၊ “ဝိတ့် အ တီ။” အန် ဘော ဝိတ့်။ အာအေလီဆာ ဘော ဒိုဝ်း ဒဲ အန်၊ ဘ့လေး ဒဲင် ဒဲ ခုန်ဒီခမ် တီ တဝ်း၊ “ဝိုဝ်း ကာဒဝ် ပါတဲင် နာ လေး ဆီငဲ တီ။” 17 အန် ဟဲ့ ဟွတ့် ဝိုဝ်း၊ အာအေလီဆာ ပီ ဝီ တဝ်း ဒီ အန်၊ “ဘန့်။” အန် ဘော ဘန့် အူ ဇေန့်။ အာအေလီဆာ ပီ ဝီ တဝ်း၊ “ဘ့လာ အ နီ၊ န့ မုး ဘ့လာ အ ဇဝ်ဖြာ၊ တဲး မဲ ပဲ ဒူအီ အာရာမ်။ ခုဝ်၊ မဲ ဒီ ကာဂုဝ်း ဒီ ဒူအီ အာရာမ် အီ ကွယ် ဒီ မိူင် အေဖဲက်၊ တဲး ဂေ ကော လိုဝ် စှိုမ် တူတ့်။”

18 အာအေလီဆာ ပီ ဝီ တဝ်း၊ “ဒိုဝ်း တး ဘ့လာ မ့ပွါ။” အန် ဘော ဒိုဝ်း တး။ အန် ပီ ဝီ တဝ်း ဒီ ခုန်ဒီခမ် အီဆာရေလ တီ၊ “ဒိုဝ်း ဘ့လာ နီ၊ မး ဒဲင် ကာဒါယ်။” အန် ဘော မး အူယ် ဇေန့်၊ ဟဲ့ ဟွတ့်၊ အန် ဘော စူ။ 19 ပန် တီ ဒူအီ ပီ တိုယ် ဇဝ်ဖြာ ဘော ရူ ဒီ အန် တဝ်း၊ “မဲ လုဝ် မး ဖန် ဒဝ် ဇေန့်၊ မဲ ဟီ မး ခဲ့ တီ၊ မဲ ဒီ ပွိုန် ဒီ ကာဂုဝ်း ဒီ ဒူအီ အာရာမ်၊ တဲး ဂေ ကော လိုဝ် စှိုမ် တူတ့်။ ဒေါ တီ နီ၊ မဲ ပွိုန် ဒီ ကာဂုဝ်း ဒီ ဒူအီ အာရာမ် မီ အူယ် ဇေန့် ခဲ့ တီ။”

20 ဝါယ် အန် တီ အာအေလီဆာ ဘော ယမ်။ ဂေ ဘော ဟာဝ် ဒိပ် အန်။ ဘော ဝီ ဇမ် ပန် နာ ဒီ တး၊ ဒူအီ မုဝ်အာပ် ဘော တး လိုပ် ခဲင် မိူင် တီ၊ တဝ်း ဒီ ပြာ ကြုဝ် ဘဲန် မျုဝ် ဘဲန် မျုဝ်။ ဒွန် ဆီနမ်၊ ဒွန် ဆီနမ် ဂေ ဒီ နပ် ဘူင် ပါယ် တီ။ 21 ဒေါ အန် တီ န့ မိုဝ်း ဒူအီ အူ ဝီ အီ ဟဲ့ ယမ်။ ဂေ ဘော တဝ်း ဒီ ဟာဝ် ဒိပ် ဒူအီ ယမ် တီ။ ဂေ ဘော ယိုဝ် ဖိုင် ဒူအီ မုဝ်အာပ် တီ ဟဲ့ တး၊ ဂေ ဘော ပီခြန် ဒိုဝ်း ဒူအီ ယမ် တွိုန်၊ ဘ့လေး ခဲင် ကာဒဝ် ဘာရေဝ် အာအေလီဆာ တွိုန်။ ဒူအီ ယမ် တွိုန် ဘော ဒိုဝ် ကာအာင် အာအေလီဆာ တွိုန်၊ အန် ဘော ဝီ ယိတ့် ဝီ အိမ် ဘော ဝီ ယိတ့် စွင့် အူ ဇေန့်။

22 ဒေါ မုး စုဝ် ခုန်ဒီခမ် အာယောခတ် တွိုန်၊ အာဟာစေလ အီ မုး ခုန်ဒီခမ် ခဲင် မိူင် အာရာမ် တွိုန်၊ အန် ခါနှာပ် ကာဆဝ် ဒူအီ အီဆာရေလ ဘော စုဝ် အန်။ 23 ဇဝ်ဖြာ ယီ ကာဝေ ဂေ၊ ဝီ ဂေဇူ ဂေ၊ ယွတ် မဲန် ဂေ။ အန် ဘော လှုဝ်း ကာဒိက် ဆတ်ဇာ ပီ ဒွိုမ် ဒွါ အန် ဒီ အာဘြာဟမ်၊ ဘော အာဆဲက် ဘော အာကူပ် ဂေ တွိုန်။ ခုဝ်၊ အန် တူ တဲး အီ ဘူင် နာ စီစိဝ် ဒီ ဂေ၊ တူ ဘ့လေး တူ ဝဲန် ဂေ ဒေါ မှဝ်။

24 အာဟာစေလ ဘော ယမ်၊ ဂွန် အီမာယ် အန် အီ စိူဝ် အာဘေန်ဟာဒါတ် ဝီ ပ့လု အန်။ 25 ဒေါ မုး စုဝ် အာယေဟုဝ်အာတ်၊ အန် ဝီ ဒိုဝ်း တူတ့် မာန် မိူင် ပဲ့ ဟဲ့ ဒွိုမ် တိုက် ပွိုန် ဒူအီ အာရာမ် ဒီ ဒူအီ အီဆာရေလ။ ဂုန့် အာဘေန်ဟာဒါတ် အီ စိူဝ် အာဟာစေလ ဟဲ့ ဒွိုမ် ဒိုဝ်း မာန် မိူင် ကိူန် ဒီ ဂုန့် အာယေဟုဝ်အာတ် အီ စိူဝ် အာယောခတ်။ န့ မုး မာန် မိူင် တီ ပီ ဝီ ဒိုဝ်း အာယေဟုဝ်အာတ်။ အန် ဘော ကာဂုဝ်း ဒီ အာဘေန်ဟာဒါတ် အာဒါ အူယ် ဇေန့်။ အန် ဘော ပွိုန် ဝိဝ် တူတ့် မာန် မိူင် ဒူအီ အီဆာရေလ။