1 အာယေဟူ တွိုန် ဟဲ့ အိုပ် ဘိုင် မိူင် အီဆာရေလ အာဒါ ဘူ ဆီနမ်၊ အာယုဝ်အာတ် ဝီ အိုပ် ဘိုင် မိူင် ယူဒါ ကွယ် ခဲင် မိူင် ယေရူဆာလဲမ် အာဒါ ဖွုန် ဂိုဝ် ဆီနမ်။ မာ အန် စိူဝ် နာင် ဆီဘီယာ အီ တး မိူင် ဘီရာဆေဘာ။ 2 အာယုဝ်အာတ် တွိုန် ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ အန် ကွယ် ရိုမ် ဒူပ် ဒါ အီ လှူ ဒီ ဇဝ်ဖြာ အီ စိူဝ် အာယေဟောယာဒါ တွိုန်။ အာယေဟောယာဒါ ဘော မာနုဝ် အန်။ 3 မာလဲ၊ အန် ယီ တူ ဒိုဝ်း ဝဲန် ဒူင် စာ အီ မုး ဒူင် လှူ ဂေ ဒီ ဇဝ် ပီ အီ ဟဝ်။ ဂေ ဒူအီ ဆီ လှူ ပီ လှူ ဂေ အီ ဒုဝ့် ဒီ ငဝ် ဘော ပီ လှူ ဂေ အီ အုး ငှုန် ဒီ တီ။

4 အာယုဝ်အာတ် ဘော တဝ်း ဒီ ဂေ ဒူအီ အီ လှူ ဒီ ဇဝ်ဖြာ၊ “အီ မုး ရွိုန် ပီ တး အုန် ဂေ ခဲင် ဟုဝ် ဇဝ်ဖြာ၊ န့ ဘော မုး ရွိုန် စိုင် ပီ လုဝ် ဟပ် ဒွန် အီ ဘော ရွိုန် ပီ ကာဆဲန့် အီ ဒီ ဒွါ ဒီ ဇဝ်ဖြာ ဘော ရွိုန် ပီ လှူ ဂေ အီ မိုဝ်း နဝ်း ဆီ လှူ၊ တဲး ဘေ ဒိုဝ်း တူတ့် ရွိုန် တီ။ 5 တဲး ဘေ ဒွါ ရွိုန် တီ ဒီ ဂေ ဒါ အီ အိုပ် ရွိုန်၊ တဲး ဂေ ဝီ ကာဆာင် ဒီ ဒူအီ အီ လှူ ဒီ ဇဝ်ဖြာ ဒွန် အီ၊ တဲး ဂေ မ့ပြာယ် ဟုဝ် ဇဝ်ဖြာ။ ဒီ မှဝ် ဟဲ့ လိုဝ်၊ ဒီ မှဝ် အီ ဟဲ့ ကာပျာတ့်၊ ဒီ မှဝ် အီ လုဝ် မ့ပြာယ်၊ တဲး ဂေ မ့ပြာယ် တူတ့် ဒွန် မျုဝ်။”

6 အာယုဝ်အာတ် ဟဲ့ ဟွတ့် အိုပ် မိူင် အာဒါ အာ ဂိုဝ် ဒီ အူယ် ဆီနမ်၊ ဂေ ဒူအီ အီ လှူ ဒီ ဇဝ်ဖြာ ယီ ညှမ် ဘူင်၊ ညှမ် မ့ပြာယ် ဟုဝ် ဇဝ်ဖြာ အီ ဟဲ့ လိုဝ် ဟဲ့ ကာပျာတ့် တွိုန်။

7 ပန် တီ ခုန်ဒီခမ် ဘော ဒဲ့ အာယေဟောယာဒါ ဘော ဂေ ဒါ အီ လှူ ဒီ ဇဝ်ဖြာ တဝ်း ဒီ ဂေ၊ “ကူပ် န့ ပါယ် မှဝ် ဘေ တူ မ့ပြာယ် ဟုဝ် ဇဝ်ဖြာ အီ ဟဲ့ လိုဝ်၊ ဟဲ့ ကာပျာတ့်။း ဝါယ် နီ၊ အာဝ် ဟူ လုဝ် ဒိုဝ်း ရွိုန် ဒီ ဂေ အီ အိုပ် ရွိုန်။ လုဝ် အာပ် ဒွါ ဒီ ဂေ ဒါလာက်၊ တဲး ဂေ မ့ပြာယ် ဟုဝ် ဇဝ်ဖြာ။” 8 ပန် တီ ဂေ ဒူအီ အီ လှူ ဒီ ဇဝ်ဖြာ၊ ဂေ ဘော လာယ် ဖြူမ်၊ အာဝ် ဟူ ဂဲပ် ရွိုန် ဒီ ဒူအီ ကိူန်။ ဂေ မိူဝ် အာဝ် ဟူ လုဝ် မ့ပြာယ် ဟုဝ် ဇဝ်ဖြာ ရာင် ဂေ။

9 ဒါ အီ လှူ ဒီ ဇဝ်ဖြာ အီ စိူဝ် အာယေဟောယာဒါ၊ အန် ဘော ဒိုဝ်း ဇီဒိူက် အူ ဘူင့်၊ ဝီ ဘ့လုး တဲး န့ မိုဝ်း ကာဒဝ် ဒီ ဆီဘ့လိုက် အန်၊ ဝီ ဘ့လေး ခူပ် ကာစှူင့် လှူ၊ ဝီ ဘ့လေး ဘ့လာက် အာအး န့တေန့် အီ ဟာဝ် လိုပ် ဒီ ဟုဝ် ဇဝ်ဖြာ တွိုန်။ ဂေ ဒူအီ အီ လှူ ဒီ ဇဝ်ဖြာ ဝီ ဒိုဝ်း တူတ့် ရွိုန် ပီ အုန် ဂေ ခဲင် ဟုဝ် ဇဝ်ဖြာ၊ ဝီ ဟပ် အုန် ဒီ တီ။ 10 ဂေ ဘော ယိုဝ် ရွိုန် ခဲင် ဇီဒိူက် တွိုန် ဟဲ့ ကိူန် ကာဆဝ်၊ ဒါ စာရေ ခုန်ဒီခမ် ဘော ဒါ တာင် လှူ ဒီ ဇဝ်ဖြာ ဂါယ် ဘော တး ဒိုဝ်း ရွိုန် ပဲ့ ဟဲ့ ကာဇု အုန် ဒူအီ ခဲင် ဟုဝ် ဇဝ်ဖြာ တီ။ ဂါယ် ဟဲ့ ဟွတ့် ဝီ တိး၊ ဂါယ် ဝီ အုန် ခဲင် ဟူ။ 11 ဂါယ် ဟဲ့ ဟွတ့် နပ် ခဲ့ မိုဝ်း ရွိုန် တီ၊ ဂါယ် ဝီ အာပ် ဒွါ ဒီ ဂေ ဒါ တာင် အီ အိုပ် ဒူအီ ဘူင် ဂါန်။ ဂေ ဝီ ဒွါ ရွိုန် တီ ဒီ ဂေ အီ ဘဲန် လက်ဆာမာ၊ အီ မ့ပြာယ် ဟုဝ် ဇဝ်ဖြာ။ 12 ဂေ ဘော ဒွါ ရွိုန် ဒီ ဂေ အီ ဂုဝ် မာဝ် အီ ဘ့လုဝ်း မာဝ်။ ဂေ ဒါ တာင် တွိုန် ဘော စိုဝ်း ဟေ ဘော မာဝ် အီ ဟဲ့ ဟွတ့် ဒဝ်း ဘော စိုဝ်း ပီ ဒီ လုဝ် ဂေ ဒွန် မျုဝ် တဲး ဂေ ပွိုန် ဒီ မ့ပြာယ် ဟုဝ် ဇဝ်ဖြာ တွိုန်။

13 ဂေ ယီ တူ ဒိုဝ်း ရွိုန် ပီ တး လှူ အီ ခဲင် ဟုဝ် ဇဝ်ဖြာ တွိုန်၊ ဘူင် အီ မုး ကွက့် ရွိုန်၊ န့ကျီပ်၊ ဆီလယ့်၊ ဝဝ် ဂေ ခြိုင် ခြိဝ်၊ ခြိုင် ရွိုန် ပီ တာ ဂေ ခဲင် ဟုဝ် ဇဝ်ဖြာ။ 14 ရွိုန် တီ၊ ဂေ ဒွါ မီ ဒီ ဂေ အီ ဘူင် ဂါန် ခဲင် ဟုဝ် ဇဝ်ဖြာ။ 15 ဂေ မိူဝ် တူ မှာန့် ဒီ ယွတ် ဇာရာင် ဒီ ဂေ အီ ဒွါ ရွိုန် ဒီ ဒူအီ အီ ဘူင် ဂါန်။ ခုဝ်၊ ဂေ အီ ဒွါ ရွိုန် ဂေ ဘူင် ဆီချာ။ နဝ်း ဂေ မိူဝ် ဆိူဝ်။ 16 ရွိုန် ပီ ဒွါ ဂေ အီ ဒွိုမ် ဘူင် မိူက် ဘူင် မှာပ်၊ ဂေ တူ တဲး န့ တး လိုပ် ခဲင် ဟုဝ် ဇဝ်ဖြာ တီ။ န့ ဝီ ဘဲန် ရွိုန် ပီ တာ ဂေ ဒါ အီ လှူ ဒီ ဇဝ်ဖြာ။

17 ဒေါ ဘူင် ဂေ ဂါန် တီ န့ ဝီ မုး အာဟာစေလ အီ အိုပ် မိူင် အာရာမ်၊ အန် ဝီ တဲး ဒါ ဆိုက် အန် ဟာဝ် ကာဂုဝ်း ဒီ ဂေ အီ ကွယ် ခဲင် မိူင် ဂါထ။ အန် ဘော ပွိုန် မိူင် တီ၊ အန် ပီ ဝီ တဝ်း ဒီ ဟာဝ် ကာဂုဝ်း ဘော ဒီ မိူင် ယေရူဆာလဲမ်။

18 အာယုဝ်အာတ် အီ မုး ခုန်ဒီခမ် ခဲင် မိူင် ယူဒါ၊ အန် ဘော ဒိုဝ်း တူတ့် ဒွန် မျုဝ် ခြိုင် တာ အီ ဘွတ် အီ ဆီချာ၊ ဒွါ ဒီ ခုန်ဒီခမ် အာဟာစေလ။ အီ မုး ကြုဝ် ပီ ဒွိုမ် လှူ ဒါ အန် အီ စိူဝ် အာယောဆာဖာတ်၊ အာယေဟုဝ်ရမ် ဘော အာဟာဇီယာ၊ ဂေ အီ ဒွိုမ် မုး ခုန်ဒီခမ် အီ အိုပ် မိူင် ယူဒါ၊ ဘော မုး ခြိဝ် အီ ကွယ် ခဲင် ဟုဝ် ဇဝ်ဖြာ၊ ဘော မုး ကြုဝ် ဒွန် မျုဝ် ပီ ဒွိုမ် လှူ အန်၊ အန် ဝီ ဒိုဝ်း တူတ့် ဒွန် မျုဝ်၊ ဝီ တိုယ် ဟာဝ် ဒီ အာဟာစေလ အီ မုး ခုန်ဒီခမ် အီ အိုပ် မိူင် အာရာမ် တွိုန်။ ဝါယ် အန် တီ အာဟာစေလ ဘော ဝီ လေး ဒီ မိူင် ယေရူဆာလဲမ်။

19 လွင် ပဲ့ ဟဲ့ ဘူင် အာယုဝ်အာတ် ဒွန် မျုဝ် ဟဲ့ ဒဲမ် အုန် ခဲင် ဘပ် ခုန်ဒီခမ် ယူဒါ။ 20 န့ ယီ မိုဝ်း အာမာတ် အန်၊ ဂေ ဘော ဝီ ခြာမ် ဒီ ဘ့လွာ့ ဝဲန် အန်။ ဂေ ဘော ငဝ်း ယမ် အန် ဒီ ရဲင် မိူင် အာဒါဝိတ် ခူပ် န့တေန့် အီ လူင် ဒီ ဒူင် စိူဝ် ဆီလ တွိုန်။ 21 န့ မုး အာယောစာဘာတ် အီ မုး ဂွန် အာဆီမာတ် ဘော အာယေဟုဝ်ဇာဘာတ် အီ မုး ဂွန် အာဆုဝ်မေရာ၊ ဂါယ် မုး အာမူ အာမာတ် အာယုဝ်အာတ် တွိုန်။ ဂါယ် ဟဲ့ ငဝ်း ယမ် အန်။ ဂေ ဘော ဟာဝ် ဒိပ် အန် ဒူပ် ဒါ ဒါ အန် ခဲင် မိူင် အာဒါဝိတ် တွိုန်။ ဂွန် အီမာယ် အန် အီ စိူဝ် အာမာဇီယာ ဘော ဝီ ဘဲန် ခုန်ဒီခမ် အီ ပ့လု အန်။