ခုဝ် အန် တီ ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ တွိုန် ဝီ ကာဂုဝ်း ဒီ ဒူအီ အာယူဒါ။ ဒေါ ဘဲန် အန် ခုန်ဒီခမ် အာဒါ ဒိမ် ဆီနမ်၊ ဒေါ ဇမ် မာဂျီန် ဂိုဝ်၊ ဝီ ဇမ် မာဂျီန် ကာမာယ် ဂိုဝ် ဆီငဲ ဘော အန် ဘော ဒါ ဆိုက် အန် ဘောကာဂ့လျီတ် ဟဲ့ ဟာဝ် ရူပ် မိူင် ယေရူဆာလဲမ်။ 2 ဂေ ဘော ဘ်ု ရူပ် မိူင်၊ ကော ဇမ် အာခြာဝ် ဒေါ ဘဲန် အာဇေဒေကီ ခုန်ဒီခမ် အာဒါ ဂိုဝ် ဒီ အူ ဆီနမ်။ 3 ဆီနမ် အန် တီ၊ ဒေါ မုး မာဂျီန် မ့ဖွုန်၊ ဘော မုး မာဂျီန် ကာမာယ် ဆီငဲ န့ဒိမ်၊ ဂေ ဒူအီ အီ ကွယ် ခဲင် မိူင် အာဝ် ဟူ မိုဝ်း ပီ ဒီ ဟူမ် မာဆေ။ 4 ပန် တီ ဂေ ဒူအီ ခဲင် မိူင် ဘော ဒါ ဆိုက် ဂေ၊ ဂေ ဘော ဘ့လုး ရဲင် မိူင် တွိုန်၊ တဲး ဂေ ပွိုန် ဒီ လေး တဝ်။ ဂေ ဘော လေး တဝ် ဒီ ခူပ် မာလုဝ်း ရဲင် မိူင် အီ မိုဝ်း အာ ထာပ်၊ အီ ကွယ် ကာတတ် ကာပိုမ် ခုန်ဒီခမ်။ ဂေ ဒူအီ ဘာဘဲ ပီ ဘော ဟဲ့ ဘ်ု မိူဝ်၊ ဂေ ဒူအီ ခဲင် မိူင် ယေရူဆာလဲမ် ယီ လေး တဝ်။ ဘော ခုန်ဒီခမ် ဘော ဂေ ဒူအီ ဘောကာဂ့လျီတ် ဘော လေး တဝ် ဟာဝ် ခဲင် ဂ့လင် အာရာဖ။ 5 ဂေ ဒါ ဆိုက် ဘာဘဲ ဘော ခုင်ခြး ဒူပ် ဂေ။ ဂေ ဘော ခြပ် ဂေ အီ ဟဲ့ တဝ် ခဲင် ဂ့လင် ခူပ် မိူင် ယေရီခုဝ်။ ဂေ ဒါ ဆိုက် ဒွန် အီ ဘော တဝ် ကာယဝ်း၊ အာဝ် ဟူ မိုဝ်း အာဆေ ကွယ် ဒူပ် ခုန်ဒီခမ် အာဇေဒေကီ။ 6 ဂေ ဘော မှေတ့် ခုန်ဒီခမ် အာဇေဒေကီ၊ ဝီ တိုယ် ဟာဝ် အန် ဒီ ခုန်ဒီခမ် ဘာဘဲ အီ ကွယ် ဒီ မိူင် ရီဘာလာ။ ဂေ ဘော ဆုင်ဖျာတ် အာမူ အန် ဒီ တီ။ 7 ဂေ ဘော မှေတ့် ငဝ်း ဘော ဂွန် အန် ဒီ အာတ့် အန် တီ။ ဂေ ဘော ဂွဲ့ လေး ငါယ် အာဇေဒေကီ ဘော ပက် အန် တာ ဝန် ဟိန်၊ တိုယ် ဟာဝ် အန် ဒီ မိူင် ဘာဘဲ။

8 ခုန်ဒီခမ် အာနေဘူခတ်နေစာ ဟဲ့ အိုပ် မိူင် ဘာဘဲ အာဒါ ဂိုဝ် ဒီ ဒိမ် ဆီနမ်၊ ဒေါ ဇမ် မာဂျီန် န့ ဖန်၊ ဘော မုး မာဂျီန် ကာမာယ်၊ ဆီငဲ မ့ဘူ၊ အာနေဘူဆာရဒါန် အီ မုး ဒါ ဘုဝ် အီ အိုပ် ဒါ ဆိုက် ခုန်ဒီခမ် မိူင် ဘာဘဲ တွိုန်၊ အန် တး ဇမ် ဒီ မိူင် ယေရူဆာလဲမ်။ 9 အန် ဘော ဒိုဝ်း ငဝ် ဒုဝ့် ဟုဝ် ဇဝ်ဖြာ၊ ဘော ဒုဝ့် ဘော ဟုဝ် ခုန်ဒီခမ် ဘော ကာင် ဂေ အီ ကွယ် ခဲင် မိူင် ယေရူဆာလဲမ် ဘော မိူင်။ န့ ဘော မုး ကာင် စှိတ် ကာင် တာင် အန် ဒုဝ့်၊ တဲး ငဝ် ကာဆိုမ် တူတ့်။ 10 ဒါ ဆိုက် ဒူအီ ဘာဘဲ အီ ဒူပ် ဒါ ဘုဝ် အာနေဘူဆာရဒါန်၊ ဂေ ဘော ပျာတ့် ဝဲန် ရဲင် မိူင် ယေရူဆာလဲမ်။ 11 ပန် တီ အာနေဘူဆာရဒါန် ဘော မှေတ့် ဒူအီ အီ ဆီ ဂိတ် ကွယ် ခဲင် မိူင် ယေရူဆာလဲမ် ဘော ဂေ အီ ဆီ ကွယ် ခဲင် မာန် ခဲင် မိူင် ဘော ဂေ အီ ဟဲ့ ဒွိုမ် တဝ် ဒီ ခုန်ဒီခမ် ဘာဘဲ။ အန် ဘော မှေတ့် တူတ့် ဂေ၊ တဲး ဂေ ဒူပ် အန်။ 12 အန် ဘော အုန် ဒူအီ မင် အီ အီ မုး ဒူအီ ဂိန်၊ ဒူအီ ဖ့လာန်၊ တဲး ဂေ ဘ်ု ဒီ လိုမ်လာ မာန် မာငုန် ဘော ရန့် မာန်၊ ရန့် ဒူင် နာ ခဲင် မိူင် ယူဒါ။

13 ဂေ ဒူအီ ဘာဘဲ ဘော ဒိုဝ်း ရွင့် ဘွင့် ဘော ကာစှူင့် ဘော အိုမ် ဒိုင် ဘွင့် ပီ အုန် ဂေ ခဲင် ဟုဝ် ဇဝ်ဖြာ တွိုန်။ ဂေ ဘော ဝီ ဒိုဝ်း ဟာဝ် တူတ့် ဒီ မိူင် ဘာဘဲ။ 14 ဒွန် မျုဝ် ကြုဝ် အီ မုး ဘွင့်၊ န့ကျီပ် ဂေ အာဇုဝ် ဘော မ့ပါန်၊ ခဲ့ ကွယ် ခြိုင် တာ ဇိုဝ် တီ၊ ဂေ ဒိုဝ်း ဟာဝ် တူတ့် ဒွန် မျုဝ်။ 15 ဘော ဖာန် ဘော ဆီလယ့် ဒွန် မျုဝ် ပီ ဘူင် ဂေ တာ ခြိဝ် ဂေ ရွိုန်၊ ဒါ ဘုဝ် တွိုန် ဒိုဝ်း ဟာဝ် တူတ့်။

16 ပီ ဘူင် အာဆာလုဝ်မုဝ် ခဲင် ဟုဝ် ဇဝ်ဖြာ၊ အီ မုး ရွင့် ဘွင့် အာ ညွင့် ဘော အိုမ် ဒိုင်၊ ကာစှူင့် ပီ ဘ့လေး ဂေ မ့ပါန် အိုမ် ပဲ့ ဟဲ့ ဒိုဝ်း ဟာဝ် ဂေ၊ န့ ဟဲ့ ကိူန် ကာဆဝ်၊ အာဝ် ဟူ နပ် ဒီ ဆ၊ အာဝ် ဟူ နပ် ခဲ့ ဘော စန်။ 17 ရွင့် အာ ညွင့် တွိုန် ဟဲ့ စာ ဂိုဝ် ဒီ ဒါ ကာနိး။ ဂိန့် ရွင့် ဒွန် ညွင့် ပီ ဝီ စာ အူယ် ကာနိး။ အီ ကွယ် ရူပ် ဒီ ဂိန့် ရွင့် တွိုန် ဘော ကာဘဲး၊ ဘော ရာင် ဘ့လေ မာစက် ဘော အာ ညွင့်၊ န့ မုး တူတ့် ဘွင့် ဒီလူယ်။

18 ဒါ ဘုဝ် တွိုန် ဘော မှေတ့် ဟာဝ် ဒါ တာင် အီ လှူ ဒီ ဇဝ်ဖြာ အီ စိူဝ် အာဆေရာယာ ဘော အာစေဖာနီ အီ ကွယ် ခြိုမ် အာဆေရာယာ၊ ဘော ဒါ အီ ဘ်ု မာလုဝ်း အူယ် ဝီ။ 19 ဒဲင် တီ၊ အန် ဘော မှေတ့် ဘော ဒါ ဘုဝ် အူ ဝီ အီ အိုပ် ဒါ ဆိုက်၊ ဘော အာမူ အာမာတ် ခုန်ဒီခမ် ဖန် ဝီ အီ ဆီ ဂိတ် ခဲင် မိူင် တီ။ အန် မှေတ့် ဘော ဒါ စာရေ တာင် အူ ဝီ အီ အိုပ် ဂေ အီ ဒဲမ် ဇာရာင် ဒါ ဆိုက် ခဲင် မိူင်၊ ဘော ဒူအီ ပီ ကာတုန့် အန် ခဲင် မိူင် တီ ဒဝ် ဂိုဝ် ဝီ။ 20 အာနေဘူဆာရဒါန် အီ မုး ဒါ ဘုဝ် တာင် တွိုန်၊ အန် ဘော ဒိုဝ်း ဟာဝ် ဒူအီ ဂေ တီ၊ တိုယ် ဒီ ခုန်ဒီခမ် အီ အိုပ် မိူင် ဘာဘဲ၊ အီ ကွယ် ခဲင် မိူင် ရီဘာလာ။

21 ခုန်ဒီခမ် အီ အိုပ် မိူင် ဘာဘဲ တီ၊ အန် ဘော ငဝ်း ယမ် ဂေ ဒီ မိူင် ရီဘာလာ အီ ကွယ် ခဲင် ကာဒါယ် မိူင် ဟာမာတ် တွိုန်။ ပါယ် တီ ဂေ ဒူအီ အာယူဒါ ဘော ကာဒုး ဒီ လေး ခဲင် မိူင် ဂေ၊ ဝီ ဟာဝ် ဘဲန် မှာယ် ခဲင် မိူင် အီ ဟဝ်။

22 န့ ဘော မိုဝ်း အာကေတာလီ အီ မုး ဂွန် အာဟီကမ်၊ အီ ဘော မုး လှာန် အာဆာဖာန်။ ခုန်ဒီခမ် ဘော တဲး အာကေတာလီ တီ ဝီ ဘဲန် ဒါ တာင် အီ အိုပ် ဂေ ဒူအီ အာယူဒါ အီ ဆီ ဂိတ် ခဲင် မိူင်။ န့ မုး ဂေ ဒူအီ ပီ တူ ဒိုဝ်း ဟာဝ် အာနေဘူခတ်နေစာ အီ မုး ခုန်ဒီခမ် ခဲင် မိူင် ဘာဘဲ တွိုန်။ 23 ဝါယ် တီ ဂေ ဒါ အီ ယဲတ့် ဒါ ဆိုက် အီ ကွယ် ခဲင် မိူင် ယူဒါ ပီ ညှမ် မှေတ့် ဟာဝ် ဂေ၊ ဂေ ဘော နပ် လွင် ခုန်ဒီခမ် မိူင် ဘာဘဲ ဟဲ့ တဲး အာကေတာလီ ဘဲန် ဒါ ကာညာ အီ အိုပ် မိူင် ဂေ၊ ဂေ ဘော ဟာဝ် ဒူင် ကွယ် အန်။ န့ မုး ဂွန် အာနေထာနီ အီ စိူဝ် အာဆာမာန် ဘော အာယောဟာနန် အီ မုး ဂွန် အာကာရေအာ ဘော အာဆေရာယာ အီ မုး ဂွန် အာတာနူမိတ်၊ အီ မုး ဒူအီ အာမျုဝ် အာနေတောဖာ ဘော အာယေစာနီ အီ မုး ဒူအီ အာမျုဝ် မာခါထိတ်။ ဂေ ဒူအီ တီ ဘော ဒါ ဆိုက် အီ ဒူပ် ဂေ၊ ဂေ ဘော တး ဒူင် ကွယ် အာကေတာလီ ခဲင် မိူင် မီဇာဖာ တွိုန်။ 24 ပန် တီ အာကေတာလီ ဘော ကာဆဲန့် ဒိူင် ဒီ ဂေ ဒူအီ တွိုန်။ တဝ်း၊ “ဘေ ကွဲ့ ယုဝ် ဒါ တာင် အီ တး ခဲင် မိူင် ဘာဘဲ တွိုန်။ ဆေ ဘေ ဘူင် ဒူပ် ပီ တဝ်း ခုန်ဒီခမ် မိူင် ဘာဘဲ၊ ဘေ ဒီ ပွိုန် ဒီ ကွယ် ဒါခိုယ်။”

25 မာလဲ၊ န့ မုး အာဆာမာန် တွိုန်၊ အီ မုး ဂွန် အာနေထာနီ ဘော လှာန် အာအေလီဆာမာ၊ အီ မုး ခြိုဝ် ခုန်ဒီခမ်။ ဒေါ ဇမ် မာဂျီန် န့ ဘူ ဘော အန် ဘော ဒူအီ အန် ဂိုဝ် ဝီ၊ ဂေ ဟာဝ် ငဝ်း အာကေတာလီ ဘော ဒူအီ အာယူဒါ ဘော ဒူအီ အီ တး မိူင် ဘာဘဲ၊ အီ ဟဲ့ ကွယ် ရိုမ် ဒူပ် အာကေတာလီ ဒီ မိူင် မီဇာဖာ တွိုန်။ 26 ပန် တီ ဒူအီ ခဲင် မိူင် တွိုန် ဘော တျီ့ ဘော တာင် ဘော ဒါ ဘုဝ် ဂေ၊ ဂေ ဘောကာဂ့လျီတ် ဘော လေး တဝ်၊ ဝီ ဟာဝ် ကွယ် ခဲင် မိူင် အဲဂိုပ် ကူပ် ယုဝ် ဂေ ဒူအီ ဘာဘဲ တွိုန်။

27 ခုန်ဒီခမ် ယူဒါ အီ စိူဝ် အာယေခေါနီ ဟဲ့ ကွယ် ခဲင် ကာပိုမ် အာဒါ အူယ် ဂိုဝ် ဒီ ဘူ ဆီနမ်။ ဒေါ ဇမ် မာဂျီန် ဂိုဝ် ဒီ ဟာအာ၊ ဘော မုး မာဂျီန် လူင် ဂိုဝ် ဒီ အာ ဆီငဲ၊ အာအေဝီလမာရော အီ ဘဲန် ခုန်ဒီခမ် အီ အိုပ် မိူင် ဘာဘဲ တွိုန်၊ အန် ဘော ဘ့လေး လေး အာယေခေါနီ၊ တဲး အန် ပွိုန် ဒီ ကွယ် ဒါခိုယ်။ 28 ခုန်ဒီခမ် အာအေဝီလမာရော ဘော ကာလာင် ဂြုဝ်း ဒါခိုယ် ဒီ အန်၊ ဘော တဲး အီ ရုဝ်ဆေ အန် လွှိုမ် အီ မုး ခုန်ဒီခမ် ကာဒင် ဟဝ် အီ ကွယ် ဒူပ် အန် ခဲင် မိူင် ဘာဘဲ တွိုန်။ 29 ပါယ် တီ အာယေခေါနီ ဘော ကာပ့လု ဝဲန် ခြိုင် ပီ တာ အန် ခဲင် ကာပိုမ် တွိုန် ဘော ဝီ ပွိုန် ဒီ ဟူမ် ရိုမ် ဒူပ် ခုန်ဒီခမ် အီ အိုပ် မိူင် ဘာဘဲ ဘော စုဝ် အန်။ 30 ဒွန် ဆီငဲ ဒွန် ဆီငဲ၊ ခုန်ဒီခမ် ဒွါ ပီ ဒီ ဟူမ် ပီ ဒီ တာ ဒီ အာယေခေါနီ ခဲ့ ပီ လုဝ် အန်၊ ကော ဇမ် ယမ် အန်။